No Aniat’ Mabalin a Kaipapanan ti Pagarian ti Dios Kadakayo
INSURO ni Jesu-Kristo dagiti pasurotna nga agkararag: “Umay koma ti pagariam.” (Mateo 6:10) Anian ti kasansan ti pannakaiyebkas dagidiay a sasao iti Dios babaen dagidiay agkunkuna a pasurot ida ni Jesus!
Nupay kasta, saan la nga insuro ni Jesus dagiti adalanna a mangikararag iti Pagarian ti Dios. Inaramidna ti Pagarian a kangrunaan a tema ti panangasaba a trabahona. Kinapudnona, kunaen ti Encyclopædia Britannica a ti Pagarian ti Dios “ket pangkaaduanna a maibilbilang a kangrunaan a tema ti pannursuro ni Jesus.”
No ikararag dagiti pasurot ni Jesus ti Pagarian, maipaay iti ania ti talaga nga ikarkararagda? Aniat’ mabalin a kaipapanan ti Pagarian ti Dios kadakuada ken kadakayo? Ken kasano a minatmatan dayta ni Jesus?
Ti Panangmatmat ni Jesus iti Pagarian
Masansan nga inawagan ni Jesus ti bagina a “ti Anak ti tao.” (Mateo 10:23; 11:19; 16:28; 20:18, 28) Ipalagip kadatayo daytoy ti panangtukoy ni mammadto Daniel iti “maysa nga anak ti tao.” Maipanggep iti masanguanan a nailangitan a pasamak, kuna ni Daniel: “Nakitak kadagiti sirmata iti rabii, ket, adtoy! immay babaen kadagiti ulep ti langit ti maysa a kasla anak ti tao; ket dimteng iti Dati a Lakay, ket isu inyasidegda iti saklang Daydiay. Ket kenkuana naited ti panagturay ken dayag ken pagarian, tapno dagiti il-ili, dagiti nasnasion ken pagsasao agserbida koma kenkuana.”—Daniel 7:13, 14.
Iti panagsaona maipapan iti panawen nga awatenna daytoy a panagturay, imbaga ni Jesus kadagiti apostolna: “Inton ti Anak ti tao agtugaw iti nadayag a tronona, dakayo a simmurot kaniak agtugawkayonto met kadagiti sangapulo ket dua a trono.” Kuna met ni Jesus: “Inton ti Anak ti tao dumteng iti dayagna, . . . amin dagiti nasion maurnongdanto iti sangona, ket paglalasinennanto dagiti tattao, kas iti maysa a pastor ilasinna dagiti karnero manipud kadagiti kalding. . . Dagitoy [dagiti nakillo] suminadanto agturong iti agnanayon a pannakaikisap, ngem dagiti nalinteg agturong iti biag nga agnanayon.”—Mateo 19:28; 25:31, 32, 46.
Dagitoy a naimpadtuan a reperensia kadagiti trono ken amin dagiti nasnasion ipamatmatda a ti Pagarian ket maysa a gobierno a sadiay ni Jesus ken dadduma kadagiti pasurotna agturaydanto iti sangatauan. Dayta a gobierno addaan pannakabalin a mangikisap kadagiti nakillo iti ipapatay. Iti sidong ti turay ti Pagarian, nupay kasta, dagidiay sililinteg a maikari awatendanto ti sagut ti Dios a biag nga agnanayon.
Nalawag, ngarud, a ti Pagarian ti Dios ket nadiosan pannakaiyussuatna a nailangitan a gobierno. Ti Pagarian ket saan a ti simbaan, ken di ipalubos dagiti Kasuratan ti sekular a panangmatmat iti dayta. Ad-adda pay, ti inted-Dios a gobierno saan laeng a maysa a banag nga adda iti puso ti maysa a tao. Yantangay ti Pagarian ti Dios ket maysa a gobierno, daytat’ saan nga agbalin a maysa a banag iti pusotayo no awatentayo ti Kinakristiano. Ngem apay a panunoten dagiti dadduma a ti Pagarian ket maysa a kasasaad a manginanaig iti puso?
Ti Pagarian Iti Unegtayo?
Marikna dagiti dadduma a ti Pagarian ket adda iti pusotayo gapu iti pamay-an a pannakaipaulog ti Lucas 17:21 babaen kadagiti sumagmamano a manangipatarus ti Biblia. Sigun iti New International Version, kuna ni Jesus sadiay: “Ti pagarian ti Dios adda iti unegyo.”
Iti daytoy a banag ti The Interpreter’s Dictionary of the Bible kunaenna: “Nupay masansan a maisitar kas ulidan ti ‘kinamisterioso’ wenno ‘kinalimed’ ni Jesus, daytoy a panangipaawat naibatay kangrunaanna iti daan a patarus nga, ‘iti unegyo,’ . . . a naawatan iti di maitutop a moderno nga anag ti ‘mo’ kas agmaymaysa; ti ‘dakayo’ . . . ket plural (Agsasao ni Jesus kadagiti Fariseo—ber. 20) . . . Ti teoria a ti pagarian ti Dios ket maysa a makin-uneg a kasasaad ti panunot, wenno iti personal a pannakaisalakan, ket maisupadi iti konteksto daytoy a bersikulo, ken kasta met iti pannakaiparang ti idea iti intero a B[aro] a T[ulag].”
