“Naemma” wenno “Ubbing”—Ania Kadagitoy?
ITI 1 Tesalonica 2:7 dineskribir ni apostol Pablo ti bagina met laeng ken ti kakaduana a nagbalin a ‘naemma iti tengngayo, a kas iti ina nga agtagibi dongdongoenna dagiti annakna met laeng.’ Sumagmamano a patarus (The Bible in Basic English; Today’s English Version) mabasa ditoy a “naemma,” ngem dadduma a patarus (Westminster Version; American Translation) ti mangusar iti sao nga “ubbing” wenno “annak.” Apay adda daytoy a panagduduma?
Dagiti patarus surotenda ti maysa kadagiti dua a nagduma a patarus a masarakan kadagiti teksto a Griego ken manuskrito. Dadduma a Griego a teksto (Textus Receptus, Tischendorf, Merk) ken dagiti manuskrito ket mabasa ti eʹpi·oi, a kaipapananna “naemma,” ngem dagiti dadduma a teksto a Griego (Westcott and Hort, Nestle-Aland) ken dagiti manuskrito ti mabasa a neʹpi·oi, a kaipapananna “ubbing.”
No maipapan iti daytoy, ti The New International Dictionary of New Testament Theology (Tomo I, 1975, panid 282) ti nagkomento: “Addada dua a pakabasaan iti 1 Tesalonica 2:7: (a) ēpioi (naemmakami iti tengngayo); (b) nēpioi (ubbing). Ti immun-una a sao [iti daytoy a bersikulo] agngudo iti n, ket mabalin a daytoy nga n ti biddut a nadoble iti panagkopia. Nupay kasta ti panangipatarus iti maikadua a panangbasa mangiturong iti rigat. Ta iti v. 7b saan nga isu a mismo dayta no di dagiti taga Tesalonica nga impadis ni Pablo kadagiti ‘ubbing’; isu ken dagiti kakaduana ti kakasla nars (trophos).” Ngarud, umiso nga adu a patarus ti mabasa ditoy a “naemma” imbes nga “ubbing.”
Ngem apay nga inusar ni Pablo ti sao a “naemma” ditoy? Daytoy ket gapu iti pudno nga ayat ken pannakaseknan a saan a mangdangran iti naespirituan nga irarang-ay dagidiay nga insurona ken dagidiay insuro dagiti padana a misionero. (1 Tesalonica 2:8) Ti (An Expository Dictionary of New Testament Words, ni W. E. Vine, 1962 reprint, Tomo II, panid 145) kunaenna a ti eʹpi·oi “ti masansan nga us-usaren dagiti Griego a mannurat a mangiladladawan iti maysa a nars a kadua dagiti narigat nga aywanan nga ubbing wenno iti maysa a maestra a kadua dagiti eskolar a nasukir, wenno dagiti nagannak a kadua dagiti annakda. Idiay 1 Tesalonica 2:7, ti Apostol inusarna dayta iti kababalinna a mismo ken kadagiti padana a misionero iti pannakilangenna kadagiti nakumberte idiay Tesalonica.” No mangisurotayo iti Sao ti Dios kadagiti tattao, sapay koma ta kanayon a panunotentayo ti kinaemma nga impakita ni Pablo ken dagiti kakaduana ket tuladentayo ti ulidanda.