Ti Naasi a Romano a Senturion
DAGITI Romano a senturion dida naaddaan ti pannakaidayaw gapu iti kinaasi. Gapu ta nadutokan a mangidaulo iti buyot ti sangagasut a maingel a soldado, masapul a ti senturion ket maysa a nadamsak a manangsikap, manangdisiplina, ken, no dadduma, uray pay mammapatay. Uray kasta, ibaga kadatayo ti Biblia ti maysa a Romano a senturion ti buyot ni Augusto a nangipakita ti pudpudno a kinamanagparabur ken pannakipagrikna ken apostol Pablo. Ti naganna? Julio.
Iyam-ammonatayo ti Biblia iti daytoy a lalaki idiay Aramid kapitulo 27. Kiniddaw ni apostol Pablo a denggen koma ni Cesar ti panagdawatna idiay Roma. Ngarud, ni Pablo, ken dagiti sumagmamano a sabsabali a balud, ti naiyawat iti panangaywan ti “maysa nga opisial ti armada a managan Julio iti buyot ni Augusto.” Naglayagda manipud Cesarea, pagsangladan a siudad iti amianan a laud ti Jerusalem a nagserbi kas hedkuarter dagiti Romano a buyot. Kunaen ni historiador Lucas: “Ket iti sumuno nga aldaw simmangladkam idiay Sidon, ket naimbag ti pakinakem ni Julio ken Pablo ket impalubosna kenkuana a mapan kadagiti gagayyemna tapno umawat ti naimbag a nakem.”—Aramid 27:1-3.
No apay a natignay ni Julio a mangipakita ti kasta a kinaasi ket saan a nailanad idiay Biblia. Mabalin nga isut’ adda iti sidong ti panangibilin ni Gobernador Festus nga ipaayanna ni Pablo ti naidumduma a panangtaming. Wenno nalabit gapu ta pagaammona dagiti sirkumstansia ti pannakatiliw ni Pablo, nagraywan unay ni Julio ti tured ken kinatarnaw ni Pablo. Aniaman kadagita, kasla binigbig ni Julio a ni Pablo ket saan a gagangay a balud.
Uray kasta, inkeddeng ni Julio ti di panangipangag iti pakdaar ni Pablo maibusor iti idadagas idiay Fenix. Di nagbayag sinuba ti napigsa a bagio ti barangay a namagpeggad a mangisadsad iti dayta kadagiti igid ti baybay ti makinamianan nga Africa. (Aramid 27:8-17) Iti kangalayan daytoy a bagio, timmakder ni Pablo ket impanamnamana kadagiti napabutngan a naglugan nga ‘awanto ti mapukaw a biag kadakuada, no di laeng ti barangay.’ Nupay kasta, ginandat dagiti sumagmamano a marinero ti aglibas. Idin imbaga ni Pablo ken Julio: “No dagitoy saanda nga agbati ditoy barangay, dikay mabalin ti maisalakan.”—Aramid 27:21, 22, 30, 31.
Iti daytoy a gundaway, inkeddengen ni Julio ti dumngeg ken Pablo, ket napawilan ti panaglibas dagiti marinero. Pimmudno ti padles ni Pablo, nakabatog ti barangay idiay pagtumpungan ti dua nga ayus ket daytat’ narba. Iti amakda nga amangan no makalibas dagiti balud, dagiti nakalugan a soldado inkeddengda a papatayen ida amin. Naminsan pay, nupay kasta, bimmallaet ni Julio ket pinawilanna dagiti buyotna, ngarud insalakanna ti biag ni Pablo.—Aramid 27:32, 41-44.
Saan nga ibaga kadatayo ti Biblia no ania ti nagtungpalan daytoy a naasi a senturion wenno no inabrasana ti Kristiano a pammati. Aniaman ti kinaasi nga impakitana ket maysa a panangiparang kadagiti aramid ti inted-Dios a konsiensia. (Roma 2:14, 15) Dagiti Kristiano, nupay kasta, artapanda pay ti basta natauan a kinaasi ket ipakitada ti nadiosan a kinaasi nga agresulta manipud panangikutda iti espiritu ti Dios. (Galacia 5:22) La ketdi, no ti maysa a pagano a soldado a di makaam-ammo iti Dios makaipakita ti asi, anianto ketdin ti pannakatignay ti ili ti Dios a mangaramid ti kasta!