Dagiti Baldado a Nalalaing a Manangaskasaba
TI GUAPO nga agtutubo a lalaki nga adda landok a patibker ti sakana ket maysa a paraplegic. Daytoy a babai a naragsak dagiti matmatana ket tuleng ken umel. Dagiti tallo nga umis-isem a lallaki ket biktimada iti muscular dystrophy. Ania ti nagpapadaanda? Dagiti kadi an-anayenda? Nalabit. Dagiti abilidadda? Apagpag-isu! Isuda amin ti nalalaing a manangaskasaba—amin-tiempo a payunir a ministro.
Kuna dagitoy a tattao nga utangda ti panagballigida kas payunir a ministro kadagiti tallo a bambanag: (1) ti positibo a panangiwanwan nga aggapgapu ken ni Jehova a Dios babaen ti naayat nga organisasionna; (2) ti awan panagbalbaliwna a tulong manipud kadagiti pamiliada ken kamkameng ti kongregasion Kristiano; ken (3) ti naimpusuan a tarigagay a mapalawa dagiti pribilehioda iti serbisio. Kitaentayo no apay ken kasano a nabalinan dagitoy baldado ti agbalin a nalalaing a manangaskasaba.
Maysa a Paraplegic a Naan-anay ti Panagbiagna
Uray no saanna a maus-usar dagiti sakana ni 35 años a ni Masashi Tokitsu ti maysan a regular payunir iti lima a tawen. Isu ti dimmakkel nga ar-arapaapenna ti panagbalinna koma a mannursuro ti gymnastics. Ngem dagidiay nga arapaapna ti naperdi idi agtawen ti 15 babaen ti pannakatnagna manipud iti horizontal a baras. Idi linak-amna dayta napait a kapadasan, kasla pay naiddep dagiti silaw iti biagna. Ngem dagita ti nagsubli idi a nagadal ti Biblia. Isuna laeng, ta itatta dagitan dagiti lawag ti kinapudno. (Idiligyo iti Juan 1:5.) Iti las-ud ti sangapulo a bulan, nabautisaran ni Masashi kas maysa kadagiti Saksi ni Jehova. Denggenyo bayat nga isalaysayna no apay ken kasano a nagbalin a payunir.
“Iti pangrugianna, mamatiak a ti panggep ti panagad-adalko ti Biblia ket isu ti panangaskasabakto met kadagiti dadduma. Gapuna ginundawayak ti makisao iti asinoman nga umay idiay balaymi. Para kaniak, dagiti payunir dagiti nakaaapal unay a tattao. Anian ti panagiliwko nga addaak koma iti ruar a mangaskasaba kadagiti tattao iti tunggal aldaw! Dagiti paraplegics nalakada a makaptan iti decubitus, wenno panaggaddil, ket adda nakadakdakes a gaddilko iti patongko, nga isu ti agiruar ti nana, danum, ken dara. Ti laengen panangsukat ti bendana iti mamin-adu a daras ti agmalem ket nagadun a tiempo ti ibusenna! Iti panangpampanunot a diak kabaelan ti agpayunir iti daytoy a sistema dagiti bambanag, makasangitak pay no mabasak kadagiti publikasion ti Watch Tower dagiti naasi, nabara a sasao a naiturong kadagidiay di makabael nga agpayunir.
“Gapu kadagiti gaddil iti agsumbangir a patongko, siak ti naggurigor. Ngem karkarna, daytoy a kasasaad ti agawan no mapanak iti Nakristianuan a panaggigimong. Gapu iti mannakaawat a singasing ti maysa a kabsat a maysa a mangngagas, siak ti naopera gapu kadagita a panaggaddil. Ti maikadua nga operasion ti nakabalballigi, a kalpasan ti lima a bulan a panagpaimbag, rinugiak ti agserbi kas auxiliary payunir. Iti dayta a tiempo, nupay kasta, naipatok a ti panangaywanko a naan-anay ti responsabilidadko kas panglakayen ti kongregasion, kasla nalabes unayen para kaniak ti panagregular payunir. Kabubuangay pay laeng ti kongregasion, ket siak ti agmaymaysa a panglakayen.
