Ikikita iti Labes ti Inaramid-Tao a “Talna ken Talged”
Kinapudnona ket, dagiti tao nikaanoman dida maipaay ti pudpudno, manayon a talna. Apay a saan? Agsipud ta dagiti tao ket saan nga isuda dagiti pudpudno a manangdadael ti talna, nupay makiramanda iti basol no maipapan iti namansaan ti dara a historiada. Ti pudpudno a manangdadael ti talna ket napigpigsa ngem tao. Daytat’ awan sabali no di ni Satanas a Diablo, isu a nadeskribir idiay Biblia kas “mangal-allilaw iti intero a mapagnaedan a daga.”—Apocalipsis 12:9.
KUNAEN ti Biblia: “Ti intero a lubong adda iti babaen daydiay a managdakdakes [ni Satanas].” (1 Juan 5:19) Ngarud, ti pananggun-od ti pudpudno a talna ken manayon a talged masapul nga iramanna ti panangikkat ken Satanas iti eksena ken ti sistema ti lubong a binangonna ken silalawag a konkontrolenna. (Idiligyo iti Isaias 48:22; Roma 16:20.) Di maaramid dagiti tao daytoy.
Kasano, ngarud, a magun-odan ti talna ken talged? Babaen iti pannakabalin daydiay napigpigsa nga amang ngem ni Satanas. Ti Dios a Mannakabalin-amin nangituyang iti naikeddeng a tiempo ti panagtignay ni Satanas iti tengnga ti sangatauan. Inton dumteng dayta a naikeddeng a tiempo, “ti kellaat a pannakadadael” ti umapay iti lubong nga adda iti babaen ti pannakabalin ni Satanas. (1 Tesalonica 5:3-7) Amin dagiti ebidensia agturongda iti konklusion a mapasamak daytoy iti mabiit.
Talna ken Talged Itan!
Nupay kasta, kumusta ngay ita? Ti maysa a rukod ti pudno a talna ken talged ket posible uray pay ita. Kasano? Saan a kas iti pinadas dagiti adu a narelihiusuan a pangulo, babaen iti pannakinamin iti politika iti daytoy a lubong, ngem, imbes ketdi, babaen ti panangsurot kadagiti bilin ken balakad ti Dios.
Dayta kadi a kurso pudpudno a mamataud ti talna? Wen, talaga a kasta. Kas pangarigan, nasintir daytan dagiti Saksi ni Jehova ket natakkuatanda a pudpudno a posible a tagiragsaken ti napaypayso a talna kasta met ti naruay a talged. Ti panangsurot kadagiti bilin ti Dios kas naipanayag idiay Biblia ti namagbalin kadakuada nga agtitipon kas maysa nga internasional nga organisasion iti pudpudno a talna, aniaman ti rasa, nasionalidad, wenno pagsasaoda.—Salmo 133:1.
Iti panagtulnog iti nadiosan a linteg, sisisimbolikon a ‘pinandayda dagiti kampilan a pagbalinen nga arado ken dida adalenen ti pannakigubat uray kaano.’ (Isaias 2:2-4) Natalgedda iti ayat ti Dios ken agtalekda a dagiti naespitituan a kakabsatda ket maseknanda kadakuada. (Roma 8:28, 35-39; Filipos 4:7) No pagduduaanyo ti kinapudno daytoy, awisendakayo a pumasiar iti maysa kadagiti Kingdom Hallda tapno mapaneknekanyo.
Talna ken Talged iti Sangalubongan
Daytoy, nupay kasta, saan nga isut’ maudi a kaitungpalan ti kari ti Biblia maipapan iti pudpudno a talna ken talged. Adayo a kasta! Daytat’ maysa laeng a pamalatpatan no anianto ti pagbalinan daytoy a lubong no suroten ti tunggal maysa dagiti linteg ti Dios. Iti mabiit dayta a pamalatpatan ti pumaysonto.
Kuna ni apostol Pablo: “Inton [dagidiay di agserserbi iti Dios] sasawenda: ‘Talna ken talged!’ [a pagarupenda a naiyegda ti talna ken talged iti bukodda a pamay-an] iti kasta isunto met ti idadateng ti kellaat a pannakadadaelda.” (1 Tesalonica 5:3) Ikeddengto ti Dios a nakapapaut unayen ti panangallilaw ni Satanas iti sangatauan. Daytantot’ tiempon tapno isut’ pukawenna, kasta met ti narugit a sistema ti lubong nga adda iti pannakabalinna. Isunto daytan ti tiempo nga agpaay ti kaitungpalan ti padto ni Daniel: “Iti al-aldaw dagidiay nga ar-ari ti Dios ti langit mamangonto iti maysa a pagarian a dinto maduprak. Ket ti pagarian met laeng dinto maited iti sabali a tao. Burakburakennanto ken pagpatinggaenna dagitoy a pagpagarian, ket agtalinaedto iti agnanayon.”—Daniel 2:44.
Agbalinto kadi daytoy a nakusit a tignay iti biang ti Dios? Nikaanoman. Ti kellaat a pannakadadael ti dumtengto kadagidiay laeng maikari iti dayta maitunos iti panangukom ti Dios, dagiti pagalagadan ti Dios. Pagtalkanyo kadi ti Namarsua tapno mangikeddeng a sililinteg iti daytoy a banag? Sigurado nga ipabus-uytay daytoy a banag kadagiti imana! Ket anianto ti resulta ti trabahona a panangukom? Kuna ti proverbio: “Dagiti sililinteg isudanto dagiti agnaed iti daga, ken dagiti awan basolna isudanto ti matda iti rabawna. No maipapan kadagiti nadangkes, maikisapdanto iti daga.” (Proverbio 2:21, 22) Addanto kadi asinoman nga agliday iti pananakapukaw dagiti nadangkes?
Iti pannakaikkat dagiti manangdadael ti talna, ti napaypayso a talna ken talged isuntot’ gunggona ti sangatauan iti intero a daga iti sidong ti mananggunggona a turay ti Pagarian ti Dios. “Didanton mangranggas wenno mangdangran iti isuamin a nasantuan a bantayko; gapu ta ti daga mapnonto iti pannakaammo ken Jehova kas dagiti danum saknapanda ti baybay.” (Isaias 11:9) Patienyo kadi daytoy a kari ti Biblia? Agtalekkayo kadi a mapasamakton dagitoy a banag iti mabiit? No agduduakayo, paregtaendakayo a mangusig pay iti banag. Kinaagpaysuanna, ti dalan ti Dios ti kakaisuna laeng a pamay-an a magun-odan ti tao ti il-iliwenna a kalat ti pudpudno a talna ken napaypayso a talged.
[Dagiti ladawan iti panid 8]
Ti ili ni Jehova tagiragsakenda ti pudpudno a talna ken naruay a talged ita