Ti Espiritu ti Panagpayunir Pinadarasna ti Panagani Sadi Filipinas
NO ADDAKAY koma idi idiay Manila idi 1935 ket kayatyo ti makipagkita kadagiti Saksi ni Jehova, kasapulan a birukenyo ti bassit nga apartment idiay 1134 Avenida Rizal. Sadiay, agarup 20 a tattao ti regular nga agtataripnong nga agadal iti Biblia. Dayta nga apartment isu idi ti umuna a sanga nga opisina iti Watch Tower Society idiay Filipinas.
Itatta, iti Manila ken kadagiti kabangibangna, addada 103 a kongregasion dagiti Saksi ni Jehova nga addaan nasurok a 9,000 a manangiwaragawag ti Pagarian! Kasta met, 50 a tawtawen ti napalabasen awan ti uray maysa a Saksi idiay siudad ti Davao, idiay adayo nga abagatan a paset ti Filipinas. Itan adda nasurok ngem 2,800 kadakuada kadagiti 41 a kongregasion iti dayta a siudad.
Ti idudur-as kadagitoy dua a kangrunaan a siudad ket paset iti pammaneknek a dagidiay immuna a Saksi nagbiagda a maitunos iti naganda. (Isaias 43:10-12) Indanonda ti trabahoda a panangasaba ken panangisuro kadagiti isuamin a paset ti Filipinas. Babaen iti panangsukimat iti naipakuyog a tsart, makitayo ti bunga ti Kristiano a panangaramid-adalan bayat ti napalabas a kagudua a siglo. Aniat’ nangpapardas iti panagsaknap ti tay-ak iti Filipinas?
Ti Espiritu ti Panagpayunir Nakatulong iti Panagdakkel
No saan koma a gapu iti naregta nga espiritu ti panagpayunir iti biang dagiti immuna a Saksi a Filipino, imposible koma ti panangdanon kadagiti ginasgasut a mapagnanaedan a purpuro babaen iti naimbag a damag. Dayta nga espiritu ti sibibiag pay unay ita. Kas pangarigan, ti report maipaay iti Pebrero 1986 ipakitana a, mainayon kadagiti 758 nga espesial a payunir, addada 9,090 a regular a payunir a ministro nga agserserbi iti intero a Filipinas. Daytoy ti nasursurok ngem doble iti bilang dagiti nagreport dua laeng a tawen iti napalabas! Idi Abril 1985, 26,630—kakatlo kadagiti isuamin a Saksi iti pagilian—ti makiramraman iti maysa a porma iti trabaho a panangasaba iti amin-tiempo.
Wen, marikrikna ti ili ni Jehova ditoy Filipinas ti kinaganat dagiti panawen. Daytoy ti nangtignay kadakuada a mangbusbos iti ad-adu a tiempo aginggat’ mabalin iti panangikasaba ken panangisuro iti Sao ti Dios kadagiti kaarrubada. Awan duadua, interesadokayo a mangammo no kasano a dadduma kadakuada naiyurnosda dagiti kabibiagda tapno makastrekda iti amin-tiempo a serbisio ken kayatyo met a maammuan dagiti nagsasayaat a kapadasan a tagtagiragsakenda.
Ti Panagaramid kadagiti Panagbalbaliw Tapno Makapagpayunir
Ni Felipe Ventura iti Binalonan, Pangasinan, binusbosna ti 13 a tawtawen iti kinaagtutubona iti amin-tiempo a serbisio sakbay ti panagpamiliana. Bayat a dimmakkel ti pamiliana, tinarigagayanna ti agsubli iti trabaho a kinapayunir, ngem ti diabetes ti nangbulsek iti maysa a matana. Kalpasanna agarup uppat a tawen ti napalabasen isut’ naan-anayen a nabulsek. Nupay kastoy ti kasasaad, nabaelan ni Felipe ti nangitultuloy a nangimaton iti maysa a bassit a negosio a pangsuportar iti pamiliana ket, babaen iti tulong ti asawana ken dagiti annakna, nabaelanna nga inyurnos ti tiempona tapno makapagpayunir idi Abril 1, 1985. Nupay adda lappedna, isut’ mangaskasaba iti binalaybalay babaen iti tulong ti anakna a lalaki, isu a mangbasa kadagiti teksto ti Biblia para kenkuana. Ni Kabsat Ventura mangikondukta met kadagiti sumagmamano a panagadal ti Biblia iti pagtaengan ket maysa a natudingan a panglakayen iti kongregasion. Maysa kadagiti annakna ti agserserbi kas regular a payunir a kaduana, ket ti anakna a babai maysa nga auxialiary a payunir iti sagpaminsan.
