Panangipukkaw ti Kinapudno kadagiti Alps ti Austria
NAINKALINTEGAN nga agdindinamag ti Austria kadagiti alpino a katantanapanna, ti Vienna Woods, ken ti nagpintasan nga asul a Danube. Dagitoy ken dagiti dadduma a nalalatak a vista ti mangatrakar kadagiti sangaili manipud intero a lubong nga umay iti daytoy nagbassit a pagilian iti tengnga ti Europa.
Iti panawen a kapuskol dagiti turista idi naglabas nga Agosto, maysa a grupo ti ngangngani sangagasut a bisita manipud 17 a ganggannaet a pagilian immayda a kimmita ti maysa a banag nga interamente a naiduma. Immayda idiay Vienna tapno tumabuno iti dedikasion ti baro a sanga nga opisina ti Watch Tower Society idiay Austria, nga isut’ mangiturturong iti panangikaskasaba ti Pagarian a trabaho dagiti Saksi ni Jehova idiay Austria.
Manipud Bassit a Pangrugian
Ti umuna a sanga nga opisina ti Sosiedad idiay Austria ti naipasdek idiay Vienna idi 1923. Daytat’ nakurkurang ngem sangapulo a tawen kalpasan ti damo a panangbisita kadagiti uppat a suskritor ti Pagwanawanan iti dayta a siudad. Iti dayta a tiempo, ti bilang dagiti manangiwaragawag ti Pagarian ti dimmakelen iti agarup sangagasut. Kalpasanna immay ti Gubat Sangalubongan II ken ti panagturay dagiti Nazi, maysa a periodo iti nakaro a pannakasuot ken pannakaparigat dagiti matalek a kakabsat. Ngem nagandorda, ket idi agpatingga ti gubat, dimmakkel ti bilangda iti nasurok a 700.
Tapno maaywanan ti trabaho a panagsaknap, maysa a pasdek idiay Gallgasse 44 ti nagatang idi 1957. Kadagiti napalabas a tawtawen, sumagmamano a panangretubar ti naaramid iti pasdek tapno maaywananna ti agtultuloy nga idudur-as ti trabaho ti Pagarian iti dayta a daga. Idi 1973 ti bilang dagiti agibumbunannag ti Pagarian nalabsannan ti 10,000. Gapuna, idi karrugi ti 1980’s, naaramid dagiti plano a maipaay ti panangpalawa. Dagiti legal a lapped idi agangay ti napagballigian, ken dagiti sanikua nga asideg iti sanga ket nagatangda. Idi Marso 1983 maysa a taga ruar a kompania rinugianda ti pundasion. Kalpasan dayta, simmublaten dagiti kakabsat ket riningpasda ti pasdek.
‘Panangibangon iti Bukodmi a Bethel’
Dagiti Saksi manipud intero nga Austria nagboluntarioda a maipaay iti trabaho. “Ibangbangonmi ti bukodmi a Bethel” ti replanda. Agsangpetda babaen kadagiti kotse ken bus, agingga iti 190 iti naminsan a ngudo ti lawas. Napattapatta a maysa iti tunggal lima nga agibumbunannag iti pagilian ti nakiraman iti trabaho. Dadduma dagiti propesional—arkitekto, tubero, ken dadduma pay. Dadduma nangtedda kadagiti materiales wenno intukonda ti pannakausar dagiti talyerda. Dadduma ti pimmanaw pay kadagiti panggedanda ket immayda nga agtrabaho nga agpaay iti intero a panawen ti panagbangon.
