Ti Maudi a Panangukom

“INTON matayka ti kararuam matutuokto nga is-isuna; daytantot’ impierno para kenkuana: ngem inton aldaw ti panangukom ti bagim makitiponto iti kararuam, ket agpadadanto nga addaan impierno, ti kararuam agling-et kadagiti tedted ti dara, ken ti bagim mapno iti rigat.”

KASTOY ti panangiladawan ti maika-19 a siglo a mangaskasaba a ni C. H. Spurgeon iti panangmatmat ti klero iti aldaw a panangukom ken ti panagsagsagaba dagiti nailunod. Ti Italiano a managdibuho a ni Michelangelo addaan ti umasping a nakabutbuteng a pammati, kas makita iti dibuhona a “Ti Maudi a Panangukom” (a ti paset dayta ti naiparang iti ngato), iti diding ti kapilia ti Sistine idiay Roma. Ti The New Encyclopædia Britannica kunana maipapan iti daytoy a dibuho: “Ti Kristo iti Panangukom ket maysa a mamutbuteng a dios imbes a maysa a Kristiano a manangisalakan, ad-adda a maseknan iti panangilunod ti natauan a rasa imbes nga abrasaenna dagiti nabendituan idiay langit.”

Ti Doktrina ti Kakristianuan

Kadagiti naglabasen a siglo, ti aldaw a panangukom ken ti impierno ket pagay-ayat a suheto kadagiti sermon. Idiay pulpitoda, dagiti mangaskasaba kas ken ni C. H. Spurgeon nagsaoda iti naariwawa, mangigkigtot a pamay-an buyogen nalawag a panangiladawan kadagiti nakabutbuteng a panangparigat nga agur-uray kadagiti managbasol. Itatta, dayta a kita ti panangaskasaba ket mammano a mangngeganen. Ngem ti impierno ken ti maudi a panangukom ket opisialda pay laeng a sursuro ti kaaduan a simbaan.

Ti kaaduan a relihion iti Kakristianuan agarup nga umanamongda iti sursuro ti Romano Katoliko a dagiti panangukom ti Dios umayda iti dua a tukad. Umuna, adda ti “partikular a panangukom.” No matay ti maysa a tao, ti makunkuna nga imortal a kararuana dagdagus a maukom ken maiyawat iti agnanayon mabalin nga idiay impierno wenno idiay langit.a Kalpasanna umay ti maudi, wenno ti pangkaaduan, a panangukom idiay ngudo ti tiempo inton dagiti bagi ti natnatayen mapagungarda ken maitiponda manen kadagiti imortal a kararuada.

Iti daytoy aldaw a panangukom, dagiti kararua idiay langit agtalinaedda sadiay ken maitiponda manen kadagiti bagida a napagbalinen a di agrupsa. Dagidiay agsagsagaba idiay impierno agtalinaedda met sadiay, ket dagiti kararuada maikaykaysada met iti napagungar, din agrupsa a bagbagi. Sigun iti dadduma, daytoy pagbalinenna a ti panagsagsagaba dagidiay adda idiay impierno ket narigrigat. Dagidiay sibibiag pay laeng kas tattao ditoy daga saanda a matay. Maukomda bayat a sibibiagda pay laeng ket mapanda, mabalbalin a “bagi ken kararua,” a deretso idiay langit wenno impierno.

Ti posibilidad ti panangibtur kadagiti di mailadawan a pannakatuok idiay impierno pinagbalinna ti intero a suheto ti maudi a panangukom kadagiti ima ni Jesu-Kristo a banag a nakabutbuteng a panunoten. Iti panangmatmat itoy, agsiddaawkayto aya a makaammo a, kinapudnona, ti panangukom ti Dios ket masansan a pakaigapuan ti panagrag-o ken ti Aldaw a Panangukom maysanto kadagiti kararagsakan a kanito iti amin a natauan a historia? Kasano nga agbalin a kasta?

[Footnote]

[Picture Credit Line iti panid 3]

Random/Sipa Icono