Ania Pay Dadduma a Gunggona ti Agayus nga Aggapu iti Dios?
TAGTAGIRAGSAKENYO aya dagiti napipintas a sabsabong, ti bangbanglo dagiti rosa, ti kanta dagiti tumatayab? Maragsakankayo aya a makakita ti damdamo a panagisem ti anakyo? Dikay aya apresiaren dagiti makapaganas a sayamusom? Ket asino ti di agrayo ti bulalayaw, iti nakarangranga a panaglennek ti init, wenno kadagiti bitbituen iti nasilnag a rabii? Dagiti nakaskasdaaw a sagana ti Dios awan patinggada, saan aya?
Kaskasdi adu dagiti pakarigatan. Ket agpapan pay abilidad ti daga nga agbunga a maipaay iti amin, minilmilion dagiti di umdas ti kankanenda. Minilmilion pay dagiti masabsabidongan gapu iti polusion. Ken binilbilion pay ita dagiti apektado iti krimen, kinaagum, kinaimut, ken panagbuteng no ania ti iyeg ti masanguanan.
Idinto a ti Namarsua aglaplapusanan ti panangipaayna, apay a nagadu dagiti pakaladingitan? Daytoy a planeta ti nakaskasdaaw a lugar, naaramid nga agpaay kadatayo a tagiragsaken. Ngem ti lubong—ti sangatauan—ket adda iti nakaay-ay-ay a kasasaad. Para iti kaaduan kadagiti agtataeng iti daga, ti pangmatmatan ket nakasipsipnget, nakabutbuteng. Apay? Ania ti dakes a napasamak? Inaramid aya ti Dios ti tao ket kalpasanna pinanawanna? Adda aya lawag iti daytoy makariro a kasasaad? Addaantayo aya ti aniaman a namnama nga agpaay iti masanguanan?
Ti Gubuayan ti Lawag ken Namnama
Ngangngani 2,000 a tawtawen ti napalabasen maysa a naisalsalumina nga ubing a lalaki ti naiyanak—naisangsangayan gapu ta ti inana, ni Maria, ket tao, ket ti amana isu ti Dios mismo! ‘Imposible!’ kunaen aya dagiti dadduma? Saan, saan no para iti Namunganay iti pananginginaw, ti Nangaramid iti amin a nakarikrikut a porma iti biag. Dayta bassit nga ubing ti dimmakkel nga isu ti perpekto a “tao, ni Kristo Jesus.”—1 Timoteo 2:5; Mateo 1:18-25.
Dayta a pannakaiyanak ti nakaaramid iti historia. Kinapudnona, kaaduan a nasnasion bigbigenda daytoy babaen iti panangpetsada kadagiti historikal a paspasamak sakbay iti kaaldawanna kas B.C.—before Christ (sakbay ni Kristo). Kaskasdi dagiti immuna a tawtawenna ti nabusbos a siuulimek kas maysa a katulongan a karpentero idiay pagtaengan iti agsiuman kenkuana idiay Nasaret. Limmabas ti tallopulo a tawtawen. Kalpasanna idiay Karayan Jordan, imparang ni Jesus ti bagina tapno aramiden ti pagayatan ti Dios ket nabautisaran, ket ti nasantuan nga espiritu ni Jehova a Dios bimmaba kenkuana. (Mateo 3:13-17) Kalpasanna rinugian ni Jesus ti maysa a dinamiko a kampania ti panangasaba ken panangisuro. Kas impadto ni Isaias, “ti umili a nagnagna iti kasipngetan nakakita iti maysa a dakkel a lawag.”—Mateo 4:14-17; Isaias 9:2.
