Panangani Kadagiti Managdaydayaw
NAIKKAN ni apostol Juan ti maysa a sirmata kadagiti manggunggon-lubong a pasamak a maaramid “iti aldaw ti Apo.” Nakitana ni nailangitan nga Apo Jesu-Kristo a sumungsungad maipaay iti nalinteg a pannakigubat, nga inladawan ti puraw a kabayo—“mangparmek ken an-anayenna ti panangparmekna.” Ti umuna nga aramidenna ket isu ti panangitappuakna iti kangrunaan a kabusor ti Dios, ni Satanas, manipud langlangit agturong iti aglawlaw daytoy a daga. Bimmales ni Satanas babaen panangsaplitna iti sangatauan buyogen ti di maartapan a panangpapatay, bisin, ken sakit, nga inladawan dagiti piguratibo a nakasakay ken dagiti kabayoda—nalabaga, nangisit, ken nabessag. (Apocalipsis 1:10; 6:1-8; 12:9-12) Dagitoy nga ay-ay nangrugida a bimtak idi tawen 1914 ket limmanlanda manipud idin. Iti mabiit, agngudodanto babaen iti inladawan ni Jesus kas “dakkel a rigat a nanipud idi punganay ti lubong agingga ita, awan pay kasta a napasamak, ket awanto metten iti uray kaano.”—Mateo 24:3-8, 21.
Kasanonto nga agtignay dagiti managdaydayaw ni Jehova iti dayta a tiempo? Ti Apocalipsis kapitulo 7, bersikulo 1 aginggat’ 10, saritaenna dagiti angheliko a pannakabalin a “laplapdanda” dagiti angin ti pannakadadael agingga a maurnong dagitoy a managdaydayaw. Kabayatan ti panawen manipud 1914, dagiti tartaraudi ditoy daga ti naespirituan nga Israel, nga addaan bilang a 144,000, ket naurnongen. Ken kalpasanna “adtoy! maysa a dakkel a bunggoy, nga awan makabalin a bumilang, a naggapu kadagiti amin a nasion ken tribo ken ili ken pagsasao.” Daytoy a dakkel a bunggoy addaanen bilang a minilion. Agtakderda a naanamongan iti sanguanan ti trono ti Dios gapu iti panangalagadda ti pammati iti makasubbot a dara ni Jesus, a napapatay kas maysa nga awan basolna a kordero. “Ket agpukpukkawda iti dakkel a timek, a kunkunada: ‘Ti pannakaisalakan nagtaud iti Diostayo, nga agtugtugaw iti trono, ken iti Kordero.’” Dagitoy a naregta a managdaydayaw agtultuloy a kunkunada “Umayka!” kadagiti sabsabali pay, a maur-urnong met maipaay iti pannakaisalakan iti “dakkel a rigat.”—Apocalipsis 7:14-17; 22:17.
“Iti Isuamin a Daga”
Kadagitoy a napeklan a managdaydayaw, maikuna: “Ti awengda nagsaknap iti amin a daga, ken dagiti sasaoda agingga kadagiti pungpungto ti lubong.” (Roma 10:18) Ti panagagawada ket nabendisionan kadagiti naisangsangayan a bunga. Kas pangarigan:
Ipadpadamag itan ti Mexico ti 335,965 nga aktibo a managdaydayaw ni Jehova, ngangngani sangagasut a ribo nga irarang-ay iti tallo la a tawen! Apay a nakadakdakkel a panagsaknap? Mabalin a tumulong a mangilawlawag ti sumaganad a salaysay. Maysa nga agtutubo a lalaki a managan Aurelio ket sakristan iti maysa a simbaan ti Katoliko. Tunggal isasangbay dagiti Saksi ni Jehova iti dayta a purok, batingtingenna dagiti kampana ti simbaan tapno upayenna ti siasinoman manipud panagimdeng kadakuada. Idi agangay isut’ gimmatang ti Katoliko a Jerusalem Bible ket rinugianna a basaen, ngem dina naawatan dayta. Kalpasanna nakitana ti maysa a gayyemna nga addaan kopia ti New World Translation a naipasigpit iti kilikilina. Inublag ni Aurelio ti gayyemna ken, iti panangibagana kenkuana nga ulbod ti Bibliana, isut’ inkuyogna iti balayna tapno ipakitana kenkuana ti “pudpudno” a Biblia. Kuna ti gayyemna: “Basaem ti Exodo 20,” ket sa pimmanaw.
