Panangsurot iti Kalat a Naituyang Idi Agtawen ti Innem
KAS INSALAYSAY NI SANDRA COWAN
Adu a nagannak ti mangpili iti maysa a karera para kadagiti annakda, kas iti musika wenno baile, ket rugianda ida a sanayen iti nagangganus a tawen. Isu daytoy ti talaga nga inaramid kaniak ni nanangko. Manipud idi dua a lawasko
pay laeng, naitugotakon kadagiti amin a Nakristianuan a gimong ken idiay tay-ak ti ministerio.
IDI agtawenak ti uppat, impagarup ni nanangko a makapangasabaakon a bukbukodko. Silalawag a malagipko ti umuna a panangpadasko. Naglugankami a nagturong iti maysa a dakkel a balay iti away, ket bayat a nagur-uray ni Nanang ken dagiti sabsabali pay idiay kotse, dimsaagak ket immasidegak iti ruangan. Nagimdeng ti maysa a naanus a babai bayat nga isut’ intukonak iti sangapulo a bukleta. Tapno mabayadanna ida, inikkannak iti maysa a dakkel a bareta a sabon. Dua nga imak ti nangiggem iti dayta. Naragsakanak!
Iti dayta met laeng a tawen, 1943, nanglukat ti Watchtower Bible School of Gilead maipaay iti panangsanay kadagiti amin-tiempo a ministro para iti misionario a trabaho. Pinaregtana ni Nanang nga aramidek ti misionario a serbisio a kalatko iti biag. Sumsumged idi ti Gubat Sangalubongan II idiay Europa, ket imbaga kaniak ni Nanang ti maipapan kadagiti agtutubo a Saksi idiay Europa a naiyadayo kadagiti dadakkelda. Kayatna nga agbalinak a nakired a mangsaranget iti aniaman a kita ti suot.
Iti kalgaw ti 1946, nabautisaranak iti internasional a kumbension idiay Cleveland, Ohio. Nupay agtawenak laeng idi ti innem, determinadoak nga itungpalko ti dedikasionko ken Jehova. Iti dayta a kalgaw nagserbiak kas maysa a payunir iti umuna a gundaway. Malagipko ti maysa a bigat a nakaipaimaak iti 40 a magasin kadagiti tattao a nakatugaw idiay The Plaza sadi San Diego, California. Siguradoak, nakatulong unay ti kinabassitko ken kinatalabitko.
Masansan a nangasabakami iti asideg ti Beth-Sarim, a sadiay ti agsaksakit a presidente ti Watch Tower Society, ni Kabsat Rutherford, binusbosna ti kalam-ekna sakbay ipapatayna idi 1942. Regular a simmarungkarkami ket nakipangpangankami kadagiti amin-tiempo nga adipen sadiay. Ti kakasta a naragsak nga isasarungkar ti namagbalin kaniak a mangeddeng a pudpudno a daytoy ti kita ti biag a kayatko. Idi agangay inaramidko a kalatko iti biag ti Gilead School ken ti misionero a serbisio.
Iti sumaganad a tawen nagdiborsio dagiti nagannakko, ngem ti nabaliwan a kasasaad ti pamilia dina sinebseban ti espiritualidadmi. Ni Nanang ket maysa a payunir ken maseknan unay maipapan iti pannakasanay nga inawatko ken ti kabsatko a lalaki. Ti bassit a maiyalis-alis a balaymi ket kanayon a naragsak gapu iti ibibisita dagiti Kristiano a kakabsat a lallaki ken babbai. Inremedio ni Nanangko ti pannakaam-ammok kadagiti nagturpos iti Gilead. Dua kadagita a nagturpos ket ni Lloyd ken Melba Barry, nga agbisbisita idi iti panagdaliasat a trabaho bayat nga agur-urayda iti ipapanda iti pakaitudinganda idiay Japan. Nagtalinaedda biit tapno paregtaendak—maysa a balasitang nga agngayngayangay nga agbalin a misionero—ket dayta ti nangpasiddaaw kaniak.
Idi agtawenak iti sangapulo, nakiasawa ni Nanang iti maysa a nakasaysayaat a Saksi a maysa met a payunir a ministro. Inakklonnak ken ti kabsatko a lalaki saan laeng a kadagiti papeles no di ket uray iti pusona. Makaakar ti ayatna ken Jehova ken ti regtana iti serbisio.
Nagtinnulong da Nanang ken Tatang tapno iwanwandakami a dua nga annak kadagiti narikut a tawtawen ti kinaagtutubo. Ti pagtaenganmi ket maysa a naespirituan a kamang a pagay-ayatak a taliawan. Saan a nalaka para kadakuada ti panagpayunir buyogen bassit a pamastrekan bayat nga adda padpadakkelenda a dua nga ubbing; kinasapulanna ti panagsakripisio. Ngem da Nanang ken Tatang nagpannurayda ken Jehova ken inyun-unada ti intereses ti Pagarian.
