Dagiti Tulong Iyanninawda ti Nakristianuan nga Ayat
“AYATENYO ti intero a timpuyog dagiti kakabsat,” indagadag ni apostol Pedro kadagiti padana a Kristiano. (1 Pedro 2:17) Ballasiwen ti kasta nga ayat dagiti pagbeddengan iti rasa, kagimongan, ken ili, a pagkaykaysaenna dagiti tattao iti pudno a panagkakabsat. Idi rimsua ti material a panagkasapulan kadagiti immuna a Kristiano, ti ayat ti nanggutugot kadagiti adu a mangiyeg iti tulong kadagiti apostol tapno maibunong kadagidiay agkasapulan. Kunaen ti rekord nga “isuamin dagiti sanikua kukuada amin.”—Aramid 2:41-45; 4:32.
Naiparangarang ti kasta nga ayat idi kiniddaw ti Bagi a Manarawidwid dagiti Saksi ni Jehova, idi ngudo ti 1991, iti sumagmamano a sanga ti Watch Tower Society idiay Makinlaud nga Europa a mangipatulod kadagiti taraon ken pagan-anay agpaay kadagiti agkasapulan a kakabsatda idiay Makindaya nga Europa, agraman idiay deppaar ti dati nga Union Soviet. Adtoy ti agsasaruno a report manipud iti sumagmamano a sanga.
Sweden
Idi Disiembre 5, 1991, naipatulod kadagiti amin a 348 a kongregasion idiay Sweden ti maysa a surat a mangilawlawag iti pakasapulan. Nasungbatan a dagus. Iti uneg ti sumagmamano nga aldaw, nagpa-St. Petersburg, Russia, ti maysa a trak a nakargaan iti 15 a tonelada nga arina, mantika, de lata a karne ti baka, polbo a gatas, ken dadduma pay nga umasping a bambanag. Diniskarga dagiti lokal a Saksi ni Jehova ti trak ket imbunongda a dagus ti 750 a balkot kadagidiay agkasapulan. Iti saan a nabayag, dua pay a trak ti nangisangpet iti taraon idiay Russia. Nasurok a 51.5 a tonelada amin ti naggapu idiay Sweden.
Uray la agsobsobra dagiti lupot ken sapatos nga indonar dagiti naparabur a kakabsat. Nabiit a napno dagiti Kingdom Hall kadagiti binumbuntoon a nabalkot a lupot. Adu a Kristiano ti nangidonar kadagiti mismo a kawesda. Gimmatang dagiti dadduma kadagiti baro. Gimmatang ti maysa a kabsat a lalaki iti lima a terno. Idi naammuan ti nasdaaw nga agay-aywan iti tiendaan no pagpaayan dagitoy, nangidonar iti lima pay a terno. Gimmatang ti sabali pay a kabsat a lalaki iti sangakahon a medias, guantis, ken bopanda. Idi inlawlawagna ti panggepna, indiaya kenkuana ti akinkukua iti tiendaan ti 30 a baro a terno ket dua laeng ti pinabayadanna. Nangidonar ti maysa nga agay-aywan iti tiendaan ti aruaten iti isport iti 100 a paris ti baro a sapatos ken boots.
Kalpasanna naipan dagitoy a pagan-anay iti sanga tapno mapaglalasin, mabungon, ken maikarga. Nalawat’ nakaipempenan dagiti lupot a katupag ti malaon ti 40 a trak! Adu a lawas ti binusbos dagiti kakabsat a lallaki ken babbai a namaglalasin kadagiti para lallaki, babbai, ken ubbing ken nangikahon kadagitoy. Sangapulo ket lima a nagduduma a trak ti nangitulod a sitatalged kadagitoy a lupot idiay Russia, Ukraine, ken Estonia.
Kinuna ti maysa a kabsat a lalaki a naminwalo a nangimaneho kadagiti trak ti Sosiedad idiay dati nga Union Soviet: “Nagsayaat ti panangawat kadakami dagiti kakabsattayo kadagiti lugar a nangitulodanmi. Inarakup ken inagekandakami, ket nupay agkurangda kadagiti sanikua, inikkandakami iti nasayaat a leksion iti Nakristianuan a kinamanagparabur.”