“Maigiddato iti dayta, adda interesko a mangasawa iti maysa a kabsat a babai, ngem dayta ti iti biangko laeng. Gapu ta nasaktan ti unegko, nairasonko laengen a mabalin a daytoy ket gapu ta isu ti pagayatan ni Jehova, ket awan ti lugar iti panangringbaw dagiti rikriknak idinto a nagadu dagiti masapul a maaywanan iti kongregasion. Nariknak a ti kasayaatan nga agas kaniak ket isu ti pannakairamanko nga ad-adda iti teokratiko a trabaho. Dua a bulan ti kamaudiananna, nagpasalistaak kas regular payunir. Ti panagpayunir kas paraplegic, ti panagbalbaliw ti personalidad ti napatpateg ngem kadagiti panagbalbaliw a pisikal. Kasapulan ti adu a tulong manipud kadagiti dadduma tapno magapuanam ti kayatmo nga aramiden gapuna kapilitan nga adalem dagiti makaay-ayo a pamay-an tapno magun-odam dayta a kooperasion. Yantangay mabalinko met ti agmaneho iti kotse iti tay-ak ti serbisio, sadinoman a pakabalinanna agsardengak idiay asideg ti ruangan dagiti balbalay. Kanayon a makipagtartrabahoak iti sabali nga agibumbunannag ti Pagarian nga isu ti agtugaw idiay pagtugawan ti pasahero. Ti katulongko ti agawit iti bagko a pangaskasaba ket lagipenna no ania dagiti kasapulak manipud iti dayta, ken no iti ania nga urnos.
“Yantangay ta agdaliasatkami kadagiti akikid a daldalan, no maminsan agtakderak laeng idiay ruangan ket umawagak idiay pagserkan babaen iti napigsa a timek tapno maalak ti atension ti bumalay. No addada met dagiti agdan, ti katulongko ti mapan idiay ruangan tapno ipakita ti Biblia iti bumalay bayat a siak ti agsasao manipud iti baba. No addada met dagiti balbalay a nalaka a papanan, wenno dagiti kukuarto nga okupado nga adda iti baba ti maysa nga apartment, siaasi nga ibati dagiti gagayyem dagidiay a kasabaak. Iti trabaho ti magasin, mapalag-anak ti trabaho ti katulongko babaen ti panangawitna iti maysa laeng a pagyanan a naglaon kadagiti magasin ken broshur.
“Kas manangaywan ti serbisio, kayatko ti makipagtugaw kadagiti panangiyadal ti Biblia kadagiti pagtaengan. Gapuna addaankami kadagiti panangiyadal iti nalaka a papanan a pagtaengan ti maysa nga agibumbunannag ti Pagarian, wenno isuda ti umay idiay pagtataengak. Gapuna makitayo a kasapulak ti tulong manipud kadagiti kakabsat. Importante a saan laeng a maawatan dagiti gagayyem no kasano ti panangtulong kaniak no di ket kasta met ammok no kasano ti panangawat a siyayaman iti tulongda.
“Idi damok a rugian ti panagpayunir, adu kadagiti panangaskasabak ti babaen ti sursurat. Yantangay mabalinko itan ti agusar kadagiti patibker ti saka iti agmalmalem nga awan ti aniaman a dakes nga epektona, ngangngani aminen a panangaskasabak ket maar-aramiden a kadua dagiti dadduma a payunir ken agibumbunannag. Maysa a gunggona iti agmalmalem a serbisio ket isu ti nagimas a pannaturog iti intero nga agpatnag. Ti panangusar ti Biblia iti tunggal aldaw ti nangpauneg iti mismo a pammatik nga adda kaniak ti kinapudno. Iti pannakipaset a direkta iti inal-aldaw a drama ti panagbiag ken ti pannakakita no kasanot’ pannakasapul ti adu a tattao ti kinapudno ti nangpauneg ti panagayatko kadakuada. Ti kanayon a pannakipagtrabahok iti maysa ti mangted met gundaway iti trabaho a panangipastor ken tulongannak a maam-ammo a naimbag iti adda iti arban.