Nangrugi iti kapitulo 1, pininda a binasa ti sakristan ti intero nga Exodo agingga a nakadanon iti Ex kapitulo 20, bersikulo 4 ken 5. Isut’ naklaat iti kuna ti Katoliko a Bibliana maipapan kadagiti ladawan. Kalpasan ti Misa iti sumuno a Domingo, insangona iti padi dagiti teksto maipapan kadagiti ladawan. Idi damo kuna ti padi a basta raraemenna laeng dagiti ladawan; dina ida dinaydayaw. Iti pannakakitana a di napnek ni Aurelio, isut’ pinabasol ti padi iti pannakiadal kadagiti Saksi ni Jehova. Pinaulbodan daytoy ni Aurelio ngem innayonna, “Ita makipagadalakon!”
Iti sumaruno nga isasangbay dagiti Saksi idiay purok, nakiuman ni Aurelio kadakuada ken nangrugi a nakipagadal ti Biblia kadakuada. Simmardengen nga agtrabaho idiay simbaan ket iti tallo a bulan naragpatna ti pannakaikari a makipaset iti publiko a ministerio kaduana dagiti Saksi ni Jehova. Ti umuna a balay a sinarungkaranna ket ti balay ti padi, a di mamati idi makitana ti dati a sakristan iti akem a manangikasaba ti Pagarian. Isut’ binutbuteng ti padi iti pannakailaksid, ngem kuna kenkuana ni Aurelio a saan a nasken daytoy gapu ta pinanawannan ti simbaan. Ti natured a kursona ti nangparegta kadagiti adu a pumurok a makipagad-adalen kadagiti Saksi ni Jehova. Ni Aurelio ken 21 a sabsabali pay manipud iti dayta a purok ket nabautisaran iti simmaganad a distrito a kumbension. Nakaparpartak ti iyaadu iti daytoy a lugar nga adda laeng maymaysa a panglakayen a mangrepaso iti daytoy a grupo kadagiti saludsod maipaay kadagiti kandidato ti bautismo.
“Ti Awengda Nagsaknap”
Saan a malisian ti pannakaikasaba ti Pagarian. Maysa nga Italiano a Katoliko ti marurod tunggal isut’ sarungkaran dagiti Saksi ni Jehova. Idi isut’ inyalis ti kompaniana idiay Singapore, impagarupna a kamaudiananna isut’ saandan a singaen. Ngem iti pannakasdaawna, adda met sadiay dagiti Saksi. Gapuna a nangala iti dua a nauyong nga aso tapno duklosenda dagiti saksi a sumangbay. Idi a dua a Saksi ti napan idiay balayna, rimmuar dagidiay nga aso. Napabutnganda, nagtaray dagidiay a babbai, a nagturongda iti nagsina a direksion iti maysa a pagsisinaan ti dalan. Bayat a maysa kadagiti aso ti nakakamakam kenkuana, kinaut ti maysa kadagiti Saksi ti dua a broshur manipud iti bagna ket inselselna ida iti nakanganga a ngiwat ti aso. Gapu itoy, simmardeng a kimmamat kenkuana, nagbuelta, ket nagawid.
Iti sumuno a lawas, dagiti isu met laeng a Saksi ket agar-aramid iti panagsarungkar iti maysa a balay iti ballasiw ti dalan. Ti makinkukua kadagiti aso ket adda idiay hardinna, ket, nakaskasdaaw unay, kinablaawanna dagiti babbai ket inawisna ida idiay balayna. Kunana kadakuada a di pay pulos nakisarsarita kadagiti Saksi ni Jehova wenno nakabasa man iti aniaman kadagiti publikasionda. Ngem nasdaaw a nakakita kadagiti broshur iti ngiwat ti maysa kadagiti asona. Iti dayta a rabii binasana dagiti broshur ket pudpudno a nasdaaw kadagita. Nupay isu ket maysa a Katoliko iti intero a panagbiagna, inyebkasna ti panagtarigagay a makipagadal iti Biblia kadagiti Saksi ni Jehova.
Gapu ta ti lalaki ket naisubli idiay Italia, naaramid dagiti urnos tapno isut’ iyadalan dagiti Saksi ni Jehova sadiay. Bayat nga isu ken ni baketna rinugianda ti tumabuno kadagiti gimong, siuunget a sinango ida ti padi ti simbaan buyogen dagiti panangipangta. Idi adda nangpuor iti hardinda, pinugsat ti agassawa amin a pannakainaigda iti simbaan. Kunaen itan daytoy a lalaki: “Mangaskasabaakon kadagiti adu a kameng ti pamiliak gapu ta kayatko a maammuanda a ni Jehova isu laeng ti pudno a Dios.”
