No Apay Nakaad-adut’ Kingdom Hall Idiay Réunion
AGARUP 640 kilometro iti daya ti Madagascar, bigla a tumpuar ti bassit a puro ti Réunion manipud ti naglawaan nga Indian Ocean. Nupay agarup 60 kilometro laeng ti kaatiddogna ken 50 kilometro ti kaakabana, agdindinamag ti isla kadagiti simmimborio a bulkanna ken sagpaminsan a naapuy a pabpabuyana. Ti kangatuan a tuktokna, a 3,069 metros ti ngatuanna iti patas ti baybay, isut’ saanen nga aktibo a bulkan a Piton des Neiges (Tuktok dagiti Niebe). Idiay umabagatan a daya a paset ti isla isut’ 2,625 metros nga aktibo a bulkan nga apagpag-isut’ pannakapanaganna a Piton de la Fournaise (Tuktok ti Urno). Anian a nakaskasdaaw a buya no daytat’ bumtak iti rabii! Adu a kalsada ti agekis-ekis nga agpangato ken agpababa kadagiti nakarangrangkis nga arisadsad, a mangted nakaay-ayat a buya iti makunkuna a nakabutbuteng a kinaimnas ti Réunion.
Apay Nakaad-adut’ Kingdom Hall?
Ti pudpudno a kinaimnas ti Réunion, nupay kasta, ket adda iti panangab-abrasa dagiti adu a taga isla iti “naimbag a damag ti pagarian” nga inwaragawag dagiti Saksi ni Jehova. (Mateo 24:14) Nangrugi ti panangaskasabada idi 1960, idi dua nga amin-tiempo a ministro ti simmangpet manipud Francia. Itan, 30 a tawtawen kamaudiananna, 1,665 a Saksi ti okupadon a mangisaksaknap ti mensahe ti Pagarian kadagiti 582,000 nga umili—ratio a 1 a Saksi iti kada 350 a tattao iti isla.
Ti kasta a panagdakkel kinasapulanna ti panangibangon kadagiti kalalainganna a lugar a paggigimongan tapno dagiti Saksi maitultuloyda ti panagdaydayawda ken naespirituan a panagad-adalda. (Hebreo 10:24, 25) Itattan, 13 kadagiti 19 a kongregasion idiay Réunion ti nakaibangonen kadagiti bukodda a Kingdom Hall. Gaput’ kasansan ti bagio iti daytoy a lugar, dagitoy ket napupuskolda a semento a patpatakder nga agkasapulan ti nawadwad a tiempo—ken gastos—tapno maibangon. Gapuna kasano a posible ti panangibangon kadagita a paggigimongan, yantangay kaaduan kadagiti Saksi itoy nga isla ket kadawyan laeng ti sueldoda ken dadakkel ti pamilia a suportaranda? Kadagiti sasao ti Biblia, ti sungbat ket ‘saan nga ababa ti ima ni Jehova.’—Isaias 59:1.
Naparmek dagiti Lapped
Kas pangarigan, panunotenyo laengen no kasanot’ panangtignay ni Jehova ti puspuso dagiti tattao a tumulong iti pannakaibangon ti Kingdom Hall idiay bassit nga ili ti Saint-Louis, a nagsaad idiay abagatan a laud a deppaar ti Réunion. Idi damo a naaprobaran dagiti plano, maysa nga agtutubo a Saksi ti nagkuna iti mangisursuro idiay klaseda ti panagkantero a maysa a Kingdom Hall ti maibangon babaen iti boluntario a trabaho. Ti maestro saanna laeng nga imboluntario ti serbisiona no di ket inyegna pay ti intero a klasena iti pagibangbangonan tapno tumulongda nga agkali iti pundasion. Kalpasanna, indonarna pay ti landok a kasapulan iti pundasion.
Idi nasurok a sangagasut a boluntario ti nagtitipon iti maysa a piesta opisial publiko tapno agsemento iti disso nga agarup 190 metro kuadrado, nakellaatda a makakita a sinerraan ti ili ti abasto ti danum. Kasano a makapagsaganada ti semento nga awanan danum? Maysa kadagiti trabahador a makaammo iti hepe ti departamento ti bombero naikeddengna nga ilawlawagna ti parikut iti daytoy naasi a tao. Di nagbayag, maysa a trak ti bombero ti immay idiay pagibangbangonan. Ti trak naglaon ti umdas a danum para iti proyekto, ket ti departamento ti bombero impalubosna nga agtalinaed dayta sadiay iti agmalmalem! Kaawatan, amin dagiti boluntario nagtignayda nga ipapuso ti panagtrabahoda.