Ni Jesus ti nagbalin a kalatakan unay ken mapagraraeman unay a Mannursuro iti amin a tiempo. Awan sabali a natauan a mannursuro ti nakaipeksa iti kasta a nagpigsa nga impluensia iti sangatauan wenno nakaipaay iti dakkel a naespirituan a lawag ken namnama. Ania ti librona? Ti Biblia, kas iti kasasaadna idi—ti Hebreo a Kasuratan, wenno “Daan a Tulag.” Pinagbalin ni Jesus ida a sibibiag. Adu a kadaanan a padto ti natungpal kenkuana. (Idiligyo ti Mikias 5:2 iti Mateo 2:3-6.) Pinatalgedanna ti salaysay ti Genesis maipapan iti namunganayan ti tao. (Genesis 2:24; Mateo 19:3-6) Ni Jesus imbaklayna, pinapigsana, ken nasaknap nga inwaragawagna ti kangrunaan a tema ti Biblia—ti pannakaalangon ni Jehova babaen ti Pagarian ti Dios. (Mateo 4:23; 6:10) Mainayon pay, dagiti salaysay maipapan iti kabibiag ken ar-aramid ni Jesus ti prominente a paset ti Kristiano a Griego a Kasuratan, wenno ti “Baro a Tulag.” Wen, ti Biblia ket maysa a nakaskasdaaw a sagut a naggapu iti Dios, maysa a sumilsilnag a lawag iti maysa a nasipngetan, malmaldaangan a lubong.—Salmo 119:105.
Apay a Nakagulgulo ti Sangatauan?
Sungbatan aya ti Biblia dayta a saludsod? Wen. Ipakpakita dayta a daytat’ saan a maysa a kaso a panangtallikud ti Dios iti tao, no di ket, dayta ti panangtallikud ti tao iti Dios. Kasta met, ti pamunganayan a prinsipio ti wayawaya ti panagpili ti nairaman. Dagiti tattao saanda a naparsua kas robot, a naiprograma nga agtulnog. Mabalintay a pilien ti agtulnog wenno sumukir.
Idi pinarsua ti Dios ti immuna a natauan a paris idiay nakapimpintas a Paraiso ti Eden, ania ngatan ti kinaragsak ken ti kinawayawayada! Awan sakit, awan iti buteng, awan danag. Dagiti makaay-ayo a tumatayab ken an-animal ti adda met, ket adda aglaplapusanan kadagiti agkakaimas a taraon. (Genesis 1:26; 2:7-9) Idi agangay, nupay kasta, maysa a di makita a kabusor ti nagparang. Maysa a mannakabalin nga espiritu a parsua ti nagbalin nga ambisiuso, nga inapalanna ti panangituray iti masanguanan ti natauan a pamilia. Babaen iti panangibagana iti imun-una a kinaulbod, ginargarina ni Eva, ket naallukoy met ni Adan a simmukir iti bilin ti Dios a di mangmangan iti naiparit a bunga. (Genesis 3:1-7) Kas kadagiti adu itatta, ipato dagiti immuna a tao a mabalinda nga ‘aramiden ti kabukbukodanda a banag.’ Ngem gapu iti dayta aktualmente nga inkabilda ti bagida iti sidong ti panangtengngel ni Satanas, ti dios ti agdama a dakes a sistema dagiti bambanag.—2 Corinto 4:4.
Daytoy ti namataud iti nagdakkelan ken nasken unay nga isyu: Maiturayan aya a sibaballigi ti tao ti bagbagina nga awan ti Dios? Kasapulan dayta ti adu a tiempo a makapkapnek unay a mangresolber iti daytoy a saludsod. Kabayatanna, kasapulan a bayadan da Adan ken Eva ti dusa nga inkeddeng ti Dios—ti ipapatay. Agsipud ta nagbalinda a nakababbaba a managbasol, isuda wenno dagiti annakda ti awan aniaman a panginanamaan iti biag nga agnanayon a naisina iti Dios.—Roma 5:12; 1 Corinto 15:21, 22.