Maysa a kabsat a lalaki a nangbusbos ti paset iti bakasionna idiay pagbangbangonan ti nagsurat: “Kayatko ti agyaman manen kadakayo iti nakaskasdaaw a maysa a lawas a panagbakasion. Kaiyarigan dayta ti nagyan iti maysa a nakaul-ulimek nga isla a nalawlaw iti nadaleg a baybay ti sangatauan. Nakaskasdaaw ti panangtagiragsak iti kasta a pisikal ken naespirituan a pannakapabang-ar nga awan pulos ti bayadna.” Uray met dagiti babassit nakiramanda. Maysa a walo a tawen ti nagsurat: “Nangngegko a kasapulanyo ti kuarta a maipaay iti panangibangon ti Bethel. Kayatko nga ipatulod kadakayo ti sumagmamano iti kuarta a naurnongko. Iratipko ti 200 shillings [agarup $16, E.U.] a kadua daytoy a surat.” Dadduma nagar-aramidda ti tinapay wenno nagburasda kadagiti berries ken nagaramidda ti tubbog manipud prutas para kadagiti boluntario. Dagiti agibumbunannag kadagiti 36 a kongregasion idiay Vienna ti mangmangted kadagiti pagpalammiis tunggal Sabado iti intero a panawen ti panagbangon.
Nakabalan a Maipaay iti Ad-adda Pay a Panagrang-ay
Babaen iti pannakapabaro ti orihinal a pasdek ken ti pannakainayon dagiti aglawlaw a baro a pasdek, dagiti pasilidades ti sanga ti mamintallo a daras a dakdakkelen ngem idi damo, nga addaan ti dagup nga espasiona a 5,400 metros kuadrados. Ti pasdek ket ramanenna ti 38 a kuarto, ti kumidor a maipaay ti 80 a tattao, baro a kusina, ken paglabaan. Maysa a baro a Kingdom Hall ti adda iti likudan a direkta ti orihinal a pasdek. Dagiti opisina ti administrasion ken dagiti nadumaduma a departamento ti nangokupar kadagiti dadduma a paset ti pasdek.
Idi Agosto 22, 1987, isu ti aldaw ti dedikasion a maipaay iti baro a pasilidades ti sanga. Kadagiti 282 a sangngaili agarup sangagasut a bisita manipud 16 a sangsanga ti Europa ken maysa ti naggaput’ Korea. Adda met a siimatang ti agarup sangagasut kadagiti old-timers ti Austria a nakalasat kadagiti susuot idi Gubat Sangalubongan II. Ti katataengan kadakuada isu ti 102-años a ni Maria Hack a taga Graz. Ti nagdengngeg a 6,810 a tattao kadagiti pito a dadduma a disso ti nakangngeg met ti programa ti dedikasion babaen ti pannakaisilpoda iti telepono.
Dagiti kangrunaan a pumapalawag iti programa ti dedikasion ket ramanenna da T. Jaracz ken M. G. Henschel iti Bagi a Manarawidwid dagiti Saksi ni Jehova sadi Brooklyn, Nueva York Nagpalawag iti tema a “Dagiti Sangsanga nga Agbunga iti Pakaidayawan ni Jehova,” inusar ni Kabsat Jaracz ti Juan 15:2, 8 a mangipakita a dagiti “sangsanga” agserbida a pakaidayawan ni Jehova no agbungada ti adu. Dagiti baro a pasilidades ti sanga ket makatulongda ti dakkel iti panangpataud ti bungbunga a pakaidayawan ni Jehova.
Iti diskurso ti dedikasion, impaganetget ni Kabsat Henschel a ni Jehova ket maysa a Dios ti panggep. Saanna laeng nga impakaammo ti panggepna a nasapa no di ket indemostrana met nga isut’ addaan abilidad a mangitungpal iti dayta. Agpapan pay ibubusor ni Satanas, mabalintay ti agtalek a ti panggep ti Dios ket matungpalto.
Idi nagserran ti programa, amin dagiti dimmar-ay nariknada ti pannakaparegtada nga agtultuloy iti trabaho a panangaskasaba a napabaro ti kinapingetda. Nalawag, dagiti nagsasayaat a baro a pasilidades ti mangkabal kadagiti Saksi idiay Austria a mangipukkaw ti naimbag a damag ti Pagarian iti dakdakkel pay a pamay-an iti daytoy alpino a pagilian, ken pakaidayawan ti Naindaklan a Namarsua, ni Jehova.
[Dagiti ladawan iti panid 23]
Baro a pasdek, a buybuyaen manipud iti minuyongan
Kingdom Hall
Kangrunaan a pagserkan
Baro a pasdek, agraman ti napabaro a pasetna iti kannawan