Finlandia
Iti laksid ti nakaro a panagsuek ti ekonomia, nasaknap a kinaawan panggedan, ken kinarigat ti biag idiay Finlandia, sidadaan latta dagiti agarup 18,000 a kakabsat idiay Finlandia a tumulong kadagiti kakabsatda idiay dati nga Union Soviet. Nangipatulodda iti 4,850 a kahon ti taraon nga agdagsen iti 58 a tonelada idiay St. Petersburg, Estonia, Latvia, Lithuania, ken Kaliningrad. Kinargaanda met dagiti awan naggianna a trak iti 12 kubiko metro a lupot. Nangidonar met ti dadduma iti 25 a segunda mano a kotse ken van a mausar iti trabaho ti Pagarian.
Dadduma kadagiti kinahon a taraon ti nakadanon iti maysa a kongregasion a buklen ti 14 nga agibumbunannag ti Slanti idiay deppaar ti St. Petersburg. Inyebkasda ti nalaus a panagyamanda iti maysa a surat. “Adda sangapulo a kakabsat a babbaket iti kongregasionmi. Adu kadakami ti masakit unay ket dimi kabaelan ti makilinia iti napaut a mangala iti taraon. Nupay kasta, dinakam inupay ti nailangitan nga Amatayo kadagitoy narikut a panawen no di ket pinunnona ti pusomi iti rag-o. Mangidadaulokami iti 43 a panagadal ti Biblia iti pagtaengan.” Idi naawat ti maysa a kabsat a babai idiay St. Petersburg ti nabungon a taraonna, nasagid ti riknana nga uray la nagsangsangit iti dua nga oras sakbay a linuktanna dayta.
Denmark
Iti daytoy bassit a pagilian a matupar ti Baltic Sea, naguummong ti agarup 16,000 a Saksi ni Jehova ket nangipatulodda idiay Ukraine iti 19 a trak a naglaon iti 4,200 a kahon ti taraon nga agdagsen iti 64 a tonelada; 4,600 a kahon ti de kalidad a pagan-anay; ken 2,269 a paris ti baro a sapatos. Impausar ti maysa a kabsat a lalaki idiay Alemania ti lima a trakna iti sanga, sana indonar dagita kadagiti kakabsat idiay Ukraine. Iti panagawidda, kinuna ti maysa kadagiti drayber: “Ad-adu ti inyawidmi ngem ti intulodmi. Pinatibker la unay ti ayat ken espiritu ti panagsakripisio nga impakita dagiti kakabsattayo idiay Ukraine ti pammatimi.”
Masapul nga agsiput dagiti drayber iti dalanda nga agturong idiay dati nga Union Soviet gapu ta adda no kua dagiti mangtambang. Sumagmamano nga aldaw kasakbayan ti ilalabas ti maysa kadagiti trak a naggapu idiay Denmark, adda napasamak a panagtambang iti dayta a dalan. Pinasardeng dagiti tulisan a nakahelikopter ken naka-submachine gun ti kumboy ti lima a trak a naglaon kadagiti taraon a naggapu iti sabali a relief organization. Intarayda ti lima a trak, ket binay-anda dagiti drayber iti igid ti kalsada. Iti laksid ti kasta a peggad, sitatalged a nakadanon kadagiti kakabsat amin nga abasto a naggapu iti sanga ti Denmark. Kas panangsubalit, impaw-itda iti maysa a drayber ti sumaganad a balikas, nga inkarigatanda nga insurat iti Ingles: “Patgenmi a kakabsat dita Denmark: Naawatmi ti tulongyo. Ni Jehova ti mangsupapak kadakayo.”
Netherlands
Nangipatulod ti sanga ti Netherlands iti 2,600 a nabungon a taraon nga agdagsen iti 52 a tonelada. Dua a kumboy ti innem a trak ti nangitulod kadagitoy idiay Ukraine. Imbatida dagiti trak, ta dagitoy ket indonar dagiti kakabsat idiay Alemania para iti trabaho ti Pagarian idiay Dumaya. Impan dagiti kakabsat idiay Ukraine ti kaaduan a taraon sadi Moscow, Siberia, ken dadduma pay a lugar a dakkel ti pakasapulan. Mainayon pay, 736 kubiko metro a lupot ken sapatos ti indonar dagiti kakabsat nga Olandes. Naipan dagitoy idiay Lviv sadi Ukraine, babaen ti kumboy ti 11 a trak a binayabayan ti pribado a kotse.