“Kadagiti Pungpungto ti Mapagnaedan a Daga”
Sabali pay a kapadasan manipud maysa nga ungto ti daga ipakitana no kasano a ti mensahe ti Pagarian ket maapresiar ken tumulong a mangbaliw kadagiti biag. Bayat iti itatabunona kadagiti klase sakbay iti panaganak, maysa a Saksi idiay Australia nasabetna ti maysa a babai nga addaan adu a dakes nga aramid, uray la nga agkedked a mangisardeng iti panagsigarilio kabayatan ti panagsikogna. Nariribukan unay ti Saksi iti kababalin daytoy a babai. Naiparparna a naggiddanda a naganak ken iti isu met laeng a ward ti ospital, gapuna a naaddaanda ti gundaway a makapagsarita. Nagparang a naaddaan ti babai kadagiti adu a parikut kabayatan ti kinaubingna, ket ita ti pannakiasawana ket agngangabit iti pannakaburak. Gapuna, kalpasan iruruarna idiay ospital, sinarungkaran ti Saksi ti babai ket inrugina ti panangiyadal iti Biblia kenkuana, nga inusarna ti libro a Panangparagsak iti Biag ti Pamiliayo.
Ti asawa ti babai nabayagen nga agkarkararag iti Dios a masarakanna koma ti pudno a relihion, nga inayonna ti kondision a: “La ketdi no dayta ket saan a ti Saksi ni Jehova!” Nupay kasta, idi natakkuatanna a makipagad-adal ni baketna kadagiti Saksi ni Jehova, rinugianna ti nagsalsaludsod ket isut’ naawis a makidanggay iti panagadal. Inaramidna daytoy, ket di nagbayag isut’ nangrugin a tumabuno kadagiti gimong ti kongregasion. Ita, agpadan a nabautisaran ti asawa a lalaki ken babai, ket nalawag a dakkelen ti rimmang-ayan ti kasasaad ti panagasawada.
Dagiti panagadal ti Biblia iti pagtaengan a naibatay kadagiti kakasta a literatura ket nagbanag iti pannakaurnong dagiti adu a kabbaro a managdaydayaw. Kadagiti daga a sadiay dagiti Saksi ni Jehova kinasapulanda nga itured dagiti rebolusion, guerra sibil, wenno panangiparit ti gobierno, rimmang-ay ti trabaho a panangiyadal ti Biblia iti pagtaengan. Simged ti guerra sibil idiay Angola iti adu a tawen, ket nagsagaba dagiti Saksi iti naruay a pannakaidadanes ken rigat. Kallas-ud ti napalabas a tawen, impakita dagiti report nga, iti promediona, tunggal agibumbunannag ket mangidadaulo iti ngangngani tallo a panangiyadal ti Biblia iti pagtaengan, ngem bassit ti naipaima a literatura dagiti agibumbunannag. Nagserbian dagiti agdaldaliasat a manangaywan ti maysa a bassit a grupo iti tunggal aldaw, nga iyurnosda ti panagserbi idiay tay-ak iti bigat ken gimgimong iti tunggal rabii. Anian a rag-o idi a namingga ti panaggugubat ket 42 a tonelada dagiti kasapulan unay a literatura ti Biblia ti simmangpet manipud Sud Africa! Sigurado, ti ayat dagidiay a kakabsat “umadu nga umadu buyogen ti umiso a pannakaammo ken naan-anay a pannakaawat,” bayat a mabalinda itan a “siguraduen dagiti napatpateg a bambanag.” (Filipos 1:9, 10) Anian a pangay-ayo para kadagidiay addaan naruay a katulongan iti panagadal ti Biblia tapno gundawayanda a naan-anay ti probision a siaasi nga ar-aramiden ni Jehova!—1 Timoteo 4:15, 16.
Ti kinaragsak dagitoy a matalek a managdaydayaw ipalagipna kadatayo dagiti sasao ni Jesus iti Sermonna idiay Bantay: “Naragsak dagidiay sipapanunot iti naespirituan a kasapulanda, gapu ta agpaay kadakuada ti pagarian ti langit. . . . Naragsak dagidiay naidadanes gapu iti kinalinteg, gapu ta agpaay kadakuada ti pagarian ti langit. . . . Agrag-okayo ken aglagto iti rag-o, ta ti gunggonayo dakkel sadi langit.” (Mateo 5:3-12) Ania ketdin nga apit ti maur-urnongen idiay Angola!
Kadagiti sabsabali a lugar iti lubong, dagiti panangiparit iti ar-aramid dagiti Saksi ni Jehova ket mapunpunas metten wenno maik-ikkat. Nagkumento ni Jesus iti kaaldawanna: “Wen, ti anien adu, ngem bassit dagiti agani.” (Mateo 9:37) Anian a pudno daytoy ita! Kankanayon nga adda pakasapulan kadagiti ad-adu pay a trabahador. Pagragsakantayo a ti panagdayawtayo ramanenna ti panangurnong iti panagani. Awanen dakdakkel a rag-o a masarakan ditoy daga ita no di ti nabunga a dedikado a serbisiotayo ken Jehova a Dios.
Ania, nupay kasta, daydiay mangtigtignay kadagiti managdaydayaw ni Jehova tapno ipakitada ti kasta a rag-o ken regta? Kitaentayo.