Ti Panagani Mangyeg Panagrag-o Idiay Japan
“NAKABATBATAD a dagiti Misionero marikriknada ti kalalainganna a pannakaupay.” Kastat’ kuna ni Charles T. Russell, ti umuna a presidente ti Watch Tower Bible and Tract Society, kalpasan ti personal a panangsukimatna ti narelihiusuan a kasasaad idiay Japan idi 1912. Sasawennat’ pannakapaay dagiti misionero ti Kakristianuan ket kinunana: “Ti kasapulan dagiti Hapones isu ‘ti Ebanghelio ti pagarian.’”
Napunnuan kadi daytoy a kasapulan? Simmilnag ti raya ti kinapudno kadagiti Hapones babaen iti sumagmamano a matalek a Saksi ni Jehova bayat ti 1920’s ken 1930’s. Uray kabayatan ti Gubat Sangalubongan II, adda sumagmamano a sipipinget a nangipakaamo ti naimbag a damag agpapan pay panangirurumen ti imperial a gobierno. Nupay kasta, ti ad-adda a nasaksaknap a panagani ti nakasagana nga agpaay kadagitoy a naggaabay a purpuro iti Adayo a Daya.
Iti idadateng dagiti 15 a misionero ti Watchtower idi 1949, nangipuyot ni Jehova ti baro a biag iti trabaho a panangaskasaba ti Pagarian idiay Japan. Dagiti kasangsangpet unay a misioneros nakitada iti gapuanan ti Gubat Sangalubongan II iti isuamin a paset: Nadaddadael dagiti siudad, ket mariruan dagiti tattao, ta ti kadaanan a sistema dagiti ipatpategda ket nagbaliktad. Maigiddato iti dayta pinabaro met dagiti misionero ti Kakristianuan ti trabahoda idiay Japan, ngem napaayda a namagbalin kadagiti Hapones a pudpudno a Kristiano. Dagiti “49ers” ken dagiti nasurok a 150 a misionero dagiti Saksi ni Jehova a simmaruno kadakuada ti naipasango iti nagdakkelan a karit ti panangimula iti is-isip ken puspuso a Hapones ti pammati iti Namarsua, a ni Jehova a Dios. Kasanoda a sinaranget daytoy a karit?
Panangisaad ti Pamuon
Ti kinamisionero a panagreggetda nangrugi manipud iti bassit a dua-grado a balay idiay Tokyo. Kadagidi 1950’s, nakain-innayad ti panaganida. ‘Mammano laeng ti umay iti kinapudno idiay Japan sakbay ti Har-Magedon,’ impato ti maysa kadagiti immuna a Hapones a nangabrasa ti naimbag a damag kadagidiay nga al-aldaw. Maysa kadagiti immuna a manangaywan ti sirkito malaglagipna pay iti itatan-awna iti tawa ti tren ket pampanunotenna no dagiti balbalay kadagiti babassit a purok a lablabasanna ti madanonto met la ti naimbag a damag.
Inabutna ti ngangngani maysa dekada a kinamisionero a panagregget tapno ti bilang dagiti agibumbunannag ti Pagarian idiay Japan ket madanonna ti sangaribo. Ngem idi 1963, gapu iti agtultuloy nga idudur-as, ti narukop a sanga ti Tokyo narebba ket maysa nga innem a grado a ferroconcrete a pasdek ti naibangon iti lugarna.
Dagiti misionero ti nangisaad ti nagsayaat a pamuon agpaay iti masanguanan babaen ti panangipasagepsep ti espiritu ti kinapayunir iti puspuso dagiti estudianteda ti Biblia. Binendisionan ni Jehova ti nagkaykaysa a panagregget dagiti misionero ken dagiti payunir a Hapones, ket ti bilang dagiti Saksi ngimmato ingganat’ sangapulo ribo idi 1970. Idi 1972, tapno mabagayan ti idudur-as, maysa a tallo-grado a pagimprentaan ken maysa a lima-grado a pagtaengan ti naibangon idiay Numazu, agarup 120 kilometro iti abagatan a laud ti Tokyo. Itan, imbes a maysa a makinruar a kompania ti agimalmaldit kadagiti magasin, Ti Pagwanawanan ken Agriingkayo! ket agtultuliddan a rummuar kadagiti mismo a pagimalditan ti sanga a Hapones tapno serbianda ti lokal a trabaho a panangaskasaba ti Pagarian.
