Pagdanaganyo Aya dagiti Annakyo?
SIEMPRE a! Ti sakit, panangabuso ti droga, ken kinadakes ti tallo laeng kadagiti problema nga ammoyo a mamagpegpeggad kadagiti annakyo. Normal laeng para kadagiti nagannak a maseknan maipapan kadagiti annakda—uray pagdanagan pay ida.
Kasta ti panagrikna ti kaaduan kadagiti nagannak iti panaglabas ti historia, kas ipakita ti Biblia. Lagipenyo a ni Jacob imbaonna ni Jose tapno kitaenna dagiti kakabsatna agsipud ta maseknan ni Jacob kadakuada. (Genesis 37:13, 14) Uray ni Job, madanagan met, nupay dagiti annakna a lallaki ti natataenganda nga addaan iti kabukbukodanda metten a pamilia. Pinanunotna: “Mabalin a nagbasol dagiti annakko a lallaki ket inlunodda ti Dios kadagiti puspusoda.”—Job 1:4, 5.
Apay, uray ni Jose ken ni Maria maseknanda maipapan iti perpekto nga anakda a ni Jesus! Kinapudnona, iti naminsan idi ni Jesus ti 12 añosna, aburidoda unay maipapan kenkuana ta isut’ nagawan. Nupay kasta, ti anakda a ni Jesus ket maysa a dayaw kadakuada, ket awan rason a pakalaisanda. Kitaentay nga apagpag-isu no ania ti napasamak iti dayta nakalaglagip nga okasion ket panunoten no ania dagiti leksion a mabalin nga adawen dagiti moderno a nagannak iti dayta.
Ti Napukaw nga Anak
No maysakayo a naganak, mabalin a makipagriknakayo iti rikrikna ni Maria idi siuunget a kinunana ken ni Jesus: “Anak, apay-apay a kasta ti inaramidmo kadakami? Adtoy ni amam ken siak a silaladingitkami a nagsapsapul kenka.” Naisina ni Jose ken ni Maria manipud ken ni Jesus iti tallo nga aldaw. Maapresiaryo no apay a madanaganda no sadino ti ayan ti 12-años nga anakda.—Lucas 2:48, Today’s English Version.
Apay a napukaw da Jose ken Maria ni Jesus? Maysa nga agdindinamag a komentarista ti nangbabalaw kadakuada gapu itoy nga insuratna: “Agsipud ta pagaammoda nga anian a gameng ti ik-ikutanda, apay a nakabaybayag sakbay ti panangsapulda kenkuana? Sadino ti yan ti kinamanangngaasida ken kinadungngo ti maysa nga ina?” Ngem kinapudnona, kas iti intay makita, ti nasingsinged a panangusig iti salaysay ti mangdalus kada Jose ken Maria manipud iti serioso a pammabasol.
Ti kinapudno a ta ipakpakita ti Biblia a ni Maria ket maysa a nasayaat a babai ken nasayaat nga ina. Ni anghel Gabriel, idi immay tapno ipadtona ti pannakaiyanak ni Jesus, kunana nga isu “nasarakanna ti grasia ti Dios.” (Lucas 1:28, 30) Sibubulos nga inawatna ti naituding nga akemna a mangipasngay iti daytoy naisangsangayan nga anak a lalaki, agraman ti nadagsen a responsabilidad a panangpadakkel ken panangsanay kenkuana. Isut’ maysa a napakumbaba a babai ken napigsa ti pammatina iti Dios. Kalpasan ti pannakaiyanak ni Jesus, inaramidna ti isuamin a kasapulan sigun iti Linteg ni Jehova, “kas adda a naisurat.”—Lucas 1:38, 45-48; 2:21-23, 39.
Ni Jose, ti lalaki a nangasawa ken ni Maria ken isu ti nagsiuman nga ama ni Jesus, ket maysa met a nasayaat, nalinteg a lalaki a nakikomunikar iti anghel ni Jehova iti namimpat nga okasion. (Mateo 1:19, 20; 2:13, 19, 22) Laglagipenyo, ni Jehova pinilina ni Jose ken ni Maria a mangpadakkel iti nasudi, bugbugtong nga Anakna. Agkurang aya ti Dios a mangpili iti pagasawaan a mangaramid a sisasayaat iti panangtulong iti daytoy nga anak a dumakkel iti nasantuan a kinasirib?
Siempre, dagiti met nagannak itatta pagaburiduanda dagiti annakda gapu iti napeggad ken nadangkes a kasasaad iti aglawlawda. Ken ammoda a dagiti annakda ket saanda a perpekto a kas ken Jesus. Kaskasdi, magunggonaantayo manipud iti ulidan ni Jose, ni Maria, ken ni Jesus.