Anian ti pannakalagipko iti internasional a kumbension idiay Siudad ti Nueva York idi 1950! Nakautang ni Tatang iti bangko, ket nangikuyogkami iti tallo a pasahero tapno makatulongda kadagiti magasto. Ni Nanang, Tatang, ti kabsatko a lalaki, ken siak ti nagaabay a nagtugaw iti makinsango a pagtugawan manipud San Diego aginggat’ Nueva York, bayat a dagiti sabsabali nagtugawda iti likud. Gapu ta di immanamong ti amo ni Tatang a mangted kenkuana iti dua a lawas a bakasion iti trabaho, napukawna ti trabahona gapu iti itatabunona iti dayta a kumbension. Ngem kas impasugurado kadakami ni Tatang, ni Jehova ti mangipaay kadagiti kasapulanmi, ket inaramidna. Inlako ni Tatang ti kotse tapno mabayadanna ti utangna idiay bangko, ket kalpasanna nakaala iti nasaysayaat a trabaho. Daytoy ken dagiti umasping a kapadasan nagbalinda a nakapatpateg kaniak tawtawen kalpasanna idi a siak ken ni lakayko napasaranmi dagiti narigat a kasasaad.
Iti isusublimi manipud Nueva York, pinasiarmi ti Kingdom Farm, a sadiay ti damo a nakakitaak iti Gilead School. Malagipko ti panagtakderko iti maysa a silid a pagadalan ket kunkunak iti bagik, ‘Awan pay 11 a tawenko. Pulos a diakto makadanon ditoy. Umun-una nga umay ti Armagedon.’ Ngem dayta a panagpasiar ti namagbalin kaniak nga ad-adda a determinado tapno pagbalinek a kalatko ti Gilead.
Panangikagumaan iti Kalatko
Tunggal kalgaw bayat iti panageskuelak, manipud umuna a tukad a nagtultuloy, nagpayunirak. Kalpasanna, dua a lawas kalpasan panagturposko iti nangato a pagadalan idi Hunio 1957, nagbalinak a regular payunir.
Ti miting iti distrito a kumbension para kadagidiay interesado iti Gilead a naangay iti kumbension idiay Los Angeles idi 1957 ket naisangsangayan unay kaniak. Bayat a magmagnaak agturong iti palapala para iti dayta a miting, nasabetko ni Bill, maysa nga agtutubo a kabsat a lalaki nga am-ammokon sipud pay agtawenak iti innem. Iti napalabas a tawen, isut’ adda iti adayo nga agserserbi sadiay dakdakkel ti pakasapulan idiay Louisiana. Naklaatkami a nakatakkuat no kasano a dakami a dua ket interesado unay iti misionario a serbisio. Innem a bulan kalpasanna inkeddengmi nga aramidenmi dayta a pagtinnulongan a proyekto. Sinuratanmi ti Sosiedad nga agkidkiddawkami iti annongenmi ket makabulan sakbay iti kasarmi, immawatkami para idiay Romney, West Virginia.
Immakarkami sadiay iti ipapanmi iti kumbension idiay Nueva York idi 1958. Bayat ti kaaddami idiay kumbension, tinabunuanmi ti miting para kadagidiay interesado iti Gilead. Ginasut dagiti timmabuno. Iti panangkitami iti bunggoy, nariknami a nakabasbassit ti namnamami iti pannakaawis idiay Gilead. Nupay kasta, impasami ti maysa a pakpakauna nga aplikasion, nupay 11 a lawasmi pay laeng a nagassawa. Iti simmaruno a tawen iti kumbension idiay Philadelphia, impasami ti maikadua nga aplikasion.
Idiay Romney nasursurok kasta met ken Bill ti agpannuray ken Jehova tapno tulongannakami kadagiti narikut a kasasaad. Ti Romney ket maysa nga ili nga addaan 2,000 nga agnanaed. Awan masarakan a trabaho. Nagnaedkami iti 5 metros nga inaramid a maiyalis-alis a balay a nadisenio para iti panniempo ti California. Awan pagalaanmi iti danum, awan pagpapudot, ken awan pagipalammiisan. Nakalamlam-ek idiay uneg a kasapulanmi a buraken ti yelo idiay karamba tapno makaalakami iti danum. Tinulongandakami dagiti kakabsat aginggat’ mabalinanda, nga inranudda dagiti naanupanda a taraon. Nagsidakami iti ugsa, musang, ken marabutit. Saan la a namnaminsan nga impagarupmi a dikami manganen iti uneg ti maysa nga aldaw, ket kalpasanna inton sumangpetkamin nga aggapu iti serbisio, makasarakkami kadagiti mansanas wenno keso a naibati iti sango ti ridawmi.
