Papanglakayen​—Saluadan ti Naitalek Kadakayo

“Kitaenyo ti bagiyo ken ti amin nga ipastoran, a nangikabilan ti nasantuan nga espiritu kadakayo a kas manangaywan, tapno pastoranyo ti kongregasion ti Dios, a ginatangna iti dara ti Anakna.”​—ARAMID 20:28.

1. Aniat’ ramanen ti Nakristianuan a talek?

INIKKAN ni Jehova a Dios dagidiay adda iti naindagaan nga organisasionna ti nakaskasdaaw a talek. Ngem ania ti talek? Daytat’ banag nga addaan pateg a naipakumit iti maysa a tao a masapul addaanto ti panagidatag. Ti Nakristianuan a talek ramanenna “ti pagwadan dagiti nasayaat a sao,” ti kinapudno a naited babaen ti Kasuratan ken isaksaknap “ti matalek ken naannad nga adipen” kas “taraon iti umiso a tiempo.” (2 Timoteo 1:13, 14; Mateo 24:45-47) Daytoy a talek ramanenna ti ministerio a nainaig iti kinapudno, a masapul a maikasaba iti uneg ken ruar ti kongregasion. (2 Timoteo 4:1-5) Dagiti manangipablaak ti Pagarian, agraman dagiti dinutokan ti espiritu a papanglakayen, rebbeng a patgenda daytoy a talek kas nangatot’ pategna.

2. Dagiti panglakayen ti addaan ania a kanayonan a talek, ket aniat’ kuna ni Pedro maipapan iti dayta?

² Dagiti panglakayen a Kristiano addaandat’ kanayonan a talek​—ti responsabilidad a panangipastor ti arban ti Dios. Gapu itoy, nagsurat ni apostol Pedro: “Kadagiti panglakayen nga adda kadakayo itdek daytoy a pammagbaga, ta siak ket panglakayen met ken makasaksi kadagiti sinagaba ni Kristo, siak a mairaman met iti dayag a maiparangarangto: Ipastoranyo ti arban ti Dios nga adda kadakayo, nga akmenyo ti panangaywan saan a mapilpilit, no di ket siaayat; saan nga iti naalas a panagsapul, no di ket iti nasiglat a nakem; saankayo met a kasla agturay kadagiti naikumit ti Dios kadakayo, no di ket agbalinkayo koma a pagulidanan dagiti arban. Ket inton maipanayag ti katan-okan a pastor, awatenyonto ti balangat a nagloriaan a di agrupsa.”​—1 Pedro 5:1-4.

3. Dagiti Kristiano a panglakayen masapul a gubuayanda ti ania?

³ Dagiti panglakayen a Kristiano “kas [da koma] maysa a paglemmengan no agangin, ken maysa a paglinongan no agbagio, kas ay-ayus dagiti danum iti disso a namaga, kasla linong ti maysa a dakkel a bato iti daga a napaksuyan.” (Isaias 32:1, 2) Kaipapanan daytoy a dagiti panglakayen masapul a gubuayanda koma ti kinatalged, talna, ken kinatibker iti arban dagiti kimmarnero nga ad-adipen ti Dios. “Ad-addanto ti madawat” kadagiti panglakayen, wenno nababbaba a papastor, ti arban agsipud ta isuda ti “nakaikumitan ti adu.” (Lucas 12:48) Ken pudno nga addaandat’ nasudi a talek a masapul a masaluadan.

Apay a Naitalek Kadakayo?

4. Apay a nagadu a panglakayen ti kasapulan?

⁴ Ti kaadda ti nasurok a 60,000 a kongregasion dagiti Saksi ni Jehova iti intero a lubong ti agkasapulan ti pinulpullo a ribo a naespirituan a kualipikado a lallaki a mangaywan ti arban ti Dios. Nagadu dagiti panglakayen ti kada pagilian, ket daytoy ti mangted rag-o. Adda promedio iti intero a lubong nga agarup 60 nga agibumbunannag ti Pagarian iti kada kongregasion. Gapuna, adu met ti trabaho nga aramiden dagiti panglakayen.​—1 Corinto 15:58.

