Kitaenyo ti Inaramid ni Jehova Maipaay Kadatayo!
“INKARKARARAGMI dayta nga okasion,” kinuna ti maysa a lalaki. Bumangon idi ti sabali pay iti tunggal alas kuatro ti parbangon tapno agkararag. Aniat’ inkarkararagna? “Tapno agkararag a maaddaankam koma iti wayawaya nga agdayaw ken Jehova a sipapanayag,” kinunana. Idi Enero 1992, idi naguummong dagiti Saksi ni Jehova idiay Ethiopia idiay Addis Ababa para iti “Dagiti Managayat iti Wayawaya” a Distrito a Kumbension, nalawag a nasungbatanen dagitoy a napakumbaba, napasnek a kararag.
Dayta a kumbension idiay Ethiopia ket maysa a pakakitaan ti panagbalbaliw dagiti bambanag a mapaspasamak idiay Africa. Kadagiti kallabes a tawen nagrag-o dagiti tattao ni Jehova kadagiti 13 a pagilian nga immawat iti legal a wayawaya a sadiay sigud a naparitan wenno napawilanda. Idiay Ethiopia, nagpatingga ti 34 a tawen nga opisial a panangiparit idi Nobiembre 11, 1991, idi impaay dagiti opisial ti gobierno ti pannakabigbig ken naaramid manen ti rehistrasion. Inyurnos a dagus dagiti Saksi ti pannakaangay ti maysa nga internasional a kumbension. Kaskasdi, kasla di nakapapati ti pannakakita iti 7,573 a tattao a naguummong idiay Addis Ababa City Stadium. Para kadagidiay kaaduan a timmabuno, kasda la kano agtagtagainep. Kinunkunada iti maysa ken maysa: “Kabsat, kitaem ti inaramid ni Jehova a Diostayo maipaay kadatayo!”—Idiligyo ti Salmo 66:1-5; 126:1.
Nangparnuay kadagiti di ninamnama a parikut ti pannakaipasidongda iti 34 a tawen a panangiparit. Saan nga ammo ti kaaduan dagiti napintas a kanta ti Pagarian. Kasanoda ngay a nasursuro a kantaen dagita sakbay ti kumbension? Uppat a pulo a kanta, agraman ti 17 a nausar iti programa ti kumbension, ti naipatarus iti Amharic a pagsasao. Kalpasanna, nabuangay dagiti espesial a koro a nangirekord kadagiti kanta iti audiocassette. Immawat ti tunggal kongregasion iti kabisera iti maysa a kopia ti tape, ket nangbusbos ti intero a kongregasion iti 30 a minutos sakbay ken kalpasan dagiti gimong nga agsanay kadagiti kanta. Ti resultana? Napno ti istadium iti naimpusuan ken naragsak a panagkanta bayat ti kumbension.
Gapu kadagiti riribuk iti makin-daya a paset ti pagilian, naserraan ti dalan nga agturong iti kabisera manipud idiay Diredawa ken Harar. Ti laeng pamay-an a mapan sadiay ket babaen ti eroplano. Gapu ta dida kabaelan ti plete iti eroplano, ngem determinadoda a tumabuno iti kumbension, napan ti walo a kakabsat idiay Harar iti maysa a base militar ket indawatda ti makilugan iti maysa nga eroplano ti militar. Iti pakasdaawanda, napatgan ti dawatda. Naipaayanda iti libre a biahe a mapan iti kumbension!
Uray la naglua gapu iti rag-o dagiti kakabsat idiay Ethiopia ta nasungbatan dagiti kararagda, yantangay tallo a dekada nga inib-ibturanda dagiti pakarigatan ken pannakaidadanes ken naimatanganda pay ti pannakapapatay dagiti gayyemda gapu iti pammatida. Kinuna ti maysa a delegado: “Nagsangsangitak manipud iti rugi ti kumbension.” Kinuna ti sabali: “No mabasayo laeng dagiti puso, makitayo no kasano karagsakko.” Wen, anian a nakaskasdaaw a banag ti inaramid ni Jehova maipaay kadagitoy a matalek a Saksi!—Salmo 66:16, 19.
