“Kristo, Anak ti Dios a Sibibiag”
KALPASAN ti panangipakaammo dagiti adalanna no aniat’ kunkuna dagiti tattao maipapan kenkuana, insaludsod ni Jesus: “‘Ngem, dakayo, siasinoak ti panagkunayo?’ Ket simmungbat ni Simon Pedro: ‘Sika ti Kristo, ti Anak ti Dios a sibibiag.’”—Mateo 16:15, 16.
Agmaymaysa aya ni Pedro iti pannakagteng itoy a konklusion? Nikaanoman! Kitaenyo no asino pay dagiti dadduma, ket anagenyo ti nakaibatayan ti panangbigbigda.
DAGITI IMMUNA A MANANGSUPORTAR: Ni Juan a Mammautisar, da adalan a Nataniel ken Marta, ken ni Saulo ti Tarso, ti sumagmamano kadakuada, inawaganda amin ni Jesus nga Anak ti Dios. (Mateo 14:33; Juan 1:33, 34, 49; 11:27; Aramid 9:20) Ti pammatida ti napabileg idi a nakitada no kasano a dagiti padto a nairanta a mangilasin ti naikari a Mesias ket natungpalda ken ni Jesus.
DAGITI IMMUNA A BUMUSBUSOR: Dagiti Judio a kayatda a papatayen ni Jesus ti nangtukoy kenkuana kas Anak ti Dios, kas kadagiti soldado nga adda idi iti pannakailansana. (Mateo 27:54; Juan 19:7) Nupay di ipamatmat daytoy iti panamati iti biang dagita a bumusbusor, nupay kasta ipakpakita dayta nga ammoda no aniat’ kunkunaen dagiti supernatural a pasamak a nanglawlaw ti pannakailansana ti awan duadua nangtignay ti dadduma kadakuada a panunoten manen ti kuestion maipapan iti kinasiasinona.
DAGITI ANGHEL: Idi inyanunsioda ti pannakaiyanak ni Jesus, ni anghel Gabriel ti nangawag kenkuana Anak ti Dios. (Lucas 1:32, 35) Uray dagiti nagunggan ti demonio a tattao nga addat’ sidong ti impluensia dagiti managdakdakes nga anghel nagikkisda: “Sika Anak ti Dios, ania ti bibiangmi kenka?” (Mateo 8:28-32) Gaput’ kaaddan ni Jesus idiay langit sakbay kinataona, kaawatan nga agpadpada dagiti naimbag ken dakes nga anghel ammoda no siasino ni Jesus.
NI JESUS MISMO: Nikaanoman saan a pinagpannakkel ni Jesus nga isut’ Anak ti Dios gaput’ panggepna a manggun-od ti pabor kadagiti dadduma wenno tapno pagragsakan ti dayaw nga intukon daytoy a pannakirelasion. Iti kasumbangirna, iti kaaduan a kaso sipapakumbaba a dinakawatna ti bagina kas “ti Anak ti tao.” (Mateo 12:40; Lucas 9:58) Ngem iti sumagmamano nga okasion inadmitirna nga isut’ Anak ti Dios.—Juan 5:24, 25; 10:36; 11:4.
NI JEHOVA A DIOS: Asinot’ makaipabigbig nga addaan dakdakkel nga autoridad maipapan ken Jesu-Kristo no di ni Jehova a Dios mismo? Namindua namaneknek ni Jehova manipud langit: “Daytoy ti Anakko a dungdungngoek, isu nga inanamongak.”—Mateo 3:17; 17:5.
Ti Dios Inanamonganna ni Jesus—Dakayo Ngay?
Idi umuna a siglo, rinibo a tattao ti nangakseptar ken ni Jesus iti kinaisuna: ti naikari a Mesias, wenno Kristo, a naibaon ditoy daga a mangalangon iti soberania ni Jehova ken tapno ited ti biagna kas subbot a maipaay ti sangatauan. (Mateo 20:28; Lucas 2:25-32; Juan 17:25, 26; 18:37) Iti imatang ti nasaem nga ibubusor, narigat koma ti pannakatignay dagiti tattao nga agbalin a paspasurot ni Jesus no saanda koma a makasiguro iti kinaisuna. Sireregta ken situtured, inabrasada ti trabaho a naited kadakuada, nga “agaramid kadagiti adalan iti tattao iti isuamin a nasion.”—Mateo 28:19.
Itatta, minilmilion kadagiti adalan a Kristiano ammodan a ni Jesus ket saan a basta sarsarita. Isut’ inawatda kas ti nailangitan a naitrono nga Ari ti naipasdeken a Pagarian ti Dios, nga itan agin-inut a mangituray iti daga ken ar-aramidna. Daytoy um-umayen a nasantuan a gobierno ti maabrasa a damag agsipud ta daytat’ mangikarkari ti bang-ar manipud parparikut ti lubong. Dagitoy pudno a Kristiano idemostrada ti amin-puso a panangsuportarda iti Agturay a pinili ti Dios babaen iti panangiwaragawagda iti “daytoy naimbag a damag ti pagarian” kadagiti sabsabali.—Mateo 24:14.
Dagitoy mangsuportar ti urnos ti Pagarian babaen ken “Kristo, ti Anak ti Dios a sibibiag,” agbiagdanto a mangtagiragsak iti bendision nga awan inggana. Dagitoy a bendision ti maipaay met kadakayo!
[Blurb iti panid 8]
Dagiti minilmilion a naminsan saanda a sigurado iti kinasiasino ni Jesus ti nagkaykaysada itan iti panangsuportar kenkuana kas ti Agturay ti Pagarian ti Dios
[Ladawan iti panid 7]
Ni Pedro nabigbigna ni Jesus kas ti “Kristo, ti Anak ti Dios a sibibiag.” Kasta met dagiti nasurok a 3,000,000 a saksi ni Jehova itatta