Ti Karit ti Panangasaba iti Maysa Kadagiti Kalawaan a Puerto ti Lubong
TI ROTTERDAM, a masarakan iti pagtappuakan ti Rhine, ti kaaduan usarna a karayan ti Europa, idiay North Sea, tagtagiragsakenna ti pannakabigbig a maysa kadagiti kalawaan a pagsangladan ti lubong. Buyogen agarup 500 a kompania ti barko nga um-umay ditoy, ti Rotterdam addaan direkta a rangtay agturong iti nasurok a 800 a destinasion iti intero a lubong. Pudno a daytoy ket maysa nga internasional a pagsangladan.
Nupay kasta, daytoy nga agtawen 650 a pagsangladan dagiti Olandes ket ad-adda pay ngem basta pagsasapalan dagiti linia ti barko. Daytoy ket pagsasabatan met dagiti tattao. Nakaad-adu a managlayag ti sumangpet nga inaldaw ken rinabii manipud amin a suli ti lubong. Dagitoy a managlayag dida naliklikan ti atension dagiti Saksi ni Jehova idiay Netherlands. Kas kadagiti Saksi iti sabali a lugar, agbirukda kadagiti pamay-an tapno ikasabada ti kasayaatan a damag ti lubong—a ti Pagarian ti Dios din agbayag pagbalinennan ti daga a Paraiso—kadagiti amin a klase ti tao, agraman dagiti managlayag.—Daniel 2:44; Lucas 23:43; 1 Timoteo 4:10.
“Nabalingling a Misionero nga Annongen”
Sumagmamano a tawen ti napalabasen, kiniddaw ti Watch Tower Society idiay Netherlands ti innem nga amin-tiempo a manangaskasaba, wenno payunir, a mangasaba kadagiti barko iti intero a pagsangladan ti Rotterdam. Sigagagar nga innala dagiti payunir ti gundaway. Inurnongda dagiti impormasion manipud kadagiti autoridad ti pagsangladan, sinirpatda dagiti pier, ket di nagbayag nabigbigda nga addaandat’ makakarit a nakaitudingan.
“Daytat’ kasla nabalingling nga annongen ti misionero,” kuna ni Meinard, a mangimatmaton iti panangasaba idiay pier. Aniat’ kayatna a sawen? “Kaaduanna ti maysa a misionero agdaliasat a mapan kadagiti tao, ngem iti kasomi dagiti tattao ti agdaliasat tapno umayda kadakami.” Innayonna, “ti teritoria a pangasabaanmi ket nalabit isut’ internasional a tartarigagayan ti maysa.” Ti yearbook iti 1985 ti Rotterdam Europoort kunana nga idi 1983, ti tawen a rinugian dagiti payunir daytoy naisangsangayan a trabaho, ti pagsangladan ti Rotterdam nakapasanglad iti 30,820 a barko manipud 71 a nagduduma a pagilian. Dayta ket internasional!
Maitutop, dagiti “misionero idiay pagsangladan”—kas nangrugi a panangawag dagiti managlayag kadagiti payunir—isilnagna met ti internasional a ramit. Da Geert, Peter, ken ni baketna, ni Karin ket Olandes; da Daniël ken Meinard naggapuda manipud Indonesia; ken ni Solomon ket maysa nga Etiope. Dagiti Europeo, Asiano, ken Africano a nagtaudanda ti nangwaswas kadagiti walo a lapped iti pagsasao, ngem tapno agballigi iti daytoy a trabaho, addaanda kadagiti ibaklay a sabsabali pay a lapped.
“Ti Agbisbisikleta a Relihion”
“Dika basta makasang-at lattan iti pantalan, makauli iti andamio, ken makalugan iti barko,” kuna ni 32-tawenna a Peter, dati a managlayag. “Kasapulam dagiti pammalubos iti lugar.” Kaipapanan dayta dagiti pammalubos a sumrek kadagiti pantalan ken dagiti pammalubos a lumugan kadagiti barko. “Daytat’ nakaad-adu a pasikut-sikot,” nalagip ni Peter, “ngem kalpasan a nakaalakami iti walo a pammalubos, naan-anay buyogen dagiti retratomi ken opisial a timbre, nakasaganakamin a mangipasia iti trabahomi.” Biningayda ti 37 kilometro a pantalan iti tallo a benneg, tunggal maysa ti tinaming ti dua a payunir.