Maysa a Nadayag a Masanguanan
Nanipud kaaldawan ni Adan adun a kaputotan ti immay ken naglabas. Iti kanayon nga agbaliwbaliw a buya dagiti ar-aramid ti tao, adu a tipo dagiti natauan a gobierno ti naipadpadasen—ti autokrasia, demokrasia, sosialismo, komunismo, ken dadduma pay. Ngem amin napaayda. Dagiti napolitikaan, sosial, ken internasional a parparikut umad-aduda; kasta met dagiti nakaam-amak nga ig-igam iti reprep a panangdadael nga isut’ mamagpegpeggad iti panagbekkel iti lubong. Bayat ti Gubat Sangalubongan II, inkari dagiti politiko iti Laud a ti panagballigi mangiyeg iti wayawaya manipud kinapanglaw ken panagbuteng, ngem dagitoy a dua lumanlanlanda.
Ania ti solusion? Ti maysa a dakkel a parikut kasapulanna met ti dakkel a remedio—saan a nakurkurang ngem ti maysa a sangalubongan a panangdalus ken panangiyeg iti maysa a baro a lubong. Asino ti makaaramid iti dayta? Siempre saan a ti Naciones Unidas wenno aniaman a nagtitipon a napolitikaan a pannakabalin a masansan isuda met laeng ti mangdaddadael kadagiti tulagan iti talna ngangngani sakbay pay ti panagmaga dagiti pirmada! Isuda laeng dagiti awan gawgawayda nga instrumento a nakemmeg iti Sataniko a pannakabalin. (1 Juan 5:19) Ni laeng Jehova, ti Mannakabalin-amin, ti makaparmek ken ni Satanas ken dagiti demoniona, a mamagpatingga iti agdama a narugitan a lubong, ken mangiyeg iti maysa a nadayag a baro a lubong iti sidong ti nailangitan a Pagarian ti Anakna, ni Jesu-Kristo, kas ti Ari dagiti ar-ari.—Mateo 6:9, 10; Daniel 2:44; Apocalipsis 20:1-3.
Anianto ti maaramidan daytoy a Pagarian? Asinodanto dagiti makalasat iti makadadael unay a sangalubongan a panagdalus, wenno ti Armagedon? Maysa a makapainteres unay a kinapudno nga isu ti malaslasin dagiti umad-adu a tattao a ta daytoy nailangitan a gobierno ti agan-andaren ken mangisagsagana kadagiti tattao a makalasat iti Armagedon! (Apocalipsis 16:14-16) Ania a kita dagiti tattao dagita? Kuna ni Jesu-Kristo: “Naragsak dagiti naemma, ta tawidendanto ti daga.” (Mateo 5:5) Gapuna pinatalgedanna daytoy kadaanan a padto: “Iti kasakbayan ti iyaay kadakayo ti aldaw ti pungtot ni Jehova, birukenyo ni Jehova, dakayo amin a naemma iti daga, a nagtungpal kadagiti bilbilinna. Birukenyo ti kinalinteg, birukenyo ti kinaemma. Nalabit a dakayo maitalimengkayto iti aldaw ti pungtot ni Jehova.”—Sofonias 2:2, 3.
Dagiti naemma saandanto laeng a makalasat iti Armagedon no di ket, babaen ti panagtalinaedda a matalek iti Dios, tawidendanto met ti biag nga agnanayon. Kasano? Kas adda a naibagan, ti nagdakkelan a pamilia dagiti kaputotan ni Adan napukawda ti namnama ti biag nga agnanayon gapu iti sibabasol a panagsukirna. Ti ipapatay immay iti intero a rasa gapu ken ni Adan. Yantangay isut’ tao a perpekto, sabali manen a perpekto a tao ti kasapulan a mangsubbot, wenno manggatang a mangisubli, iti napukaw ni Adan. Pinunnuan ni Jesu-Kristo dayta a pakasapulan ket impaayna ti biagna “tapno isuamin a mangalagad ti pammati kenkuana saandanto a madadael no di ket adda biagda nga agnanayon.”—Juan 3:16.
