Masarsarakanda ti Pudno a Kinaragsak iti “Paraiso”
PARAISO! Masansan a sumiplot dayta a sao iti panunot dagiti tao no Hawaii ti pagsasaritaan—ket agpayso a kasta. Kalalainganna ti klima ditoy, nasin-aw ti langit, naruay dagiti agpallapallayog a palma, makapabang-ar ti palayupoy, ken nadarat dagiti baybay—bambanag nga ibilang ti adu a paraiso.
Daytoy a buya ti nangawis kadagiti tattao manipud adayo ken asideg. Naggapuda iti Asia, Pacifico, ken America, ken uray kadagiti lugar kas dagiti isla ti Caribbean ken Europa. Adu ti immakar ditoy gapu iti makatawen a kinasayaat ti klima. Immay dagiti dadduma a mangsapul iti natalged a pagsapulan—ken kinaragsak, siempre. Ti resultana isu ti panagpupunipon dagiti nasionalidad ken grupo etniko, nga addaan nagduduma a kultura ken relihiuso a kapanunotan.
Nupay kasta, adda sabali a benneg ti kasasaad. Kas kadagiti nagadu a napintas a lugar ditoy daga, masapsaplit ti Hawaii iti krimen, droga, kinadelingkuente, polusion, ken adu pay a parikut a mangrirriribuk iti natauan a pamilia sadinoman ti pagnanaedanda. Gaput’ kinaliway ken panagimbubukod ti tao, in-inut a mapukpukaw dagiti isla ti Hawaii ti nakaparsuaan a pintasda. Tarigagayan dagiti tao ti paraiso, ngem saan nga amin nga agnaed ditoy ti maseknan a mangaramid wenno uray la koma mangtaginayon kadagitoy nga isla a paraiso. Saan laeng a napintas a buya ken makaay-ayo a klima ti mamagbalin iti maysa a paraiso.
Nupay kasta, adda dumakdakkel a grupo dagiti tattao nga agnanaed ditoy ken agsagsagrap iti pudno a kinaragsak iti daytoy a naparaisuan a kasasaad. Isuda dagiti tattao nga umaw-awat ti kinapudno ti Biblia ken mangipappapuso iti nakaay-ayat a kari ti Dios: “Mamarsuaak kadagiti baro a langlangit ken baro a daga; ken dagiti immun-una a bambanag didanto malagipen, didanto mapanunoten.” Siraragsak a kumitkita dagitoy a tattao iti masanguanan a sipapanunotda kadagitoy a sasao ni apostol Pedro: “Adda baro a langlangit ken maysa a baro a daga nga ur-urayentayo kas mayannurot iti karina, ket isuda ti pagtaengan ti kinalinteg.” (Isaias 65:17; 2 Pedro 3:13) Asino dagitoy a tattao? Kasanoda a naammuan ti nakaay-ayat a namnama a naiparang idiay Biblia? Ken ania a panagbalbaliw ti naaramid iti panagbiagda?
Napagballigian ti Panagbuteng iti Patay
Filipino ti nagtaudan ni Isabel ken ni lakayna a George. Isut’ napadakkel iti relihion dagiti nagannakna a Romano Katoliko, nupay pulos a dina pay nasuksukimat ti Biblia. Naisuro ken Isabel a saan a matay ti natauan a kararua. Aniat’ epekto daytoy nga ulbod a doktrina kenkuana? Ay ket, mabuteng a matay gaput’ kapanunotan ti agnanayon a pannakaitabon a sibibiag iti maysa a lungon, ket saan kano a makapanaw ti kararuana. Ngem, idi 1973, nangrugi a nakipagadal ni Isabel iti Biblia kadagiti Saksi ni Jehova. Idi naadalna a matay met gayam ti kararua ken pukawento ti Dios ti patay babaen ti panagungar, nalaus ti ragsakna ket kasta unay ti pannakabang-arna. (Ezequiel 18:4, 20; Juan 5:28, 29) Naipasagepsep kenkuana ti kinapudno ti Biblia ket napardas a rimmang-ay.
Ni ngay George? Nakisango met kadagiti panagsasarita iti Biblia ngem panggepna laeng a paneknekan nga ulbod dagiti Saksi. Nupay kasta, awan a pulos ti nasarakanna a kamali iti maisursuro kadakuada ken baketna. Kinapudnona, di nagbayag kalpasan nga inrugida ti nagadal, rimsua ti suheto maipapan ti dara. Paborito idi ni George ti dinardaraan. Ngem idi nakitana a nalawag a kondenaren ti Biblia ti pannangan ti dara, insardengnan ti mangan ti dinardaraan. (Genesis 9:3, 4; Levitico 17:10-12; Aramid 15:28, 29) Intuloyna ti nakipaset iti panagadal ti Biblia ket naragsakan ta nabirukanna met laengen ti kinapudno. Pudno a naragsak itan da George, Isabel, ken dagiti uppat nga annakda gaput’ panagbiag a maitunos kadagiti pagalagadan ti Dios.