Ni Clodualdo Quiohilag, maysa a panglakayen idiay Biñan, Laguna, ket maysa a payunir ken agdaldaliasat a manangaywan iti 1960’s agingga nga isu ken ni baketna naaddaanda ti maysa nga anak. Ngem, kas kunana, “Oras a naramanamon ti ragsak iti amin-tiempo a serbisio, kanayonen a maaddaanka ti tarigagay a maipaay iti dayta.” Gapuna uray no isut’ addaan iti naballigi a negosio ken tagtagiragsakenna ti nanam-ay a panagbiag a kadua ni baketna ken ti anakda a babai, dina imbilang daytoy kas isut’ pudpudno a panggepna iti biag. Kunana: “Amin dagiti ik-ikutak awan koma ti mamaayda no ti nabayagen nga il-iliwek a panagsubli iti amin-tiempo a serbisio ket di natungpal.” Tapno makapagpayunir, kinissayanna ti panagnegosiona iti kagudua laeng nga aldaw, nga us-usarenna dagiti oras iti agsapa idiay tay-ak ti ministerio. Ti arapaapna ti natungpal idi Oktubre 1, 1984, idi nangrugi manen nga agserbi kas regular payunir. Numan pay ti sapulna ket kagudua laeng ngem iti dati a maganganarna, dagiti gastosna ti nababbaba met. Itan kimmuyog metten ni baketna kenkuana iti trabaho kas regular a payunir, ket sagpaminsan ti anakda a babai ti agserserbi kas auxiliary payunir.
Panagserbi iti Amin Tiempo Nupay Bulsek
Gaput’ panagsakitna iti German measles, nabulsek ni Pantaleon Tatoy nanipud pay agtawen ti tallo. Idi 1972 nangngeganna ti kinapudno iti damdamona ket nangrugi a nakipagadal iti libro a Ti Kinapudno a Mangiturong iti Biag nga Awan Inggana. Daytoy ti nangtulong kenkuana a nangparmek iti bisiona a panagtabako ken panaginum iti arak, ket insimbolona ti dedikasionna ken ni Jehova babaen iti bautismo idi Hulio 29, 1973.
Idi damo a rugian ni Pantaleon ti mangaskasaba kadagiti kaarrubada, ni manangna ti nanglais kenkuana: “Kasanot’ panagbalinmo a ministro idinto a bulsekka ken maymaysa met a paris ti pantalonmo?” Ngem saan a daytoy ti nangupay kenkuana. Agsipud ta pagaammona unay ti lugar nga aglawlaw ti pagtataenganda, isut’ napan a nagbukbukod ken inkaskasabana ti kinapudno kadagiti kaarrubada. Idi 1984 pagragsakanna ti pannakatulongna iti kasinsinna ken ti kaanakanna a makaammo ti kinapudno, ket nabautisaranda idi Setiembre iti dayta a tawen.
Nabaelan met ni Pantaleon ti nangikondukta ti panagadal iti Biblia kadagiti singin a kakaanakanna a babbai, da Lorna ken Luz, agpadpadada nga umel. Kasano a mabalinan ti maysa a bulsek a payunir ti makipagadal kadagita nga indibidual? Babaen iti tulong ti maysa a kaduana, us-usarenna a naimbag dagiti ilustrasion nga adda kadagiti publikasion. Bayat ti panangilawlawagna iti kinapudno, ni kasinsinna a Roquina ipatarusna dagiti sasaona babaen kadagiti senias nga agpaay kadagiti singin. Nabautisaran da Lorna ken Luz idi Abril 20, 1985, agpapan pay dakkel a pakarigatanda. No maipapan ken ni Pantaleon, kalpasan ti panagserbina kas maysa nga auxiliary payunir iti makatawen, isut’ nadutokan a regular payunir idi Marso 1, 1985.
Amin-Tiempo a Serbisio kas Maysa a Karera
Iti graduasion iti high school, maysa nga estudiante kunana iti kaklasena a Saksi: “Tunggal saludsodek dagiti kapadayo a tattao no ania a kurso ti alaenda kalpasan ti graduasion, kunada amin, ‘Panagpayunir.’ Ania a kita ti kurso dayta?” Inlawlawag ti agtutubo a Saksi no ania ti panagpayunir. Ti padana nga estudiante nagbalin nga interesado ket inawatna ti maysa a panagadal iti Biblia, ket isu itan, ti addaan metten ti kalat nga agbalin a payunir.
Dadduma nasarakanda a dagiti kurso iti kolehio ket saanda a mapennek dagiti naespirituan a kasapulan ti maysa. Idiay Bohol, maysa nga agtutubo a kabsat a babai nga addan iti maudi a tawenna iti kolehio ti nakakita nga isut’ addaan panawen a makapagpayunir bayat a turturposenna ti panagadalna. Kamaudiananna, isut’ timmabuno iti Pioneer Service School ket nagkomento a ti kolehio ket di maiyasping iti dayta nga eskuelaan ken ti ragsak a nariknana iti amin-tiempo a serbisio ken Jehova. Isu itan ti agserserbi kas maysa a payunir idiay lugar a dakdakkel a pakasapulan dagiti panangasaba.