Asino koma ti nanginanama a ti panagani ket malab-awanna dagiti pasilidad ti Numazu iti uneg ti sumaganad a sangapulo a tawen? Ngem daytat’ napasamak, ket adda pay isagsagana ni Jehova nga adu a panagbangon tapno maaywanan ti dumakdakkel a panagani.
Idudur-as Agpapan Pay Rigrigat
Maysa a baro a sangal a mamitlo daras ti kadakkel daydiay adda idiay Numazu ti nairingpas idi 1982 sadi Ebina, abagatan la bassit ti Tokyo. Idi naidedikaren dayta iti Mayo iti dayta a tawen, binendisionan ni Jehova dagiti Saksi idiay Japan iti agsasaruno a binulan a peak dagiti agibumbunannag iti nasurok a tallo a tawen. Daytoy nga irarang-ay ti nagtultuloy, ket idi Mayo 1985 ti bilang dagiti agibumbunannag a Hapones dimmanonen iti sangagasut a ribo. Wen, pappapartaken ni Jehova ti trabaho iti panawenna, gapuna dandani manen ti kanayonan a panangpalawa kadagiti pasilidades ti sanga. (Isaias 60:22) Sumagmamano laeng a tawen kalpasan ti dedikasion ti umuna a sangal ti Ebina, inanamongan ti Bagi a Manarawidwid ti panangibangon ti baro nga innem a grado a paktoria nga adda basement na ken maysa a walo-grado a pagtaengan.
Nalawag, saan a naragsak ni Satanas iti daytoy nga irarang-ay kadagiti ad-adipen ni Jehova agsipud ta ti bulan kalpasan a maragpat ti sangagasut a ribo nga agibumbunannag, maysa a serioso a kaso ti panangiyalison ti dara ti rimsua idiay Japan. Maysa a sangapulo ti tawenna nga ubing a lalaki ti natay kalpasanna—ngem saan a gapu ta —dagiti dadakkelna ket linaksidda ti panangiyalison ti dara para kenkuana. (Aramid 15:29) Kas nagbanaganna, bimmara dagiti pagiwarnakan kontra kadagiti Saksi. Nupay ti ama ti ubing ket saan idi a dedikado a Saksi, tinakderanna ti awan-asi a panangan-anup dagiti periodista kenkuana. Isut’ nabautisaran kamaudiananna ket itan agserserbin kadua ni baketna kas regular payunir.
Kasanot’ panangapektar daytoy nga iraraut iti panagani? Bassit laeng. Dadduma kadagiti estudiante ti Biblia insardengdat’ pannakiad-adalda, ngem dagiti binulan a peak dagiti agibumbunannag nagtultuloy nga awan ressatna, ket idi Disiembre 1988 isut’ nangtanda ti sangapulo tawen nga awan inggana a peaks. Bayat ti pito a tawen a nagbaetan ti dedikasion ti umuna a sangal ti Ebina ken ti dedikasion ti baro, ti bilang dagiti agibumbunannag ket nadoble manipud 67,000 ingganat’ nasurok a 135,000, bayat a ti bilang dagiti regular payunir nagtriple manipud 12,000 ingganat’ 36,000, ken ti bilang dagiti panangiyadal ti Biblia iti pagtaengan ket ngangngani nagdoble manipud 97,000 ingganat’ 172,000. Anian a nakaskasdaaw a pammaneknek ti panagballigi ni Jehova kontra iti iraraut ni Satanas iti ilina!—Proverbio 27:11.
