Ti Kinasirib ti Dios—Makitayo Aya Dayta?
SIRMATAENYO ti korte ti maysa nga ari idi ugma. Sadiay, situtugaw ti ari iti maysa a trono iti kinadayag, bayat ti panangidadaulona a nakawesan iti naarian a pagaan-anay. Isut’ agdindinamag saan laeng a ti kinabaknangna no di ket kasta met ti kinasiribna. Dagiti babaonen iti korte organisadoda a naan-anay. Ti buya ti kinaranga ti nakaskasdaaw. Kitaenyo: ni Ari Salomon!—1 Ar-ari 10:1-9, 18-20.
Ita, denggenyo, ti lalaki a mabigbigbig kas ti Naindaklan a Mannursuro, ni Jesu-Kristo: “Ket ti maipapan iti pagan-anay, apay-apay naagawakayo? Usigenyo dagiti lirlirio iti talon, no kasano ti panagdakkelda; saanda nga agaramid, ket dida met mambi; ngem kunak kadakayo nga uray pay ni Salomon agraman ti isuamin a kinadayagna saan a nakawesan a kas iti maysa kadakuada.”—Mateo 6:28, 29.
Aniat’ kayat a sawen ni Jesus iti dayta? Bueno, pudno nga isut’ mamalbalakad maipapan iti di panagbalin a materialistiko. Ngem dagiti kadi sasaona maipapan ken ni Salomon ti literal a pudno? Laglagipenyo, nagusar ni Jesus kadagiti pudno-iti-biag a pangpangngarig. Gapuna dagiti diseniador ken trabahador ni Salomon, nupay nalalaingda, ket di maipada kadagiti disenio, ti panaglalaok dagiti kolor, ti semetria “dagiti lirlirio ti talon” a naikuardo kadagiti natural nga aglawlawda.
Naiparangarang ti Kinasirib ni Jehova
Uray laeng ti di inggaggagara a panangsukimat kadagiti sabsabong ti mangtignay kadakayo a mangpaneknek iti sasao ni Jesus. Ditay ammo no ania a kita ti lirio ti adda iti panunot ni Jesus, ngem aglaplapusanan ti sabsabong iti kaaduan a paset ti daga. Mingminganyo a naimbag ti maysa a sabong, ti aniaman a sabong: maysa a lirio, rosa, orchid. Anian a makaay-ayo a kolor ken nagpino a disenio ti makitayo, ti panagbagayda kadagiti sepals, dagiti bulbulong, ken dadduma pay a paset ti sabong. Makitkitayo aya ti nagulimek ngem nagpigsa a pammaneknek a ti Naindaklan a Diseniador iti awan inggana a kinasirib ken kinamanagpartuat ti adda iti likudan daytoy nagpipintas nga ar-aramid? Saan laeng a maragsakan dagiti matmatatayo iti kinapintasda no di ket dagiti pay agongtayo ti mangipastrek kadagiti bangloda iti angin nga ang-angsentayo.
Napaliiw ni apostol Pablo a ‘dagiti kualidad [ni Jehova a Dios] a di makita maipakaammoda a nalawag, ta maipakitada gapu kadagiti inaramidna nanipud iti pannakaparsua ti lubong.’ (Roma 1:20) Nupay kasta, saan laeng a dagiti sabsabong ti pinarsua ti Dios a mangkawes iti daga; isut nagaramid pay kadagiti di mabilbilang a masmasetas ken kaykayo, nga aminda ti mangporma iti maysa a praktikal, kaskasdi nakapimpintas kinaberdena, a pagarian. No masarungkaranyo laeng ti Humboldt National Forest idiay California, E.U.A., makakitakayo ti maysa a higante a redwood a mapapati nga isu ti kangangatuan a kayo iti intero a lubong. No makapagtakderkayo idiay sakaananna ket tumangadkayo iti kangatona a nasurok a 360 pie (110 m), diyonto aya siuulimek a dayawen Daydiay makaammo no kasanot’ panangaramid iti kasta a kayo?
Ti Nainkasigudan a Sirib dagiti An-animal
Iti daga ken iti baybay addada an-animal, babassit ken dadakkel, dayta ti mamagsiddaaw kadatayo iti kinasirib ti Dios. Kaawatan tunggal maysa ti addaan panggep ti Namarsua a serbianna. Balakadannatayo ni masirib nga Ari Salomon: “Inka ken kuton, sika a nasadut; utobem dagiti daldalanna ket sumiribka.” (Proverbio 6:6) Dagidiay a nakapaliiwen iti kuton pagsidsiddaawanda ti abilidadna nga agorganisar. Dagiti kuton saanda a manangiputputong; agnanaedda kadagiti komunidad. Dadduma ti mannalon ken managapit ti bin-i. Kadagiti tropiko makitayo dagiti dadduma a kuton nga okupadoda nga agkitkitteb kadagiti bulbulong nga awitenda kadagiti pagumokanda. Kasanot’ pannakaammoda a mangaramid iti daytoy? Ni Agur, maysa kadagiti mannurat iti libro a Proverbio, ti sumungbat a ti kuton ti “nainkasigudan a nagsirib.” Asinot’ nangaramid kenkuana a kasta? Ni Jehova, ti Nangaramid ti langit ken daga.—Proverbio 30:24, 25.
