Baro a Libro Paragsakenna ti Minilion
MAYSA a tampok ti “Dagiti Managayat iti Wayawaya” a Kumbension a nangrugi idi napalabas a Hunio ket isu ti palawag a “Ti Katan-okan a Tao a Nagbiag Pay Laeng.” Ti tampokna ket isu ti pannakairuar ti libro nga addaan isu met laeng a tema. Nasuroken nga innem a milion a tao ti intero a lubong ti timmabuno itoy a serie dagiti kumbension ket nangngegdan ti palawag, nga agparang iti napapino a porma iti dua nga artikulo a sinaruno daytoy.
Nasuroken a 12 milion a kopia ti libro a Ti Katan-okan a Tao a Nagbiag Pay Laeng ti naiyimprenta iti agarup 60 a pagsasao. Magun-odan pay daytoy uray kadagiti Makindaya nga Europeo a pagsasao nga Albaniano, Kroasiano, Hungariano, Macedoniano, Polako, Ruso, Serbiano, ken Sloveniano. Nangnangruna a nagragsakan dagiti nasurok a 74,000 a timmabuno kadagiti pito a kumbension idiay Union Soviet nga immawat itoy iti pagsasao a Ruso.
Nangrugian ti Libro
Ti material idiay libro ket nagparangen nga immun-una iti porma ti serie kadagiti 149 a nagsasaganad a ruar Ti Pagwanawanan, nangrugi iti Oktubre 1, 1985, a ruar. Adu a managbasa ti nagkuna a limdaangda idi nagpatingga ti serie iti Hunio 1, 1991, a ruar. Ni Melissa, maysa nga agtawen ti 12 idiay Italia, ket naglulua idi binasana ti maudi a salaysay idiay Ti Pagwanawanan. “Iti rabii sakbay ti kumbensionmi,” kunana, “nagkararagak ken Jehova a kiniddawko ti maysa a libro iti biag ni Jesus. Idi naipresenta ti libro, nagtipatak agingga iti kabaelak.”
Ti material a nagparang iti serie idiay Ti Pagwanawanan ket napapino ken napagmaymaysa idiay baro a napintas pannakaiyilustrarna, 448-panid a libro nga addaan 133 a kapitulo. Naaramid ti panagregget tapno maipresenta ti tunggal palawag nga impaay ni Jesus ken tunggal nairekord a pasamak iti naindagaan a biagna, agraman amin dagiti ilustrasion ken milagrona. Aginggat’ mabalin, tunggal banag ket naisalaysay iti umiso a panagsasaganad ti pannakapasamakda. Iti ngudo ti tunggal kapitulo, adda listaan dagiti teksto ti Biblia a nakaibatayan ti kapitulo.
Mabalin a pampanunoten dagiti dadduma, ‘Bueno, nabasakon ti libro agsipud ta binasak dagiti serie idiay Ti Pagwanawanan.’ Ngem dagiti managbasa ti Pagwanawanan inawatda ti salaysay iti biag ni Jesus kadagiti babassit a paset a naipresenta kadagiti artikulo a nagparang tunggal dua a lawas iti unos ti nasurok nga innem a tawen. Uray no dagiti artikulo ket makaisuroda iti porma ti serie, panunotenyo ti ragsak ti panangbasa iti intero a salaysay iti ababa a tiempo ken pannakakita iti naan-anay a kasasaad ti katan-okan a tao a nagbiag pay laeng!
Makapabileg Pammati
“Naleppasko a binasa ti publikasion iti dua a lawas,” impadamag ti maysa a babai manipud Washington, D.C., E.U.A. “Bayat nga agbasbasaak, agayus dagiti lua ditoy matak. Isardengko ti agbasa ket agkararagak ken agsangitak. Impariknana kaniak a kas tay kaduanak a mismo ni Jesus, a makipagsagsagabaak kenkuana. Uray kalpasan makalawas a nabasakon ti libro, makaluaak pay laeng no mapanunotko dagiti nabasak. Nariknak nga ad-addaak pay a nasinged ken Jehova gapu iti panangtedna iti Anakna.”
“Naileppasko ti libro maipapan ken Jesus ita nga aldaw,” insurat ti maysa a babai manipud Pittsburg, Pennsylvania, E.U.A. “Daytat’ nakaskasdaaw. Aglulua ti matak bayat a basbasaek dagiti maudi a sumagmamano a kapitulo. Ti panangbasa a mammaminsan iti libro ket nakasaysayaat. Pudno a diak mailadawan ti riknak maipapan iti dayta—basta kayatko unay dayta!”