Inkarkarigatanmi iti siam a bulan ti masansan a panagbiag iti bassit ngem agkurkurang pay a magasto. Kamaudiananna, inkeddengmi a nainsiriban ti iyaakar idiay Baltimore, Maryland, a sadiay makabiruk ti trabaho ni Bill. Idi insaritami kadagiti kakabsat ti pangngeddengmi, nagsangitda ken nagsangitkami. Gapuna nga inkeddengmi ti agan-anus pay biit.
Kalpasan unay dayta maysa a Saksi a manedyer iti maysa a supermarket idiay Westernport, Maryland, agarup 60 kilometros ti kaadayona, ti nangitukon iti paset-tiempo a trabaho ken Bill. Iti isu met laeng a bulan maysa kadagiti iyad-adalanmi ti Biblia ti nangitukon kadakami iti maysa a makaay-ayo nga addaan kadagiti alikamen a bassit a balay nga addaan dakkel a pugon. Ket idin a nagbalin a paboritok a kasuratan ti Malakias 3:10. Imbukbok ni Jehova ti bendision iti labes dagiti ninamnamami.
Ti Gilead Kamaudiananna!
Maysa kadagiti kararagsakan unay nga aldaw ti biagmi ket isu ti aldaw, idi Nobiembre 1959, idi a naawatmi ti awis idiay Gilead. Naawiskami iti maika-35 a klase, ti naudi a naangay idiay Kingdom Farm. Idi nagtakderak iti isu met laeng a silid a pagadalan a pinasiarko idi kas maysa nga ubing, naaddaanak iti nabara, naragsak a rikna a di siuumiso a mailadawan dagiti sasao.
Ti Gilead ket maysa a naespirituan a salindeg. Daytat’ kasla panagbiag idiay baro a lubong iti lima a bulan. Mammano iti biagtayo a mapasamak ti panaguraytayo iti nabayag para iti maysa a banag ket kalpasanna matakkuatantayo a nasaysayaat dayta ngem iti ninamnamatayo. Ngem kasta a talaga ti Gilead.
Naitudingkami idiay India, ngem idi agangay dikam naikkan iti visa. Gapuna, kalpasan makatawen a panaguraymi idiay Siudad ti Nueva York, ti Watch Tower Society binaliwannakami nga intuding idiay Morocco, Makinamianan nga Africa.
Misionero Idiay Morocco
Binusbosmi ti 24 a tawen idiay Morocco, a nakayawankami kadagiti tattao apaman a simmangpetkami. Naadalmi nga agpada ti Pranses ken Español, dagiti pagsasao a timmulong kadakami a makikomunikar kadagiti adu a nasionalidad nga agnanaed sadiay. Kaaduanna a dagidiay naggapu manipud sabsabali a pagilian ti nangipangag iti mensahe ti Pagarian.
Maysa a babai nga inyadalak ti Biblia ket maysa a Kastila a sumasala iti flamenco nga agtartrabaho iti maysa a kabaret idiay Casablanca. Kalpasan pannakaadalna kadagiti prinsipio ti Biblia, pinanawanna ti makinkukua iti kabaret a pakikabkabbalayanna ket nagsubli idiay España. Sadiay isut’ nangasaba iti intero a pamiliana, ket sumagmamano kadakuada ti nangawat kadagiti kinapudno ti Biblia nga inranudna kadakuada. Kalpasanna isut’ nagsubli idiay Casablanca, a sadiay nagtalinaed a matalek iti Dios agingga iti ipapatayna idi 1990.
Nagbunga dagiti immuna a sumagmamano a tawenmi idiay Morocco kadagiti irarang-ay iti bilang dagiti agibumbunannag ti Pagarian. Nupay kasta, idi nagbalin a narigat para kadagiti sangsangaili ti makagun-od iti pammalubos iti panagtrabaho ken panagnaed, adda ipapanaw dagiti Saksi agturong idiay Europa. Dadduma kadagidiay inyadalanmi ket addada itan idiay New Zealand, Canada, ti Estados Unidos, Bulgaria, Russia, ken Francia, ken dadduma kadakuada ti makiramraman iti amin-tiempo a ministerio.
Apagdarikmat, idi Abril 1973 ti panangasaba a trabahotayo idiay Morocco ket naparitan. Anian a sipat dayta! Iti maysa a rabii ti Huebes, nakaragragsakkami a bunggoy idiay Kingdom Hall, a nagsasaritakami agingga a naiddep dagiti silaw tapno maammuanmi nga orasen ti panagawid. Dikam impagpagarup a dikamto pulos makitan nga agsindi dagidiay a silaw iti kasta a nawaya a Nakristianuan a panagkakadua. Iti sidong dagiti naparitan a kasasaad, nakedngan dagiti gimongmi ken sirkito nga asamblea iti babassit a grupo kadagiti pribado a pagtaengan. Tapno makatabuno kadagiti distrito a kumbension, nagdaliasat dagiti Saksi agturong idiay Francia wenno España.