Wen, ti an-animal a sangaparsuaan addaanda ti nainkasigudan a kinasirib. Nakabatbatad dayta iti panagakar dagiti tumatayab. Mabalin a nangnangngeganyon ti maipapan iti panagakar ti Capistrano a billit tuleng. Iti naikeddeng a tiempo iti kada tawen, agdaliasatda iti rinibo a milias manipud idiay pagindeganda iti kalam-ekna sadi Sud America nga agturong iti mision idiay San Juan Capistrano, California, E.U.A. Iti nainkasigudan a rikna ken awan biddutna mapanda iti isu met laeng a disso iti isu met laeng a tiempo ti Marso.
No maipapan iti naglawaan a taaw, kuna ti salmista: “O Jehova, anian a nagadu dagiti ar-aramidmo! Nainsiriban ti panangaramidmo kadakuada amin. Ti daga napno ti pagsanikuaam. Addayta ti baybay, dakkel ket nalawa, isu a yan dagiti agkukunolkunol a bambanag a di mabilang.” (Salmo 104:24, 25) Manipud iti nagbassitan a munamon agingga iti nagdakkelan a balyena, makitkita ti nadiosan a kinasirib iti porma ken ar-aramidda.
Ti balangat ti panamarsua ti Dios ditoy daga isu ti tao a mismo. Adtoy ti maysa a parsua a saan a basta nagtignay laeng babaen iti naikabiten, wenno nainkasigudan a kinasirib. Isut’ addaan ti abilidad a kas kadagiti abilidad ti Dios kadagiti adu a pamay-an. Anian a pudno kenkuana nga “iti nakaam-amak a pamay-an” isut’ nakaskasdaaw pannakaaramidna! Uray pay no saantayo a medikal a sientista, mabasatay dagiti panagsirarakda ket makagun-odtayo ti isu met laeng a konklusion a kas ti napaltiingan a mannurat. Dagiti ar-aramid ti Namarsua a nalawag a makita iti natauan a bagi nakaskasdaawda—Salmo 139:14.
Ti Nailangitan a kinasirib ni Jehova
Kuna ti Salmo 19:1 a dagiti langlangit ipalawagda ti dayag ti Dios. Anian a pudno unay daytoy! Ti salmista a David awanan kadagiti teleskopio wenno elektroniko nga instrumento, ngem isut’ addaan ti nadayaw a panangipateg kadagiti makitkitana. Itatta, ti gagangay a tao ad-adut’ ammona ngem ni David no maipapan iti sistema solartayo ken ti naindaklan a galaksitayo, ti Milky Way. Ammona met nga adda dagiti di mabilbilang a dadduma pay a galaksi iti awan pagpatpatinggaanna a law-ang. Kasanot’ panagriknayo no ar-arapaapenyo ti kinasirib ti naindaklan ken di maartapan a Diseniador? Maikunayo aya a buyogen ti nadayaw a timek: ‘Jehova, sika ti “mangar-aramid kadagiti dadakkel a bambanag a di matukod, ken dagiti bambanag a nakaskasdaaw a saan a mabilang”’? Rebbengna.—Job 9:10.
Iti di mabilbilangen a napalabas a panawen, intultuloy ni Jehova dagiti ar-aramidna iti panamarsua, umuna ti bugbugtong nga Anakna, kalpasanna ti dadduma kadagiti espiritu a parparsua. Daytoy ti sinaruno ti namaterialan nga uniberso. Amin ti nakataltalinaay ken nakaur-urnos. Ta, dagiti angheliko nga annak ti Dios ti aktual nga imkisda iti panangipateg ken panagpalakpak iti pannakaibangon ti daga! (Job 38:4-7) Ti lalaki ken babai naparsuada ken naisaadda iti maysa nga awan pagkuranganna a minuyongan, ngem kalpasanna maysa a nakakigkigtot a banag ti napasamak. Maysa a timek manipud iti di makita, nga agsasao babaen iti maysa nga uleg, ti nangpardaya iti Naindaklan a Namarsua. Pinabasolna ni Jehova a di mangus-usar a siuumiso iti kinasoberanona; inawaganna ti Dios nga ulbod. Gapuna, ti makintimek nagun-odanna ti di makaay-ayo a nagnagan a mangilasin kenkuana, kas ti Diablo, Uleg, ken Satanas. Ania itan ti aramiden Daydiay Kasisiriban iti isuamin? Aniat’ maaramidanna? Maysa a baro a kadakkel ti kinasirib ti kasapulan a mangartap kadagiti disenio a nanglab-awen iti dayag ni Salomon.—Genesis 3:1-5.
[Blurb iti panid 4]
Manipud kadagiti nagbabassitan a munamon agingga kadagiti kadadakkelan a balyena, makitkita ti nadiosan a kinasirib iti porma ken ar-aramidda