Panangdanon Kadagiti “Isuamin a Kita Dagiti Tao” Idiay Belgium

IMPALAGIP ni apostol Pablo kadagiti padana a napulotan a Kristiano a pagayatan ti Dios nga “isuamin a kita dagiti tao maisalakanda koma ken dumtengda iti umiso a pannakaammo ti kinapudno.” Gapu itoy, nasken nga ikararagda a maikkanda koma ti “natalna ken naulimek a panagbiag” tapno maikasabada ti naimbag a damag ti Pagarian kadagiti amin a dumngeg.​—1 Timoteo 2:1-4.

Itatta, naisangsangayan ti kaipapanan ti panangdanon kadagiti “isuamin a kita dagiti tao” kadagiti Saksi ni Jehova idiay Belgium. Nanipud panagpatingga ti Gubat Sangalubongan II, dakkel ti namalbaliwan ti etniko ken kultural a kasasaad iti daytoy bassit a pagilian, a malaon ti Lake Tanganyika wenno kagudua ti Lake Michigan. Malaksid kadagiti tallo a tradisional a komunidad sadiay​—Flamenco (Olandes), Pranses, ken Aleman​—masarakan itan idiay Belgium dagiti komunidad a naggapu iti nagduduma a pagsasao ken kultura. Adda dagiti Arabo, Turko, Indian, Insik, Filipino, Africano, ken Americano, ken dadduma pay. Mapattapatta a 1 iti tunggal 10 a tao idiay Belgium ti naggapu iti sabali a nasion.

Gapuna, naipasango dagiti Saksi idiay Belgium, kas kadagiti padada a Kristiano iti intero a lubong, iti karit ti panangidanon ti naimbag a damag kadagiti “isuamin a kita dagiti tao.” Kasano ti panangasabada iti nagduduma a kita dagiti tao? Kasano ti pannakisaoda kadagiti tao nga addaan iti naan-anay a naiduma a kultura ken relihion? Ken aniat’ tignay dagiti tao iti mensahe ti Biblia?

Ti Panagregget Nasayaat ti Ibungana

Makaparagsak ken makapagagar a kapadasan ti panangisarita ti naimbag a damag ti Pagarian kadagiti “isuamin a kita dagiti tao.” Masarakan dagiti tattao a naggapu iti amin a kontinente kadagiti naarimbangaw a lansangan, paglakuan, pagluganan, ken balbalay. Babaen ti bassit a panagregget, nalaka la a makairugi ti agibumbunannag ti Pagarian iti panagsasarita, ket masansan a nasayaat ti ibunga daytoy.

Iti maysa a pagsardengan ti bus, nakasarita ti maysa a Saksi ti maysa nga Africana babaen laeng ti nabara nga isem. Naragsakan ti babai a nakangngeg maipapan iti Pagarian ti Dios, ket kayatna pay ti makasursuro ti ad-adu maipapan iti Biblia. Nangala ti magasin a Pagwanawanan ken Agriingkayo! ken intedna ti adresna iti Saksi. Idi imbaga ti Saksi a sarungkaranna iti mabiit, nagkedked ti babai. “Saan! Saan! Pagtulaganta ti aldaw tapno madanonnak inton umayka idiay balay.”

Tallo nga aldaw kalpasanna, idi mapan koman sumarungkar ti Saksi, naduktalanna a napukawna ti adres ti babai. Ngem gapu ta malagipna ti nagan ti kalye, napan latta ket nagdamdamag iti tunggal balay bareng no mabirukanna ti Africana. Nakadanon agingga iti ungto ti kalye ngem saanna a nabirukan ti sapsapulenna. Anian a pannakadismayana! Pumanawen idi pagammuan la a nagparang ti babai a sapsapulenna a sitatakder iti sangona, ket apag-isu a daydi nga oras ti nagtulaganda! Nairugi ti panagadal ti Biblia iti pagtaengan.

Dagiti ngay met nagduduma a kustombre, pammati, ken tradision? Kas pangarigan, dagiti pammati ti Hindu? Ay ket, nalagip ti maysa a payunir ti nabasana iti libro a Panakirinnason Manipud kadagiti Kasuratan. Kuna ti libro: “Imbes a risutenyo dagiti komplikado a pilosopia ti Hindu, idatagyo dagiti makapnek a kinapudno a masarakan idiay Nasantuan a Biblia. . . . Dagiti nabatad a kinapudno a masarakan iti Saona danonenna ti puso dagidiay mabisin ken mawaw iti kinalinteg.”

Kasta nga agpayso ti inaramid ti payunir idi nasarakanna ni Kashi, maysa a babai a taga India a nangakseptar iti panagadal ti Biblia. Nasayaat ti irarang-ay ni Kashi, ket di nagbayag iranranudnan kadagiti amin a gagayyemna dagiti maad-adalna. Maysa nga aldaw, nakasarita ti payunir ti asawa ti maysa nga embahador: “Sika kadi ti mangisursuro ti Biblia ken Kashi?” Naklaat ti payunir idi kinuna ti babai: “Naglaing a mangisuro! Nakumbinsirnak iti adu a punto. Rabakem, maysa a Hindu, ngem isursurona ti Biblia kaniak, a maysa a Katoliko!”