Bayat a bimmassit ti bilangmi, dagiti sumagmamano a Saksi a nabati idiay Morocco nagbalinda a nasinged unay iti maysa ken maysa. Gapuna nga idi a kamaudiananna inkeddengen ti Watch Tower Society a serraan ti sanga ken itudingdakami iti sabali a lugar, aminkami ti naglulua.
Agturong Idiay Makintengnga nga Africa
Ti baro a nakaitudinganmi ket ti Central African Republic. Anian a nagdakkel a panagbalbaliw manipud Makinamianan nga Africa! Idinto a ti Morocco addaan klima a kas iti makin-abagatan a California, nasarakanmi dagiti bagbagimi iti napudot, nadagaang a tropiko.
Addada kabbaro a parikut a sanguen. Kas pangarigan, kasapulak itan a tenglen ti panagbutengko kadagiti agkakarayam. Namitlo a natinnag ti maysa nga alutiit iti ulok bayat a magmagnaak iti ridaw. No maminsan, bayat a mangidadauloak iti panagadal ti Biblia, danggayannakami ti maysa nga utot! Nupay kayatko ti aglagto ken agtaray, nasursurok a tenglen ti bagik, a diak pulos isinsina ti matak iti utot ken diak idisdisso ti pagkargaak iti libro ken ti sakak iti datar agingga a daytat’ pumanaw. Natakkuatak a mairuamka iti maysa a banag no dika sumuksuko.
Idi addakami sadiayen iti innem a bulan, naaramid ti maysa a pakaammo iti radio a naparitan ti trabahotayo. Gapuna a naserraan dagiti Kingdom Hallmi, ken nakiddaw a pumanaw dagiti misionero. Dakami laeng ken sabali pay a pagassawaan ti nakapagtalinaed idiay sanga iti sabali pay a tallo a tawen. Kalpasanna maysa nga agsapa ti Sabado kabayatan ti Panagadalmi iti Pagwanawanan, immay dagiti addaan armas a polis ket innaladakami idiay hedkuarter ti polis. Pinalubosanda dagiti babbai ken dagiti ubbing, ngem imbaludda dagiti 23 a kakabsat a lallaki, agraman ni lakayko, ni Bill. Kalpasan innem nga aldaw isut’ pinalubosanda nga agawid ken agimpake; tallo nga aldaw kalpasanna, babaen mandar ti gobierno, pinanawanmi ti pagilian, idi Mayo 1989. Daytat’ sabali manen a naladingit nga ipapanaw idiay eropuerto, a sadiay adu kadagiti managayat a kakabsattayo ti immay tapno makipinnakadada.
Kamaudiananna, Idiay Sierra Leone
Ti agdama a nakaitudinganmi ket ti Sierra Leone, Makinlaud nga Africa, maysa a nalibnos a pagilian nga addaan napipintas, puraw-daratna nga igid ti baybay. Nainggayyeman dagiti tattao, ken makaay-ayo ti ministerio iti tay-ak. Maawiskami nga agtugaw iti tunggal balay, masansan iti linong ti maysa a kayo ti mangga wenno sirok ti niog. Kayat dagiti tattao a pagsasaritaan maipapan iti Dios ken kayatda ti mangala iti bukodda a kopia ti Biblia ken sumurotda iti panagbasa.
Agpadpada a siak ken ni Bill ket agtartrabaho idiay Freetown Bethel Home. Agserserbiak kas maysa a manangpasangbay ken tamtamingek dagiti suskripsion ken kuenta dagiti kongregasion. Kalpasan 16 a tawen ti panagserbi kadagiti pagilian a sadiay ti panangasaba a trabaho ket naparitan, makaparagsak ti maadda iti maysa a daga a sadiay ti trabaho ket nawaya ken rumangrang-ay.
Naturposko ti 30 a tawen ti misionero a serbisio idi Hunio 1991. Pudno unay, intuyang ni Nanang iti sanguanak ti napateg a kalat! No isut’ sibibiag pay koma, kayatko a kunaen manen kenkuana, “Pagyamanan, Nanang!” Siraragsak, maikunak pay met, “Pagyamanan, Tatang!”
[Ladawan iti panid 28]
Kumbension idiay Nueva York, 1958
[Ladawan iti panid 29]
35th class—July, 1960
[Ladawan iti panid 30]
Da Bill ken Sandra Cowan, 1991.