Nangipangagak iti Panawen ti Panagani

KAS INSALAYSAY NI WINIFRED REMMIE

“ADU ti anien, ngem bassit dagiti trabahador.” Dagitoy a sasao ni Apotayo a Jesus ket tinignay ti maysa a nauneg a rikna para kadagiti tattao a naliday ken nawarawara kas karkarnero nga awan pastorda. Napasarak daytoy met laeng a rikna, ket iti napalabas nga 40 a tawen, inkarkarigatak ti mangipangag iti awag ti Apo nga agtrabaho iti panagani.​—Mateo 9:36, 37.

Naiyanakak idiay Makinlaud nga Africa iti maysa a pamilia nga addaan pito nga annak, babbai amin. Nadungngo dagiti nagannakmi, ngem naestriktoda; relihiusoda met unay. Saan a mapagpambaran ti itatabuno iti simbaan ken eskuela Dominicana iti tunggal lawas. Para kaniak saan a parikut daytoy gapu ta pagay-ayatko dagiti naespirituan a banag. Kinapudnona, iti edad a 12, nadutokanakon a mangidaulo kadagiti klase ti eskuela Dominicana.

Pannakiasawa ken Pannakigasanggasat

Idi 1941, iti edad a 23, nakiasawaak ken Lichfield Remmie, maysa a manangaywan iti libro ti kuenta iti opisina ti gobierno. No iti material, narang-aykami, ngem ti panagayat iti pannakigasanggasat ken ti tarigagay nga agurnong kadagiti material a kinabaknang ti nangipan kadakami idiay Liberia idi 1944. Ti panawen a nangbalbaliw iti biag ni lakayko, ken idi agangay iti biagko, ket dimteng idi 1950 idi a naam-ammona ni Hoyle Ervin, maysa a misionero a Saksi ni Jehova. Kalpasan laeng iti tallo a lawas a panagadal, nangrugin ni lakayko a makipaset iti panangasaba a trabaho.

Naupayak idi insardeng ni lakayko ti tumabuno idiay simbaan. No pampanunoten, isu ket maysa a napeklan a Protestante nga uray la nagay-ayunar kabayatan ti kuaresma. Iti immuna a pannakakitak kenkuana a rimmuar a nangasaba, nga adda ig-iggamanna a bag, makapungtotak unay. “Aniat’ mapaspasamak kenka?” insaludsodko. “Maysa a mararaem a tao a kas kenka ti mapan mangasaba kadagitoy agmauyong a tattao!” Isu ket naulimek ken nalimbong ti pampanunotna kabayatan daytoy a panagpungtot.

Iti sumuno nga aldaw, simmarungkar ni Kabsat Ervin idiay balaymi tapno makiinnadal ken Lichfield. Kas kannawidan, nagmattidirak kabayatan ti panagadal. Nalabit gapu iti daytoy a sinaludsodannak ni Kabsat Ervin no saanak a makabasa. Ania? Siak, saan a makabasa? Anian a pananginsulto! Ipakitak kenkuana no kasano kangatot’ nagadalak! Ibutaktakkonto daytoy nga ulbod a relihion!

Panangawat iti Kinapudno

Saan a nabayag kalpasan daytoy, nadlawko ti libro a Mapapati Coma ti Dios iti lamisaan idiay salas. ‘Anian a makaparurod a paulo,’ impatok. ‘Ti Dios kankanayon a napudno, saan kadi?’ Bayat a tinaldiapak dagiti pinanid ti libro, dagdagus a nakasarakak iti sabali pay a pakaigapuan ti panagreklamok. Kuna dayta a ti tao awanan kararua, isu ket kararua! Uray dagiti aso ken pusa ket kararuada! Daytoy ti namagsimron kaniak. ‘Anian a minamaag a pannursuro!’ impagarupko.

Idi simmangpeten ni lakayko, isut’ sipupungtot a sinangok. “Dagitoy a manangallilaw kunaenda a ti tao awanan kararua. Ulbodda a mammadto!” Saan a nakiringgor ni lakayko; imbes ketdi, siaalumanay nga insungbatna: “Winnie, adda amin idiay Biblia dagita.” Idi agangay, idi a siaanus nga impakita kaniak ni Kabsat Ervin manipud bukodko a Biblia a datayo ket kararuatayo ken ti kararua ket matay, nagsiddaawak. (Ezequiel 18:4) Ti nangnangruna a namagsiddaaw kaniak isu ti kasuratan idiay Genesis 2:7, nga agkunkuna: “Ti lalaki [ni Adan] nagbalin a kararua a sibibiag.”

Anian ti pannakaallilawko idi! Nariknak a kinusitdak dagiti klero ken diak pulosen timmabuno idiay simbaan. Imbes ketdi, rinugiak a tabunuan dagiti gimong dagiti Saksi ni Jehova. Anian a nakaskasdaaw a makita ti ayat kadakuada! Daytoy la ketdi ti pudno a relihion.

