Report dagiti Manangiwaragawag ti Pagarian
Ti Kinaanep ti Asawa a Lalaki Pinagkaykaysana ti Pamilia
ANIA komat’ aramidenyo no inawatyo ti kinapudno kalpasanna ti asawayo ti mangbusor kadakayo ti sipapait unay ket aramidenna amin nga adda iti pannakabalinna a mangdadael ti kinatarnawyo? Mapapigsakayto aya iti sasao ni Pablo idiay 2 Timoteo 3:12, a sadiay kinunana: “Isuamin dagiti mayat nga agbiag iti nadiosan a debosion ken Kristo Jesus aglak-amdanto ti pannakaidadanes”? Agibturkayto aya wenno sumukokayon? Maysa a Kristiano a lalaki idiay Italia ti naipasango iti kasta a karit. Isut’ saan a simmuko, ket isut’ binendisionan ni Jehova gapu iti dayta.
Ti lalaki nga agproblema ket dati a nasaet a komunista, ngem isu met ti napeklan a Katoliko. Isut’ mamatpati iti panagpapada dagiti tattao ket patienna nga agpadpada dagitoy a ganuat ti mangikaskasaba iti daytoy a kalat. Maysa kadagiti katrabahuanna ti nangisasao kenkuana maipapan ti Pagarian ti Dios, ket dagus a nabigbigna, a daytoy ti kakaisuna a pamay-an a pakaragpatan ti panagpapada. Isut’ kimpet iti kinapudno iti isu met laeng a regta nga impakitana iti komunismo ken Katolicismo ket nabautisaran idi 1972. Ti ngay baketna? Isut’ nangbusor a sipapait kenkuana. Insalaysay ti babai:
“Idi 1970 nga immuna a naiyamammo ni lakayko kadagiti Saksi ni Jehova idiay pagtartrabahuanna. Nagin-inut, bayat a nakipagad-adal iti Biblia, nalasinko a daytat’ maysa a baro a relihion ket addada dagiti punto a diak pakitunosan. Dagus a nangrugi ti panangidadanes manipud kaniak ken kadagiti dadduma a kameng ti pamilia.”
Intuloyna: “Ti nagannak ni lakayko ti nangriribuk kenkuana, nga inusar amin a pamay-an a mangpasardeng kenkuana. Idi rumangrangay ni lakayko iti pannakaammona iti Biblia, nakitana ti pannakasapul a panangdalus ti pagtaenganmi manipud kadagiti idolo. Imbagak kenkuana a no aramidenna dayta adda dakes a mapasamak. Dinadaelna ti maysa a narelihiusuan a ladawan, ket rinugiak metten ti naan-anay a berbal ken pisikal a panangatakar kenkuana ket pinisang-pisangko ti sumagmamano kadagiti magasinna. Iti panagik-ikkisko, dagus nga immarayat dagiti katugangak ket nagpungtotda met kenkuana, ngem saan a bimmalbales.
“Ti di pagkikinnaawatan nagtultuloy agingga a pinanawak idi binusorna ti itatabuno ti anakmi a babai iti katekismo idiay simbaan. Imbaga ni lakayko kaniak a no diak agawid idiay balay, isut’ mangaramid ti pormal a darum iti panangabandonar. Kalpasan ti maysa lawas naikeddengko met laeng ti agsubli.
“Iti kanayonan pay a panagregget a mangpasardeng kenkuana, napanak iti maysa a medium ti espiritu ket indawatko nga isut’ kulamenna. Ti medium ti nangrugi nga agsaludsod kaniak, ket inlawlawagko ti adda a situasion. Idi maammuanna dayta, kinunana kaniak nga awan aniaman a kulam ti agepekto iti uray asinoman a Saksi ni Jehova.
“Napanunotmi ti umuman iti lokal a padi. Imbalakad ti padi a mapankami iti maysa nga abogado. Iti pannakakellaatko pinaregtanak ti abogado a makigimong ketdi kadagiti Saksi ni Jehova a kadua ni lakayko. Ti katugangak a lalaki, a kaduak idi, ti nagmadi, a kunkunana a ti pamiliana ket debosionado unay ken San Rocco, ‘Ti Mannalaknib’ ti ilimi. Nupay kasta, inlawlawag ti abogado a daytoy a ‘santo,’ kas met laeng kadagiti amin a sabsabali nga idolo, ket ulbodda. Kalpasanna inyam-ammona ti bagina kas tsirman ti Catholic Action, ket imbagana kadakami nga isut’ saan a makibibiang kadagiti amin a narelihiusuan a pipiesta agsipud ta, gapu ta nabasanan ti Biblia, naammuanna nga ulbodda amin dagita. Kas pangserra, kinuna: ‘Inka ket kumuyogka ken lakaymo ket agkappiakayo. Agimdengda kenkuana, ket mangrugika metten a makipagadal ti Biblia.’
“Gapu iti daytoy a pammaregta pinampanunotko ti kababalin, dagiti panagbalbaliw, ken panagan-andor ni lakayko; gapuna rinugiak ti makigimong kadagiti Saksi ni Jehova a kaduan lakayko. Nasdaawan iti ayat nga ipakpakitada sadiay, nakipagadalak, ken nagpasalista iti Teokratiko nga Eskuelaan ti Panagministro, ket nangrugiak metten iti tay-ak ti serbisio. Iti kamaudianan, insimbolok ti dedikasionko idi 1977 ket maragsakanak itan ta addaak iti kinapudno, agyamanak ken Jehova a nangtulong ken lakayko a makapagandor ket pinagkaykaysana ti intero a pamiliami iti panagdaydayaw Kenkuana.”