“Siempre, il-iliwek ti kaaddanton ti baro a sistema dagiti bambanag ken ti panagserbi ken ni Jehova nga addaan ti nasalun-at a bagi. Ngem saanen a nesisita ti aguray agingga iti dayta. Ti panagserbi kenkuana itan, adda man wenno awanan kadagiti limitasion, ti kasasayaatan a gundaway nga agpaay kadagiti agtutubo ken kasta met kadagiti natataengan.”
Agsapsapul kadagiti Lapayag a Dumngeg
“Dagiti tawtawen ti panagdakkelko ket napunnoda iti panagsangsangit,” kuna ni Katsuko Yamamoto. Kalpasan ti nakaro a panaggurigor a napakuyogan iti panagkamuras nagbalin a tuleng ni Katsuko idi agtawen iti dua. Malaglagipna pay dagiti rigatna a mapan ageskuela ken ibturan ti di nasayaat a panangtrato dagiti dadduma nga ub-ubbing. Gaput’ maragsakanen kas maysa a payunir nanipud 1981, salaysayen kadatayo ni Katsuko no kasano ti panangar-aramidna iti dayta.
“Agsipud ta saanko a mabalin ti makisao, idiay tay-ak ti ministerio agus-usarak kadagiti notas ket ipakitak ida iti bumalay. Masansan dawdawatek iti maysa a kabsat a babai a makangngeg a kumuyog kaniak tapno masiguradok no matartarusandak met laeng. No maminsan siak ti mangaramid iti umuna a panagsarungkar a bukbukodko ket kalpasanna dawatek iti maysa a kabsat a makangngeg a kumuyog kaniak iti maikadua a panagsarungkar. Nakairugiak kadagiti panangiyadal ti Biblia iti dayta a pamay-an. Makaparagsak unay kaniak a makaipakita iti panangipategko iti kinamanangngaasi ni Jehova iti daytoy a pamay-an.”
Dagiti “al-aldaw a panagsangsangit” ni Katsuko napalabasdan. Itatta, daytoy napintas a babai a Kristiano ti addaan pudpudno a rag-o iti okupado a panagbiagna kas maysa a payunir a ministro.
Tallo a Kakabsat a Lallaki a Makiramraman
Dagiti tallo nga agkakabsat a Tanizono ket agtawendan iti 40’s ket addaanda ti limb-girdle a tipo ti muscular dystrophy wenno kinalupoy. Sakbay a naammuanda ti kinapudno, insentroda ti biagda iti aglawlaw ti sekular a trabahoda, a nangin-inanama a main-inot a malipatandanto ti kinakapuyda ken ti nasapa nga ipapatay a kababalin daytoy a sakitda. Tunggal maysa kadakuada ti nangrugi iti nagsisina a panagadal ti Biblia ket makagtengda iti pannakaammo ti kinapudno. Tapno maipakita ti panangapresiarda ken ni Jehova, aniat’ maaramidanda a mangpalawa iti serbisioda? Ti ub-ubing a kabsatda, ni Toshimi, salaysayenna kadatayo:
“Agtataengak a kadua ti inaunaan a kabsatmi a lalaki, ni Akimi, ken ti asawana agingga idi 1979. Idi saankon a kabaelan nga aywanan ti bagbagik, napanak timmipon ken ni manongko a Yoshito iti maysa nga institusion. Sadiay rinugiak ti nagserbi kas auxiliary payunir ket bayat dagiti sumaganad a lima a tawen nakipagadalak ti Biblia kadagiti 12 nga ub-ubbing nga adda idiay ward. Maysa kadagitoy nga ub-ubbing ti napilitan a mangisardeng ti pannakiad-adalna idi nga isu ti busoren dagiti nagannak kenkuana, ngem impalubosda met laeng idi a nagpakpakaasi kadakuada a makipagadal manen. Isu ti natay idi agtawen ti 16 nga addaan sigurado a namnama iti panagungar. Kalpasan ti agarup makatawen, immawatak ti maysa nga awag ti telepono manipud kadagiti dati a bumusbusor a nagannakna. Addaanda ti parikut iti ub-ubing nga anakda a babai ket patienda a ti pannakipagadal ti makatulong kenkuana.
