Report Dagiti Manangiwaragawag ti Pagarian
Naespirituan a Pannakaluk-at Idiay Colombia
ADDAAN ti Katolisismo iti napigsa a narelihiusuan nga impluensia idiay Sud America nanipud idi tiempo dagiti konkistador a Kastila. Idiay Colombia, dayta ti nabayagen nga opisial a relihion ti Estado. Iti napalabas a 105 a tawen, addaan ti Vaticano ken ti gobierno ti Colombia iti katulagan a nangsalaknib iti simbaan ken nangipaay kadagiti espesial a gundaway iti tay-ak ti edukasion ken panagasawa.
Idi Disiembre 1990 nangpili dagiti umili ti Colombia ti maysa a komision a nangputar iti baro a konstitusion, a nairingpas idi ngalay ti 1991. Baliwan ti baro a konstitusion ti relihiuso a kasasaad idiay Colombia. Addaanen ti amin a relihion iti agpapada a kalintegan iti imatang ti linteg, ket saan a maipilit dagiti relihiuso nga instruksion kadagiti ubbing kadagiti publiko a pagadalan. Naikeddeng a marebisar ti katulagan iti Vaticano tapno maipatungpal dagitoy a konstitusional a panagbalbaliw.
Pakapsuten daytoy dakdakkel a relihiuso a wayawaya ti impluensia ti Iglesia Katolika, isu a nalaklakan para kadagiti nasingpet-panagpuspusona a tattao ti gumun-od ti pannakaammo iti Biblia ken naespirituan a wayawaya.
Iti pananginanama itoy naespirituan a pannakaluk-at, isagsaganan dagiti 51,000 a Saksi ni Jehova iti dayta a pagilian ti pannakaaywan dagiti naespirituan a refugees (tattao a nagkamang). Ngannganin mairingpas ti baro a complex ti sangada nga addaan kadagiti napalawa a pasilidad, agraman high-speed full-color offset press. Naibaonen dagiti temporario nga espesial payunir kadagiti babbabassit nga ili tapno sapulenda dagiti napukaw a karnero ni Jehova ket nakaskasdaaw ti nagapuananda iti trabaho a panangisuro iti Biblia. Iti 63 nga ili, a tunggal maysa addaan iti agarup 10,000 nga agnaed, 47 a baro a kongregasion ken grupo ti nabuangayen.
Bayat nga itultuloy ti espiritu ni Jehova a tignayen dagiti nasingpet-panagpuspusona a tattao, adu nga agtutubo ti mangipangpangag met. Napaneknekan a makatulong unay ti publikasion a Dagiti Saludsod nga Iyimtuod ti Agtutubo—Dagiti Sungbat nga Epektibo agpadpada kadagita nga agtutubo ken dagiti dadakkelda. Bayat a mangaskasaba iti balbalay, nasarakan ti maysa a Saksi ti maysa a lalaki a nakabasan iti sumagmamano a paset daytoy a libro, ngamin isut’ pinabulodan ti kaarrubana iti maysa a kopia dayta. Isut’ naawis iti praktikal a sirib nga imparangarang dayta iti panangsalsaysay kadagiti parikut ti pamilia. Ti Kapitulo 4, “Apay a Nagsina da Tatang ken Nanang?” ti kangrunaan a nangawis kenkuana, ngamin pangpanggependa idi ken baketna ti agsina. Kinunana nga isut’ inispal ti libro manipud iti dakkel a didigra. Isu ken ti pamiliana ti makiad-adal itan iti Biblia kadagiti Saksi ni Jehova ken tumabtabunodan kadagiti gimong iti kongregasion. Nalaus ti panagyamanda gapu iti praktikal a sirib nga ipapaay ni Jehova babaen ti Biblia ken ti organisasionna.
Ipakita daytoy a kapadasan ti naespirituan a pannakaluk-at a mapaspasamak idiay Colombia bayat a tultulongan dagiti Saksi ni Jehova dagiti mabisin a mangammo kadagiti nakaskasdaaw a panggep ni Jehova ken ti baro a lubongna, nga asidegen.—2 Pedro 3:13.