Dakdakkel a Wayawaya idiay Makinlaud ken Sentral Africa
Ti Benin ket maysa pay a pagilian a sadiay nagbalinen a legal ti trabaho dagiti tattao ni Jehova itay nabiit. Kasanot’ panagrikna dagiti Saksi iti dayta? Maysa a kabsat a nagpalawag iti maysa a Nakristianuan a panaggigimong sadiay ti nangbigbig: “Pudno a maysa a sagut manipud ken Jehova ti wayawaya ti panagdayaw iti daytoy a pagilian.” Wen, nalaus ti panagyaman dagiti adipen ni Jehova sadiay gapu ta matagiragsakda itan ti di nakedngan a wayawaya nga agtitipon iti panagdayaw ken makisao kadagiti kaarrubada maipapan iti Pagarian ni Jehova—wayawaya a tagtagilag-anen ti nakaad-adu kadatayo.
Kasanoda nga ipakita ti rag-oda? Impakita ti naadaw itay a managpalawag ti maysa a pamay-an idi kinunana: “Ti pannakiramantayo iti trabaho a panangasaba—nangnangruna ti panangidanontayo iti naimbag a damag kadagiti balbalay—iyanninawna ti panangipategtayo iti daytoy a wayawaya.” Pudno daytoy idiay Benin. Kas pammaneknek, kitaenyo laengen ti bilang dagiti payunir. Bayat ti Enero 1990, ti bulan idi a naikkat ti 14-tawen a panangiparit, 77 nga agibumbunannag ti nakipaset iti regular nga amin-tiempo a serbisio. Dua a tawen kalpasanna nasurok a mamitlo ti ngimmatuan dayta a bilang, nagbalin a 244!
Di kayat a sawen daytoy a saan nga aktibo dagiti Saksi idiay Benin sakbay a naikkat ti panangiparit. Kinapudnona, dakkel ti epekto ti panagibturda iti maysa nga opisial ti militar a natudingan iti kampo a pakaipananda no kasta a maarestoda. Yantangay nangiturong iti masansan a pannakaaresto ti determinasionda nga agserbi ken Jehova, gistay isuda lattan ti patinayon a kalangenlangenna. Ngem nagserbi laeng daytoy a mangipalagip kenkuana kadagiti naragsak a pannakisarsaritana kadakuada maipapan iti Biblia kadagiti immun-una nga aldaw idi natagiragsakdan ti legal a wayawaya.
Kamaudiananna, nagkidar ti riknana nga isut’ mabisin iti naespirituan gapu iti natibker a pammatida. Napan kadagiti nagduduma a simbaan ken sekta ngem dina napennek ti bisinna. Idi laeng kalpasan a naikkat ti panangiparit idi Enero 1990 a nakasaritana a siwayawaya dagiti Saksi maipapan iti Biblia ket nabirukanna ti sungbat iti naespirituan a kasapulanna. Bautisado itan ken agserserbi kas maysa a payunir. Ti panagbalbaliwna ipalagipna kadagiti kakabsat idiay Benin daydi napasamak ken Saulo a taga Tarso: “Daydi nangidadanes kadatay idi, ita ikaskasabanan ti naimbag a damag maipapan iti pammati.”—Galacia 1:23.
Idi Disiembre 1991, nairehistro kas maysa a legal a korporasion dagiti Saksi ni Jehova idiay Niger, sabali pay a pagilian ti Makinlaud nga Africa, ket naggibus dagiti pannakaipawil iti trabahoda. Naragsak met ti reaksionda sadiay. Ipadamag ti sanga idiay Nigeria, a mangay-aywan iti Niger, ti reaksionda iti maysa a kumbension: “Kalpasan ti pannulbek a palawag iti kumbension idiay Maradi iti Biernes, naipakaammo kadagiti kakabsat nga addaantayon iti legal a pannakabigbig idiay Niger. Nalaus ti ragsakda ket nagpalpalakpakda iti sumagmamano a minutos. Iti panagngudo ti sesion, nakadekdekket dagiti kakabsat, nagririnnakepda ken nagrag-oda iti dayta a naimbag a damag.” Mailadawantayo ti buya, ket makipagrag-otayo kadakuada.
