“Daytoy a Balay Kukuam”

“DAYTOY a balay kukuam​—daytat’ ninayonanmi.” Anian pannakaibagay dagitoy a sasao a nanggupgop ti rikna dagidiay kakkalpas ti dua tawen a nadagsen a panagtrabaho iti sanga nga opisina ti Watch Tower Society idiay Australia! Dagiti sasao naiturongda ken Jehova a Dios, ket paset dayta ti kanta a pinutarda nga agpaay iti espesial nga okasion. Ania nga okasion? Ti dedikasion dagiti baro a nainayon iti pagtaengan a Bethel ken ti paktoria.

Panangpalawa Nabiit Unay?

Nakaskasdaaw, kurang pay ngem pito a tawen sakbayna, naaramid idi ti umas-asping met laeng a dedikasion iti daydiay kabarbaro a naipatakder a sangal ti Bethel sadi Ingleburn, iti umabagatan a laud iti igid ti Sydney, Australia. Apay a ti panangpalawa ket kasapulan iti kasta kabiit?

Maysa ket, ti bilang dagiti Saksi idiay Australia immadun manipud nasurok la bassit a 32,000 idi 1981 aginggat’ kangatuan a bilang a 51,152 idi Oktubre 1989, ket kinasapulan dayta ti panangpaadu met dagiti agtrabaho idiay Bethel. Mainayon pay, adda ti nakaskasdaaw nga idudur-as ti kantidad dagiti literatura nga ipatpatulod ti Australia iti dadduma a sangsanga. Iti agdama, agar-aramid ti Australia kadagiti publikasion iti 37 a nagduduma a pagsasao a mangipaay kadagiti kasapulan ti Fiji, Indonesia, Papua New Guinea, New Caledonia, New Zealand, Solomon Islands, Tahiti, Vanuatu, Niue, Western Samoa, Tonga, Tuvalu, ken Wallis Islands, agraman pay Australia. Gapuna, ti pamilia ti Bethel dimmakkel a sipapardas ingganat’ 164 a miembro.

Tapno mapadagus daytoy dumakdakkel a pamilia, idi karrugi ti 1987 maysa a baro a tallo-grado a kanayonan ti opisina ti nakompleto, a nangted ti kasapulan unay a kanayonan nga espasio ti opisina. Sumaganad, inanamongan ti Bagi a Manarawidwid ti pannakapadakkel ti tallo-grado a paktoria ken panangpalawa ti lima-grado a pagtaengan. Nangrugi ti trabaho idi Enero 1988 iti kanayonan ti baro a paktoria, a nangted ti ad-adu pay a 3,600 metro kuadrado nga espasio. Sumagmamano a bulan kalpasanna, nangrugi met ti trabaho para iti kanayonan ti pagtaengan, a mangted ti 51 pay a kukuarto.

Dagiti Panagsakripisio ken Naparabur a Panangted

Naipatulod dagiti imbitasion kadagiti kongregasion iti intero a pagilian maipaay kadagiti boluntario nga agbalin a paset ti “pamilia ti panagbangon” agingga iti dua a tawen. Nakaskasdaaw ti panangabrasada, ket simmungbat a sidadaras dagiti boluntario manipud amin a kita ti trabaho. Nasurok ngem 700 a nasinasina a porma ti aplikasion ti naawat, ken bayat ti panawen ti panagbangon, agdagup 270 a boluntario ti immay ken nagtrabaho iti proyekto manipud dua a lawas aginggat’ ngangngani dua a tawen.

Maysa a Saksi adda negosiona a pagbunag ti daga idiay umamianan nga estado ti Queensland. Inlakona ti dadduma a paset ti negosiona, ket isu ken ni baketna ti nagbalin a paset ti pamilia ti panagbangon manipud pannakaiplanona. Gimmatang ti maysa a dakkel a makina a pagkali ket inaramidna ti kaaduan kadagiti trabaho a panagkali nga awan gastos ti Sosiedad. Idi nalpasen ti kadakkelan a paset ti panagkali, inlakona ti makina kalpasanna nagtalinaed iti trabaho kadagiti dadduma a paset ti konstruksion. Maysa laeng daytoy nga ulidan iti nagsayaat, awan-imutna nga espiritu nga impakita ti isuamin iti intero a proyekto.

