Panangmatmat iti Bahamas​—Kadagiti Mata ti Agdaldaliasat a Ministro

TI Bahamas. Adda idi tiempo idi dagidiay a sasao ti mamataud kaniak ti panagar-arapaap nga agil-ilad kadagiti nagpintasan a pannaraten nga ig-igid ti baybay iti sirok dagiti nainayad ti panagpallapallayogna a kaniogan wenno aglanglangoy kadagiti nakalitlitnaw a kas kristal nga umasul a dandanum. Pudno unay, kadagiti rinibribo a bakasionista a bumisbisita iti Bahamas iti kada bulan, ti kakasta a parparmata ti agbalin a maysa a kinapudno. Ket din pagsidsiddaawan, a ti klima kadagitoy tropikal a purpuro ti makaparagsak, nga addaan ti promedio a temperatura a 70 degrees Fahrenheit (21° C.) no kalam-ekna ken 85 degrees Fahrenheit (29° C.) iti kalgaw!

Ita, nupay kasta, ti Bahamas kaipapananna ti ad-adda pay ngem ti basta panagbilag iti bara ti tropikal nga init kas maysa a bakasionista. Isudat’ nagbalinen kas nakaitudingak nga agdaldaliasat a ministro dagiti Saksi ni Jehova. Kumuyogkayo kaniak ket kitaenyo ti Bahamas babaen kadagiti matmatak.

Dagiti Out Islands

Agarup 20 laeng kadagiti 700 a purpuro ken isla ti natagitauan, ket ti kaaduan kadagiti taga Bahamas ti agnanaed idiay kabisera a siudad ti Nassau idiay isla ti New Providence. Ti Nassau ti pagaammo kas maysa a puerto a pagsangladan dagiti barko iti taaw nga addaan kadagiti pasahero nga aglinglingay laeng ken addaan sumagmamano a bilang dagiti dadakkel nga otel para kadagiti bakasionista. Nalabit nagtaengkayon iti maysa kadakuada. Ngem napasiaryo kadin dagiti dadduma nga isla?

Ti kadakkelan a bilang dagiti taga Bahamas ti agindeg kadagiti Out Islands, a maaw-awagan met ti Family Islands. Dagitoy nga isla ti nanglikmut ti Nassau, a ti kaadaywan kadagita ti nasurok a 300 milia (480 km) ti kaadayona. Iti sumagmamano kadagitoy nga Out Islands mabalinyo a tagiragsaken amin dagiti moderno a pagnam-ayan ti Nassau, ngem dagiti dadduma ket saanda a kastat’ karang-ayna. Kas pangarigan, dadduma ti awanan iti elektrisidad wenno gripo ti danum. Kadagiti dadduma, makakitakayo pay kadagiti tattao nga aglutluto kadagiti pagsungrod a kayo kadagiti kusinada a naatepan ti pan-aw wenno aggilgiling ti mais kadagiti paggilingan a patpatayeken ti ima.

No Kasano ti Panagdaliasatko

Amin dagiti Out Islands ti mabalin a danonen manipud Nassau babaen iti barko wenno eroplano, ngem dagiti nasulinek a luglugarda ti mabalin a makaiparang ti karit kadagiti tattao nga addaan iti propesion kas kaniak. Ti pamay-an nga umas-asping iti daydiay sinursurot dagiti Kristiano idi umuna a siglo, ti agdaldaliasat a ministro, wenno manangaywan ti sirkito, ti mangsarungkar kadagiti kongregasion ken babassit a grupo dagiti Saksi ni Jehova tapno pabilgen ken paregtaen ida iti naespirituan.​—Aramid 15:36; 16:4, 5.