Naawis ti Pudno a Kinakristiano
Addadan iti 60’s ti maysa a Hapon nga agnagan George ken ti Portugues a baketna, a ni Lillian. Parehoda a nayanak ken dimmakkel idiay Hawaii. Yantangay di pulos sinursuruan dagiti nagannakna iti relihion, pulos a di sinerioso ni George ti relihion. Ngem mamati iti Dios. Iti sabali a bangir, napadakkel ni Lillian iti relihion dagiti nagannakna, kas maysa a Romano Katoliko.
Nupay saan a managbasa ti Biblia ni George, 30 a tawenen nga agbasbasa iti magasin a Pagwanawanan ken Agriingkayo! Adu ngaruden ti ammona maipapan iti Biblia. Nupay kasta, gapu ta maysa a napeklan a mannigarilio ken managinum, nabannayat ti panagbalbaliw ti kabibiagna. Bayat a naglabas dagiti tawen, intuloy ni George ti nagbasbasa kadagiti magasin ken pasaray a tumabuno kadagiti Nakristianuan a gimong idiay Kingdom Hall. Apay? Gapu ta, kas inlawlawagna, “nakaro ti panaginsisingpet dagiti dadduma a relihion” a pampanuynoyanda dagiti bambanag a kondenaren ti Biblia. Nakitana a naiduma dagiti Saksi ni Jehova.
Aniat’ nangawis iti napeklan nga asawa ni George, ni Lillian, iti kinapudno ti Sao ti Dios nupay dakkel ti impluensia kenkuana ti relihion dagiti nagannakna? Ay ket, isut’ inawis ti kabsatna iti lasag kadagiti gimong idiay Kingdom Hall. “Naay-ayoak iti naragsak a panaglalangen ken naingayyeman nga isem,” linagip ni Lillian. Ti pudpudno nga ayat a nakitana nga imparangarang dagiti tattao ni Jehova ti nangkumbinsir kenkuana nga isu daytoy ti pudno. (Juan 13:34, 35) Inawatna ti panagadal ti Biblia, ket idi agangay indedikarna ti biagna ken Jehova a Dios, ket nabautisaran sumagmamano a bulan kalpasan ti pannakabautisar ni lakayna.
Saanen nga agsigsigarilio wenno agbarbartek ni George, ket imbellengen ni Lillian amin a rebultona. Buyogen puspuso a napno iti ayat, iranranudda dagiti naadalda kadagiti sabsabali, agraman kadagiti 25 nga apokoda ken 4 nga apo iti tumeng. Matmatanyo ti rupada, ket makitayo a nakaragragsak da George ken Lillian!
Nagun-odan ti Talna ken Kinaragsak
Ni Patrick, maysa a nataengan nga Irish, ken ti Judio a baketna a ni Nina, agpadada nga immakar idiay Hawaii manipud iti makin-abagatan-a-laud ti Estados Unidos. Kadagiti naglabas, naigamerda iti droga, panangpadpadas iti relihion, ken nalulok a moral. Iti adu a tawen, nagbalinda pay a miembro ti kulto, a pinagreggetanda a gun-oden ti nangatngato a pannakaammo babaen ti droga, panagmennamenna, ken ti bukodda a guru. Idi agangay, nauman ni Patrick iti panagiinnimon, panagsusupiat, ken naynay a panagririri dagiti kameng ti kulto a nagkuna a nagaw-atdan ti ‘nangatngato a tukad ti pannakaammo.’ Naglusulos iti grupo ket nagsubli idiay Hawaii, a naminsan a nagnaedanna, a nangnamnama a masarakanna ti talna ti panunot. Kalpasanna, nakumbinsir ni Patrick ni Nina, ti nobiana, a sumarungkar. Idi agangay, nagkallaysada ket nagnaedda idiay Hawaii.