Kasano, nupay kasta, a sanguenyo dagiti nakaad-adu a pagsasao dagiti managlayag manipud nakaad-adu a pagilian? Uray no dagiti payunir nagurnongda kadagiti literatura ti Biblia iti 30 a pagsasao ken inawitda ti aginggat’ mabalin a kaadu kadagiti bisikletada, pulos a kasla dida umdas. “Pulos a dika masigurado no ania dagiti pagsasao a kasapulam,” insalaysay ni 30-tawenna a Solomon buyogen panagisem. “Masansan a mairana a dagiti managlayag tarigagayanda dagiti libro iti tunggal pagsasao a dika intugot, ket kalpasanna ibagada kenka a ti barkoda ket pumanaw kalpasan agarup tallo nga oras.” Gapu ta dida kayat a mabainan dagiti managlayag, maysa kadagiti payunir ti agdardaras a pumanaw, mangala kadagiti kasapulanda a libro, darasenna ti agsubli, ket iyawatna dagita kadagiti magagaran a managlayag. “Idi a ti isu met laeng a parikut ti timmaud bayat a mangaskasabakami kadagiti paset ti pier a madanon kalpasan panagbisikleta iti tallo nga oras,” kuna ni Peter, “nabatad a kasapulanmi ti sabali pay a pamay-an.”
Maysa nga aldaw kinellaat dagiti dadduma a Saksi nga agnanaed idiay pier dagiti payunir babaen kadagiti dua a pagkargaan a guyoden ti bisikleta, tunggal maysa ket kas kadakkel iti paglabaan. Kinargaan dagiti payunir dagiti kariton kadagiti literatura iti amin a magun-odan a pagsasao, insilpoda ida kadagiti bisikletada, ket imsuatda a mapan idiay pier. Di nagbayag nagbalin a gagangayen dagiti kariton. “Nagbalindan a pakabigbigan iti kaaddami,” kuna ti maysa kadagiti payunir. “No ti agbambantay iti pagserkan makitana a sumungsungadkamin, lukatanna ti pagserkan, payapayannakami, ket ipukkawna: ‘Adtoyen ti agbisbisikleta a relihion!’” Kadagiti sabsabali pay a gundaway, no ti guardia madlawna “ti agbisbisikleta a relihion” nga umas-asideg iti ayanna, lukatanna ti pagserkan ket ipukkawna: “Dua a barko a Polako ken maysa a barko nga Intsik ti simmanglad!” Dagiti kakasta a makatulong unay a pangripiripan ti namagbalin kadagiti payunir a makastrek buyogen dagiti literatura kadagiti maitutop a pagsasao. Ngem masapul met a mapanda iti umiso a tiempo. Apay?
Dagiti Naintiempuan nga Isasarungkar Buyogen Naintiempuan a Mensahe
Mabalin a makisarita dagiti payunir kadagiti tripolante kabayatan laeng dagiti oras ti panagmiriendada iti bigat ken iti malem wenno oras ti pangngaldawda. Ti kusinero, nupay kasta, addaan naiduma nga oras iti trabaho, ken ti kapitan ken sabsabali pay nga opisial mabalin a masarakan iti intero nga aldaw. Kasta pay met, naadal dagiti payunir a dagiti barko a Briton a sumanglad idiay Rotterdam sumurotda iti oras a Britania (maysa nga oras ti dumana manipud iti oras nga Olandes), gapuna a dagiti tripolanteda mapanda iti panganan inton agsubli iti trabaho dagiti saan a Briton a tripolante. Nabatad, para iti maysa a payunir iti pier, kasapulan unay ti maysa a mapagpiaran a relo.
Nupay kasta, situtulok kadi dagiti managlayag a mangaramat iti panawen ti panaginanada maipaay kadagiti panangsalaysay iti Biblia? “Pangkaaduanna, masarakak a silulukat-panunotda maipanggep iti mensahe ti Pagarian,” kuna ni 31-tawenna a Geert. “Nalabit daytat’ gapu ta umuna a makitada ti pannakapaay dagiti natauan a gobierno.” Kas pangarigan, dadduma a managlayag kunada ken Geert a dagiti buntuon ti bukbukel a naidissaagdan para kadagiti agbisbisin nga Etiope ket adda pay laeng sadiay bulbulan ti napalabasen idi nakapasiarda manen sadiay, ket idin nabuloken dagiti bukel ken inatibelbelanen dagiti utot. “Isu met laeng nga adu a managlayag ti awanen namnamada iti politika,” kuna ni Geert. “Gapuna a ti kari ti Biblia maipapan iti maysa a gobierno para iti amin a sangatauan ket makaallukoy kadakuada.”