Dagiti napintas nga ilustrasion idiay libro parang-ayenna ti emosional a bilegna, kas kuna ti maysa a manangapresiar a managbasa: “Ipariknana kaniak a kas kettay kasla mangngegko ida a dungdung-awanda ti maysa a natay nga ubing (kapitulo 47) wenno kasla ammotayo no ania ti pampanunoten ni Jesus idi isut’ sinagid ti agpadpadara a babai ket naagasan (kapitulo 46). Dagiti ebkas kadagiti rupada ket pudno a makadunor. . . . Imbes a ti panagbasa ket maysa a trabaho, daytoy a libro pagbalinenna ti panagbasa nga ad-adda a maysa a paglinglingayan wenno sagut iti ngudo ti tunggal aldawko. Ti makaabbukay-rikna a pamay-an ti pannakaisurat ti libro dina laeng ibaga no ania ti inaramid ni Jesus no di ket mangted pangripiripan no ania ti panunot ken riknana.”
Nagduduma nga Usarna
Adun ti nangirugi a mangusar iti libro iti panagadal ti Biblia ti pamiliada. “Adda tallo nga ubbing nga annakmi,” insurat dagiti nagannak manipud Silverton, Oregon, E.U.A., “ket umiso la unay daytoy a libro para iti ‘rinabii a panagadal ti pamiliami.’ Pudno unay, anian a maitutop nga adalenmi a siaannad ti naglabas ti naayat nga Aritayo, ni Kristo Jesus.”
Ilawlawag ti maysa nga agtutubo manipud Japan: “Ibasbasaannakami ni tatangko bayat nga agin-inanakami kalpasan panangrabiimi. Kas maysa a pamilia, basbasaenmi manipud rugina, ngem inkeddengko a basaen ti maysa a kapitulo iti kada rabii manipud iti ngudo ti libro sakbay pannaturogko. Nupay kasta, makakayaw unay ti libro ket masansan nga ala una ti parbangonen no kitaek ti oras.”
Adu ti masdaaw iti kaadu dagiti detalye a nairaman kadagiti salaysay. “Nakaad-adu dagiti naadalko a diak idi ammo,” insurat ti maysa a Saksi. Kuna ti maysa a surat manipud California, E.U.A.: “Siak ken ni baketko addakamin iti kinapudno iti nasurok a 35 a tawen, ket sipupudno a maibagami a dikam pay immawat iti aniaman a publikasion a kas itoy ti kinamakaparagsakna.”
Tumulong la ketdi daytoy a libro a mangrebba iti kinaulbod a dagiti Saksi ni Jehova dida mamati ken Jesus. Maysa a managyaman a managbasa nagkumento iti daytoy a pamay-an: “Diak maimameg dayta, gapu ta isu dayta ti kadadakkelan a panglaban iti kinaignorante dagidiay mangibaga a ti ili ni Jehova ket saan a mamati ken ni wenno dida raemen ni Jesu-Kristo. Ti kasapulantayo laengen nga aramiden ket iyawat kadakuada daytoy a sungbat iti kinaignoranteda.”
Sigurado a daytoy a libro maaddaan napateg a lugar iti ministerio dagiti Saksi ni Jehova. “Nangtedak iti maysa a kopia dayta iti maysa a babai nga iyad-adalak ti Biblia,” insurat ti maysa a Saksi, “ti epekto dayta kenkuana ket kasla maysa a milagro. Makatawenen a makipagad-adal, ket narigatanak a mangikuyog kenkuana kadagiti gimong.” Kalpasan a nabasa ti maiyad-adalan ti 45 a kapitulo ti baro a libro, inlawlawag ti Saksi, “kunana kaniak a makigimong inton Domingo gapu ta panawenen para kenkuana a mangala ti takderna.”
Dagiti Napateg a Parupa
Iti kasta, Ti Katan-okan a Tao a Nagbiag Pay Laeng mangipaay iti maysa a komentario kadagiti Ebanghelio. Dagiti panangilawlawag kadagiti adu a bambanag a sinao ken insuro ni Jesus ket naipaay, gapuna a ti libro mabalin a maaramat kas maysa a napateg nga aruaten iti panagsirarak, gapu ta sursurotenna unay dagiti salaysay ti Biblia.
Maysa a naisangsangayan a sagudayna a ta tunggal banag ket kangrunaanna a naisalaysay iti kronolohikal a panagsasaganad. Uray ti panangukag laeng kadagiti panidna a sipapanunot iti daytoy ket mapaneknekanna a pudpudno a katulongan daytoy iti panangilasin no kaano, iti intero a ministerio ni Jesus, a naangay dagiti paspasamak. Dagiti managbasa kadagiti Ebanghelio masansan a masabetda dagiti kasla panagsisimparat. Ti baro a libro, babaen di kasapulan a panangipadlawna kadagitoy, pagtutunosenna ida iti presentasionna.
Kas Kristiano, sigurado a rebbeng a ditay kayat a baybay-an ti naannad a panagadal iti biag ti matalek nga Ulidantayo, ni Jesu-Kristo. Ngarud, usigentayo a siiinget dagiti salaysay ti Ebanghelio babaen tulong ti baro a libro a Ti Katan-okan a Tao a Nagbiag Pay Laeng.