Kasanot’ panangusarto dagiti kakabsat sadiay iti baro a wayawayada? Awan panagduadua ti maysa a kabsat a babai a payunir idiay Niger no maipapan iti sungbat iti dayta a saludsod. Insuratna: “Ipakita ti kasasaad iti teritoriami ditoy Niger nga adunto ti rummuar iti Babilonia a Dakkel sakbay ti panungpalan. Kas pammaneknek iti daytoy, makairepreportak iti manipud 80 agingga iti 85 a panagsarungkar iti tunggal bulan ken mangidadauloak iti 13 wenno 14 a panagadal ti Biblia, nupay impasakon kadagiti dadduma nga agibumbunannag ti dadduma.” Innayon daytoy matalek a kabsat a babai: “Gapu kadagiti parikutko iti salun-at, diak maaramid ti amin a kayatko nga aramiden idiay tay-ak ti serbisio, ngem ar-aramiden ti tunggal maysa ti kabaelanna.”
Idiay Rwanda iti Sentral Africa, dakkel met ti namalbaliwan ti kasasaad dagiti Saksi ni Jehova. Idi Abril 1992 nairuar ti maysa a dokumento a nangpasingked a kamaudiananna maawatdan kas maysa a legal nga organisasion. Naawatda ti dokumento iti lawas ti Memorial, ket naragsakan dagiti 1,526 nga agibumbunannag a nakakita iti 6,228 a timmabuno iti dayta a pasken. Ipakitanto aya dagitoy a patpatgen a kakabsat ti rag-o ken panangapresiarda babaen ti nagaggaget a panangiwaragawagda ti naimbag a damag? Ay ket wen! Iti dayta met la a bulan ti Abril, nangbusbos dagiti agibumbunannag ti kongregasion iti promedio a 27.7 nga oras iti trabaho a panangasaba ken 17 a panagsarungkar, ket nangikonduktada iti promedio a 2.4 a panagadal ti Biblia. Ken ag-40 porsiento kadakuada ti nakipaset iti amin-tiempo a serbisio.
Nagbalinen a Legal Idiay Makin-abagatan nga Africa
Idiay makin-abagatan nga Africa, simmiplag ti nalamiis a pul-oy ti wayawaya iti dua a napintas a daga, ti Mozambique ken Angola. Idiay Mozambique naipaay ti legal a pannakabigbig idi Pebrero 1991. Bayat a timmalna ti kasasaad sadiay, nangibaon ti Watch Tower Bible and Tract Society kadagiti misionero iti dayta a pagilian, a dinadael ti guerra sibil. Nakasarak dagiti misionero iti nadam-eg a daga. Dakkel ti pakasapulan kadagiti literatura ti Biblia—nangruna ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo. Ipadamag ti maysa a misionera nga isut’ nakaipaima iti 50 a libro iti las-ud ti kurang a dua ket kagudua nga oras.
Dagus a mangipangag dagiti interesado a tao. Sinarungkaran ti maysa a misionero ti maysa a direksion nga inted ti Sosiedad, ket maysa a kameng ti militar ti nadanonna. Nasayaat ti pannakisaritana kenkuana ken ti dua a kabagianna. Idi nagsubli, naballigi manen ti pannakisaritana iti lalaki ken iti lima pay a kaduana. Kalpasanna, pinatganda ti awis a tumabuno iti palawag publiko ken Panagadal ti Pagwanawanan—amin dayta iti las-ud ti uppat nga aldaw.