Umanamong ni Peter. “Maysa a kapitan nga Aleman kunana a sangapulo a tawen ti napalabasen mabalin a dagiti tripolantena pinaruardak koman manipud iti barko, ngem dagiti agbalbaliw a kasasaad ti lubong ita ti nangtukay iti interesda iti naintiempuan a mensahe ti Biblia.” Maysa a kusinero ti barko ti Korea ti nangisalaysay a kabayatan ti gubat ti Iran ken Iraq, ti pagtartrabahuanna a dakkel a barko nga agkarkarga iti asete ket napuntaan ti maysa a raket ken simgiab idiay Persian Gulf. Inkarina a no isu ket agbiag, birukenna ti Dios. Isut’ nakalasat. Idi nga isu ket nasabet dagiti payunir idi agangay idiay Rotterdam, tarigagayanna amin dagiti literatura a Koreano a mabalinda nga iyeg kenkuana.
Kaaduanna a barko ti agtalinaed idiay pier iti sumagmamano nga aldaw. Daytoy ti mangipalubos kadagiti payunir tapno agsubli iti mamindua, mamitlo, wenno ad-adu pay a daras tapno itultuloyda dagiti panangsalaysayda iti Biblia kalpasan oras ti trabahoda. Kaskasdi, no adda dadael ti makina ti maysa a barko, mabalin nga agtalinaed a nakasanglad iti tallo a lawas. “Dadael dayta para iti kompania,” inkumento ti maysa a naangaw a payunir, “ngem nasayaat para iti trabahomi.” Kalpasanna, malaksid iti panangitultuloyda kadagiti panangsalaysay iti Biblia, iyurnos met dagiti payunir ti mangipabuya iti maysa kadagiti programa iti slide ti Sosiedad, ti “Ti Biblia—Maysa a Libro Maipaay iti Daytoy a Kaputotan,” idiay silid a panganan. Dadduma a managlayag mapanda met kadagiti gimong dagiti adu a ganggannaet-pagsasaona a grupo dagiti Saksi ni Jehova idiay Rotterdam. Agtultuloy daytoy agingga a matarimaan manen ti makina. Kalpasanna masapul a maserraanen dagiti Biblia. Mawarwaranen dagiti wayway ti barko, ket umadayon ti barko manipud iti pier—ngem saan manipud kadagiti panunot dagiti payunir.
Makaparegta a Pakasaritaan Dagiti Managlayag
Babaen kadagiti listaan iti pagiwarnakan wenno iti sistema ti kompiuter dagiti opisial ti pier, maammuan dagiti payunir ti isasanglad ken ipapanaw dagiti barko a binisitada. Apaman a maysa kadagita ti agsubli manen, magagaran dagiti payunir a sumarungkar kadagiti managlayag tapno maammuanda no aniat’ napasamaken manipud naudi nga isasarungkarda. Aniadan a makaparegta nga estoria ti ibaga dagiti managlayag!
Maysa a managlayag ti nangipaima kadagiti kopia ti libro a Mabalinyo ti Agbiag nga Agnanayon iti Paraiso a Daga kadagiti lima a katrabahuanna idiay barko kalpasan a nagpataawen ti barko a pagtartrabahuanna, ket isuda nga innem ti naiyadalan. Inrekordna met ti kapitulo maipapan iti biag ti pamilia iti audiocassette ket impangngegna dayta idiay silid a panganan tapno magunggonaan dagiti amin a tripolante. Nakalugan iti sabali a barko, maysa a managlayag a nakapasiaren iti maysa a Kingdom Hall iti kabangibang a pagsangladan ti Antwerp ti nangikapet iti diding ti silid a panganan kadagiti sasao a “Kingdom Hall of Jehovah’s Witnesses” kadagiti dadakkel a letra. Kalpasanna inawisna dagiti tripolante a mapan sadiay idi nga indauluanna ti gimong iti Biblia. Sakbay nga inikkatna ti karatula, inawisna dagiti tripolante para iti sumaganad a gimong. Iti simmaganad a lawas, ti karatula ken dagiti tripolante ti addada manen.