Ti footnote iti Lucas 17:21 idiay New International Version ipakitana a dagiti sasao ni Jesus mabalin a maipaulogda koma a: “Ti pagarian ti Dios ket adda kadakayo.” Mabasa kadagiti sabali pay a patarus ti Biblia: “Ti pagarian ti Dios ket adda kadakayo” wenno “ket adda iti nagtetengngaanyo.” (The New English Bible; The Jerusalem Bible; Revised Standard Version) Sigun iti New World Translation of the Holy Scriptures, kuna ni Jesus: “Ti pagarian ti Dios adda iti tengngayo.” Saan a kayat a sawen ni Jesus a ti Pagarian ket adda iti puspuso dagiti napalangguad a Fariseo a pakisarsaritaanna. Imbes ketdi, kas ti nabayag a maur-urayen a Mesias ken Nadutokan nga Ari, ni Jesus ket adda iti mismo a nagtetengngaanda. Ngem aglabas pay ti panawen sakbay nga umay ti Pagarian ti Dios.
Inton Umayen
Sumagmamano a pasurot ni Jesu-Kristo ti napili kas kakaduana nga agturay iti nailangitan a Mesianiko a Pagarian. Kas ken Jesus, matayda a simamatalek iti Dios ken mapagungarda iti espiritu a biag idiay langit. (1 Pedro 3:18) Bassitda iti bilang, 144,000 dagiti ar-ari ken papadi a naala manipud sangatauan. (Apocalipsis 14:1-4; 20:6) Dagiti kakadua ni Jesus nga agturay iramanna dagiti matalek nga apostolna.—Lucas 12:32.
Naminsan iti panagsaona kadagiti pasurotna, inkari ni Jesus: “Dadduma kadagidiay adda a sitatakder ita dida maramanan ni patay agingga iti makitada ti Anak ti tao nga um-umay iti pagarianna.” (Mateo 16:28) Makapainteres unay, ipamatmat ti sumaganad a bersikulo a natungpal ti kari ni Jesus sumagmamano la nga aldaw ti napalabas. Kalpasanna inkuyogna ti tallo kadagiti adalanna iti tuktok ti bantay a sadiay nagbaliw ti langana iti sanguananda, ket naaddaanda ngarud iti sirmata kenkuana iti dayag ti Pagarian. (Mateo 17:1-9) Ngem ti Pagarian ket saan a naipasdek iti dayta a tiempo. Kaano a maaramid dayta?
Maysa kadagiti pangngarig ni Jesus ipamatmatna nga isut’ saan a dagus a maisaad kas Mesianiko nga Ari. Idiay Lucas 19:11-15, mabasatayo: “Isut’ nagsao . . . iti maysa a pangngarig, gapu ta isu ket asideg iti Jerusalem ken ipagpagarupda nga iti apagdarikmat agparang ti pagarian ti Dios. Kunana ngarud: ‘Maysa a tao a natan-ok napan iti maysa a daga nga adayo tapno awatenna ti kinaari ket sa agsublinto. Ket idi nga inayabanna dagiti sangapulo nga adipenna inikkanna ida iti sangapulo a mina ket kunana kadakuada, “Pagsapulyo agingga iti agsubliak.” . . . Ket naaramid nga idi simmubli kalpasan iti panangawatna iti kinaari, pinaayabanna dagidi nga adipen a nangtedanna idi iti pirak, tapno mammuanna ti nasapulanda.’”
Kadagidi nga al-aldaw naunday a panawen ti panagdaliasat ti maysa a tao manipud Israel agturong idiay Roma, aguray iti dayta a siudad agingga a magun-odanna ti kinaari, ket agsubli iti ilina kas ari. Ni Jesus isu ti “tao a natan-ok.” Awatenna ti pannakabalin kas Ari manipud ken Amana idiay langit ngem saan a dagdagus a maisaad kas Mesianiko nga Ari. Dagiti pasurotna agnegosioda babaen panangitultuloyda iti trabaho a panangipakaammo iti naimbag a damag ti Pagarian iti naunday a panawen sakbay panagsublina kas Ari.
No Kasano nga Umay ti Pagarian
Aniat’ idawdawat dagiti managayat iti Dios no ikararagda nga umay ti Pagarianna? Kinaagpaysuanna dawdawatenda a ti nailangitan a Pagarian agtignay babaen panangdadaelna kadagiti inaramid-tao a sistema a napaay a mangtungpal kadagiti karida a mangiyeg iti pudno a talna ken kinarang-ay. Iti panangitudona itoy a pasamak, insurat ni mammadto a Daniel: “Ket kadagiti al-aldaw dagidiay nga ar-ari ti Dios ti langit mamangonto iti maysa a pagarian a kaanoman dinto madadael. Ket ti pagarian saanto a maited iti sabali nga ili. Burakburakennanto ken ibusennanto amin dagitoy a pagpagarian, ket isu agtalinaedto iti agnanayon.” (Daniel 2:44) Kaano a mapasamak daytoy?