Idiay Angola, tinagiragsak dagiti Saksi ti dumakdakkel a wayawaya a nagngudo iti panagbalin a legal ti trabahoda idi Abril 1992. Kasanoda nga us-usaren ti dakdakkel a wayawayada? Makipaspasetda iti tay-ak ti serbisio! Adda agarup 17,000 nga agibumbunannag idiay Angola, ket mangidadaulo dagita nga agibumbunannag iti agarup 60,000 a panagadal ti Biblia. Mainanama la ketdi ti masanguanan nga irarang-ay!
Makipaset dagiti Agtutubo iti Panangasaba
Kadagitoy a pagilian a nabiit pay a nagbalin a legal ti trabaho a panangasaba, ipakpakita uray dagiti agtutubo ken di pay nabautisaran ti panangapresiarda babaen ti pannakipasetda iti ministerio. Idiay Cape Verde Republic, a sadiay nabigbig a legal dagiti Saksi ni Jehova idi Nobiembre 1990, iti maysa a kumbension timmakder ti maysa a 17-tawenna a balasang tapno ipaduyakyakna iti publiko ti pammatina. Kalpasan ti bautismo, nakita ti maysa a sangaili nga isut’ inaribungbonganda. Napanna kinablaawan ti agtutubo a babai ket dinamagda no asino dagitoy immaribungbong kenkuana. “Ay,” insungbatna, “isu dagitoy dagiti iyad-adalak ti Biblia.” Pito ti iyad-adalanna, ket addada sadiay tapno kablaawanda iti panagbautisarna. Isut’ nagaplikaren kas maysa nga auxiliary pioneer ken ninamnamana ti agbalinto a maysa a regular pioneer.
Napagsaludsodan ti maysa a sangapulot’-tawenna a balasitang idiay Angola no isut’ maysa nga agibumbunannag. Insungbatna: “Wen.” Adda kadi iyad-adalanna ti Biblia? “Siempre.” Manoda ngay? “Pito,” insungbat daytoy a sangapulot’-tawenna nga ubing.
Mabasatayo iti libro ti Aramid nga iti naminsan idi umuna a siglo, “ti kongregasion naaddaan ti talna idi iti isuamin a Judea ken Galilea ken Samaria, ket napabilegda; ket bayat a nagnagna iti panagbuteng ken ni Jehova ken iti panangliwliwa ti nasantuan nga espiritu nagtultuloy nga immadu.” (Aramid 9:31) Idawdawattayo nga agari met koma ti talna agpaay kadagiti kakabsattayo idiay Africa. Makipagrag-otayo kadakuada bayat a bumilbilegda, ken ikararagtayo a maadda koma kadakuada ti espiritu ni Jehova bayat nga aprobetsarenda ti wayawayada a mangisaknap iti naimbag a damag ken agtultuloyda nga umadu.
[Mapa iti panid 24]
(Para iti aktual a pannakaurnosna, kitaem ti publikasion)
Dagiti Pagilian a Sadiay Nabigbigen a Legal dagiti Saksi ni Jehova wenno Naikkaten dagiti Panangipawil Kadakuada
1. Ti Gambia, Disiembre 1989
2. Benin, Enero 1990
3. Cape Verde Republic,Nobiembre 1990
4. Mozambique, Pebrero 1991
5. Ghana, Nobiembre 1991
6. Ethiopia, Nobiembre 1991
7. Congo, Nobiembre 1991
8. Niger, Disiembre 1991
9. Togo, Disiembre 1991
10. Chad, Enero 1992
11. Kenya, Marso 1992
12. Angola, Abril 1992
13. Rwanda, Abril 1992
[Ladawan iti panid 23]
Idiay Benin ikomkompas ti maysa nga agibumbunannag ti Pagarian dagiti sasao ti Mateo 24:14 iti tamborna
[Ladawan iti panid 25]
Iti adu a pagilian ti Africa, us-usaren a naimbag dagiti pudno a Kristiano ti baro a wayawayada
[Ladawan iti panid 26]
Isimbolo dagiti kabbaro a Saksi ti dedikasionda ken Jehova babaen ti bautismo iti danum