Nabatad ti tulong ni Jehova kadagiti wagas a pannakaparmek dagiti dadduma a lapped. Kas pangarigan, iti maysa a paset iti panagbangon, ti bobida sisasaganan para kadagiti 22 nga espesial a silsilaw a napedido walo a bulan a nasapsapa. Ngem pinakaammuan ti kompania dagiti kakabsat a ti modelo a kayatda ket saanen a maar-aramid. Ania ngay ita ti maaramidan? Kasapulan ngata a masukatan ti intero a disenio ken ti bobida? Saan, ta iti umiso a kanito, nadamag dagiti kakabsat a ti maysa a lokal a managkontrata addaan kadagiti umas-asping a silsilaw para iti proyekto a di pulos naituloy.
“Mano ti adda kenka?” naisaludsod kenkuana.
“Agarup 25,” insungbatna.
Awan taktak, nagatang dagiti silaw ket naikabitda.
Bayat ti panagtultuloy ti proyekto, maysa a tao a karugrugina laeng ti makipagadal ti Biblia kadagiti Saksi ni Jehova ti nakellaat unay iti nagsayaat a pasdek.
“Ibagam kaniak,” insaludsodna, “adda kadi pay aniaman a kasapulanyo?”
“Wen,” kuna ti maysa a kabsat. “Kasapulanmi ti sound-equipment.”
Iti dayta, daytoy kabbaro nga interesado dagus nga inruarna ti libretana ket nangidonar ti ngangngani umdas para iti kompleto a baro a sound-system. Dagita a kontribusion, agraman naparabur a pautang manipud ti hedkuarters ti Watch Tower Society idiay Estados Unidos, ti nakatulong iti kongregasion a kompletuen daytoy nagpintas a Kingdom Hall.
Kas pinakatampok amin dagitoy, naragsakan ti Saint-Louis a Kongregasion a ni Brother Carey W. Barber, miembro ti Bagi a Manarawidwid dagiti Saksi ni Jehova, ti immay a nangidedikar ti Kingdom Hall idi Disiembre 1988. Naiyeskediol ni Brother Barber nga umay manipud kedkuarters ti Sosiedad sadi Brooklyn, Nueva York, tapno idedikar ti baro a sanga idiay kaarruba nga isla ti Mauritius. Idi nangngegan dagiti kakabsat idiay Saint-Louis maipapan iti daytoy, iti las-ud laeng ti tallo a lawas, nakaurnongda ti umdas a kuarta tapno mabayadan ti pletena iti eroplano ken ti maysa a miembro ti Mauritius Branch Committee tapno makapagdaliasatda manipud Mauritius nga agturong Réunion. Gapu ti panagdakkel nanipud idin, kasapulan a mabingay ti Saint-Louis a Kongregasion. Itan, dua a kongregasion ti agus-usar iti baro a Kingdom Hall.
Ti Dayaw Mapan ken Jehova
Kumusta met ngay dagiti dadduma a kongregasion ti Réunion? Gaput’ nagsayaat a pannakaabrasa ti trabaho a panangikaskasaba ti Pagarian, ti tumabtabuno iti gimong kadagiti Kingdom Hall ket manipud 150 ingganat’ 200 porsiento iti bilang dagiti Saksi ni Jehova iti dayta nga isla. Ngarud nalawag no apay a kasapulan dagiti adu a Kingdom Hall idiay Réunion. Kinapudnona, tallo pay ti nabangon nanipud iti daydiay adda idiay Saint-Louis, ket daytat’ nangiyeg iti dagup a bilang a 13 para kadagiti 19 a kongregasion iti isla.
Gapu amin kadagitoy, ti dayaw mapan ken Jehova, a nangipadto: “Ti bassit agbalinto a sangaribo, ket ti kabassitan maysa a napigsa a nasion. Siak, ni Jehova, aramidekto a nadaras iti panawenna.” (Isaias 60:22) Kas kadagiti dadduma a paset ti daga, pimmudno daytoy a padto iti daytoy nagpintasan nga isla.