Panangiwaragawag ti Naimbag a Damag iti “Polynesian a Siudad” ti New Zealand
“TI KADAKKELAN a Polynesian a Siudad ti Lubong.” Kastat’ panangawag ti dadduma iti Auckland a kabisera ti New Zealand. Apay? Saan laeng a gapu ta daytat’ pagtaengan dagiti kabukbukodan a Polynesian ti New Zealand, ti Maori, ngem kasta met gapu ta pinullo a ribo dagiti sabsabali pay a Polynesian ti agnanaed sadiay. Iti nabiit pay a tawtawen, dimmayoda manipud Makinlaud a Samoa, dagiti Isla ti Cook, Tonga, Niue, ken dadduma pay nga isla ti Pacifico. Ay, ad-adun ti Maori ti Isla ti Cook idiay New Zealand ngem iti amin a grupo nga adda idiay Isla ti Cook a mismo! Umas-asping, dagiti residente a Niueano idiay Auckland dakdakkelen bilangda ngem kadagiti adda idiay Niue.
Nupay dagitoy taga-isla ti Pacifico immakarda idiay Auckland kangrunaanna gaput’ ekonomia, addaanda pay sabsabali a kasapulan a masapul a mapunnuan. Napateg kadagitoy managayat-Biblia a tattao isut’ naespirituan a kasapulanda. (Mateo 5:3) Iti panangbigbig iti daytoy, dagiti Saksi ni Jehova idiay New Zealand nangikabildat’ dakkel a panagregget tapno iwaragawag ti “naimbag a damag ti Pagarian” kadagitoy a taga-isla. (Mateo 24:14) Aniat’ naaramidanen maipapan iti daytoy, ket kasano a simmungbat dagiti taga-isla?
Rumangrang-ay dagiti Samoano
Ti komento nga inaramid ti maysa a misionero idiay Samoa ibaganat’ sumagmamano a banag maipapan ti panangmatmat dagiti taga-isla iti naespirituan a bambanag. “No damdamom ti makasabat ti maysa idiay New Zealand, nakaugalian a saludsoden ti sekular a pagtrabahuanna,” inlawlawagna. “Idiay Samoa ti umuna a saludsod a maiyimtuod masansan mainaig iti nakaitimpuyogan a relihion.” Di pagsiddaawan, ngarud, a ti dua a Samoan-pagsasaona a kongregasion dagiti Saksi ni Jehova idiay Auckland naparpardas panagdakkelna ngem ti gagangay a kongregasion idiay New Zealand.
Ti immuna a kongregasion a Samoano idiay Auckland naipasdek idi 1977. Gaput’ inted-Dios a panagdakkel, nabuangay ti maikadua pito a tawen kalpasanna. (Idiligyo ti 1 Corinto 3:6.) Kadagitoy dua a kongregasion, adda dagup a 154 a manangibunannag ti Pagarian, 12 kadakuada ti aktibo iti amin-tiempo a ministerio. Iti gagangay a Domingo, nasurok a 275 a tattao ti tumabtabuno kadagiti naibatay-Biblia a gimgimong a maang-angay idiay Kingdom Hall.
Matmatmatan dagiti Samoano a kakabsat a lallaki ken babbai ti pammatida a siseserioso, kas ipasimudaag ti regta ken determinasion nga ipakpakitada iti trabaho a panangikasaba ti Pagarian ken panagaramid-adalan. (Mateo 28:19, 20) Makita daytoy manipud sumaganad a kapadasan ti maysa a kabsat a Samoana:
Iti binalay-balay a ministerio, nasarakan ti kabsat ti maysa a babai a namadpadakes ti amin a relihion kas managinsisingpet ket inrikepna ti ridaw. Nakigtot ken masmasnaayan, pinampanunot ti kabsat no ania ti aramidenna. ‘Diak mabalin a panawan isuna a mangipagpagarup a dagiti Saksi ni Jehova managinsisingpetda,’ pinanunotna. Gapuna inkeddengna ti mangibati ti surat. “Inlawlawagko iti ababa ti Nainkasuratan a nakaibatayan ti trabahok ket indawatko nga ikkannak ti tiempo tapno ilawlawag kenkuana ti namnama nga ididiaya ti Biblia. Inramanko met ti numero ti teleponok.”