Panagani Idiay Cape Palmas

Agarup tallo a bulan kalpasanna, naaddaan ni lakayko ti gundaway a mangtakaw iti dakkel a gatad ti kuarta manipud iti kompaniada​—ngem saanna nga inaramid dayta. Isut’ inum-umsi dagiti gagayyemna: “Remmie, napanglawkanto latta aginggat’ matayka.”

Nupay kasta, gapu iti kinasingpetna, naingato ti saadna ket naibaon idiay Cape Palmas tapno mangilukat iti maysa a baro nga opisina sadiay. Sireregta a nangasabakami ket kalpasan laeng ti dua a bulan, naaddaankamin iti maysa a bassit a grupo nga interesado unay iti mensahe ti Biblia. Idi agangay, idi nagdaliasat ni Lichfield agturong idiay kabisera, ti Monrovia, tapno mangala kadagiti abasto agpaay iti baro nga opisina, isu ket nabautisaran. Isut’ nagkiddaw met iti tulong manipud Sosiedad tapno mataripato dagidiay adda idiay Cape Palmas a mangipakpakitat’ interes iti kinapudno.

Nangipangag ti Sosiedad babaen panangibaonda idiay Cape Palmas kada Brother ken Sister Faust. Ni Sister Faust ket dakkel unay naitulongna kaniak, ket idi Disiembre 1951, insimbolok ti dedikasionko ken Jehova babaen panagbautisarko. Ad-adda idin ngem iti napalabas, determinadoakon nga ‘agburas kadagiti bunga maipaay iti biag nga agnanayon.’ (Juan 4:35, 36) Idi Abril 1952, imbaklayko ti amin-tiempo a ministerio kas maysa a payunir.

Dagiti panagreggetko ket dagdagus a binendisionan ni Jehova; iti las-ud ti makatawen, natulongak ti lima a tao agturong iti dedikasion ken bautismo. Maysa kadakuada, ni Louissa Macintosh, ket kasinsin ti presidente idi ti Liberia, ni W. V. S. Tubman. Isut’ nabautisaran ken simrek iti amin-tiempo a ministerio ken nagtultuloy a matalek iti Dios agingga iti ipapatayna idi 1984. Iti sumagmamano a gundaway isut’ nangasaba iti presidente.

Agturong Idiay Akimbaba a Buchanan

Idi 1957, kabayatan ti ibibisita ti manangaywan ti distrito, siak ken ni lakayko ti naawis nga agbalin nga espesial payunir. Kalpasan nainkararagan a panangsalaysay, inawatmi ti annongen. Kinasapulan ni Lichfield ti sumagmamano a bulan tapno ingudonan ti sekular a trabahona idiay Cape Palmas, gapuna nga immunaakon idiay Akimbaba a Buchanan, maysa a di pay naas-asak a teritoria, tapno rugiakon ti trabaho sadiay.

Apaman isasangpetko, pinadagusdak ti pamilia Maclean. Iti sumuno nga aldaw, kas nakaugalianen, naipanak idiay ayan ti nababbaba a hepe ti tribo a Pele. Ti hepe ken ti pamiliana ti sibabara a nangabrasa kaniak, ket nangasabaak iti maysa a bassit a grupo dagiti tattao idiay balayna. Saan a bumaba iti innem a tao a nakisaritaak iti dayta nga aldaw, agraman ti nababbaba a hepe ken ti asawana, ti nagbalin a Saksi idi agangay.

Di nagbayag nasarakakon ti bagik a mangidadaulo iti panagadal ti Pagwanawanan a nasurok a 20 a tao ti tumabtabuno. Kinasapulak ti agpannuray a naimbag ken Jehova, ket intedna kaniak ti kasapulan a bileg ken abilidad a mangtaripato kadagiti karnerona. No mariknak a nabannogak wenno agkapuyak, malagipko dagiti matalek idi ugma, nangnangruna dagiti babbai kas kada Deborah ken Hulda, nga awan butengda iti panangitungpal kadagiti komision nga inted ni Jehova.​—Oc-ocom 4:4-7; 14-16; 2 Ar-ari 22:14-20.

Idi Marso 1958, kalpasan laeng tallo a bulanko idiay Akimbaba a Buchanan, nakaawatak ti surat a mangipakpakaammo kaniak iti ibibisita ti manangaywan ti sirkito, ni John Charuk. Inabangak ti akimbaba amin a kadsaaran ti maysa a balay a makalaon iti adu a tao. Kalpasanna nagdaliasatak agturong idiay Akingngato a Buchanan tapno sabtek ni Kabsat Charuk, ngem saan nga immay. Kalpasan panagurayko aginggat’ sumipnget, natektekanak unay a nagsubli idiay Akimbaba a Buchanan.