“Siak ken ni kabsatko a Yoshito tarigagayanmi ti agbalin a regular payunir. Ngem maragpatminto aya ti kasapulan a tinawen a kalat a 1,000 nga oras? Pudno, daytat’ maysa a banag laeng a panangnayonmi iti panawen a busbosbosenmi iti ministerio iti 30 pay nga oras iti kada bulan. Ngem matngelanto aya dayta dagiti bagbagimi? Sa manen, mapampanunotmi, ‘No dikam aramiden itan, mabalin a makagtengkaminto iti punto a dikamto kabaelanen uray kaano.’ Dagiti sasao ni Pablo idiay 1 Corinto 9:16 ti maulit-ulit a rumrummuar iti panagpapatangmi. ‘Ay-ayak pay no diak iwaragawag ti naimbag a damag!’ Talaga, nga addaankami ti obligasion nga ikaskasaba ti naimbag a damag nasayaat man ti salun-atmi wenno saan. Gapuna impatulodmi dagiti aplikasionmi ket rinugianmi ti panagregular payunir idi Setiembre 1, 1984.”
Innayon ni Yoshito: “Idi pinadpadasko ti panagpayunir a ‘temporario’ idi Enero 1976, nadadaelko ti salun-atko ket naidalitak iti pagiddaan iti dua a bulan. Ti pagamkak unay a ta ti panagregular payunir ti mabalin nga ad-adda a mangipaay ti sakit kaniak ket isunto ketdi ti pakaikapisak kadagiti pannakigimong. Siraragsak ta, idi Agosto 1985 naragpatko ti kalatko iti oras para iti tawen, ken diak pay limmangan iti uray maysa a gimong gapu iti panagpaypayunirko!”
Nagkomento met ni Toshimi: “Ti kangrunaan a pamay-an a panangar-aramidmi iti ministeriomi ket babaen ti panagsursurat. Agsuratkami kadagiti tattao nga awan kadagiti pagtaenganda, kadagiti gagayyem, kadagiti kakabagian, kadagiti di manamati a miembro ti pamilia dagidiay adda iti kongregasion, ken dagiti agnanaed kadagiti teritoria nga adda kadagiti bambantay a masaksaknapan laeng ti ministerio a panagbalaybalay iti mamindua iti kada tawen. Mangaskasabakami a di pormal kadagiti doktor, narses, kadagiti trabahador nga estudiante, ken dagiti dadduma a pasiente. Agingga ita, addan innem a pasiente a nakaammo ti kinapudno. Tallo kadakuada ti nagbalinen nga agibumbunannag ti Pagarian ken ur-urayendan ti pannakabautisarda idi isuda ti matay. Tagtagiragsakenmi dagiti pisikal a gunggona manipud ti panagbalinmi nga okupado, ti pannakapnek iti panunotmi iti inkam pannakaammo nga ar-aramidenmi ti panangaskasaba, ken naimpusuan a rag-o manipud panangparparegta kadagiti dadduma.”
Innayon pay ni Yoshito: “Kas dagiti panglakayen ti kongregasion, mabalinmi ti agsao manipud iti kapadasan kadagidiay a gumawgaw-at ti serbisio a panagpayunir. Idi inyawatmi dagiti aplikasion nga agbalin a payunir, dua kadagiti natataengan a kakabsat a babbai iti kongregasion ti natignay met a tumipon iti ranggo. Maragsakanak un-unay a mangibaga a gapu ti espiritu ti Salmo 119:71, ti dati a negatibo a panagpampanunotko ti nabalbaliwanen kadagiti pamay-an ni Jehova. Wen, ‘Nasayaat kaniak ti pannakasaplitko, tapno maammuak dagiti al-alagaden ti Dios.’”
