Panangtabbaaw ti Nagan ti Dios—Babaen ti Di Panangusar iti Dayta
NI Jehova siaasi a nakilangen kadagiti tattao iti Israel maigapu iti naganna a mismo, tapno dayta saan koma a matabbaawan kadagiti nasnasion. (Ezequiel 20:9, 13, 14, 22) Kabayatanna, nupay kasta, dagiti Israelitas saandan nga inus-usar ti nagan ti Dios, ta kamaudiananna napukawen ti panangbalikasda iti dayta. Daytoy a di panangusar iti nagan ti Dios kaiyariganna ti panangtabbaaw iti dayta.
Maipapan iti daytoy, ni R. Laird Harris nagkomento: “Nakaskasdaaw unay a kinapudno a ti kadaanan a panangbalikas iti nagan ti Dios iti Israel ti naan-anay a napukaw. Ti pammati ti Israel isu laeng ti kakaisuna a napateg a pammati idi ugma. Dayta ti immuna a pammati iti lubong a mamati iti maymaysa a Dios ket isu ti kakaisuna a pammati idi ugma a pudpudno a nagbalin a sangalubongan a relihion. Dayta ti naisangsangayan gapu ta naan-anay a naespirituan ken awanan ti namaterialan a representasion iti dios. Naisangsangayan met dayta, ngem daksanggasat, gapu iti pannakapukaw iti panangbalikas iti nagan ti Dios. Pudno a nakaskasdaaw ti kasasaad ket narigat nga ipadto dagidiay napasnek a lallaki a makarikna a saanda a baliksen ti sagrado unay a nagan di la ket ta matabbaawanda dayta. Ti nagbanaganna ti kasla pudno a naiduma a kita ti panangtabbaaw. Ti saan a panangusar iti nagan ti Dios ket kasla panangtabbaaw iti dayta a kas maaramidan ti di umiso a panangusar iti Nagan. Ngem nalawag dagiti kinapudno. Dagiti Hebreo idi ugma, gagangay, a baliksenda ken isuratda ti nagan ti Dios.”—The Law and the Prophets, nga insurat ni John H. Skilton, Nutley, New Jersey, 1974, panid 215.
Ammo dagiti Israelitas a no malipatanda ti nagan ni Jehova, ti Dios a mismo ‘sukimatennanto daytoy.’ (Salmo 44:20, 21) Kalpasanna, idi napasamak daytoy, “inturongna ti atensionna kadagiti nasnasion tapno mangala kadakuada ti tattao a maipaay iti naganna.” (Aramid 15:14) Nupay datay itatta ditay ammo ti pudpudno a pannakabalikas ti nasantuan a nagan iti Hebreo, ti nagsayaat ken umiso a pannakaipatarus ti Tetragrammaton (dagiti uppat a Hebreo a konsonantes a mangirepresenter iti nagan) iti Ingles ket Jehovah. Itatta, nasurok a tallo a milion a tattao ti maaw-awagan kas Saksi ni Jehova, ket maragsakanda a mangawit iti nagan ti Diosda ken ti mailasin iti dayta.