Ti Panagungar ni Jesu-Kristo​—Saan a Sarsarita

TI KADI salaysay ti Biblia maipapan iti panagungar ni Jesus ti pinabpabrika laeng? Iti nabiit pay ti International Herald Tribune ti nangipadamag ti imbestigasion nga inaramid ti maysa a mannurat a Judio nga agnagan Pinchas Lapide. Ti konklusionna? Ti panagungar ket saan a sarsarita.

Sumagmamano a bambanag ti nangiturong ken ni Lapide iti daytoy a konklusion. Umuna, insalaysay dagiti ebanghelio nga adda tallo a babbai a simmarungkar iti tanem ni Jesus ket nakitada a dayta ti awan nagyanna. Ngem idi un-unana a tiempo, dagiti babbai “maibilbilangda a saanda a makaited iti balido a pammaneknek,” kuna ti padamag ti Tribune. Pudno unay, dagiti mismo nga adalan ni Jesus dida pinati dagiti babbai! Ngarud adayo a dayta nga estoria ti inggagarada a pinarparbo laeng.

Insitar met ni Lapide ti napigsa nga epekto ti panagungar ni Jesus kadagiti adalanna. Manipud iti maysa a bunggoy dagiti lallaki a managbabain a gapu itoy pinanawanda ni Jesus idi a tiliwenda, dagitoy ti “nagbalbaliw iti nagpatnag a nagbalin a maysa a matalek a kagimongan nga adda missionna, a kumbinsido iti pannakaisalakan.” Impadamag ti Tribune ti panagrason ni Lapide: “Awan parparmata wenno ar-arapaap a supisiente a mangilawlawag iti kasta a rebolusionario a panagbalbaliw.”

Kamaudiananna, adda met daydiay pammabasol a tinakaw laeng dagiti ad-adalan ni Jesus ti bagina. Iti daytoy, insungbat ni Mr. Lapide: “Dagiti manangsiutik mabalinda kadi a palubosan a matutuokda ken maidadanesda iti nagan ti maysa nga ar-arapaap laeng, agingga iti maysa a naragsak a kinamartir?” Nupay ni Mr. Lapide dina patpatien ni Jesus kas ti Mesias, bassit ti panagduaduana iti kinapudno ti inyanunsio ti maysa nga anghel dua a ribo a tawtawen sakbayna: ‘Ni Kristo napagungaren.’​—Mateo 28:6.