Itan, agsao metten ti inaunaan a kabsatda. Kuna ni Akimi: “Babaen iti asi dagiti kakabsat ken babaen ti naayat a manangtulong nga asawak mabalinak nga aramiden ti ar-aramidek ita iti nateoktarikuan a pamay-an. Diak pulos makapagna iti uray maysa nga addang. Iti 14 a tawtawen itan, dagiti kakabsat saanda a maum-uma a mangtultulong kaniak iti ipapan iti tunggal panaggigimong ken asamblea. Manipud idi mangrugiak nga agadal, dagiti kapadasan dagiti payunir ti sentro ti panagpapatang no agtitimpuyog ken agtataripnong dagiti agtutubo. Kas naisingasing iti Ti Ministeriotayo iti Pagarian, naikeddengko a padasen ti panagpayunir iti makatawen. Buyogen ti panagduadua maipapan iti pisikal a kasasaadko, nagkariak ken ni Jehova babaen ti maysa a kararag, ket pabpabaruek dayta a kari iti tunggal tawen iti unos ti liman a tawen. Iti tay-ak ti serbisio, agus-usarak ti bisekleta a tallo ti pilidna a nairanta nga agpaay kadagiti baldado. Babaen iti dayta mabalinko ti umasideg idiay ruangan dagiti adu a balbalay. Masansan nga agtugtugawak kadagiti lugar a sadiay adu dagiti aglabas. No mammano laeng dagiti aglabas, agkararagak idiayen a mismo nga adda koma ti makaskasabaak, ket kalpasanna umayton ti maysa a tao nga addaan met ti panagdengngeg. Dagiti estudiante ti Biblia umayda idiay pagtaengak tapno makipagadal, ket nakatulongakon ti walo a tattao a rimmang-ay agingga iti bautismo.
“Kas ti manangidaulo a manangaywan ken manangaywan iti Teokratiko nga Eskuelaan ti Panagministro, sumangsangpetak idiay paggigimongan a nasapa tapno addaakon a sisasagana a mangkablaaw kadagiti kakabsat. Agsipud ta saanko a mabalin ti sumarungkar kadagiti pagtaenganda, ti siepektibo a panangusar ti panawen sakbay ken kalpasan dagiti panaggigimong ket nasken unay. Masansan met nga us-usarek ti telepono a maipaay iti trabaho a panangipastor.
“Kadagiti maudi nga uppat wenno lima a tawen, dakkelen ti kimmapuyan dagiti piskelko. No rabii, literal a diak payen makaigunay ti uray aniaman a piskelko, ket kasla nagpupuniponen ti rigatna agingga iti punto a kasla adda nadagsen a banag a mangpampandag kaniak iti pagiddaan. Siaannad a bagkaten ni baketko dagiti saksaka wenno im-imak tapno mabang-aranak bassit. Kadagiti tiempo a kas kadagitoy a dagiti naasi ken naayat a sasao dagiti kakabsat ti makatulong kaniak a mangsalimetmet iti isemko a namnamaek a mangisarming iti adda metten a sasaaden ti pusok a saan ket a ti bagik.”
Ti ilalanlan daytoy a sakit ket saanen a mapasardeng ngem patien dagiti agkakabsat a Tanizono a ti panamagbalinda nga okupado kadagiti bagbagida iti tay-ak iti serbisio, a silalagipda iti bumalay ken kadagiti kasapulanna, ti pannakipagtrabaho a sisisinged kadagiti kapammatianda, ken ti pannakariknada iti pannakapnek manipud serbisio ti Dios kas payunir ti nakatulong tapno malappedan bassit ti ilalanlan ti sakitda. Anian ti panagyamanda ken ni Jehova!
Baldado Ngem Determinado
Dagiti pagkapuyan iti lasag ket saan nga isu ti nangpalammiis ti ayat ken regta nga adda kadagitoy a manangaskasaba iti amin-tiempo a ministerio. Ti determinasionda ket umas-asping ken ni apostol Pablo a nangisurat: “Gapuna saankam a maupay, ngem uray ti tao a makinruar kumapuyda a kumapuy, ti tao a makin-uneg mapabaro nga inaldaw.”—2 Corinto 4:16.
Siempre, saan amin a baldado nga agibumbunannag ti Pagarian ket kabaelanda ti mangaskasaba iti amin a tiempo. Ti kasasaad ti agdudumaduma manipud maysa a tao iti sabali. Ngem aniaman a maaramidan dagita nga indibidual a panagdayaw iti Kangatuan ken panangtulong kadagiti dadduma iti naespirituan ti mangyeg dakkel a rag-o, personal a pannakapnek, ken bendision ti naayat a Diostayo, a ni Jehova.
[Dagiti ladawan iti panid 23]
Masashi Tokitsu
Katsuko Yamamoto
Akimi Tanizono
Toshimi Tanizono
Yoshito Tanizono