Nagtultuloy ti kabsat iti ministeriona, nga immawag kadagiti dadduma pay a pagtaengan. Iti dalanna idi a madanonnan ti maikapat a balay, isut’ naikkan ti mensahe iti telepono nga agsubli tapno kitaenna di babai a siuunget a nangirikep ti ridaw iti nasapsapa. “Nagpadispensar ti babai iti damdamo a panagtignayna,” inlawlawag ti kabsat, “ken inyebkasnat’ apresasion iti surat nga imbatik. Daytat’ sinaruno ti maysa a nabunga a panagpatang, ket naipasdek ti panagadal ti Biblia iti pagtaengan.”
Makaparagsak met a makita ti espiritu ti misionero a panagsakripisio nga impakita ti dadduma kadagiti Saksi a Samoano. Maysa a kabsat a lalaki ken ti pamiliana immakarda idiay Wellington manipud Auckland idi 1981 tapno tulonganda ti bassit a grupo nga agob-obra kadagiti populasion a Samoano sadiay. Manipud pakabuklan a 11 a manangibunannag ti Pagarian iti dayta a tiempo, nabuangay ti kongregasion dagiti 47. “Dagiti gunggona linab-awanda nga adayo dagiti sakripisio,” kinuna ti kabsat a lalaki. Itay nabiit, isu ken ti pamiliana sinungbatandat’ ‘awag ti Macedonia’ ket nagsublida idiay Makinlaud a Samoa. (Aramid 16:9, 10) Dagiti dadduma nagsublida met kadagiti dati a pagnanaedanda ket innalada ti espesial a payunir, misionero, wenno Bethel a serbisio.
Ti Tignay dagiti Niueano
Ti trabaho a panangaskasaba ket rumangrang-ay met kadagiti Nieuano idiay Auckland. Ti agdaldaliasat a manangaywan isalaysayna: “Iti binalay-balay a ministerio, nakaugalian ti pannakaawis a sumrek. Masansan a kaab-abay ti Biblia ti pamilia, ket naibilang a normal a banag a pagsasaritaan dayta.” Adda itan ti nakaak-aktibo a kongregasion a Niueano idiay Auckland. Kabayatan ti bisita ti agdaldaliasat a manangaywan iti napalabas a tawen, ti 76 a manangibunannag ti Pagarian a naitimpuyog iti dayta inabrasada ti 127 a tattao iti publiko a palawag ti Biblia iti Domingo. Ket adda nagsayaat nga espiritu kadagiti kakabsat.
“Ti bisita ket namatmatan kas maysa a naisangsangayan a lawas ti panangparegta ti isuamin,” naimatangan ti agdaldaliasat a manangaywan. “Ti tunggal pannangan ket pasken ti kongregasion. Ket dagitoy dagiti okasion a pakaiserbian ti kakasta a paggugusto a Niueano kas ti takihi (maysa a bandeha ti papaws [papaya], taros [maysa a nateng iti tropiko], ken krema ti niog a nabungon iti bulong ti saba), pitako (maysa a masa a naaramid manipud taros, saba, ken balinghoy), ken punu povi (nailata a narekaduan a karne ti baka), a no dadduma madakamat kas porterhouse steak dagiti taga-isla.”
Dagiti Polynesian-Pagsasaona a Publikasion
Tapno mapennek ti naespirituan a kasapulan ti populasion a Polynesian idiay Auckland ken iti sadino pay, ti Watch Tower Society inyurnosnat’ panangpataud ti adu a publikasion ti Biblia kadagiti Polynesian a pagsasao. Kas pangarigan, ti Rarotongan, wenno Maori iti Isla ti Cook, ti Pagwanawanan maipabpablaak iti mamindua ti makabulan. Maaw-awat met a nasayaat ti makabulan a Pagwanawanan a Niueano. Ti Rarotongan ken Niueano nge edision ti Ti Pagwanawanan ket addaan agdama a sirkulasion nga agarup 1,000 a kopia tunggal maysa, agarup 900 a kopia ti Samoano nga edision ti maiwarwaras itan idiay New Zealand.