No makasarakkayo kadagiti Filipino, maammuanyo a dagus a kaaduan kadakuada ti mangipatpateg iti Biblia. Nadayaw ken manangpasangbayda, ket nakalaklaka ti mangirugi ti panagsasarita kadakuada. Dagus nga innala ti maysa a Filipina ti dua a magasin, ngem gapu ta maysa a Katoliko, imbasurana. Sumagmamano a lawas kalpasanna, immawat manen ti dua a magasin, nga inkabilna iti bagna. Maysa a rabii, kayatna ti agbasa. Nangsapul ti basaenna ket dagiti magasin ti nakitana. Nupay saan nga interesado, binasana latta, ket nariing ti interesna. Di nagbayag kalpasanna, adda maysa a Saksi a simmarungkar iti pagtaenganna, ket nagdamdamag ti babai iti adu a saludsod. Daytoy ti kaunaan pay laeng a panangidiligna kadagiti pammati ti Katoliko iti ibagbaga ti Biblia. Ti lohikal, Nainkasuratan a panangilawlawag ti nangkumbinsir kenkuana a nabirukanna met laengen ti kinapudno.

“Ipalladawmo ta Tinapaymo”

Adu kadagiti ganggannaet ti adda idiay Belgium gapu iti negosioda wenno tapno agtrabaho iti maysa kadagiti 150 nga embahada wenno iti European Community Commission. Kaaduan kadakuada ti agtaeng sadiay iti sumagmamano laeng a tawen. Ti panangasaba ken panangiyadal ti Biblia kadakuada ket kasla saan a nabunga iti damo. Ngem ipalagip kadatayo ti Biblia: “Ipalladawmo ta tinapaymo iti rabaw dagiti dandanum, ta isu masarakamto iti kalpasan dagiti adu nga al-aldaw.” (Eclesiastes 11:1) Masansan a nasayaat dagiti resultana.

Pudno daytoy iti maysa nga Americana a regular nga umaw-awat ti magasin iti maysa a Saksi. Idi agangay, impakita ti Saksi ti pagsayaatan ti panagadal ti Biblia a regular, ken intukonna kenkuana ti maysa a panagadal. Inawat ti babai ti tukon ket napardas a rimmang-ay. Di nagbayag nakitana ti naggidiatan ti pudno a relihion ken ti ulbod. Isu nga inikkatna amin nga imahen iti balayna. Dimteng ti tiempo nga agsublin idiay Estados Unidos. Kaipapanan kadi dayta ti panagpatingga ti naespirituan nga irarang-ayna? Darepdepenyo ti rag-o ken pannakaklaat ti Saksi idi nakaawat iti awag manipud iti maysa a Saksi idiay Estados Unidos a mangipakpakaammo kenkuana nga intuloy ti babai ti panagadalna, indedikarna ti biagna ken Jehova a Dios, ken nagbautisaren! Kinapudnona, agserserbin kas maysa nga auxiliary payunir a ministro.

Pudno met dayta ken ni Kashi, daydiay babai a taga India, ken iti daydiay Filipina a nakadamat itay. Idi nagsubli ni Kashi idiay India, intuloyda ken lakayna ti panagadalda ti Biblia. Idi agangay agpada nga indedikarda ti bagida ken Jehova ken nakiramanda metten iti trabaho a panangasaba. Yantangay awan sabali a Saksi iti lugarda, indiayada ti pagtaenganda para iti Panagadal ti Libro iti Kongregasion. Nagserbi ni Kashi kas maysa nga auxiliary payunir sigun iti ipalubos ti salun-atna, ket innem a panagadal ti Biblia iti pagtaengan ti ikonkonduktana, a pakairamanan ti 31 a tao amin. Umarngi iti dayta, immakar ti Filipina idiay Estados Unidos, rimmang-ay agingga a nagdedikar ken nagbautisar, ket nagbalin a regular payunir. Kakasta a naragsak a resulta ti tagtagiragsaken dagiti agibumbunannag ti Pagarian idiay Belgium bayat nga itultuloyda ti mangasaba kadagiti tattao iti teritoriada.

