Ti Kaiyulogan dagiti Damdamag
Dagiti Klero ken ti AIDS
“Umad-adu ti Kaso ti AIDS iti Ummong dagiti Klero a Katolio” kasta ti mabasa iti titulo ti maysa nga artikulo nga agparang iti International Herald Tribune. Kuna ti report: “Nupay no imposible ti panangala iti dokumento wenno kasuratan maipapan iti kasaknap ti parikut, dagiti mangngagas, opisiales iti iglesia ken dagiti social workers kadagiti sumagmamano a siudad iti aglawlaw ti pagilian kuna ti adu a klero a Katoliko nga inapektaran ti AIDS ket umad-adu, . . . Ti kumarkaro a pannakaammo a dagiti biktima ti [AIDS] iramanna dagiti klero a Katoliko ti mangibangon iti parikut iti iglesia gapu iti panangipapan a dadduma a papadi ken kakabsat saanda laeng a sinalungasing ti karida a saan a panangasawa no di ket nagaramidda kadagiti homoseksual nga ar-aramid a pananglabsing kadagiti linlinteg ti iglesia.”
Ti panangsalungasing iti kari a di pananangasawa, nupay kasta, saan laeng a daytat’ mapabasol, ta uray pay dagiti ig-iglesia a dagiti ministroda ket mapalubosan a mangasawa ket nakailistada kadagiti kaso iti AIDS kadagiti kleroda. Dayta met laeng a report ipalgakna a ti “AIDS inapektaranna ti adu a kita dagiti Americano, agraman dagiti rabbi, papadi nga Episcopal, dagiti ministro a Baptist ken dagiti dadduma pay a klero.”
Siempre, saan nga amin a klero nga addaan iti AIDS ket homoseksualda. Ti AIDS mabalin met a maala babaen iti normal a seksual a panagdenna ken babaen iti panangiyalison iti dara. Nupay kasta, dagita a kaso kadagiti klero iyilustrarna no ania ti mapasamak no dagiti indibidual saanda a suroten ti nalawag a pagalagadan nga impasdek ti umuna-siglo a konsilio idiay Jerusalem, kayatna a sawen, ‘ti iyaadayu . . . manipud iti dara, manipud iti animal a nalmes, ken ti pannakikamalala.’—Aramid 15:29, The New American Bible (a Katoliko).
Di Umiso nga Alikamen
“Ayatem ti bagim; maysaka a Dios.” Nakaskasdaaw a mensahe, kunaenyo aya? Pudno unay, ngem kadagiti umad-adu a bilang dagiti tattao nga agsapsapul iti kasukat a maisandi a relihion iti gagangayen a relihion, ti mensahe ket agbalbalinen a nalatak. Dagidiay a sasao, nga inyebkas iti 27-años nga asawa a babai a taga California a ni Penny Torres, ti makuna a sinarita a mismo ni Mafu, “maysa a nakaro ti itataudna a ‘biag manipud iti maikapito a kasasaad’ a naudi a nagbiag a kas maysa nga agkukutel idi umuna a Siglo idi panawen ni Pompeii,” isu a pagserserbian ni Torres a kas maysa nga “alikamen,” kuna ti Los Angeles Times. Ni Torres ket maysa kadagiti adu a tattao idiay Estados Unidos nga “alikamen” a pakisaritaan dagiti “espiritu dagiti natay” isu a mangisuro a ti tunggal maysa ket Diosna ti bagina met laeng.
Dagiti “alikamen,” sigun iti Times, ket “medium a talaga a sumrek iti kasla awan puotna wenno pudno nga awan puotna a kasasaad tapno makisarita kadagiti ‘espiritu iti [di makita] nga ayan’” wenno “dagiti biag iti ruar ti daga.” Iti kastoy a kasasaad, mabalin a dagitoy ti maawagan a mangipaay iti balakad wenno mangipaay kadagiti sungbat kadagiti salsaludsod kadagiti personal a bambanag. Napattapatta nga idiay Los Angeles laeng addada agingga iti 1,000 a tattao a mangak-akem a dagitoy ket alikamen wenno medium. Apay nga adda ti kellaat a panaginteres kadagiti medium? Iti The Miami Herald, ni Ronald F. Thiemann, dean iti Harvard Divinity School, kunaenna a ti “teolohia agbalbalinen a saan unay a makagunggona iti nasirib a biag ti Americano.”
Adu a siglo sakbayna, namakdaar ni Moises iti Israel: “Awanto ti masarakan kenka uray maysa . . . a mangaramat iti panagpadpadles wenno maysa a mammuyon wenno maysa a manangsalamangka wenno managanito.” Ti rason? “Ta siasinoman a mangaramid kadagitoy isu ti makarimon ken Jehova.”—Deuteronomio 18:10-12.
Agar-arikap iti Kasipngetan
Dagiti miembro iti ISSOL (International Society for the Study of the Origin of Life) nagtitiponda idi napan a tawen idiay Berkeley, California, a maipaay iti maikawalo a kumperensiada. Kalpasan ti panangbigbigda iti pannakasapul iti “panangbabalaw iti bagi met laeng a panangurnong kadagiti naaramidan agingga ita,” ti katulongan a nangibangon iti ISSOL a ni Propesor Klaus Dose kinunana iti Naturwissenschaftliche Rundschau, maysa a sientipiko a magasin nga Aleman, a dagiti tawtawen iti panagsirarak dina inyeg dagiti ebolusionista iti as-asideg a pannakaawat iti nagtaudan iti biag.
Nagsurat ni Propesor Dose: “Nalabit awan disiplina iti natural a siensia a mangilasin iti bagina met laeng babaen iti kasta a nagduduma nga agsusupadi a kapanunotan, pagpagarup, ken dagiti teoria a kas iti intero a tay-ak iti ebolusion iti biag. Idi 1986, nasurok a 30 a tawtawen kalpasan ti damo a makapanamnama a pangrugian iti panawen dagiti eksperimento ti panangtulad, ngangani saantayon a makaitudo iti ad-adu pay a kinapudno a mangilawlawag iti aktual a mekanismo iti nagtaudan iti biag ngem ti inaramid ni Ernst Haeckel 120 a tawtawenen ti napalabas. Nakalkaldaang, masapul a bigbigentayo a dagiti produkto a mapataud kadagiti eksperimento a panangtulad ket, iti kaaduanna, saan nga as-asideg iti biag ngem kadagiti sustansia wenno bambanag a mangbukel iti alkitran.” Kasta met, ti propesor iti Unibersidad iti Nueva York a ni Irving Kristol nagsurat a “ti main-inut a pannakabalbaliw iti populasion iti maysa a kita nga agbalin a sabali ket maysa a biolohikal a pagpagarup, saan a maysa a biolohikal a kinapudno.”
Bayat ti panagtultuloy a panagar-arikap dagiti ebolusionista kadagiti sungbat, ti panangilawlawag ti Biblia maitunos kadagiti amin a naammuanen a kinapudno. Kas iti inlanad ti mannurat iti Biblia a ni David a buyogen iti pammati: “Ta adda kenka [ti Dios] ti ubbog ti biag.”—Salmo 36:9.