Kas kanayonan iti Ti Pagwanawanan, adu a libro ken broshur ti magun-odan iti nadumaduma a Polynesian a pagsasao. Ti libro a Ti Kinapudno a Mangiturong iti Biag nga Awan Inggana, a naipablaak iti Niueano idi 1989, isut’ umuna a publikasion iti dayta a pagsasao a mangipapaay ti pannakaawat kadagiti pamunganayan a sursuro ti Biblia. Nangnangruna nga epektibo iti tay-ak iti Maori (Rarotongan) ti Isla ti Cook isut’ libro a Mabalinyo ti Agbiag nga Agnanayon iti Paraiso a Daga iti dayta a pagsasao. Agarup nga amin a panangyadal ti Biblia maar-aramidda babaen tulong dayta a libro. “Ti mangpaneknek iti kinaepektibona a katulongan ti panangisuro,” naimatangan ti maysa a panglakayen, “isut’ kinadaras a dagiti iyad-adalan mangrugida a tumabuno kadagiti gimong ti kongregasion.”
Kas kanayonan iti gagangay a panagiwarasda kadagitoy a publikasion iti binalay-balay, dagiti tattao ni Jehova makaipaimada ti nakaad-adu a literatura iti maaw-awagan panangaskasaba iti awan-linongna a tiendaan. Gaput’ iyaadu ti populasion ti Polynesian idiay Auckland kadagiti nabiit pay a tawtawen, timmaud dagiti dadakkel a tiendaan nga addaan kadagiti temporario a paglakuan nga aglaklako kadagiti taraon ti Isla Pacifico. Adda 25,000 a tattao nga umay iti kasta a tiendaan iti bigat ti Sabado. Kas panangusar a nainsiriban iti daytoy a gundaway, dagiti Saksi mapanda kadagitoy a tiendaan ket makisaritada kadagiti akinkukua kadagiti paglakuan ken kadagiti aggatgatang maipapan ti Pagarian ti Dios.
Iti intero a ministerioda, dagiti Saksi ni Jehova nagimulada ti nawadwad a bin-i ti Pagarian ket nakaipaimada kadagiti nakaad-adu a literatura ti Biblia kadagiti tattao a Polynesian. Ti sanga nga opisina ti Watch Tower Society inreportna a kabayatan ti 1990 a tawen serbisio, 23,928 a kopia ti Polynesian-pagsasaona a literatura ti naibiahe manipud paktoria.
Panagrag-o iti Maysa a Naespirituan a Lamisaan
Sipapanunot kadagiti naespirituan a kasapulanda, dagiti Saksi a Polynesian ipangpangrunada ti itatabuno kadagiti linawas a Nakristianuan a gimgimong kadagiti Kingdom Hall, kasta met ti itatabuno kadagiti asamblea ken kumbension. (Hebreo 10:23-25) Idiay “Nadiosan a Kinahustisia” a Distrito a Kumbension a naangay idiay Auckland idi Disiembre 1988, naangay dagiti nagduduma a sesion iti Samoano, Niueano, ken Maori ti Isla ti Cook. Ti tampok ti programa a Samoano isut’ nasayaat pannakasanayna ken entusiastiko a drama ti Biblia. Dagiti Saksi a Niueano ken iti Isla ti Cook idiay Auckland imparangarangda ti Nakristianuan a kinamanagpadagusda babaen panagserbi kas nararagsak a manangsangaili kadagiti bisita manipud nakaiyanakanda nga isla. Pudno a ti kumbension maysa nga okasion ti panagpiesta ken panagrag-o iti naespirituan a lamisaan ni Jehova. Iti 1990 a “Nadalus a Pagsasao” a Kumbension idiay Auckland, ti kangatuan a bilang a 503 ti timmabuno kadagiti sesion a Samoano.
Ti positibo nga isusungbat iti mensahe ti Pagarian ket nalawag nga ebidensia a dagiti tattao manipud kadagiti isla a Polynesian iti Sud Pacifico ‘inur-urayda ti linteg ni Jehova.’ (Idiligyo ti Isaias 42:4, 12.) Isuda met sirarag-o a makiramanda iti panangiwaragawag ti naimbag a damag iti “Polynesian a siudad” ti New Zealand.