5. Maibatay iti ania a ti pribilehio nga agserbi kas panglakayen maipaay iti maysa a lalaki?

⁵ No maysakay a panglakayen, apay a daytoy bendito a pribilehio ti naipaay kenka? Agsipud ta nakapagaramidka kadagiti sumagmamano a bambanag, ken addaankay kadagiti naespirituan a kualipikasion. Kas pangarigan, mabalin a sigagaget nga inadalmo ti Sao ti Dios. (Josue 1:7, 8) Mabalin a sireregta a makiramramanka met iti ministerio ti tay-ak, a tumultulong kadagiti dadduma nga agbalin a manangiwaragawag ti Pagarian. Agsipud ta “nasuotka nga umuna,” nagserbika a simamatalek kas ministerial nga adipen. Sika ti ‘gimmaw-at,’ wenno sinapulmo ti pannakakualipikarmo, nga agbalin a panglakayen, nga inapresiarmo a ti panagbalin kas manangaywan ket “naimbag nga aramid.” (1 Timoteo 3:1, 10) Kas ken Timoteo, “naimbag ti damag[yo] kadagiti kakabsat.” (Aramid 16:2) Idi mairekomendarkay kas panglakayen, nalabit dandanikayon nga agtallopulo wenno natataengankay pay ken adun kapadasanyo iti biag. Ti kongregasion ket agraem kadakayo kas nataenganen iti naespirituan, nalaka a maas-asitgan a kabsat a kabaelanna ti mangted ti epektibo a Nainkasuratan a balakad ken mangsalimetmet kadagiti kumpidensial a bambanag.​—Proverbio 25:9, 10.

No Kasano a Saluadan ti Naitalek Kadakayo

6, 7. Ti 1 Timoteo 4:13-15 mangted iti ania a balakad a mangtulong iti maysa a lalaki a mangsaluad ti naitalek kenkuana kas panglakayen?

⁶ Wen, no maysakay a panglakayen, agpaay kadagiti nasin-aw a rason a ti Nakristianuan a panangaywan ket naitalek kadakayo. Ket anian ti panangriknayo iti dayta a pribilehio! Ngem kasanoyo ngay a saluadan dayta a naitalek kadakayo?

⁷ Ti maysa a pamay-an a panangaywan wenno panangsaluad ti naitalek kadakayo kas panglakayen isut’ panagbalin a positibo ken naanep iti panangaywan ti annongenyo. Amintayo ti addaan naituding nga aramiden iti agdudumaduma a responsabilidad iti organisasion ni Jehova. Gapuna, salimetmetanyo ti lugaryo, ket agkontentokay koman nga ‘agbalin a kanumoan.’ (Lucas 9:46-48; idiligyo ti Oc-ocom 7:21.) Tagipatgenyo dagiti pribiliehioyo, ken nikaanoman dikay ‘agtrabaho a naliway ti imana.’ (Proverbio 10:4) Dikay agin-intek iti pagtakderanyo, no di ket iti tulong ni Jehova, rumang-aykayo iti amin a paset ti ministerio. Pudno unay, surotenyo ti balakad nga inted ni Pablo ken ni Timoteo: “Umagawaka iti panagbasbasa iti publiko, iti pammagbaga, iti panangisursuro. Dika liwayan ti sagut nga adda kenka a naited kenka babaen ti padto ken iti pannakaipatay dagiti im-ima dagiti panglakayen. Gagetam dagitoy a bambanag; isuda laeng ti sanguem, tapno ti irarang-aymo maiparangarang koma kadagiti isuamin.”​—1 Timoteo 4:13-15.

8. Aniat’ makatulong iti panglakayen a mangted nasin-aw a balakad ken mangted ti banag a makapabaknang iti naespirituan iti gimgimong?