Panangibangon kadagiti Baro a Pasdek
Saan nga agibangbangon dagiti Saksi ni Jehova kadagiti nararanga a pasdek tapno pagsiddaawen dagiti tattao. Ngem bayat a makigidgiddanda iti irarang-ay dagiti manangiwaragawag ti Pagarian, dagiti pasdekda masansan a masapul a dadakkelda. Ti baro a paktoria a Hapones ti nasayaat a pangarigan. Daytat’ addaan datar a ti kalawana ngangngani 22,500 metro kuadrado, tallo a daras ngem ti napalabas a kalawa ti datar ti paktoria nga immuna. Ti Bindery, Machine Shop, ken ti Export/Shipping Department immakardan iti baro a paktoria, ket ngangngani dua a grado ti maus-usar a bodega. Uray pay kadagitoy amin, ti baro a paktoria ket addaan pay kapasidad a makalaon ti ad-adu pay. Adda dagiti pundasion a naisaaden idiay basement agpaay iti dua a mainayon a napapartak a rotary offset presses, ken dua nga intero a grado ti awan pay nagianna, a sisasagana iti masanguanan a panagsaknap.
Ti baro a walo-grado a patakder a residensia addaan ti nagpintas ken makaay-ayo a naarkosan a pagawatan ti bisbisita. Addada 128 a pribado a kukuarto para kadagiti agtartrabaho idiay Bethel ket 8,980 metro kuadrado ti kalawa ti datarna—nga umas-asping iti kalawa ti datar ti daong ni Noe. Maysa kadagiti kaarruba ti nagsaludsod pay kadagiti agtartrabaho iti konstruksion no kasanot’ panagaplikarna para kadagiti baro a “condominiums”!
Amin dagidiay nakipaset iti konstruksion pinadayawanda ni Jehova iti panangiturturongna iti trabaho a panagbangon. (Salmo 127:1, 2) Ti kangrunaan a puersa dagiti nagtrabaho ket buklen dagiti situtulok nga agtutubo a trabahador nga adda iti kallabes laeng a 20 años, a napnuan regta ngem awan kapkapadasanda pay iti panagbangon. “Idi damo,” kuna ti arkitekto a nagtrabaho iti proyekto, “nagrigat para kaniak a mangaramid ti plano a nalaka a maawatan dagiti awan kapkapadasanna a kakabsat.” Babaen ti espiritu ti panagtitinnulong manipud amin a dasig, nupay kasta, naparmek dagiti aniaman a lapped.
Daytoy kinatulokda a makitunos ti namagbalin a nalaklaka para iti espiritu ni Jehova nga agtignay kadagiti trabahador. “Idi madamakami pay nga agkalkali,” malaglagip ti maysa, “kanayon nga agtudo—uray no dayta ket iti bigbigat wenno nakarabrabiin—mapanak idiay pagibangbangonan tapno kitaen no dagiti pader addada pay a sitatakder. Masansan, adda latta makitak a magagaran a rupa sadiay, ket nagtrabahokami a sangsangkamaysa, a maiyop-oper ti kudilmi, tapno maaywanan ti aniaman a pagpeggadan. Ti kasta a kapkapadasan ti nangpabileg iti nairut a panagkakaduami.”
Tulong iti Internasional a Panagani
Gapu ta dagiti baro a pasdek naibangonda tapno mangsuportar iti trabaho a panagani ni Jehova, maiyanatup laeng a maidedikar dagita kenkuana apaman a malpas. Ti programa ti dedikasion naangay idi Mayo 13, 1989, a tinabunaun da Carey Barber, John Barr, ken ni Lloyd Barry iti Bagi a Manarawidwid dagiti Saksi ni Jehova, agraman dagiti assawada. Nasurok a sangaribo kadagiti immuna a Hapones a nabautisaran ti naawis a tumabuno iti programa ti dedikasion, ket maragsakanda a makakita kadagiti nabayagen a gagayyemda a simamatalek pay met laeng nga agserserbi ken ni Jehova. Dagiti pannakabagi manipud 13 a pagilian ti nangakseptar ti imbitasion a tumabuno ken makiraman iti daytoy nakaragragsak nga okasion. “Arignat’ bassit nga internasional kumbension,” kunat’ maysa a delegado.