Malaglagipko pay ti maysa a grupo nga addaan laeng tallo kadagiti Saksi nga isut’ sarungkarak iti maysa kadagiti Out Islands. Daytoy a grupo ti saan pay a nasarsarungkaran babaen iti manangaywan iti sirkito iti nasuroken a tallo a tawen. Nagsuratak kadakuada manipud Nassau, a pakpakaammuak ida kadagiti petsa ti isasarungkarko. Ngem idi a nakagtengak sadiay babaen iti barko, awan Saksi a simmabat kaniak idiay pantalan. Gapuna nagkalikagumak ti maysa a mabalin a makatulong kaniak a mangsapul iti maysa kadagiti Saksi. Naiturongak iti maysa a babai, ket idi inyam-ammok ti bagik kas manangaywan ti sirkito, isut’ naragsakan unay nga isut’ nagtaray kadagiti dadduma a Saksi a mangibaga kadagiti dadduma maipapan iti idadatengko. Pinanawannak sadiay a sitatakder a kadua dagiti maletak. Di naaw-awat dagidiay a Saksi ti suratko, ket nakellaatda ken maragsakanda iti ibibisitak.

Ti biahe a panagsubli idiay Nassau ket babaen iti maysa a bassit a barko a para karga ken koreo. Ti biahe inabutna ti nasurok a 30 oras babaen kadagiti nadaleg a baybay, ngem ti panawen ti limmabas a sidadaras, no para kaniak laeng. Ginundawayak ti nangaskasaba iti dadduma kadagiti pasahero. Di nagbayag kalpasan dayta, maysa kadagiti trepolante ti nangrugi a makipagadal ti Biblia ket itan makigimgimongen iti maysa kadagiti kongregasion idiay Nassau.

Ti maysa pay a pamay-an a panangbisita kadagiti Out Islands ket babaen ti eroplano. Nupay kasta, babassit laeng nga eroplano ti mabalin nga agdisso kadagiti sumagmamano kadagiti pagdissuan ti eroplano iti isla. Dagitoy ti masansan medio natalgedda, ngem no maminsan addada met dagiti nakabutbuteng a kapadasan. Iti naminsan nagnerbiosak pay unay idi makakitaak ti asuk a nangpunno ti cockpit ti eroplano bayat a daytat’ ngumato manipud iti daga. Ti eroplano ti dardaras a nagsubli iti baba. Ti makagapu iti asuk? Maysa nga umok ti utot a naaramid idiay pagpapudot ken bentilasion ti angin a dumna ti makina!

Komusta Met dagiti Tattao?

Bayat ti panagdaldaliasatko kadagiti Out Islands, nasarakak nga adu kadagiti tattao ti agtarigagay iti literatura ti Biblia. Ngem para kadagiti dadduma kadakuada, uray pay ti naglaka a gatad dagiti literatura ket dida kabaelan. Kas pangarigan, iti maysa a nakapudpudot unay nga aldaw, lima kadakami ti nangaskasaba iti naiputputong nga isla idi nakasarakak ti maysa a babai a nangipakita ti dakkel nga interesna iti pagbasaan a Ti Librok dagiti Estoria ti Biblia. Awan aniaman a kuartana a mabalinna a maitulong iti nginana, ngem ti nagyan ti repriheradorna ti apagpag-isu met a kasapulanmi​—lima a lata ti napalamiisan nga inumen. Insukatmi ti libro kadagiti ilado nga inumenna, nga isut’ nangparagsak met iti tunggal maysa.

Dagiti taga Bahamas addaanda ti pudpudno a panagayat iti Biblia. Daytoy ti mamagbalin a maysa a rag-o ti panangiyeg kadakuada iti “naimbag a damag” ti Pagarian ni Jehova. (Mateo 24:14) Masansan a no sumarsarungkar iti maysa a pagtaengan, masarakam ti bumalay nga agbasbasa ti Biblia. Iti maysa a balay a sinarungkarak, maysa nga ina ti sipapannakkel nga imparangna ti tres años a balasitangna a nangibitla kaniak kadagiti amin a nagnagan dagiti 66 a libro ti Biblia iti panagsasarunoda.

Bayat dagiti napalabas a sumagmamano a tawen, tinagiragsak dagiti Out Islanders ti pannakakitada iti presentasion babaen ti slide kadagiti tema ti Biblia nga insagana ti Watch Tower Society. Iti maysa nga isla, awan ti sidadaan a balay a pakaaramidanna, gapuna nga inyurnosmi ti pannakaipabuya dagiti slides iti ruar ti kapimpintura ti puraw a pader a kaarruba ti maysa a bassit a tiendaan. Agarup 60 a tattao ti nagurnong​—a dadduma ti sitatakder, dadduma ti situtugaw.