⁸ Siguraduenyo a masalimetmetanyo ti nasayaat, nabunga nga iskediol ti personal a panagad-adal. Kas maysa a panglakayen, nainkalintegan a manamnama ti panangtedyo ti nasin-aw a Nainkasuratan a balakad. Tapno makabalanka iti daytoy a responsabilidad, nabasayon aya ti intero a Biblia nga addaan panagmennamenna, nalabit iti adu a darasen? (Proverbio 15:28) Dagiti met ngay naituding a pasetyo iti plataporma? Isaganayo ida a naimbag, a sikakararag a dawatenyo ti tulong ni Jehova tapno makaipaaykayo ti banag a makapabaknang iti naespirituan kadagidiay timmabuno iti mitingtayo. Dagiti panglakayen a nangnangruna rebbeng a ‘sawenda ti naimbag a maipaay a pakapabilgan, tapno paraburanna dagiti agdengngeg.’​—Efeso 4:29; Roma 1:11.

9. Sigun iti 2 Timoteo 4:2, aniat’ masapul nga aramiden ti panglakayen?

⁹ Kas panglakayen, ipangagyo ti pammagbaga ni Pablo: “Ikaskasabam ti sao, umagawaka iti tiempona man ken saanna a tiempo, tumubngarka, mangbabalawka, mamagbagaka, a buyogen ti amin a panaganus ken iti arte ti panangisursuro.” (2 Timoteo 4:2) Maseknan ni Pablo maipapan ti apostasia ta dadduma iti kongregasion ‘agsusuppiatda maipuon kadagiti sasao,’ naigamerda kadagiti ‘supsuppiat a minamaag,’ ken ‘sukirenda ti kinapudno.’ (2 Timoteo 2:14-18, 23-25; 3:8-13; 4:3, 4) Aglaklak-am man ti kongregasion iti panawen a nariribuk wenno saan, nupay kasta, ni Timoteo ket masapul nga “ikasabana ti sao.” Daytoy ti mangpabileg kadagiti kapammatian a mangparmek iti apostasia. Umas-asping met itatta, masapul nga ikaskasaba dagiti panglakayen ti mangsalput a Sao, wenno mensahe, ti Dios, a dumanon iti puso ken mangparegta iti panangsalimetmet kadagiti pagannurotan ni Jehova.​—Hebreo 4:12.

10. Apay a rebbeng nga agtrabaho a regular ti panglakayen iti tay-ak ti ministerio a kadua dagiti miembro ti pamiliana ken ti dadduma pay?

¹⁰ Tapno makapagsao nga addaan autoridad, masapul a ti panglakayen agbiag a maitunos iti Sao ti Dios. Ngem saanna a salsaluadan a naan-anay ti naitalek kenkuana no ‘ikaskasabana ti sao’ idiay laeng plataporma iti uneg ti kongregasion. Iti dayta met laeng a konteksto ni Pablo inggunamgunamna ken Timoteo: “Aramidem ti aramid ti manag-ebanghelio.” Tapno ‘matungpalyo a naan-anay ti ministerioyo’ kas maysa a panglakayen, masapul nga ikaskasabam ti Sao ti Dios iti “publiko ken iti binalaybalay.” (2 Timoteo 4:5; Aramid 20:20, 21) Gapuna, makipagtrabaho iti tay-ak ti ministerio kadua dagiti miembro ti pamiliayo. Makatulong daytoy iti naespirituan a singgalutyo iti asawayo ken makagunggona ti dakkel kadagiti annakyo. Mangbusbos met ti tiempo, a makiraman iti trabaho a panangaskasaba kadagiti dadduma a miembro ti kongregasion. Daytoy ti mangpabileg ti naespirituan a singgalut ken parang-ayenna ti nainkabsatan nga ayat. (Juan 13:34, 35) Siempre, masapul a pagreggetan ti panglakayen ti kinatimbeng ti panangbingayna iti napateg a panawenna iti pamiliana ken iti kongregasion. Ti panangusar ti pannakaawat ti manglapped kenkuana manipud panangbusbos ti ad-adu a tiempo iti maysa, a pakaliwayan ken pakadangran met ti dadduma.

