Panaglawag kas Silsilaw iti Lubong

ITI lubong a minulitan ti moral a kinakillo ken kinalulok, dagiti pudno a Kristiano iti intero a lubong ti gubuayan ti lawag. Isuda ti silsilaw iti nasipnget a lubong. (Filipos 2:15) Rinibo ti sitatallugod a mangar-aramid iti daytoy kas payunir, wenno amin-tiempo a manangaskasaba. Nagadu kadakuada ti nabayagen iti daytoy a serbisio ken magunggonaan babaen ti pannakakitada kadagiti amin a kita ti tao a nangbalbaliw iti kabibiagda tapno agbalinda a pudno nga adalan ni Jesu-Kristo.​—Mateo 28:19.

Tapno maparegta dagiti payunir nga agtultuloy iti daytoy sagrado a serbisio ken rumang-ay ti kinasigoda a mangisuro, inorganisar dagiti Saksi ni Jehova ti Pioneer Service School. Maysa dayta a sangapulo-aldaw a naibatay-Biblia a kurso a nairanta a tumulong kadagiti payunir iti tallo a benneg: pannakipagna ken Jehova kas pasurot ni Jesu-Kristo; panangpadakkel ti panagayat kadagiti amin a kakabsat; panaglawag kas silsilaw iti lubong.

Eskuelaan ti Payunir idiay Central African Republic

Idiay Bangui, ti kabisera ti Central African Republic, 48 nga estudiante ken 2 nga instruktor ti naguummong idi Agosto 1991. Immawat dagiti estudiante kadagiti pannursuro ken praktikal a suhestion maipaay iti trabahoda. Aniat’ makapagagar unay iti dayta a klase idiay Bangui?

Maysa, 21 nga estudiante ti agbasbasa pay laeng. Nabaelanda nga inyurnos ti iskediolda tapno matagiragsakda ti agserbi kas regular pioneer. Inusarda dagiti bulbulan ti bakasion, libre a ngudo ti lawas, ken malem a mangasaba ken mangisuro.

Nabigbig dagitoy nga agtutubo ti kinapateg ti panagserbi iti Namarsuada itan. (Eclesiastes 12:1; idiligyo ti 1 Corinto 7:29.) Ket makapainteres ta 12 kadakuada ti di mamati dagiti nagannakda. Bukbukodda nga adda iti kinapudno iti pamiliada. Dua nga agtutubo a lallaki, agkabsat iti lasag, ti pinagtalaw ti amada gapu iti pammatida. Pinaggian ida dagiti ubing pay nga agassawa a kakongregasionda iti pagtaenganda.

Sabali met ti kasasaad da Michée ken Sulamithe Kaleb. Parehoda a payunir ken agbasbasada pay met, ngem Saksi ni Jehova dagiti dadakkelda. Kinapudnona, kaklaseda ni tatangda!

Nakipaset met iti eskuelaan dagiti kongregasion idiay Bangui ngem iti naiduma laeng a pamay-an. Inasikasoda dagiti material a kasapulan, kas ti taraon. Nangidonarda iti kuarta, agraman manok, asukar, bagas, ken manioc a pangpakan iti klase.

Nangbuangay dagiti kabangibang a kongregasion kadagiti grupo a mangisagana kadagiti simple ngem naimas a taraon. Agdinamag ti Central African Republic gapu iti ngunza, maysa a putahe a magustuan ti amin. Ti rekado? Bulbulong ti manioc, lana ti palma, sibuyas, nakaad-adu a bawang, peanut butter, ken anus tapno maluto a naimbag. Kada grupo adda bukodna a wagas ti panagluto iti dayta. Naballigi unay; nagustuanda amin dayta.

Naangay ti dua pay a klase iti ruar ti Bangui, maysa idiay Bouar ket ti sabali idiay Bambari, isu nga agdagup 68 ti bilang dagiti estudiante. Iti napalabas a dua a tawen, ngimmato ti bilang dagiti payunir idiay Central African Republic. Idi Enero 1992, adda 149 a regular pioneer ken 17 nga special pioneer agraman 78 nga auxiliary pioneer. Nagresulta daytoy iti irarang-ay ti trabaho iti intero a pagilian buyogen ti baro a kangatauan a bilang dagiti manangibunannag, oras, panagsarungkar, ken panagadal iti Biblia. No ad-adu ti trabahador, umadu met ti maani.​—Isaias 60:21, 22; Mateo 9:37, 38.

Agyamantayo ken Jehova a Dios gapu kadagitoy a probision ken iti naindagaan nga organisasionna gapu iti panangiyurnosna kadagitoy a klase. Makatulong dagitoy agpadpada kadagiti estudiante ken instruktor nga aglawag kas silsilaw iti daytoy nasipnget a lubong.

[Ladawan iti panid 24]

Duapulo ket maysa nga estudiante ti eskuelaan ti payunir nga agbasbasa pay laeng

[Ladawan iti panid 25]

Napagtalaw dagitoy dua nga agtutubo a lalaki gapu iti kinapudno