Ti Thursday Island Nangngeganna ti Naimbag a Damag

BAYAT nga agliklikmut ti eroplano, ti inkam la makita isu ti nagaasideg nga isla a nagduduma ti langa ken kadakkelna iti tengnga ti umasul a baybay. Idi dandanin panagdisso, makitkitami ti pagdissuan​—anian a nagbassit​—ngem limmawa pay ti pagangsanmi!

Nagdissokami idiay Horn Island. Kalpasan ti panagdaliasat babaen ti bus a nagturong iti pantalan, maysa a bassit a balsa ti nangipan kadakami idiay Thursday Island, ti sentro dagiti Torres Strait Islands. Dagitoy a purpuro naisaknapda kas dagiti pagtalaytayan a batbato manipud iti Umamianan a murdong ti Queensland, Australia, a bumallasiw agingga idiay Papua New Guinea.

Bayat ti napudot, matutudo a panawenna (Enero ingganat’ Mayo), ti isuamin ti nakaberberde ken naglasbang. No maminsan tumanor dagiti napipigsa a bagio a pagbalinenna a nakapegpeggad ti panagdaliasat kadagiti isla. Iti dadduma a paset ti tawen, kadawyanen ti kinamaga ken ti kinatapukna.

Ti Naimbag a Damag Nadanonna Dagitoy nga Isla

Idi 1938 a ti 16 metros a sasakayan ti Watch Tower Society a Lightbearer nagsardeng iti apagbiit kadagitoy nga isla idi agturongda idiay Dutch East Indies (nga isu itan ti Indonesia). Adda a silulugan ti pito kadagiti Saksi ni Jehova, a magagaran a mangiranud ti damdamag nga isut’ mensahe ti Biblia.

Nupay kasta, di pagaammo dagitoy a kakabsat, maysa kadagiti misionero ti Kakristianuan ti simmangpet met iti isu met laeng a tiempo. Imbagana kadagiti taga isla a saanda a dumdumngeg kadagiti Saksi wenno umawat iti aniaman kadagiti pagbasaanda. Ngem idi nakadanon dagiti kakabsat iti pagtaenganna ken nakisaoda kenkuana isut’ immawat iti uppat a libro. Nakita ti dadduma kadagiti taga isla daytoy, gapuna napanunotda: ‘No mabalinna nga alaen ida, apay ket a saan kadatayon?’ Iti dayta a rabii, bayat a dagiti dadduma kadagiti Saksi agipabpabuyada kadagiti slides, maysa a kabsat ti nagtugaw idiay ruar idiay ayan dagiti karton ti libro. Maulit-ulit idiay kasipngetan, maysa nga ima nga adda kuartana ti agparang ket maysa a timek ti mangikalikagum ti maysa a libro. Iti las-ud ti maysa nga oras, 200 a libro ti naipaima! Kamaudiananna, pinadpadas ti misionero nga awan panagballigina nga usaren dagiti libro a nagun-odan kas ebidensia iti pammabasolna kontra kadagiti Saksi.

Nabuangay ti Maysa a Kongregasion

Dagidiay immuna a bin-i ti kinapudno ket saanda a nasibugan iti nakabaybayag. Saan nga aginggat’ arinunosen dagiti 1950’s a dimteng ti kanayonan a tulong kadagitoy naiputputong nga isla. Dua nga amin-tiempo a trabahador ti imbaon ti Watch Tower Society. Isudat’ sinaruno dagiti Rudds, maysa a pamilia dagiti tallo nga immay tapno agserbi iti dakdakkel ti pakasapulanna. Di nagbayag, maysa a bassit a kongregasion ti nabuangay idiay Thursday Island.

Narigat idi dagitoy a tiempo, ta natakkon ti aniaman a pagdagusan ken adda met kalalainganna nga ibubusor manipud iti gobierno ken manipud kadagiti naipasdeken a relihion. Idi damo nagtataripnong ti kongregasion iti bassit a kuarto iti ngatuen dagiti pugon ti lokal a panaderia. Panunotenyo laengen no kasano ti kapudotna dayta kadagiti tropiko!

Gaput’ pannakakitada ti pannakasapul ti panagtalinaed a napigsa iti naespirituan, naikeddeng dagiti Saksi ti tumabuno iti maysa a kumbension idiay kosta ti Australia, agangay 1,300 kilometros ti kaadayona. Gapu ta awan ti pagpasaheda iti eroplano, sikakararag a sinapulda ti sabali a dalan nga agturong iti kumbension.