Daytoy a sagana ti subbot isu ti naindaklan a sagut ti Dios iti tao. Daytat’ agaplikar saan laeng a kadagidiay makalasat a sumrek iti baro a lubong no di ket kasta met kadagidiay agsubli manipud ken patay. Nakaskasdaaw unay aya dayta? Kuna ni Jesus: “Dikay pagsiddaawan daytoy, ta umay ti oras a dagiti amin nga adda kadagiti tanem a pakalaglagipan mangngegdanto ti timekna ket rummuardanto, dagiti nagaramid ti naimbag iti panagungar ti biag, ken dagiti nagaramid ti dakes iti panagungar ti pannakaukom.” Anian a nakaay-ayat!Anian a nakaragragsak kadagiti makalasat iti Armagedon, a mabalindanto nga abrasaen dagiti ing-ingungotenda nga agsubli manipud ken patay!—Juan 5:28, 29.
Anian a nagdayag a panginanamaan ken namnama! Ket amin daytoy ti ipaayto ti naayat a Namarsua, ni Jehova, babaen iti Anakna a dungdungoen, ni Jesus. Nupay ti panginanamaan ita ti nakasipsipnget ken nakabutbuteng, ti masanguanan ti napunnno ti lawag ken namnama nga agpaay kadagidiay agad-adal ti Biblia ken agtigtignay a maitunos iti makaparagsak a mensahena. Agbibiagtayo kadagiti nakaay-ayat a tiempo. Ti Pagarian ti Dios asidegen. (Mateo 24:33, 34) Idaydayawyo ni Jehova, ti Mannangted ti “tunggal naimbag a sagut ken tunggal naan-anay a regalo”!—Santiago 1:17.
Bayat ti panangmennamennayo kadagiti nagadu a pamay-an a pakagunggonaantayo manipud kadagiti sagana ken pangpanggep ti Dios, mabalin a mariknayo ti nauneg a panagyaman ken tarigagay a mangiyebkas iti dayta iti sumagmamano a pamay-an. Ngem no mangrugrugikay pay laeng a makaawat ken mangawat iti pudpudno a namnama a maipaay iti masanguanan, mabalin a mariknayo ti inkay pay panagsukimat a naan-anay iti dayta. Paregtaendakayo a mangaramid iti dayta. Itultuloyyo ti panagadal ti Sao ti Dios agraman dagiti publikasion kas iti daytoy a tumultulong kadakayo a mangparang-ay iti pannakaammo ken panangipategyo kadagiti nadayag a pangpanggep ti Dios.
Dagidiay addaanen ti nalawag a pammati ken panagrikna a ti Pagarian ti Dios ket isu laeng ti kakaisuna a solusion iti panagrigat ti sangatauan ti mabalin a maipadada iti napaltiingan a salmista a nagkuna: “Ania ti itdekto ken Jehova a subad dagiti paraburna kaniak?” (Salmo 116:12) Dagita a tattao makitadanto a ti panangibaga kadagiti dadduma maipapan ti naaramidanen ti Dios kadatayo ken ti nadayag a masanguanan nga isagsaganana kadagiti agayat ken agserbi kenkuana ti mangiyeg iti nauneg a pannakapnek ken pudpudno a ragsak. Apay? Agsipud ta, kas kinuna ni Jesus:“Naragragsak a banag ti mangted ngem ti umawat.”—Aramid 20:35.
[Kahon iti panid 5]
JESU-KRISTO—
◆ Tinungpalna dagiti adu a kadaanan a padpadto, kas pangarigan, ti Mikias 5:2; Mateo 2:3-6
◆ Pinatalgedanna ti salaysay ti Genesis maipapan iti namunganayan ti tao—Mateo 19:3-6
◆ Pinapigsana ken inwaragawagna ti kangrunaan a tema ti Biblia, ti pannakaalangon ni Jehova babaen ti Pagarian—Mateo 4:23; 6:9, 10; Lucas 8:1
◆ Binayadanna ti napukaw ni Adan, ti maysa a perpekto a natauan a biag, a gapu iti dayta dagidiay mangalagad iti pammati Kenkuana magun-odandanto ti biag nga agnanayon—Juan 3:16
[Ladawan iti panid 7]
‘Anianto ti isubadyo ken Jehova kadagiti isuamin a pananggunggonana?’