“Kasla Leon a Ngumerngernger”
MAMATIKAYO kadi nga adda Satanas? Itatta, adu ti di mamati. Kasla matmatanda dayta a pammati kas “di sientipiko.” Uray idi 1911, kinuna ti Encyclopædia Britannica: “Adun ti nailawlawag dagiti sientista maipapan iti makinruar a kababalin ken makin-uneg a biag ti tao ket awan natakuatanda a Sataniko nga impluensia.” Ikalintegan dagiti teologo a ni Satanas ket maysa laeng a simbolo, wenno parparbo. Kunaen ti The World Book Encyclopedia: “Ibilang ti adu a moderno a teologo a ti Diablo ket maysa a simbolo ti pannakabalin ti kinadakes, dagiti kadaksan a kababalin ti tao.”
Ngem, ania dagiti kinapudno? No mamatikayo iti Biblia, masapul a mamatikayo nga agpayso ni Satanas. Saan laeng a pinati ni Jesus nga adda ni Satanas no di ket inawaganna pay ketdi a “ti prinsipe ti lubong.” (Juan 14:30) Inawagan ni apostol Pablo ni Satanas a “dios daytoy sistema dagiti bambanag.” (2 Corinto 4:4) Ket kinuna ni lakayen nga apostol Juan: “Ti isuamin a lubong adda iti pannakabalin ti managdakdakes.”—1 Juan 5:19.
No dikay umanamong ken ni Juan, panunotenyo dagiti kallabes a pasamak. Usigenyo dagiti death squad ken ti panangusar dagiti gobierno iti tuok. Lagipenyo dagiti gubat ken dagiti genocide a napasamak iti panawentayo. Ket dagiti met ngay nakaam-ames a krimen a naipadpadamag kadagiti pagiwarnaktayo—dagiti nadawel a panangpapatay, panangrames, agsasaruno a panangpapatay, seksual a panangabuso kadagiti ubbing, ken adu pay? Saan kadi nga awanen ti sabali pay a dios daytoy a lubong no di ni Satanas?
Imballaag ni Kristiano nga apostol Pedro: “Agsalukagkayo. Ti Diablo a kabusoryo, kasla leon a ngumerngernger, magmagna iti sibayyo nga agsapsapul iti alun-unenna.” (1 Pedro 5:8) No adda leon nga agdakdakiwas iti sangakaarrubaanyo, pagsasaritaanyo pay laeng kadi no pudno nga adda wenno awan? Wenno aglemmengkay ketdi?
Agpayso nga adda ni Satanas. Isut’ naulpit ken narungsot, ken napigpigsa ngem datayo. Isu nga agkamangkayo iti Daydiay napigpigsa pay tapno masalaknibankayo. “Ti nagan ni Jehova nabileg a sarikedked. Ti nalinteg agkamang kenkuana ket maisalakan.” (Proverbio 18:10) Agkamangkayo ken ni Jehova a Dios, ket ammuenyo a din agbayag maluk-atanton ti sangatauan manipud iti impluensia dayta a managdakdakes, ni Satanas. Anian a pannakabang-arto dayta!—Apocalipsis 20:1-3.