Malagipyo Pay Aya?

Tinagiragsakyo aya a basbasaen dagiti nabiit pay a bilang Ti Pagwanawanan? Ngarud, kitaenyo no masungbatanyo dagiti sumaganad a salsaludsod:

◻ Aniat’ pakaibatayan ti naballigi a panagasawa?

Dagiti agassawa ti masapul a mangipakita ti panagayat, panagraem, ken kinasungdo iti maysa ken maysa, nga apresiaren dagiti naimbag a kualidad wenno birtud ti maysa ken maysa ken sursuruen ti panangpalabas ken panangpakawan kadagiti pagkapuyan ti maysa ken maysa.​—5/15, panid 15.

◻ Kadagiti ania a pamay-an a ti linlinteg ti Dios nga intedna iti Israel tinulonganna ida a nagtalinaed a nasantuan?

Tinulongan ti linlinteg ni Jehova dagiti Israelita a nagtalinaed a nadalus iti naespirituan, iti moral, iti pampanunot, iti pisikal, ken iti naseremoniaan a pamay-an, a ti maudi maipapan iti panagdaydayawda.​—6/1, panid 11.

◻ Aniat’ kaipapanan iti “kinadalus ti pampanunot”?

Ti “kinadalus ti pampanunot” kayatna a sawen ti sipupuot a panagregget iti biangtayo nga agbalin a nadalus iti isip babaen iti panagtalinaed kadagiti bambanag a ‘napudno, nalinteg, ken nadalus’ ken babaen ti ‘panagtultuloy a panangpampanunot kadagitoy a bambanag.’ (Filipos 4:8)​—6/1, panid 16.

◻ Apay a kinuna ni Jesus a ti kaaddana ket “kas ti kimat”? (Lucas 17:24)

Ipampamatmat ni Jesus ditoy a ti pammaneknek ti kaaddana iti pannakabalin ti Pagarian ket makitanto iti nalawa a disso, nga isunto amin nga agtarigagay a mangpaliiw iti dayta ket pagaammodanto dayta a banag.​—6/15, panid 8.

◻ Apay a dagiti Nakristianuan nga ug-ugali nainaig a direkta iti Nakristianuan nga ayat?

Dagiti Nakristianuan nga ug-ugali wenno kababalin​—daydiay pannakilangentay kadagiti dadduma, ti aw-awidtayo, ti tigtignaytayo, ken nakaiyugalianen a kababalintayo​—ipamatmatda no kasanot’ panagayattayo kadagiti dadduma a tattao. Ipakpakita ti kababalintayo ti kinauneg ti ayattayo kadakuada. (Juan 13:35; 1 Corinto 10:24; 13:4-7)​—6/15, panid 14.

◻ Kaanontot’ pannakaaramid ti panagkasar ni Jesus ken “ti nobiana” a 144,000 a matalek a napulotan a paspasurotna? (Apocalipsis 19:7, 8)

Daytoy a kasar wenno boda maaramidto kalpasan ti bakal ti Armagedon ken ti pannakaigarangugong ni Satanas. Kalpasanna maalangonton ni Jehova ti kinasoberanona babaen iti panangikkatna manipud daga dagidiay mangkarkarit ti kinaturayna ken babaen iti panangikkatna ti dakes nga impluensia ni Satanas ken dagiti demoniona.​—7/1, panid 24.

◻ Kasano a ti sangol ti kinaadalan mangyeg pakabang-aran, kas ipamatmat ti sasao ni Jesus idiay Mateo 11:29, 30?

Yantangay ni Jesus ket saan a di nainkalintegan, makapabang-ar ti makipagtrabaho a kaduana iti isu met laeng a sangol. Pampanunotenna dagiti pagpatinggaan ti kabaelantayo ken pagkapkapuyantayo. Ket anian a makapabang-ar ti panangibagbaga kadagiti dadduma a mabalindanto met ti agbiag nga agnanayon iti Paraiso!​—7/15, panid 20.

◻ Ania daydiay “baro a pannakaparsua” a sarsaritaen ni Jesus idiay Mateo 19:28?

Impakita ni Jesus ditoy nga addanto “baro a pannakaparsua” dagiti kasasaad ditoy daga tapno dagiti bambanag agbalindanto kas idiay minuyongan ti Eden.​—8/1, panid 9.