Ti namagbalin iti programa a pudpudno nga internasional isu dagiti report manipud siam kadagidiay a pagilian. Maysa a napigsa a singgalut ti panagkakabsat ti narikna bayat a dagiti pannakabagi manipud nadumaduma a pagilian ti Asia insalaysayda dagiti pangarigan ti internasional a kooperasion ket dinakamatda ti kinapudno a ti baro a paktoria serserbianna dagiti kasapulan dagiti pagilianda agraman ti tay-ak a Hapones. Ti sanga ti Japan agim-imprenta itattan kadagiti publikasion iti 13 a pagsasao ken agipatpatulod kadagiti literatura iti adu a dagdaga.
Iti malem, nagpalawag ni Kabsat Barber kadagiti agdengdengngeg ken impaganetgetna ti pateg ti kaitungpalan dagiti padto ni Ezequiel. Kalpasanna ni Kabsat Barr nagpalawag iti tema a “Panangpunno iti Daga iti Dayag ni Jehova,” a tinulonganna dagiti agdengdengngeg a mangapresiar ti pannakabalin a panagsaknap ti kinapudno.
Ti diskurso ti dedikasion ket impaay ni Kabsat Barry, a kadagiti napalabas nagserbi kas misionero idiay Japan iti nasurok a 25 a tawen. Iti palawagna a napauluan “Agrag-okayo iti Sanguanan ti Diosyo, a ni Jehova,” pinaregtana dagiti agdengdengngeg nga agrag-o gaput’ panagbibiagtayon iti panawen nga iladladawan ti Piesta dagiti Abong-abong, wenno Panagani, idiay kadaanan nga Israel. Intudona dagiti rason nga agrag-o bayat a sinalaysayna ti ababa a historia ti trabaho idiay Japan. Idi inrekomendar ni Kabsat Barry a dagiti baro a pasdek maidedikarda ken Jehova, amin a timmabuno simmungbatda iti nabara a palakpak.
Iti sumaganad nga aldaw, dagiti pannakabagi ti Bagi a Manarawidwid pinalawaganda ti nagdengngeg a 233,780 a naurnong kadagiti 46 a disso a naisilpo babaen iti telepono iti intero a purpuro ti Japan. Pudno unay, kas kinuna ni Pastor Russell idi 1912, kasapulan dagiti Hapones ti naimbag a damag ti Pagarian. Pinunnuan ni Jehova dayta a kasapulan babaen ti panangisaad ti pamuon babaen iti ar-aramid dagiti misionero ken panangpapigsana ti espiritu ti panagpayunir kadagiti Hapones a Saksi. Dagiti kaideddedikar a pasdek agtaktakderda kas pammaneknek ti ‘panangpapardas’ ni Jehova iti panagani bayat ti antitipiko a Piesta dagiti Abong-abong.—Isaias 60:22.
[Dagiti ladawan iti panid 24]
Kannigid: ti baro a paktoria a pasdek idiay Ebina agraman ti (makimbaba a kannigid) madama a programa ti dedikasion ken (makimbaba a kannawan) ti pagawatan ti bisita idiay baro a residensia a pasdek
[Dagiti ladawan iti panid 25]
Ti baro a pasdek ti residensia ken (naisengngat) ti libreria idiay maikadua a grado iti pasdek ti opisina
[Dagiti ladawan iti panid 26]
Dagitoy 19 a misionero manipud maika-11 a klase ti Gilead timmabunoda iti dedikasion. Ti amin-tiempo a serbisio dagitoy—agraman lima pay a sabsabali manipud iti maika-11 a klase a natayen a matalek iti nakaitudinganda idiay Japan—ket agdagup iti 1,023 a tawtawen
Dagiti tallo a kameng ti Bagi a Manarawidwid—Carey Barber, John Barr, ken Lloyd Barry,—nakipasetda iti programa ti dedikasion