Natakkuatan met dagiti payunir a dadduma a managlayag pulos a dida insunison dagiti libroda. “Idi simrekkami idiay kamarote ni Isaac, maysa a taga Makinlaud nga Africa nga operator ti radio, narigat ti bumirok iti pagtugawan,” insalaysay ni Meinard. “Dagiti magasin ti Sosiedad, libro, ken konkordansia ket adda iti amin a disso—ken nakaukradda.” Naaddaan met ni Isaac iti listaan dagiti naisagana a saludsod ti Biblia, bayat nga isut’ nagur-uray para iti isasarungkar dagiti payunir.
Dadduma a managlayag, nupay kasta, dida urayen dagiti payunir a sumarungkar kadakuada. Maysa a rabii nagkiriring ti telepono ni Geert kalpasan panagiddanan.
“Siasino ngata daytoy?” intanamitim ni Geert bayat nga ar-arikapenna ti telepono.
“Hello, daytoy ti gayyemmo!” impakaammo ti naragsak a timek.
Pinanunot ni Geert no siasino dayta.
“Ti gayyemmo iti barko,” kuna manen ti timek.
“Alas tres iti parbangonen!” kuna ni Geert.
“Wen, ngem kunam kaniak nga awaganka iti telepono apaman a sumangpet manen ti barkok ditoy Rotterdam. Bueno, addaak ditoy!” Di nagbayag kalpasanna, napanen ni Geert tapno sabtenna daytoy a gayyem nga interesado iti Sao ti Dios.
“Ipalladawmo ta Tinapaymo”
Ti panangapresiar kadagiti literatura ti Biblia ket naiyebkas met kadagiti surat dagiti managlayag kadagiti payunir. Dagiti sumaganad ket sumagmamano kadagiti pasetda:
‘Rinugiakon a binasa ti libro a Mabalinyo ti Agbiag nga Agnanayon iti Paraiso a Daga . . . Ita maawatakon dagiti adu a banag a diak naawatan idi. Inanamaek a ti barkomi makasublinto dita Rotterdam.’—Angelo.
‘Binasak ti libro, ket mangipatulodak kadagiti saludsod kadakayo tapno masungbatanyo ida kadagiti suratyo.’—Alberta.
‘Basbasaek itan nga inaldaw ti Biblia. Maragsakanak nga agbalin a gayyemyo. Ti pannakasarakko kadagiti gagayyem a mangiturong kaniak iti Dios isut’ kasayaatan a pasamak iti biagko.’—Nickey.
Dagiti kakasta a makaparagsak a surat ipalagipna kadagiti payunir maipapan iti kunaen ti Biblia idiay Eclesiastes 11:1: “Ipalladawmo ta tinapaymo iti rabaw dagiti dandanum, ta isu masarakamto iti kalpasan dagiti adu nga al-aldaw.” Nangnangruna nga agrag-oda no maammuanda a dadduma a managlayag ti nangalan iti takderda maipaay ken Jehova.
Ni Polako a managlayag nga Stanislav, kas pangarigan, ket naragsakan unay iti naadalna manipud kadagiti libro ti Sosiedad. Isut’ dagdagus a nakagun-od iti bassit a libreria dagiti literatura ti Biblia ken, bayat nga adda idiay baybay, sinaggaysana nga inadal ida. “Idi adda damagmi manen kenkuana,” kuna ni Meinard, “insuratna nga isu ket nabautisaranen.”
Ni Folkert, maysa a kapitan ti barko a lumaslasat kadagiti karayan, immuna a nangngeganna ti mensahe ti Pagarian idiay Rotterdam. Tunggal dua a bulan isu ket makasubli idiay pagsangladan iti maysa a lawas ket nagadal iti Biblia iti innem a nagsasaruno nga aldaw. Kalpasanna, sakbay a pimmanaw para iti dua a bulan a panagdaliasat, inted kenkuana dagiti payunir ti listaan ti direksion dagiti Kingdom Hall a madalananna. Dimmagas ni Folkert kadagiti paggimongan ket isut’ natignay babaen iti nabara a panangabrasa nga inawatna. Di nagbayag, daytoy a kapitan ket nabautisaran ken sireregta nga agserserbi itan ken Jehova.
