Ti Kaiyulogan dagiti Damdamag

Agsakit nga Edukasion

Bayat ti napalabas a sangapulo a tawen, maysa a kolehio idiay Estado ti Nueva York ket mangidatdaton iti maysa a kurso maipapan iti seksualidad ti tao a pakagun-odan dagiti estudiante iti tallo a kredito iti kolehio. Dagiti estudiante “makalikagumanda a rummuar ‘iti klase’ tapno makisarita kadagiti balangkantis, sumarungkar kadagiti bar dagiti bakla wenno sumarungkar kadagiti igid ti baybay a yan dagiti lamolamo,” kuna ti maysa a kolumnista iti New York Post. Ti libro ti klase makuna a mangipaay iti nalawag nga instruksion maipapan iti panangaramid iti pannakidenna babaen iti ngiwat ken paregtaenna ti panangaramid iti masturbesion. Sigun iti Post, bilang paset ti kurikulum ti klase, maipabuya kadagiti estudiante ti maysa a pelikula a mangipakita iti “agasawa nga agdendenna,” agraman ti napadakkel a naimbag a ladawan ti anatomia ti lalaki ken babai.” Anian ti pannakaiduma a naimbag iti gagangay a kinaemma ken kinasingpet?​—Filipos 4:8, 9.

Nupay no dagiti agtutubo masapul a maammuanda dagiti kinapudno iti biag ken tapno maaddaanda iti nasalun-at a kababalin kadagita, dagiti nagannak ti addaan ti kangrunaan a rebbengen a mangipaay iti kasta a pannursuro. (Proverbio 22:6) Aniaman a kurso iti eskuelaan a mangiparparegta iti panagdenna iti ruar ti panagasawa ken mangkalikagum kadagiti estudiante a mangbuya kadagiti maiparparit a pelikula ken tapno mangsirarak iti homoseksualidad ken panagbalangkantis ket, siempre, saan a pulos a maawat kadagiti pudno nga agdaydayaw iti Dios. Nalawag a deskribiren ti Biblia a dagiti mannakiabig, mannakikamalala, ken dagiti homoseksual ket tattao a “nakababain ti seksual a kababalinda,” nga agaramidda iti “nakaap-aprang.” Maipapan kadagita, ibilin ti Biblia: “Umadayokayo iti pannakiabig.” Ket saan la a dayta, kunaenna: “Ngem ti pannakiabig . . . saan man la koma a madukit kadakayo.”​—Roma 1:24-32; 1 Tesalonica 4:3; Efeso 5:3, 5; Galacia 5:19, 21.

Ulbod a Namnama

Dagiti tattao nga agsapsapul iti “ad-adda a personal nga ilalasat iti ipapatay ti umik-ikayen iti gagangay a porma ti pompon a pilpilienda ti kadaanan nga aramid a panamagbalin a mummy iti bangkay, kuna ti The Wall Street Journal. Ti kababaan a presio a $7,500 “ti mangiyuper iti maysa a suki iti uneg ti dua a bulan iti arak, yerba ken dagiti kemikal a pagitalimeng, a nasapsapuan iti nabangbangluan a lana ken nabalkot iti lupot, fiberglass, polyethylene ken plaster,” kuna ti Journal. Dagiti kalupkop a balitok wenno bato a naiyarkos iti lungon a tanso a naikorte iti bagi ket mabalin nga aggatad iti $100,000 ken nangatngato pay.

Kaskasdi, saan laeng a ti panamagbalin a mummy iti bangkay ti mangaw-awis kadagiti suki. Maysa a tao ti nagkuna a “no pudno a kunaen dagiti dadduma a Kristiano nga iti Aldaw ti Panangukom ayabannatayto ni Kristo manipud iti tanem, ngarud kayatkonto a nasayaaat ti itsurak.”

Kas kadagiti kadaanan nga Egipcio a mamati a ti bagi ket masapul a maitalimeng a maipaay iti panagsubli ti kararua kalpasan ti panagbiag manen kalpasan ti ipapatay, dagita a tattao gagangay nga ibatayda ti namnamada iti sursuro a ti kararua ket saan a matay. Dagiti relihiuso a papangulo insuroda nga iti Aldaw ti Panangukom, dagiti bagi dagiti nalinteg ken dagiti nadangkes maikaykaysadanto iti kararuada a makiraman iti nailangitan a bendision wenno iti pannakailunod iti impierno nga apuy.

Kaskasdi, ti doktrina a natawid nga imortalidad ket saan a naisuro iti Biblia. Imbes ketdi, isuro ti Biblia a matay ti kararua. “Ti kararua nga agbasol​—matayto.” (Ezequiel 18:4) Gapuna, ti namnama iti Biblia a maipaay iti masanguanan a biag ket agpannuray, saan nga iti pannakalasat a sibibiag ti imortal a kararua, no di ket iti panangpagungar ti Dios iti tao iti bukodna a padron ti panagbiag ken ti maitutop a bagi nga addaan iti isu met laeng a pakailasinan ken pakalaglagipan idi natay. Umiso ngarud, kunaen ni Jesus: “Umay ti oras a dagiti amin nga adda iti tanem mangngegdanto ti timekna ket rummuardanto.”​—Juan 5:28, 29.

“Saan a Paset iti Lubong”

Ti Watchtower Bible and Tract Society of New York, Inc., nakiuman iti New York City Board of Estimate idi napan a tawen tapno dawaten ti panagbalbaliw ti zona tapno maibangon ti 19-grado a pagtaengan. Nupay no ti kaaduan kadagiti miembro ti board busorenda ti proyekto, ti dua a botos a mangpabor iti pannakabalbaliw ti zona ket impaay ti mayor ti Siudad ti Nueva York a ni Edward Koch. Iti sasaona a mangilawlawag iti pakaibatayan ti pangngeddengna, ni Mayor Koch napaliiwna a dagiti “Saksi ni Jehova . . . mabalin laeng a maibilangda a nasayaat a kakaarruba . . . Raemek ida iti kasta unay.” Ngarud innayonna: “Naibaga kaniak a gapu kadagiti relihiuso a rason mabalin a saanda nga agbotos iti aniaman nga eleksion ket mabalin a dayta ti maysa a parikut itoy a proyekto, ta narigat a mangabak dagiti saan nga agbotbotos iti mapagsusuppiatan a banag no dagiti nabotosan nga opisiales ket piliten dagiti adu a tattao.”

Makomendaran ni Mayor Koch iti turedna ken ti dina panangidumduma iti sidong dagiti adu a bumusbusor. Nupay no naiduma koma ti nagbanaganna no makiramraman dagiti Saksi ni Jehova iti napolitikaan nga eleksion, dagitoy saanda a sumiasi iti neutral a takderda maipapan kadagiti napolitikaan nga isyu​—kasano man kadakkel ti premio. Para kadagiti pudno a Kristiano nalawag ti sasaadenda. Kinuna ni Jesus: “Saanda a paset ti lubong, a kas kaniak a saanak a paset ti lubong.”​—Juan 17:16.