Di ninamnama da Patrick ken Nina a ti panangbirukda iti talna ken kinaragsak ti mangiturong iti pannakiadal ti Biblia kadagiti Saksi ni Jehova. Maysa a napeklan nga ateista iti intero a panagbiagna, masarsarakanen ni Nina dagiti makapnek a sungbat ti Biblia kadagiti makariro a saludsod kas ti no apay nga adda kinadakes ken no apay a mapasamak dagiti dakes a bambanag kadagiti naimbag a tattao. Naragsak met ti nagtungpalan ti sangapulo a tawen a panagbirbiruk ni Patrick iti kinapudno. Di nagbayag, binalbaliwandan ken ni Nina ti kabibiagda gaput’ maad-adalda manipud Biblia. Kalpasan ti napaut ken narigat a pannakidangadang, naparmek ni Patrick ti pannakaigamerna iti tabako. Iti agarup maysa a dekada itan, nadalusen ti kabibiagda nga agassawa a mangsursurot kadagiti pagalagadan ti Dios. Buyogen nasin-aw a puso ken nadalus a konsiensia, tagtagiragsakendan ti talna a binirbirukda.
Panagsakripisio ken Dagiti Gunggona
“Agawaanyo ti sumrek iti ruangan a nailet, ta kunak kadakayo nga adu dagiti agsapulto no kasano ti iseserrekda ket didanto mabalin.” (Lucas 13:24) Nalawag nga ipakita dagita a sasao ni Jesu-Kristo a saan a nalaka ti agserbi iti Dios ken agbiag a maitunos kadagiti Nainkasuratan a pagalagadan. Tunggal maysa nga agtarigagay a mangaramid ti kasta saan laeng a masapul nga agregget no di ket mangaramid met kadagiti kasapulan a panagsakripisio. Isu daytoy ti nalawag a kasasaad dagiti indibidual a nadakamat iti daytoy a salaysay. Ngem anian a nakakaskasdaaw dagiti gunggonada!
Kas pangarigan, usigenyo da Patrick ken Nina, a kalkalpas a nadakamat. Nangaramidda iti nakaro a panagbalbaliw ket insakripisioda ti dakkel masapulan a wagas ti panagbiagda tapno makastrekda iti amin-tiempo a Nakristianuan a ministerio a supsuportaran ti paset-tiempo a sekular a panggedan. Kaskasdi, kumbinsidoda a napatpateg nga amang dagiti naespirituan a gunggona ngem dagiti material a bambanag nga insakripisioda. Ket pudno a naragsakda.
Gapu iti tawenda, saan a nalaka ti panagbalbaliw kada George ken Lillian. Ti pannakiraman kadagiti Nakristianuan a gimong ken iti ministerio sapulenna ti panawen, atension, ken pisikal a panagregget. Ngem, naragsakanda iti kasta unay ta simmayaat ti salun-atda, ken maikuna a naganaygay, makapnek, ken naragsaken ti panagbiagda.
No maipapan kada George ken Isabel, ti kadakkelan a karit kadakuada isu ti panangsanay kadagiti annakda ken panangtulong kadakuada nga agturong iti dana ti biag. Kasapulan ti adu a panawen ken panagregget iti panangirubbuat kadagiti uppat nga annakda kadagiti Nakristianuan a gimong wenno panangikuyog kadakuada iti Nakristianuan a ministerio. Naminsan naliwayan da George ken Isabel dagiti pagrebbenganda kas nagannak gapu iti masansan a pakadagsenan. Ngem ti palawag iti Biblia a napauluan “Panangpabaro iti Espiritu ti Panagsakripisio” tinignayna ida a mangdoble ti panagreggetda a mangipaay ti amin a kasapulan nga atension ken tulong kadagiti uppat nga annakda tapno ‘mapadakkel ida iti disiplina ken pammagbaga ni Jehova.’ Siempre, sibabaknang a nagunggonaan ti kasta a panagregget.—Efeso 6:4.
Saan a ti napintas a buya, makaay-ayo a klima, wenno ti nanam-ay a panagbiag ti mangted ti pudno a kinaragsak kadagitoy nga indibidual ken sabsabali pay. Imbes ketdi, isu ti pannakaammo nga us-usarenda ti biagda a maitunos iti pagayatan ti Dios ken panangsalimetmet kadagiti pagalagadan ti Saona, ti Biblia. (Eclesiastes 12:13) Mainayon pay, agubbog ti pudno a kinaragsak iti pusoda bayat a pampanunotenda ti naragsak a panawen inton maisubli ti paraiso iti intero a daga.
—Lucas 23:43.
[Ladawan iti panid 25]
Kaay-ayo da George, Isabel, ken dagiti annakda ti agbasa ti Biblia
[Ladawan iti panid 26]
Pagragsakan da George ken Lillian ti Nakristianuan a ministerio
[Ladawan iti panid 27]
Tagtagiragsaken da Patrick ken Nina ti pudpudno a talna iti serbisio ni Jehova