Ni Mike, maysa nga opisial ti British Navy, ket naaddaanen pannakiuman kadagiti Saksi ni Jehova sakbay panagadalna iti Biblia idiay baybay. Naminsan, idi a ti bapor a pagtartrabahuanna ket simmanglad idiay Rotterdam, inusarna ti makupit a bisikletana tapno makapan idiay Kingdom Hall. Isut’ nasdaaw iti nakitana nga ayat ken panagkaykaysa ket kunana kadagiti gagayyemna nga inkeddengnan nga ibbatan ti trabahona. Nupay isu ket uppat a tawen laengen sakbay a maawatna ti dakkel a pension, isut’ kimpet iti pangngeddengna ket idi agangay isu ket nabautisaran.
Kuna ni Meinard: “Ti kinagagar da Mike, Stanislav, Folkert, ken dagiti sabsabali pay tapno agserbi ken Jehova ti mangtignay kadakami tapno itultuloymi ti agsapul idiay pagsangladan kadagiti managlayag a kas kadakuada.”
Mabalinyo Kadi ti Makiraman?
Iti itatalliaw kalpasan ngangngani maysa a dekada ti panangasaba iti maysa kadagiti kadakkelan a pagsangladan ti lubong, dagiti innem a “misionero iti pagsangladan” naimpusuan unay nga umanamongda—ti nakaitudinganda ket makakarit ngem makagunggona. “Kalpasan tunggal aldaw ti panangasaba,” ginupgop ni Meinard, “agbisikletakami nga agawid buyogen rikna a dadduma kadagidiay a managlayag ket agur-urayda iti isasarungkarmi.”
Mabalin kadi nga adda dagiti managlayag nga agur-uray iti lugaryo iti maysa nga isasarungkar? Nalabit dagiti panglakayen iti kongregasionyo makaaramidda kadagiti urnos tapno mabalinyo ti makipaset iti daytoy a makakarit ngem makagunggona a trabaho.
[Kahon iti panid 20]
IDADANON KADAGITI MAPARPARITAN A TERITORIA
Iti maysa a kallabes a tawen, nasurok a 2,500 a barko manipud kadagiti pagilian a sadiay ti ar-aramid dagiti Saksi ni Jehova ket adda iti sidong ti pannakaparit ket simmangladda idiay Rotterdam. Ket dagiti payunir idiay pier nakitada dayta kas maysa a gundaway tapno makadanonda kadagitoy a teritoria buyogen mensahe ti Biblia.
Iti maysa kadagiti immuna a barko nga Asiano a sinarungkaranda, naipaima dagiti payunir ti amin nga abastoda a 23 a libro, a dadduma kadagiti tripolante ket naladingitanda gapu ta dida nakaala iti kopiada. Maysa nga agtutubo a lalaki nga agtartrabaho idiay kusina iti sabali pay a barko nga Asiano ti nasiksikap pay. Kalpasan iyaawatna iti maysa a libro manipud iti payunir, daytat’ insublina a nabalkot iti papel a naisurat sadiay ti maysa a direksion. Naawatan ti payunir ti punto. Napeggad unay para iti agtutubo ti mangitugot iti libro. Iti dayta met laeng nga aldaw daytat’ naibuson agturong idiay Adayo a Daya.
Iti maysa a barko manipud Africa immay ti maysa a managlayag nga addaan listaan dagiti libro a tarigagayan dagiti Saksi sadiay. Nanipud idin, tunggal agawid dayta a managlayag, ti maletana ket napusek iti literatura. Maysa a managlayag manipud sabali pay nga Africano a pagilian ti nabainan unay idi a ti payunir a mangiyad-adal kenkuana ket nakaitukon laeng iti tallo a kopia ti libro a Panangparagsak iti Biag ti Pamiliayo. “Awan serbina dayta!” impukkaw ti managlayag, nga ingngatona dagiti takkiagna iti pannakaupayna. “Dagiti kakabsat idiay lugarko kasapulanda ti 1,000 a libro!” Maipaay iti bukodna a talged, isut’ inallukoy dagiti payunir a mangitugot laeng iti 20 a kopia iti maminsan.