Kalpasan ti nawatiwat a panagbiahe idiay Alemania ken Polandia, limmasat ti kumboy kadagiti aduana idiay Ukraine a di narigatan, ket nakadanon iti pingir ti Lviv iti alas 3:00 t.b. Ipadamag dagiti drayber: “Iti saan a nabayag, simmangpet ti 140 a kakabsat a lallaki a mangdiskarga kadagiti trak. Sakbay nga inrugida ti trabaho, impakita dagitoy napakumbaba a kakabsat ti panagtalekda ken Jehova babaen ti panagkararag a sangsangkamaysa. Idi naiwakasen ti trabaho, naguummongda manen tapno agyaman ken Jehova. Kalpasan ti panangtagiragsakmi iti kinamanagpasangbay dagiti lokal a kakabsat, a sibubuslon a nangipaay ti adda kadakuada, kinuyogdakami agingga iti kangrunaan a kalsada. Nakipagkararagkami kadakuada iti igid ti kalsada sakbay a pinanawandakami.
“Bayat ti nawatiwat a panagbiahemi nga agawid, nakaad-adu ti malagipmi—ti kinamanagpasangbay dagiti kakabsat idiay Alemania ken Polandia, ken dagiti kakabsattayo idiay Lviv; ti natibker a pammati ken kinamanagkararagda; ti sibubulos a panangpadagus ken panangipaayda iti taraon nupay agkasapulanda a mismo; ti panagkaykaysa ken kinasingedda; ken ti kinamanagyamanda. Malagipmi met dagiti kakabsat a lallaki ken babbai a kailianmi, a sipaparabur a timmulong.”
Switzerland
Irugi ti sanga ti Switzerland ti reportna babaen ti panangadaw iti Santiago 2:15, 16: “No ti maysa a kabsat a lalaki wenno babai adda a lamolamo ken awan taraonna nga inaldaw, ket ti maysa kadakayo kunaennanto: ‘Inkayo a sitatalna, aginudo ken agbussogkayo,’ ngem dikayto ited kadakuada dagiti masapul a maipaay iti bagi, ania ti magunggonada?” Kalpasanna kunaen ti report: “Nalagipmi daytoy a Kasuratan idi kiniddaw kadakami ti Bagi a Manarawidwid dagiti Saksi ni Jehova a mangiburay iti material a tulong kadagiti agkasapulan a kakabsattayo.
“Naggunay a dagus ti tunggal maysa! Iti las-ud laeng ti dua nga aldaw, naipatulod idiay Ukraine ti 600 a balkot ti taraon nga agdagsen iti 12 a tonelada babaen ti tallo a trak a naggapu idiay Alemania, a naidonar para iti trabaho sadiay. Nalaus ti ragsak dagiti kakabsattayo ditoy idi nadamagda a nakadanon a sitatalged dagiti amin a bambanag. Kabayatanna, nangur-or dagiti kongregasion kadagiti pagan-anay, ket iti saan a nabayag napno ti sangami kadagiti kahon, maleta, ken supot! Karaman kadagidiay naglaon iti aruaten dagiti ubbing dagiti abalbalay a naggapu kadagiti ubbing a Swiso nga agpaay kadagiti di ammo a gagayyem iti adayo nga Amianan. Adu met a tsokolate ti naiballaballaet kadagiti lupot.”
Kasano a naipatulod amin daytoy? Kunaen ti report: “Tinulongannakami ti sanga ti Francia babaen ti panangibaonna iti dua a trak ken uppat a drayber. Kanayonanna, maysa a trak manipud iti sangami ken uppat pay a kukua dagiti lokal a kakabsat ti nausar a mangibunag iti 72 a tonelada idiay Ukraine.” Ti kumboy, a 150 metro ti kaatiddogna, ket sitatalged a nakadanon iti pagbodegaan idiay Lviv, a sadiay agarup sangagasut a lokal a kakabsat ti agur-uray a mangdiskarga kadagiti trak. Impadamag dagiti drayber a saan a lapped ti pagsasao agsipud ta iyanninaw dagiti langada ti nauneg a panagyaman.