Umuna, gimmatang dagiti kakabsat ti maysa a daanen a bilog a maus-usar iti panagala ti perlas nga awan ti makinana, elisena, layagna, ken angklana. Bayat panagsapsapulda kadagiti nadaddadaelen a bilog, iti kamaudiananna nakasarakda iti maysa nga addaan iti dakkel a lima-silindro a makina a de-krudo ken ti kambiona. Ginatangda daytoy, ket maragsakan dagiti kakabsat a nakasapul met kadagiti layag, angkla, ken adu pay a dadduma a pasetna. Kaskasdi, awan pay met laeng ti elisena.

Nagsaludsod ni Kabsat Rudd iti makinkukua ti pantalan no mabalinna ti kumita iti aglawlaw. Ti makinkukua ti agang-angaw a nagkuna no isut’ makasapul ti elise iti uray sadino iti paraanganna, mabalin a kukuan ti Saksi dayta. Iti pannakakellaat ti makinkua nasarakan ti maysa nga elise. Bayat ti panagbalaybalayda iti sumagmamano nga agsapa kamaudiananna, adda nakugtaran ni Kabsat Rudd a maysa a banag kadagiti natatayag a karuotan. Daytat’ maysa nga elise nga apagpag-isu la unay iti luganda!

Kalpasan ti panangisaganada iti sasakayan, ti kongregasion iti 25 ti sisasaganan a maipaay iti pito-aldaw a panagdaliasat. Idi nga agrubuatdan, ti lokal a mangkukulam ti nangikabil iti “lunod” kadakuada. Maysa a rabii ti bilog ti naisadsad iti kabatuan. Inusar dagiti kakabsat a sisasayaat ti tiempo babaen ti panagkammelda iti abastoda nga ikan. Idi dimtengen ti atab iti kabigatanna, timpaw manen ti bilog, nupay kinasapulan ti panangibombada nga iruar ti danum para iti dadduma a paset ti panagbiaheda.

Idi dumtengda idiay Townsville, Australia, maysa a nabaknang a makinkukua ti pantalan ti nangsabet kadakuada. Kaawatan a nabasana ti maysa nga artikulo ti periodiko maipapan iti panagreggetda a tumabuno iti kumbension, ket isut’ natignay a tumulong. Impapilitna ti panangtarimaanna iti naperdi iti bilog nupay dida kabaelan ti agbayad wenno tumulong iti panangtarimaan agsipud ta addada idiay kumbension. Kamaudiananna, isudat’ siningirna laeng iti $80 (E.U.) imbes a $1,000 (E.U) nga isu koma ti rasonable.

Ti Panangdanon kadagiti Dadduma nga Isla

Babaen ti panangiwanwan ni Jehova, ti mensahe ti Pagarian dimmanon met kadagiti makinruar a purpuro. Kas pangarigan, da Kabsat Rod Anderson ken Allan Webster, nga immakarda idiay Thursday Island sumagmamano a tawen ti napalabasen, inaramatda ti bilogda iti panangaskasaba kadagiti dadduma nga isla. Agingga itatta, ti panangaskasaba ti naaramidanen kadagiti 12 kadagiti 17 a mapagnanaedan nga isla.

Maysa a Nagsayaat a Paggigimongan

Ngem, nabayagen a pampanunoten dagiti kakabsat, no maaddaanda met laeng ti kabukbukodanda a Kingdom Hall idiay Thursday Island. Kalpasanna ti panagtignay iti espiritu ni Jehova ti nagbalin a nakabatbataden. Idi Setiembre 1983, ni Kabsat Graham Keen, maysa a nasigo a managbangon, ti immay tapno tumulong a mangipatakder ti maysa a pagtataripnongan. Sumagmamano kadagiti kongregasion ti Australia ti siaayat a nangted kadagiti kasapulan a materiales a maipaay iti panagbangon. Dagitoy ti naikarga kadagiti container ken nailugan manipud Cairns, Queensland. Nagsiddaaw dagiti taga puro a makakita iti daytoy a sangabunton a materiales a pagbangon iti naminsan awan nagyanna a lote. Inabutna laeng ti 140 nga aldaw a panagtrabaho tapno leppasen ti pagtataripnongan, agraman ti maysa a balay iti likudan. Addada 120 a siraragsak a timmabuno iti aldaw a naidedikar ti baro a pagtataripnongan.

Anian ti ragsak amin dagiti Saksi a maaddaan iti daytoy baro a Kingdom Hall nga agserbi kas sentro iti trabaho a panangisaknap ti naimbag a damag idiay Torres Strait Islands. Babaen ti tulong ti espiritu ni Jehova, maragsakanda a mangipapaay ti dayaw ken ni Jehova a Dios.​—Isaias 42:12.