Tinawen a Miting​—Oktubre 7, 1989

TI TINAWEN A MITING dagiti miembro ti Watch Tower Bible and Tract Society of Pennsylvania ket maangay inton Oktubre 7, 1989, idiay Assembly Hall of Jehovah’s Witnesses, 2932 Kennedy Boulevard, Jersey City, New Jersey. Ti damo a miting dagiti miembro laeng ti maangay iti alas 9:30 t.b., a sarunuen ti pangkaaduan a tinawen a miting iti alas 10:00 t.b.

Dagiti miembro ti Korporasion masapul a pakaammuanda ti Opisina ti Sekretario itan iti aniaman a panagbalbaliw ti pagsangpetan ti koreoda bayat ti napalabas a tawen tapno ti regular a sursurat ti pakaammo ken proxies dumanon kadakuada di agbayag kalpasan ti Agosto 15.

Dagiti proxies, a maipatulod kadagiti miembro agraman pakaammo ti tinawen a miting, ket maisublida tapno makagtengda iti Opisina ti Sekretario ti Sosiedad saan a naladladaw ngem Setiembre 1. Tunggal miembro masapul a kompletuenna ken isublina a daras ti proxyna, nga ibagbaga no isut’ personal nga addanto iti miting wenno saan. Ti impormasion a naited iti kada proxy ti rebbeng a piho iti daytoy a punto, yantangay daytat’ pagpannurayan iti panangdeterminar no asinonto dagiti adda a personal.

Mainanama a ti intero a sesion, agraman ti pormal a bambanag ti miting ken dagiti report, ti mairingpas iti ala 1:00 t.m. wenno di agbayag kalpasan dayta. Awantot’ sesion iti malem. Gapu iti limitado nga espasio, ti pannakaadmitar ket babaen iti tiket laeng. Awan maaramid nga urnos a panangisilpo iti tinawen a miting babaen iti telepono kadagiti dadduma a luglugar.