11. Apay rebbeng a gagetan ti panglakayen a parang-ayen ti kabaelanna kas mannursuro?

¹¹ Tapno mabantayanyo ti naitalek kadakayo kas panglakayen, pagreggetan met a parang-ayen ti kabaelanyo kas mannursuro. “No manangisuro, manursuro koma,” kuna ni Pablo, “no manamagbaga, mamagbaga koma.” (Roma 12:7, 8) Yantangay agtakder ti mannursuro iti sanguanan dagiti dadduma kas instruktor, adda kalinteganda a mangnamnama ti dakkel kenkuana. No ti maysa a panglakayen grabe ti panagerradona iti pannursurona ket mamataud ti parparikut kadagiti kapammatianna, isut’ umay iti pannakaukom iti Dios. Wen, dagiti mannursuro “awatendanto ti naing-inget a pannakaukom.” (Santiago 3:1, 2; Mateo 12:36, 37) Gapuna kasapulan nga agbalin a serioso nga estudiante ti Sao ti Dios dagiti panglakayen ket masapul nga iyaplikarda dayta iti biagda. Iti kasta ti Nainkasuratan a pannursuroda, a suportaran ti personal a panangiyaplikarda, ti apresiarento unay dagiti kapammatianda. Salaknibannanto met ti kongregasion manipud kadagiti di makaay-ayo nga impluensia, agraman apostasia.

Lisian dagiti Pakaikulboan

12. Ania a balakad a naminsan naipablaaken iti daytoy a pagbasaan ti makatulong iti panglakayen a lisian ti di umiso a panangusar ti dila?

¹² Saluadanyo met ti naitalek kadakayo kas panglakayen, babaen ti pananglisi kadagiti pakaikulboan. Maysa kadagitoy isut’ di umiso a panangusar ti dila kas mannursuro. Ti pannakasapul ti panagannad iti daytoy a banag ti nabayagen nga ipagpaganetget ti organisasion ni Jehova. Kas pangarigan, iti ruarna ti Mayo 15, 1897, sinalaysay daytoy a pagbasaan ti Santiago 3:1-13 ket kinunana nangnangruna kadagiti panglakayen: “No ikutanda ti natalabit a dila mabalin a daytat’ pagayusan ti dakkel a bendision, a mangallukoy ti dakkel a bilang iti Apo, iti kinapudno ken iti dalan ti kinalinteg; wenno, iti kasumbangirna, no nalaokan iti biddut, ti dila makaaramid ti ngangngani di mailadawan a pakadangranan​—pannakadangran iti pammati, kadagiti moral, kadagiti naimbag nga ar-aramid. Talaga a pudno, nga asinoman a mangwatwat iti sagut ti panangisuro inlukatna iti bagina ti dimmakkel a responsabilidad iti imatang ti Dios ken tattao. . . . Asinoman a burayok a pagtaudan ti nasantuan a Sao, a mangted bendision ken pakabang-aran ken pammigsa, rebbengna a kitaen a dagiti danum a napait, dagiti ulbod a doktrina a mangpataud ti pakailunodan, ti pakadangranan​—a manglais iti Dios ken mangtiritir iti Saona​—ti di koma masarakan kadakuada iti pannakisasaoda. Iti panangpili kadagiti manangidaulo ti gimgimong ti kualipikasion ti ‘dila,’ kas naiwayat ditoy ti saan koma a liplipatan. Ti naapuy ti dilana saan koma a pilpilien, no di ket daydiay naemma, natimbeng, a ‘medmedanda’ ti dildilada ken pagreggetanda a naimbag ti ‘agsao kadagiti pammadto ti Dios’ laeng.” Anian a nagpateg a ti panglakayen aramatenna koma a siuumiso ti dilana!