Ti Karit dagiti Pagsasao

Tapno mairingpas ti trabaho a panangasaba kadagiti “isuamin a kita dagiti tao,” nasken nga addaan ti sanga nga opisina kadagiti literatura ti Biblia a magun-odan iti nasurok a sangagasut a pagsasao. Adda itan dagiti kongregasion idiay Belgium iti sangapulo a pagsasao. Kadagiti 341 a kongregasion, 61 ti mangus-usar ti sabali a pagsasao, ket kadagiti 26,000 nga agibumbunannag ti Pagarian, 5,000 ti naggapu iti nagduduma a nasion. Maysa a kongregasion ti buklen dagiti lallaki ken babbai a naggapu iti 25 a nagduduma a pagilian. Darepdepenyo ti panaglalaok dagiti nagduduma a nasionalidad, kultura ken rasa no kasta nga aggigimongda! Kaskasdi ti ayat ken panagkaykaysa dagiti agkakabsat ket nabileg a pammaneknek iti pudno a Nakristianuan a kinadisipulo.​—Juan 13:34, 35.

Yantangay nagadu dagiti agnaed idiay Belgium a masapul a makangngeg iti naimbag a damag iti ganggannaet a pagsasao, inawat dagiti dadduma nga agibumbunannag ti karit ti panagadal kadagiti narigat a pagsasao, kas ti Turko, Arabe, ken Insik. Sibabaknang a nagunggonaan dagiti panagreggetda.

Dagidiay agtartrabaho iti komunidad dagiti Arabo masansan a mariingda ti interes iti Biblia babaen ti panangitampok iti praktikal a pateg daytoy. Nasayaat ti pannakisarita ti maysa nga agibumbunannag ti Pagarian iti maysa a propesor nga Arabo, ket kalpasan ti tallo a tawen saannan a nasarakan ti propesor. Gapu ta saan a nalaka a maupay, nangibati ti agibumbunannag ti sumagmamano a saludsod a mainaig iti Biblia para iti propesor. Daytoy ti nangtignay kenkuana a nangsukimat iti Biblia. Nasdaaw iti kasta unay iti naammuanna ta nangilasinda ken baketna, nga agpada a Muslim, kadagiti rabii a panangbasada ti Biblia.

Malaksid iti pagsasao, adda sabali pay a lapped a nasken a sarangten dagidiay tumultulong kadagiti adu nga Insik nga agnanaed kadagiti kangrunaan a siudad. Kaaduan nga Insik ti di mamati iti Dios kas Namarsua wenno iti Biblia kas Sao ti Dios. Kaskasdi, managusiusoda ken kayatda a maammuan no ania ti ibagbaga dayta. Kaay-ayoda met ti agbasa. Gagangay a maungpotda a basaen ti aniaman a literatura ti Biblia a naibati kadakuada, wenno uray pay adu a paset ti Biblia, iti las-ud laeng ti sumagmamano nga aldaw. No nalinteg ti panagpuspusoda, matignayda babaen ti bileg ti Sao ti Dios.

Maysa a babai nga Insik ti di mamati iti Namarsua. Ngem bayat ti maikadua a panagadal, nagarubos ti lua kadagiti matana idi kinunana: “Mamatiak itan ken Jehova a Dios, ta no naisurat ti Biblia iti las-ud ti nasurok a 1,600 a tawen babaen ti 40 a sabasabali a lallaki ket kaskasdi a naan-anay nga agtutunos ti temana, ngarud ni Jehova a Dios la ketdi ti nangiwanwan iti pannakaisuratna. Lohikal unay dayta!”

Sabali pay a babai nga Insik ti inasitgan ti maysa a Saksi iti tram. “Kristianoka kadi?” sinaludsodna ti Saksi. Kalpasanna imbagana a napalalo ti pannakaupayna gapu ta agsisimparat ti ibagbaga dagiti agkunkuna a Kristiano. Kinanunongan ti Saksi ti imbagana ngem inlawlawagna a saan a supiaten ti Biblia ti sasawenna. Rumuar idin ti babai iti tram. Intedna ti adresna iti Saksi, ket idi sinarungkaranna, kinuna ti babai: “No ammok laeng, idi pay koma napan a tawen a nagluganak iti tram!” Idi dinamag ti Saksi no ania ti kayatna a sawen, inlawlawag ti babai: “Isu daydi ti damo a panagluganko iti tram nga agturong iti unibersidad. Agasem! Maysa a tawen ti sinayangko!” Nalaus ti ragsakna a makaadal ti Biblia uray iti sumagmamano laeng a bulan sakbay nga agsubli idiay China.

Dagiti kapadasan a kas dagitoy lineksionanda dagiti Saksi idiay Belgium: “Iti bigat imulam ti bin-im ket iti rumabii dika pagsardengen ta imam,” kunaen ti Biblia, “ta dika ammo nga agrang-ayto, no daytoy wenno daydiay, wenno isuda nga agpadpada naimbagdanto.” (Eclesiastes 11:6) Nasayaat ti imbunga dagiti panagreggetda a nangparmek kadagiti lapped ti pagsasao, kustombre, ken tradision. Kangrunaan iti amin, ti makaparagsak a tignay dagiti tao paneknekanna a ti Dios ket pudno a “saan a mangidumduma, no di ket iti uray ania a nasion dagiti agbuteng kenkuana ken agaramid iti kinalinteg makaay-ayo kenkuana.”​—Aramid 10:34, 35.