Indonar dagiti Saksi ti pannakausar ti trak a pagbomba ti konkreto nga agipakbo ti 3,300 metro kubiko a konkreto a kasapulan para kadagiti walo a grado kadagiti dua a pasdek. Dadduma indonarda dagiti materiales a kasapulan iti 22,000-litro a konkreto dagiti tanke ti danum, ken dagiti Saksi a nagtrabaho iti paktoria indonarda ti panawenda a mangaramid kadagiti tanke.

Siempre saan nga amin dagiti boluntario ket nalalaingda iti aniaman a linea ti trabaho. Pudno unay, adu kadagiti agtutubo a lallaki ti nakaadal kadagiti baro a paglaingan idiay mismo pagtrabahuan. Sumagmamano ti nagbalin a nasisigo a mason bayat a tumultulongda nga agikabil ti kagudua milion a ladrilio a kasapulan iti proyekto. Dadduma naadaldat’ agikabil kadagiti baldosa iti pader ken datar, ket iti sumagmamano laeng a lawas, maysa a kabsat a babai ti nagbalin a nalaingen nga agikabil kadagiti papel ti diding.

Aldaw ti Dedikasion

Ti aldaw ti dedikasion, Sabado, Nobiembre 25, 1989, nagbannawag a nalawag ken imminit​—maysa a napintas, naladaw nga aldaw ti primavera. Ti maikadua a kadsaaran ti kanayonan ti baro a paktoria ket nadalusan a mangbukel ti kangrunaan nga auditorium para iti programa ti dedikasion. Dagiti closed-circuit a telebision ti nangikawing kadagiti seksion ti dadduma a grado ti dua a paktoria ken yan ti shipping, ti auditorium ti Bethel, ken ti kumidor ti Bethel. Daytoy ti nangted ti komportable a pagtugawan iti uneg para iti nasurok a 3,000.

Gapu ta limitado ti espasio, dagidiay laeng nabautisaran iti agarup 40 tawen ti naawis a tumabuno, agraman dagiti personal a sangaili ti pamilia ti Bethel ken konstruksion. Magun-odan dagiti pagrepresko iti agsapa, ken maysa a nananam a naikahon a pangaldawan ti naipaay iti tengngat’ aldaw. Iti alas 9:00 t.b., naangay ti tinawen a miting ti Watchtower Society ti Australia, ket amin dagiti 21 a miembro ti korporasion ti Australia timmabunoda. Kalpasan a dagiti nesesita a legal a detalye ti naaywananen, dadduma ti naawis iti miting, naragsakan ti amin a dimngeg iti diskurso ni Theodore Jaracz ti Bagi a Manarawidwid.

Iti ala 1:45 t.m., ti 15 minutos a toktokar ti Pagarian ti nangirugi iti programa ti dedikasion. Dagiti agdengdengngeg maragsakanda a makangngeg kadagiti report, makapainteres nga estoria, kapkapadasan, ken komento dagiti tallo a miembro ti Bagi a Manarawidwid a timmabuno. Kadagitoy, damdamo da Carey Barber ken Daniel Sydlik ti bimmisita iti Australia. Impalawag ni Kabsat Barber ti tema a “Ti Panagani Isut’ Panungpalan ti Panawen,” bayat a ni Kabsat Sydlik ti nangisalaysay ti tema a “Naragsak ti Ili a Ni Jehova ti Diosna.” Ni Kabsat Jaracz, a nagserbi kas manangaywan ti sona iti sanga ti Australia, impalawagna ti diskurso ti dedikasion.

Ti makaay-ayo a paset ti programa isut’ panangkanta ti uppat-estansa a kanta kasakbayan ti diskurso ti dedikasion. Naibatay kadagiti sasao ni Isaias ti Isaias 60:22, ti paulo ti kanta ket “Ti Bassit Agbalinto a Sangaribo.” Kadagiti sasaona naiyebkas ti panagyaman ken Jehova nga adu kadagiti nagboluntario ti naikkan pribilehio a nayonan ‘ti balayna’ iti daytoy a paset ti sangalubongan a tay-ak.

[Dagiti ladawan iti panid 15]

Baro a kanayonan ti pagimprentaan ti Watch Tower idiay Ingleburn, N.S.W., Australia

C. Barber

T. Jaracz

D. Sydlik