13. Masapul dagiti panglakayen ti ania a panagannad no maipapan iti panaglinglingay?

¹³ Ti aglablabes a panaglinglingay ket pakaikulboan a masapul met a lisian. Ti panaglinglingay ti rebbeng a mangpabang-ar ken mangpapigsa, saan a mangbannog ken mangriribuk ti Kristiano. Mainayon pay, rebbeng a dagiti manangaywan ket “natimbeng iti ug-ugalida.” (1 Timoteo 3:2) No ti kinatimbeng iwanwanna ti aniaman nga aramidenyo maipapan ti panaglinglingay, daytoy ti mangsaluad kadakayo ken ti pamiliayo ket mangted nasayaat a pagwadan iti kongregasionyo. Narigatyo ti mangted ti nasayaat a pagwadan no, iti kadarato, mapankayo a maipaay iti panggep nga aglinglingay kadagiti ngudo ti lawas bayat a dagiti kapammatianyo ket siaanepda a makiramraman iti tay-ak ti ministerio. Masapul a maikaskasaba ti naimbag a damag, ket rebbeng a dagiti panglakayen ti mangidaulo iti daytoy a trabaho kas nareregta a manangiwaragawag ti Pagarian.​—Marcos 13:10; Tito 2:14.

14. (a) Ania dagiti Nainkasuratan a pangarigan a mangitampok iti pannakasapul ti panagannad dagiti panglakayen kontra iti seksual nga imoralidad? (b) Dagiti panglakayen rebbeng a saanda koma a laksiden ti ania a maulit-ulit a pammagbaga maipapan iti panangtulong kadagiti naespirituan a kakabsat a babbai?

¹⁴ Ti seksual nga imoralidad ket maysa pay a pakaikulboan a lisian. Ti panagrakaya ti moral iti lubong ti makaimpluensia uray iti panglakayen no saanna a parmeken dagiti pannulisog nga us-usaren ni Satanas iti panagreggetna a dadaelen ti kinatarnaw ti ili ti Dios. (Idiligyo ti Mateo 4:1-11; 6:9, 13.) Laglagipenyo a ni mammadto a Balaam, a di nagballigi iti rantana a mangilunod kadagiti Israelita, ti nangirason a ni Jehova mismo ti mangilunod kadakuada no magargarida nga agaramid iti panagdayaw ti sekso. Gapuna sinursuruan ni Balaam ni Moabita nga ari Balak a “mangikabil iti pakaitibkolan iti sanguanan dagiti annak ti Israel, a manganda iti maidaton kadagiti didiosen ken makikamalalada.” Nalisianda aya dayta a pakaikulboan? Saan, ta 24,000 nga Israelita ti natay iti didigra a naggapu ken Jehova gapu ta naaddaandat’ imoral a pannakirelasion kadagiti babbai a Moabita ken nagruknoyda kadagiti didiosenda. (Apocalipsis 2:14; Numeros 25:1-9) Laglagipenyo, met, nga uray ni David, ‘maysa a lalaki a maiyannurot ti pusona iti Dios,’ ket naitibkol iti silo ti seksual nga imoralidad. (1 Samuel 13:14; 2 Samuel 11:2-4) Kas maysa ngarud a panglakayen, ipangagyo ti maulit-ulit a pammagbaga ti “matalek a mayordomo” a nikaanoman dikay tultulongan ti naespirituan a kabsat a babai a dakdakayo no di ket maaddaan koma pay ti sabali a panglakayen a siimatang no ar-aramidenyo daytoy a responsabilidadyo.​—Lucas 12:42.