Impakpakauna ni Jesus a mapasamak daytoy iti kaputotan dagidiay makaimatang iti di gagangay a kinariribuk dagiti natauan nga aramid. Maipanggep iti “kaaddana,” nangted ni Jesus iti sibubukel a “pagilasinan” a mangiramraman kadagiti pasamak kas dagiti di maartapan a panaggugubat, ginggined, bisbisin, angol—wen, ken ti sangalubongan a pannakaikasaba ti naimbag a damag ti Pagarian ti Dios.—Mateo, kapitulo 24, 25; Marcos, kapitulo 13; Lucas, kapitulo 21.
Ti padto ni Jesus iramanna dagiti pasamak a maar-aramid itan—iti maika-20 a siglotayo. No kasta, saanen a mabayag ket iyegen ti Pagarian ti Dios dagiti engrande a bendision iti sangatauan. Mabalinyo ti maibilang kadagidiay mangtagiragsak kadagiti gunggona ti turay ti Pagarian. Ngem ania a talaga ti mabalin a kaipapanan ti Pagarian ti Dios kadakayo ken kadagiti inay-ayatyo?
Dagiti Bendision ti Turay ti Pagarian
Agraira ti kinaragsak iti intero a daga. Iti sidong ti “maysa a baro a langit”—ti nailangitan a Pagarian—addanto “maysa a baro a daga,” sangalubongan a kagimongan dagiti natulnog a sakop ti Pagarian. “Ti Dios met laeng addanto kadakuada,” insurat ni apostol Juan. “Ket punasennanto ti amin a lulua kadagiti matada.” Awanton makagapu iti aniaman no di kinaragsakto laengen, ta “awanton ti sasaibbek wenno sangsangit wenno rigrigat.”—Apocalipsis 21:1-4.
Awanton ni patay. Daytoy a nakaro a pakaigapuan ti ladingit dinatayto iyadayon kadagiti gagayyem ken inay-ayattayo. “Kas ti maudi a kabusor, mapukawto ni patay.” (1 Corinto 15:26) Anian a rag-o ti maadda inton dagiti pumpon ket sukatanto dagiti panagungar dagidiay adda iti lagip ti Dios!—Juan 5:28, 29.
Ti nalasbang a salun-at sukatanna ti sakit ken pakapilawan. Saanton a mapno dagiti pagiddaan iti ospital kadagidiay parparigaten ti pisikal ken mental a saksakit. Ti Kalaingan a Mangngagas, ni Jesu-Kristo, ipakatnanto ti pateg ti daton a subbotna “maipaay iti pannakaagas dagiti nasion.” (Apocalipsis 22:1, 2; Mateo 20:28; 1 Juan 2:1, 2) Dagiti panangagas nga inaramidna bayat nga adda ditoy daga ket pangripiripan laeng iti aramidennanto babaen iti Pagarian.—Idiligyo ti Isaias 33:24; Mateo 14:14.
Aglaplapusananto dagiti abasto a taraon. Kas kuna ti salmista, “addanto kinaruay ti bukel iti daga; iti tapaw dagiti bambantay ti bungada margaayanto.” (Salmo 72:16) Iti daytoy, inayon ti padto ni Isaias: “Ni Jehova dagiti buybuyot agaramidto kadagiti amin nga inilin-ili, iti daytoy a bantay, iti maysa a rambak dagiti nalukmeg a banag, maysa a rambak dagiti arak iti rabaw dagiti aributed, dagiti nalukmeg a banag a napno iti pata, dagiti arak a nadalusan a naimbag kadagiti aributed.” (Isaias 25:6) Sigurado, saanton a parigaten ti bisin dagiti agtaeng iti daga iti sidong ti turay ti Pagarian.
Agbalin a paraiso ti intero a daga. Matungpalto ngarud ti kari ni Jesus iti managbabawi a managdakdakes: “Makipaggiankanto kaniak idiay Paraiso.” (Lucas 23:43) Mabalinyo met a matagiragsak ti biag nga agnanayon iti daytoy a daga, maysa a nadalusan iti kinadakes a daga ken napagbalin a makaay-ayo, kasla parke a globo.—Juan 17:3.
Dagitoy a nakaskasdaaw a namnama ket naidiaya iti amin a natulnog a sangatauan. Ti naipaltiing a Sao ni Jehova, ti Biblia, itedna dagitoy a nabendisionan a pammasiguro. Ket amin dagitoy isudat’ mabalin a kaipapanan ti Pagarian ti Dios kadakayo.
[Ladawan iti panid 7]
Patienyo kadi ti kuna ni Jesus maipapan iti Pagarian ti Dios?