Ti Biag ken Ministerio ni Jesus

Ti Parikut Maipapan iti Tawid

NALAWAG pagaammo dagiti tattao a ni Jesus ti makipangpangan iti balay ti Fariseo. Gapuna naguurnongda a rinibo iti ruar ket ur-urayenda ti iruruar ni Jesus. Saan a kas kadagiti Fariseo a nangbusor ken Jesus ken pinadpadasda a tiliwen iti panagsaona iti aniaman a di umiso, sigagagar dagiti tattao nga agimdeng kenkuana a buyogen ti panangapresiar.

Timmaliaw nga umuna kadagiti adalanna, kuna ni Jesus: “Agaluadkayo iti lebadura dagiti Fariseo, ta isu ti panaginsisingpet.” Kas naidemostra bayat ti pannangan, ti intero a narelihiusuan a sistema dagiti Fariseo ti napno ti panaginsisingpet. Ngem uray pay no ti kinadakes dagiti Fariseo ti nailemmeng babaen iti pabuya ti kinasanto, daytanto met laeng ti agangay maibutaktak. “Ngem awan ti naabbungan,” kuna ni Jesus, “a dinto maipatak, ken nailemmeng a dinto a maammuan.”

Kalpasanna inulit ni Jesus ti pammaregta nga intedna kadagiti 12 idi imbaonna ida iti panangaskasaba idiay Galilea. Kunana: “Dikay pagbutngan dagiti mamapatay ti bagi ket iti kalpasanna awan ti sabali a mabalinda nga aramiden.” Yantangay di malipatan ti Dios uray ti maysa laeng a billit-tuleng, impasiguro ni Jesus kadagiti pasurotna a ti Dios dinanto met malipatan ida. Kunana: “Ket inton isaklangdakayo kadagiti pagtataripnongan ti publiko ken kadagiti opisiales ken agtuturay ti gobierno, . . . ti nasantuan nga espiritu isuronakayto iti dayta met la nga oras no ania ti rebbengyo a sawen.”

Maysa a tao manipud tallaong ti nagsao: “Mannursuro,” indawatna, “ibagam ken kabsatko nga ibingayannak ti tawid.” Kuna ti Linteg ni Moises a ti inauna nga anak a lalaki ti umawat ti dua a kapaset iti tawid, gapuna awan rason a pagsuppiatan. Ngem kaawatan a ti lalaki kayatna ti maaddaan iti ad-adu ngem ti nainkalintegan a bingayna iti tawid.

Siuumiso a nagkitakit ni Jesus a makiraman. “Tao, asino ti mangikabil kaniak a mangukom wenno mamagbingay kadakayo?” insaludsodna. Kalpasanna intedna ngarud daytoy nasken a pammagbaga kadagiti umariwekwek: “Kitaenyo ket agaluadkayo iti amin nga agum, ta ti biag ti tao saan nga adda iti kaadu dagiti gameng a kupkupikupanna.” Wen, agpapan pay kasano kaadu ti magamgam ti maysa a tao, gagangay isunto met laeng ti matay ken panawannanto met laeng amin dagita. Tapno maipaganetget daytoy a kinapudno, agraman panangipakitana ti kinamaag ti di panangaramid ti nasayaat a pakasarsaritaan iti Dios, nagusar ni Jesus ti maysa a pangngarig. Inlawlawagna:

“Ti talon ti maysa a tao a nabaknang nagbunga ti adu. Ket pakpakinakmenna, a kunkuna, ‘Anianto ti aramidek, ta awan ti pangidulinak kadagiti apitko?’ Ket kinunana, ‘Aramidekto daytoy: Rakrakekto dagiti kamaligko ket bangonekto ida a dakdakkel, ket idulinkonto idiay dagiti amin nga apitko ken gamgamengko; ket kunakto iti kararuak: “Kararua, adu dagiti gameng nga indulinmo a maisagana iti adu a tawen; aginanaka, manganka, uminumka, agragsakka.”’ Ngem kinuna kenkuana ti Dios, ‘Nakuneng, ita a rabii masublian a dawaten kenka ti kararuam. Ket dagiti adda nga insaganam asinonto ti agtagikua kadakuada?’”

Kas pangserra, kinuna ni Jesus: “Kastoy ti agurnong ti gamgameng a maisagana kenkuana ket saan a nabaknang iti Dios.” Nupay no dagiti adalan saanda a masiluan iti kinamaag ti panagurnong ti kinabaknang, mabalin a nakalaklaka a maisiasida manipud panagserserbida ken Jehova iti amin a kararuada babaen kadagiti inaldaw a panagagawa iti panagbiag. Gapuna us-usaren ni Jesus ti okasion tapno uliten ti nagsayaat a balakad nga intedna agarup maysa ken kagudua a tawen a nasapsapa idiay Sermonna iti Bantay. Timmaliaw kadagiti adalanna, kunana:

“Gapuna kunak kadakayo, Dikay agagawa iti maipaay iti biagyo no anianto ti kanenyo wenno iti bagiyo no anianto ti ikawesyo. . . . Panunotenyo dagiti wak a dida agmula ket dida met agani ket awan ti pagidulinanda wenno agamangda, ket ti Dios taraonanna ida. . . . Kitaenyo dagiti lirio no kasano ti idadakkelda; saanda nga agtrabaho ket saanda met a mambi; ngem kunak kadakayo nga uray ni Salomon agraman ti isuamin a dayagna saan a nakawesan a kas ti maysa kadakuada. . . .

“Gapuna dikay agagawa ti kanenyonto wenno ti inumenyonto, ket dikay met agdanag; ta isuamin dagitoy a banag ag-agawaan dagiti nasion ti lubong, ngem ni Amayo ammona a masapulyo dagitoy. Ngem sapulenyo a nangnangruna ti pagarianna, ket isuamin dagitoy a bambanag mainayonto kadakayo.”

Nangnangruna bayat kadagiti tiempo ti rigat ti panagbiag a maikari dagiti sasao ni Jesus iti nasinged a panangusig. Ti tao a masikoran unay kadagiti material a kasapulanna ket mangrugi a kumapuy iti naespirituan nga ar-aramidna, iti kinapudnona, mangipakpakita ta ti kinakurang ti pammati iti abilidad ti Dios a mangipaay kadagiti ad-adipenna. Lucas 12:1-31; Deuteronomio 21:17.

◆ Apay, nalabit, nagsaludsod ti tao maipapan ti tawid, ket ania a pammagbaga ti inted ni Jesus?

◆ Ania a pangngarig ti inusar ni Jesus, ket ania ti puntona?

◆ Ania a balakad ti inulit ni Jesus, ket apay a daytat’ maiyanatup para iti daytoy nga okasion?