15. Kasano a ti pamilia ti panglakayen makatulong kenkuana a manglisi iti pakaikulboan a materialismo?

¹⁵ Ti materialismo ket maysa pay a pakaikulboan a lisian ti panglakayen. Mapnekkay koman kadagiti pakasapulan, nga ammuenyo a mangipaay ni Jehova iti umdas a kasapulan. (Mateo 6:25-33; Hebreo 13:5) Sanayenyo ti pamiliayo nga agbalin a nasalimetmet, ta ti kinabuslon ket mannanakaw ti panawen ken kinabaknang a mabalin a mausar pay a pangtulong ti pamilia, agraman iti pannakiraman iti tay-ak ti ministerio, mangpabileg iti kongregasion, ken mangyadelantar kadagiti intereses ti Pagarian. Magunggonaan ti panglakayen manipud kooperasion ti pamiliana iti daytoy a banag ket agyaman nga isut’ saanda a pilpiliten kadagiti bambanag a kinapudnona saan a kasapulan. Kinapudnona, “nasaysayaat ti bassit a kakuyogna ti panagbuteng ken ni Jehova ngem ti dakkel a gameng ket dukot iti kakanunongna.”​—Proverbio 15:16.

“Kitaenyo ti Bagiyo”

16. Ania a balakad ti inted ni Pablo kadagiti manangaywan idiay Efeso?

¹⁶ No kayat a saluadan dagiti panglakayen ti naitalek kadakuada, masapul nga iyaplikarda ti balakad ni Pablo kadagiti manangaywan idiay Efeso. Kunana kadakuada: “Kitaenyo ti bagiyo ken ti amin nga ipastoran, a nangikabilan ti nasantuan nga espiritu kadakayo a kas manangaywan, tapno ipaarabyo ti kongregasion ti Dios, isu a ginatangna iti dara ti Anakna. Ta ammok nga iti kalpasan ti ipapanawko addanto dagiti nauyong a lobo a didanto lisian ti ipastoran, ket kadakay met laeng addanto tumakder a tattao nga agsao kadagiti nakas-ang a banag tapno guyugoyenda dagiti adalan a sumurot kadakuada. Gapuna agsalukagkayo, a laglagipenyo nga iti bayat ti tallo a tawen, saanak a nagsardeng a namagbaga iti tunggal maysa iti rabii ken aldaw, a binuyogan dagiti lulua.”​—Aramid 20:28-31.

17, 18. Ania a balakad a naipablaaken iti daytoy a magasin agarup 80 tawen ti napalabasen ti kaskasdi nga agaplikar pay laeng kadagiti panglakayen a Kristiano?

¹⁷ Iti nasurok a 80 tawen a napalabasen, inadaw ti The Watch Tower (Marso 1, 1909) ti sumaganad a balakad ni Pablo kadagiti padana a panglakayen ken nagkomento: “Dagiti Panglakayen iti isuamin a disso kasapulan ti nangnangruna a panangipangagda; ta iti tunggal pakasuotan dagidiay napaboran unay ken dagiti prominente ti addaan kadagiti kasasaeman a pannakalakub ken pakasusuotan. Gapuna [ni Santiago] namagbaga, ‘Saan koma nga adu ti mannursuro kadakayo, kakabsatko, idinto nga ammoyo nga awatentayto ti naing-inget a pannakaukom.’ Kasta met, a bagbagaanmi amin a Panglakayen nga iti puso nadalus, awan agumda, nga awananda no di laeng ti ayat ken naimbag a nakem iti intero a sangatauan, ken mapunnoda nga ad-adda kadagiti bunga ken grasia ti nasantuan nga Espiritu, nga ipangpangagda met ti arban. Laglagipenyo, a ti arban kukua ti Apo ken addaankay responsabilidad iti Apo, agraman kadakuada. Laglagipenyo, nga igagayo ti biagda (dagiti interesesda) kas kadagidiay agidatagto iti Naindaklan a Kangrunaan a Pastor. Laglagipenyo, a ti kangrunaan a banag isu ti Ayat, iti isuamin; ken, bayat a dikay liwliwayan dagiti doktrina, ipangagyo met a nangnangruna ti pannakapatanor ti Espiritu ti Apo kadagiti nadumaduma a kameng ti Bagina, tapno iti kasta ‘maragpatda met ti tawid dagiti sasanto iti lawag,’ ken, sigun iti Nadiosan a pagayatan, saanda nga agsagaba ti pannakaitibkol iti daytoy dakes nga aldaw, no di ket, inton naaramidda aminen, agtakderda a naan-anay ken Kristo, ti Bagina, dagiti Miembrona, dagiti Kaduana a Makipagsagaba, dagiti Makipagtawid kenkuana.”