Sibubulos a Makiramraman dagiti Agtutubo ken Natataengan
Impadto ti libro dagiti Salmo a kadagiti kaaldawan ti pannakabalin ti Pagarian ti ili ti Dios ket “itulnogdanto ti bagbagida a siaayat.” Kunana met a ‘dagiti babbaro, babbalasang, lallakay ken ub-ubbing’ idaydayawdanto ti nagan ni Jehova. (Salmo 110:3; 148:12, 13) Daytoy ti pimmayso iti ili ti Dios idiay Filipinas.
Iti maudi a panagbilang, 1,159 wenno 13 porsiento kadagiti regular payunir a nagpasalista idiay Filipinas ket nababbaba ngem 20 años ti edadda. Anian a rag-o iti pannakakita kadagiti kakastoy nga agtutubo nga awan-agumna a ‘manglaglagip iti Namarsuada iti aldaw ti kinaagtutuboda’ imbes a saysayangen laeng dayta kadagiti inaagum wenno nailubongan nga ar-aramid!—Eclesiastes 12:1.
Dadduma kadagidiay nangrugi iti amin-tiempo a serbisio iti kinaagtutuboda ket natataenganda itan iti edad ngem kaskasdi simamatalek nga agserserbida pay laeng. Ni Kabsat Leodegario Barlaan ken ti asawana a Natividad nangrugida a nagpayunir idi Abril 1, 1938. Nalasatanda dagiti narigat a tawtawen iti gubat ket nakapagserbida kadagiti adu a kapasidad, agraman iti agdaldaliasat a trabaho. Itan ni Kabsat Barlaan ti 72 ti edadnan ket kaskasdi a sireregta nga agserserbi nga espesial payunir idiay San Carlos, Pangasinan, a kadua ni baketna.
Dadduma nangrugida iti amin-tiempo a serbisio iti maud-udi a paset ti panagbiagda ket nagtultuloyda agingga iti kinalakayda. Kas pangarigan, ni Leoncio Sabandal nangrugi a nagpayunir idi agtawen iti 52 ket kaskasdi nga espesial payunir iti tawen a 92. Isu ken ti asawana ti nakatulongen iti 118 a tattao a nangidedikar iti biagda ken Jehova. Umas-asping iti dayta, ni Cipriano Sepulveda, Sr., nangrugi a nagpayunir idi isut’ 72 ket maysa a regular payunir agingga iti ipapatayna iti edad nga 88 idi 1985. Ni Paula Mariano nangrugi a nagpayunir iti edad a 71 ket kaskasdi nga adda iti amin-tiempo a serbisio agpapan pay kadagiti pagkapuyanna iti edad nga 88. Anian a nagsasayaat nga ulidan iti pammati ken debosion dagitoy ken dagiti dadduma pay a natataengan!
Panagrag-o iti Naaramidan a Panagrang-ay
No taliawen dagiti napalabas a kagudua-siglo, nakalawlawag dagiti pammendision ni Jehova iti naregta a panagregget dagiti Saksina. Manipud iti bassit laeng a bilang idi 1935, anian a rag-o ti pannakakita iti 88,113 a nakiraman iti tay-ak ti ministerio idi Pebrero 1986! Daydiay maymaysa a bassit a kongregasion idiay Avenida Rizal idiay Manila ti dimmakkel itan agingga iti 2,454 a kongregasion iti intero a pagilian, a naorganisarda kadagiti 120 a sirkito.
Ket ania dagiti panginanamaan a maipaay iti masanguanan? Ti makaparegta a mangipamatmat isu ti naisangsangayan a bilang dagiti timmabuno a 268,526—nasursurok ngem mamitlo a daras iti bilang dagiti Saksi iti pagilian—iti panangrambak iti Memorial idi Abril 4, 1985. Mainayon iti dayta, idi Pebrero 1986, 63,248 a panangiyadal iti Biblia iti pagtaengan ti naidaulo kadagiti interesado a tattao. Ket awan duadua a ti agtultuloy a panagdakkel ti makitkita babaen iti pammendision ken anamong ni Jehova.
Maragsakantayo a pinagbunga unay ni Jehova ti trabaho a rinugian dagiti immuna a napulotan a saksina kadagitoy a purpuro kadagiti nasurok a 50 a tawtawen a napalabasen. Babaen iti bendision ken panangaywanna, isut’ kalat ti ilina idiay Filipinas a makapagtultuloyda nga isaknap ti trabahoda a panangaskasaba ken panangisuro agingga kadagiti aldaw nga umay.
[Tsart iti panid 29]
Limapulo a tawtawen nga iyaadu idiay Filipinas
1935 20
1940 222
1950 10,055
1960 31,608
1970 54,789
1980 61,164
1986 88,113
[Mapa iti panid 28]
(Para iti aktual a pannakaurnosna, kitaem ti publikasion)
The Philippines
San Carlos
Manila
Biñan
Zamboanga
Davao