Kadagiti dadduma nga okasion, 120 a tattao ti nagtataripnong. Tinagiragsakda unay ti programa ti slides nga idi naisindi manen ti silaw, awan ti pimmanaw. Malagipko nga adda pay sabali a set dagiti slides a naitugotko iti naiduma a tema ti Biblia. Gapuna nagiddep manen dagiti silaw, ket naipabuya ti maikadua​—nga isut’ nangparagsak kadagiti tattao.

No maminsan rumsua met dagiti parikut. Iti maysa nga isla maysa a bunggoy dagiti tattao ti nagtataripnong iti lokal nga eskuelaan tapno mabuya ti programa dagiti slides ti Biblia. Idi nga isindikon ti projector, napundi ti bombilia. Ket awan pay met ngarud ti ekstra a bombilia ti projector a naitugotko ket awan met ti sidadaan a magatang iti daytoy nga Out Island. Ket, kasta unay ti pannakapaay dagiti tattao. Nupay kasta, babaen ti sidadaras a panangsinasinak iti projector ken ti panangaramid iti sumagmamano a panagbalbaliw, nabalinak nga inusar ti maysa nga ordinario a bombilia iti balay kas maysa met a kalalainganna, ngem medio nasipsipnget bassit a kasukatna. Saan nga inkankano dagiti tattao dayta. Tinagiragsakda met latta ti programa.

Dagiti Tarantula, Lamok, ken dagiti “Imprito a Pusa”

Ti panagaramid kadagiti regular a panagsarungkar kadagiti Out Islands kasapulanna ti sumagmamano a pannakibagay kadagiti tropikal a kasasaad. Malaglagipko pay ti damo a pannakakitak iti tarantula. Dayta ti agkarkarayam iti datar ket kas kadakkel ti dakulap ti imak! Nagtakderak a di makagaraw​—napabutngan. Agyamanak unay ta immay ti bumalay a nangalaw kaniak. Babaen iti maysa a wasiwas ti bunengna, nadispatsaren ti “kabusor.” Ti bumalay ket maysa nga 82-años a lakay. Iti dati, binusorna unay ti panagregget ni baketna nga agserbi ken ni Jehova. Ngem idi agangay rinugianna metten ti tumabuno iti panaggigimong idiay Kingdom Hall ken makipagadal iti Biblia a kadua ni baketna.

Gapu iti nabara a klima, mabalin a mangted parikut dagiti lamok. No maminsan dagitat’ nakaad-adu ta, bayat ti nga agsasaoka mabalin a ti maysa agtayab a diretsa iti ngiwatmo. Siempre, adu kadagiti dadduma a sibibiag a bambanag ti pagragsakan met a buybuyaen, kas kadagiti nagpintas a rimmosas a flamingos nga aggigian iti tengnga ti natural a pagtaenganda a narukbos a tropikal a mulmula ken agbungbunga a kaykayo.

Ti panangadal met iti maipapan kadagiti lokal a taraon mabalin a nakaay-ayat. Iti maysa nga isla, nakakitaak iti maysa a kayo a napunno ti kasla kahel a nakatubtubbog ti bungana. Insaludsodko iti babai iti balay no mabalinko ti pumuros iti maysa wenno dua kadagiti kahelna. Ngem siak ti binallaaganna. Saan a kahel dagita no di ket nakaal-alsemda. Nupay kasta mabalinko ti pumuros, kunana. Bueno, naikunak a mabalinko met a mabigbig ti maysa a kahel no makakitaak ti maysa. Gapuna pimmurosak ti maysa a dakkel a bunga ket kinagatko. Anian ti pannakakellaatko! Nagdiwig pay ti ngiwatko. Ti bunga ti nagkaro ti kinaalsemna, kas maysa a kaburaw. Nagkatawa ti babai, ngem naadalko a nupay ti bunga ti maysa a naalsem a puon ti “kahel” ti umasping iti maysa a kahel, saan met a kasta ti panagramramanna!