¹⁸ Dagidiay a sasao ti naiturong kadagiti napulotan ti espiritu a panglakayen ken kadagiti kapammatian maitunos iti pannakaawat ken sirkumstansia ti organisasion ni Jehova kadagidiay immuna nga al-aldaw. Kaskasdi, anian nga apagpag-isu ti pannakaiyaplikar dayta a balakad itatta! Nailangitan wenno naindagaan man ti namnamada, masapul a dagiti panglakayen a Kristiano kitaenda ti bagbagida, saluadanda ti naitalek kadakuada, ken siaayat nga aywananda dagiti intereses ti arban ti Dios.

Rag-o ti Ibunga ti Panangsaluad ti Naitalek Kadakayo

19, 20. Apay a maikuna a rag-o ti ibungana no saluadan dagiti panglakayen ti naitalek kadakuada?

¹⁹ Ti ragsak​—kinapudnona, ti naimpusuan a rag-o​—ti ibunga ti panangsaluad ti naitalek kadakayo kas panglakayen a Kristiano. Adda ragsak iti panangitungpal a naimbag iti nadagsen a responsabilidad. Gapuna agbalin a naannad, managkarkararag, naanep. Saluadanyo ti naitalek kadakayo kas panglakayen ken kumitakayo iti tiempo inton maikunayonto, kas iti daydiay lalaki nga addaan pagtinteroan ti sekretario: “Inaramidko a kas imbilinmo kaniak.”​—Ezequiel 9:3, 4, 11.

²⁰ Wen, agtrabahokayo a sisusungdo kas panglakayen tapno maikunanto met kadakayo kas idi ken Noe: “Kasta ti inaramidna.” (Genesis 6:22) Manipud kasta a naanep a serbisio, magunggonaan ti kongregasion kadagiti adu a pamay-an. Kangrunaan iti isuamin, mapadayawan ni Jehova babaen kadagiti napigsa, aktibo a kongregasion a pagserserbian dagiti matalek a panglakayen a mangsalsaluad kaagiti naitalek kadakuada. Ngem adu pay ti makalikaguman no, iti epektona, maibaga met kadakayo: “Naimbag, nalaing nga adipen!” (Lucas 19:17) Kas panglakayen, masapul a tratuenyo ti arban ti Dios a siaanus.

Aniat’ Maikunayo?

◻ Ania a kanayonan a talek ti adda kadagiti Kristiano a panglakayen?

◻ Ti panglakayen mabalinna ti mangala kadagiti ania a positibo nga addang tapno masaluadan ti naitalek kenkuana?

◻ Tapno masaluadan ti naitalek kenkuana, ania dagiti pakaikulboan a masapul a lisian ti maysa a panglakayen?

◻ Apay a rag-o ti ibungana no saluadan dagiti panglakayen ti naitalek kadakuada?

[Ladawan iti panid 10]

Dagiti panglakayen a Kristiano agbalinda koma a “maysa a paglinongan no agbagio”

[Ladawan iti panid 12]

Kas panglakayen, makiraman a regular iti tay-ak ti ministerio a kadua ti kamkameng ti pamiliayo ken ti dadduma

[Ladawan iti panid 13]

No saluadanyo ti naitalek kadakayo kas panglakayen, magunggonaanto ti kongregasion iti adu a pamay-an