“Kalpasanna Inikkanna Met ni Asawana”
PRESENTE kadi ni Adan idi kinasarita ti uleg ni Eva ken inulbodna tapno agrebelde iti Dios? Saan a kasta ti ipasimudaag ti Biblia. Kuna ti Genesis 3:6 a ni Eva “pimmuros iti bungana ket nangan. Kalpasanna inikkanna met ni asawana idi kaduanan.” Nupay kasta, dagiti dadduma a patarus sabali nga impresion ti itedda. Kastoy ti panangipatarus ti King James Version iti dayta a teksto: “Pimmuros iti bungana, ket nangan, ket inikkanna met ti asawana a kaduana idi; ket isu nangan.”
Ti Hebreo a berbo a naipatarus kas “inikkanna” imperpekto ti saadna ket nainaig iti espesial a porma ti mamagsilpo a “ket” [Hebrew, waw], nga ipasimudaagna ti temporario wenno lohikal a sumaruno. Gapuna, ti New World Translation ipatarusna ti sumagmamano a panagparang ti waw, a mamagsilpo iti agsasagadsad a pasamak idiay Genesis 3:6, a saan a basta “ket” no di babaen kadagiti mangrangtay a sao, a kas iti “nagbanaganna,” “gapuna,” ken “kalpasanna.” Ti New World Translation no kasta adda natibker a pangibasaranna iti kasta a patarusna ditoy ngato.
Siaanus latta koman aya a pinalpaliiw ni Adan ti nagsaritaan da baketna ken ti uleg, a dimngeg lattan kadagiti kinaulbod ken pammardaya dayta di makita a rebelde iti likudan ti uleg? Nagsayaat, ta laksiden ni J. P. Lange nga Aleman nga eskolar iti Biblia daytoy nga ideya ket inkomentona: “Narigat a panunoten ti kaadda ti lalaki idi madama ti pannulisog, uray pay ti panagtalinaedna koma a siuulimek.” Ket kas panangilawlawagna iti balikas a “kaduana idi,” ti Judio a komentarista a ni B. Jacob nasaona a “dina [kaipapanan] nga agtaktakder a kaduana idi (bayat ti immun-una nga akto wenno idi madama a mangmangan).”
Iparangarang ti pannakisarita ni Eva iti uleg a ni lakayna ti nangibaga kenkuana iti bilin ti Dios a dida mangmangan iti bunga ti kayo. (Genesis 3:3) Gapuna kas ulo ni Eva, tinungpal ni Adan dayta a rebbengenna. Di inkankano ti Diablo ti urnos ti Dios iti kinaulo ket nasikap nga inaprobetsarna daydi panagmaymaysa ni Eva. Insungbatna kalpasanna: “Ti uleg—inulbodnak ket iti kasta nanganak.” (Genesis 3:13) Nasulbog ni Eva gapu ta pinatina ti kinaulbod, ngem daytoy dina inkalintegan ti salungasingna. Daytoy mamakdaar nga ulidan ti mangipakita nga awan mabalintay a pagpambar tapno agaramidtay ti dakes iti imatang ni Jehova.—1 Timoteo 2:14.