Impagarupko no naibagaykon ti bagik iti panagbiag ti isla a nasayaaten agingga iti panagdaliasatko iti maysa pay kadagiti puro iti di pay nabayag unay. Siak ti nagdagos iti maysa a lumakayen a biudo bayat nga agserserbiak iti kongregasion. Apaman a bumangonak iti umuna nga agsapa, inawisnak a makipagalmusar a kaduana. Medio tumbog pay ti ngiwatko a mangin-inanama iti dayta​—agingga nga imbagana kaniak no ania ti indasarna. Dagiti “imprito a pusa”! Idi sumrekak ti kusina ken idi ngangngani tungdayek ti panangitukonna, isut’ nakitak a mangibalbaliktad kadagiti pancakes. “Sadino ngay ti yan dagiti ‘imprito a pusa’?” insaludsodko. Intudona dagiti pancakes. Limmawa pay dagiti pagangsak, ket dakam ti nagkatkatawa a dua. Impatona no ammok a dagiti pancakes ket maaw-awaganda ti imprito a pusa iti dayta nga isla.

Dagiti Gunggona iti Panagdaliasat

Gapu kadagiti naiputputong unay a lugar ti dadduma kadagiti isla, adda ti dakkel a panagkasapulan ti ad-adu pay a ministro a tumulong iti panangisaknap iti naimbag a damag ti Pagarian ti Dios. Daytoy a pannakasapul ket saan laeng a ti panangdanon kadagiti Ingles-pagsasaona a tattao iti Bahamas no di ket kasta met tapno makasarita dagiti immakar a Haitian (taga Haiti) a Pranses ti pagsasaona.

Ti panagbalin nga agdaldaliasat a ministro idiay Bahamas ket maysa a makaparagsak a karit nga agkasapulan ti sumagmamano a panagbalbaliw kadagiti wagas ti panagbiag ti isla. Ngem addada met dagiti dadakkel a gunggona. Maysa kadagiti di maartapan a rag-o isut’ pannakakita kadagiti tattao a mangabrasa iti mensahe ti Biblia. Ti maysa pay isu ti nagsayaatan a pribilehio iti panangparegta a naespirituan kadagiti naipattopattok a kongregasion ken naiputputong a grupo.

Dakami idiay Bahamas ket pagragragsakanmi ti kinapintas dagiti ig-igid ti baybay a sumilapsilap kadagiti rimmosas a darat ken puraw a darat ken kadagiti makakayaw a kabatbatuan iti uneg ti baybay nga aglaplapusanan kadagiti nagduduma nga ikan. Ngem nangnangruna a maragsakankami iti adda a mapaspasamaken ita ditoy aglawlaw ti globo. Kas dagiti Saksi ni Jehova, makitkitamin ti kaitungpalan ti Salmo 97:1. Kunana: “Ni Jehova nagarin! Ti daga agragsak koma. Agrag-o koma dagiti adu a purpuro.”​—Kas salaysayen ni Anthony Reed.

[Blurb iti panid 27]

Nagnerbiosak pay unay idi makakitaak ti asuk a nangpunno ti cockpit ti eroplano bayat a daytat’ ngumato manipud iti daga

[Blurb iti panid 28]

Dagiti taga Bahamas addaanda ti pudpudno a panagayat iti Biblia. Daytoy ti mamagbalin a maysa a rag-o ti panangiyeg kadakuada iti “naimbag a damag” ti Pagarian ni Jehova

[Blurb iti panid 28]

Malaglagipko pay ti damo a pannakakitak iti tarantula. Dayta ti agkarkarayam iti datar ket kas kadakkel ti dakulap ti imak!

[Blurb iti panid 29]

Isut’ sinaludsodak, “Sadino ngay ti yan dagiti ‘imprito a pusa’?”

[Mapa/Ladawan iti panid 26]

(Para iti aktual a pannakaurnosna, kitaem ti publikasion)

FLORIDA

BAHAMAS

ATLANTIC OCEAN