Nalabit ti makasair unay isu ti tiempo idi a naammuan dagiti payunir a maysa a barko ti simmanglad a naggapu iti pagilian a sadiay dagiti Saksi ket naidadanesda gapu kadagiti patpatienda, ken adu ti nakapukaw kadagiti trabaho ken sanikuada. Idi a natakkuatanda a ti mayordomo a nakalugan ket maysa Saksi, inawaganda ti kapitan ket dimmawatda iti pammalubos a mangipatulodda iti tulong a maikarga iti barkona. Immanamong ti kapitan, ket sumagmamano nga aldaw kalpasanna, sangagasut a dadakkel a supot dagiti kawes, sapatos, ken sabsabali pay a kasapulan ti addan iti dalan agturong kadagiti Saksi iti dayta a pagilian.
[Kahon iti panid 21]
PANANGASABA KADAGITI BARKO—PANANGMATMAT TI MAYSA A BABAI
“Idi damo, agduduaak a mangkadua ken Peter,” nalagip ni Karin, ti maymaysa a babai kadagiti payunir, “gapu ta nadamdamagko a dagiti managlayag ket masansan a nasabrak ken managbartekda. Nupay kasta, natakkuatak a kaaduanna ket nadayawda. Masansan, kalpasan a maammuan dagiti managlayag nga agassawakami, iruarna ti retrato ni baketna ken dagiti annakna ket rugianna ti agsao maipapan iti pamiliana. Iti dayta a pamay-an, nakaipaimakami iti adu a kopia ti libro a Panangparagsak iti Biag ti Pamiliayo.”
Ti panagsarungkar kadagiti barko kas asawa a lalaki ken babai pagbalinenna met a nalaklaka ti makisarita kadagiti assawa dagiti tripolante ken dagiti sabsabali pay a babbai a no dadduma agtartrabahoda kas nars. “Masansan a naatapda kadagiti ganggannaet,” kuna ni Karin, “ngem no makitadak, ad-adda a maawisda a makipaset iti panagpapatang.”
Aniat’ kadadakkelan a karit iti nakaitudinganna? “Dagiti agdan a tali,” insungbat ni Karin. “Diak kayat dagidiay narukop a bambanag.” Naparmekna kadi ti butengna? “Wen. Naminsan idi a nagduduaak nga umuli, kimmita ti maysa a grupo dagiti managlayag manipud Paraguay ket impukkawda: ‘Kabaelam dayta. Agtalekka laeng iti Dios.’ Siempre,” kuna ni Karin nga agkatkatawa, “kalpasan dayta a saoda, awan naaramidak no di ti umuli.” Kuna ti agrayrayo nga asawana: “Uppat a tawen ken adu nga agdan a tali kalpasanna, ulienna ida itan kas maysa a managlayag.”
Ni Karin ken ni lakayna, ni Peter, tinabunuanda ti maika-89 a klase ti Watchtower Bible School of Gilead idiay Estados Unidos. Idi Setiembre 28, 1990, pimmanawda maipaay iti baro a nakaitudinganda, ti Ecuador, maysa a pagilian nga addaan pagsangladan. Saanda la ketdi a maikawa.
[Kahon iti panid 22]
MAYSAKAYO KADI A MANAGLAYAG?
Kayatyo kadi a tabunuan ti Ingles-pagsasaona a gimong dagiti Saksi ni Jehova bayat a ti barkoyo ket nakasanglad iti maysa kadagiti kangrunaan a pagsangladan ti lubong? Salimetmetanyo ngarud daytoy a listaan dagiti agdama a direksion dagiti Kingdom Hall ken dagiti oras ti gimong:
Hamburg, Schellingstr. 7-9; Sabado, alas 4:00 t.m.; telepono: 040-4208413
Hong Kong, 26 Leighton Road; Domingo, alas 9:00 t.b.; telepono: 5774159
Marseilles, 5 Bis, rue Antoine Maille; Domingo, 10:00 t.b.; telepono: 91 79 27 89
Naples, Castel Volturno (40 kilometro iti amianan ti Naples), Via Napoli, corner of Via Salerno, Parco Campania;Domingo, alas 2:45 t.m.; telepono: 081/5097292
New York, 512 W. 20 Street; Domingo, alas 10:00 t.b.; telepono: 212 627-2873
Rotterdam, Putsestraat 20; Domingo, alas 10:00 t.b.; telepono: 010-41 65 653
Tokyo, 5-5-8 Mita, Minato-ku; Domingo, alas 4:00 t.m.; telepono: 03-3453-0404
Vancouver, 1526 Robson Street; Domingo, alas 10:00 t.b.; telepono: 604-689-9796