Idi agarup tengnga ti rabii, nakangngegak iti panagtuktok idiay ridaw. Apaman a nalukatak dayta, saan laeng a ti manangaywan ti sirkito ti nakitak no di ket uray ni lakayko, a ti surpresa nga isasangpetna ti nakasaysayaat unay pannakairanana iti isasangpet ni Kabsat Charuk. Kasanodak a nasarakan? Nakasabetda ti maysa a mangnganup ket dinamagda no adda ammona a babai a mangaskasaba kadagiti tattao maipapan ken Jehova. “Wen,” insungbatna, ket kalpasanna impatungdana ida iti pagnanaedak. Anian a ragsak ti nariknak ta iti tallo laeng a bulanko idiay Akimbaba a Buchanan, nakasilsilnag unay ti panagraniag ti lawagko!​—Mateo 5:14-16.

Tinagiragsakmi ti kangatuan a bilang dagiti timmabuno a 40 kabayatan ti panagbisita ni Kabsat Charuk. Idi agangay naipasdeken ti maysa a rumangrang-ay a kongregasion, ket nakaibangonkami iti maysa a napintas a Kingdom Hall. Nupay kasta, ti biag ket saan a kanayon a nalinak. Kas pagarigan, idi 1963 bimtak ti relihiuso a pannakaidadanes idiay Kolahun, ket naaresto ken naibalud ni lakayko. Isut’ namalmalo iti nakaro unay a kinasapulanna ti maipan iti ospital.

Saan a nagbayag kalpasan pannakairuarna iti ospital, iti dayta met laeng a tawen, naaddaankami iti kumbension idiay Gbarnga. Iti maudi nga aldaw, dagiti soldado pinalawlawanda amin a timmabuno ket minandarandakami nga agsaludo iti bandera. Idi nagkedkedkami, pinilitdakami dagiti soldado a mangitayag kadagiti imami ket sumangokami iti init. Minalmaloda met ti dadduma kadakami babaen kadagiti putan ti paltogda. Kas tulong iti panangsalimetmet iti kinatarnawko iti Dios, siuulimek a kinankantak ti kanta ti Pagarian a “Dikay Pagbutngan Ida!” Kalpasan dayta impisokdakami dagiti soldado iti nakarugrugit a pagbaludan. Tallo nga aldaw kalpasanna napalubosan dagiti ganggannaet, ket siak ken ni Lichfield ti naidestierro idiay Sierra Leone. Dagiti lokal a Saksi ti nawayawayaan iti simmaruno nga aldaw.

Ad-adu Pay a Pribilehio ken Gunggona

Natudingankami a makipagtrabaho iti Bo a Kongregasion, idiay abagatan ti Sierra Leone. Nagserbikami sadiay iti walo a tawen sakbay a naiyaliskami idiay Njala. Bayat ti kaaddami idiay Njala ni lakayko ket nadutokan nga agserbi kas sandi ti manangaywan ti sirkito, ket naaddaanak ti pribilehio a kumuyog kenkuana bayat ti panagserbina. Kalpasanna, idi ngalay ti 1970’s, nabaliwankami a naituding idiay East Freetown a Kongregasion.

Napasarakon ti gunggona a pannakakita iti adu kadagidiay inyadalak ti Biblia a nangaklon iti pudno a panagdayaw. Addaanak iti nasurok nga 60 nga espiritual nga annak ken appoko kas “sursurat ti rekomendasion.” (2 Corinto 3:1) Dadduma kinasapulanda ti mangaramid iti nakaro a panagbalbaliw, kas inaramid ni Victoria Dyke, a maysa idi a propetisa ti Aladura a sekta. Kalpasan maysa a panangusig iti 1 Juan 5:21, imbellengnan kamaudiananna dagiti adu a karkarading ken bambanag a daydayawenna. Insimbolona ti dedikasionna babaen bautismo ket idi agangay isut’ nagbalin nga espesial payunir, a tultulonganna ti adu kadagiti kakabagianna a mangawat iti kinapudno.

Idi Abril 1985, napukawko ken patay ni lakayko, sumagmamano laeng a bulan sakbay ti maika-44 nga anibersario ti kasarmi. Ngem saanak a nabati nga agmaymaysa. Nagtultuloyak a nagserbi iti Manangtulongko, ni Jehova, kas maysa nga amin-tiempo a ministro. Ken mariknak ti maysa a naisangsangayan a singgalut kadagidiay natulongak a makaammo kenkuana. Pamiliak ida iti naisangsangayan a pannakaawat. Ay-ayatek ida ken ay-ayatendak. No masakitak, agdardarasdak nga umay aywanan ken, siempre, tultulongak met ida.

Awan duadua iti dayta, no kasapulan nga aramidek amin manen dayta, siraragsak nga alaek ti kumpayko ket makidanggayak iti panagani kas katrabahuan ni Jehova.

[Ladawan iti panid 23]

Ni Winifred Remmie ita