Austria
Nangipatulod dagiti kakabsat idiay Austria iti 48.5 a tonelada a taraon, 5,114 a kahon ti lupot, ken 6,700 a paris ti sapatos idiay Lviv ken Uzhgorod idiay Ukraine. Nangipatulodda met iti 7 a tonelada a taraon, 1,418 a kahon ti lupot, ken 465 a paris ti sapatos idiay Belgrade, Mostar, Osijek, Sarajevo, ken Zagreb idiay dati a Yugoslavia. Kunaen ti report ti sanga: “Nangibaonkami iti 12 a nakargaan a trak, a nagbiahe iti 34,000 kilometro. Maysa a kabsat ken ti anakna a lalaki nga agnegnegosio iti trak ti nangibiahe ti kaaduan kadagitoy.”
No maipapan kadagiti naidonar a lupot, ituloy a kunaen ti report: “Inusarmi ti Assembly Hall kas kangrunaan a pagbodegaan. Binagbagon ti simmangpet agingga nga awanen ti pagipempenan. Kas idi kaaldawan ni Moises, masapul nga isardengen dagiti tao ti agited. (Exodo 36:6) Adda met dagiti dadduma, nga uray no saanda a Saksi ni Jehova, nangidonarda iti kuarta, ‘agsipud ta,’ kinunada, ‘iti kastoy a pamay-an ammomi a makagteng daytoy kadagiti tattao nga agkasapulan.’ Pinadawatandakami met dagiti kompania ti lubong kadagiti basio a kahon a kasapulanmi unay.” Agtawen iti 9 agingga iti 80 dagiti kakabsat a lallaki ken babbai a nangilasin ken nangikarga. Inkagumaanda pay a pinagteterno dagiti kurbata ken kamisa dentro kadagiti pantalon.
Kunaen ti report: “Dakkel ti naitulong dagiti autoridad idiay Austria ken kadagiti pagbeddengan iti pannakaibiahe dagiti tulong ken iti pannakaasikaso dagiti kasapulan a papeles tapno nanam-ay ti panangitulod.”
Italia
Manipud Roma ag-188 a tonelada a taraon ti intulod ti dua a dadakkel a kumboy ti trak a limmasat idiay Austria, Czechoslovakia, ken Polandia nga agturong idiay dati nga Union Soviet. Tunggal grupo ti kumboy ket buklen ti innem a drayber, maysa a mekaniko, maysa nga auto electrician, maysa a manangipatarus, maysa a forwarder, maysa a kusinero, maysa a doktor, maysa a convoy leader a nakalugan iti dyip, ken maysa a kabsat nga addaan iti camper.
Naggapu ti taraon kadagiti pito a suplayer. Ipadamag ti sanga: “Idi naammuan dagiti suplayer ti panggepmi, kayat dagiti dadduma kadakuada ti tumulong. Nangidonar dagiti suplayer ti lubong iti sumagmamano a gasut a kilo a pasta ken bagas, kasta met dagiti kahon a pagkargaan. Nangidonar met dagiti dadduma kadagiti snow tire para kadagiti trak kasta met iti kuarta.
“Inapresiar dagiti kakabsat idiay Italia daytoy a gundaway a tumulong. Kayat met dagiti ubbing ti tumulong. Nangipatulod ti maysa nga ubing a lalaki nga agtawen iti lima iti bassit a tulong nga inanamaenna nga umanay a panggatang iti ‘de lata a tuna a tumukno idiay langit agpaay kadagiti kakabsat idiay Russia.’ Gapu iti nangato a markana idiay eskuelaan, nakaawat ti maysa a bassit nga ubing a babai iti kuarta manipud kadagiti apongna a panggatang iti isagutna kadagiti dadakkelna. ‘Ngem,’ insuratna, ‘idi nalagipko nga awanan dagiti kakabsatko iti naiimas a taraon a kas iti kankanek, napanunotko a ti kasayaatan nga isagutko kadagiti dadakkelko isu ti panangtulong kadagidiay a kakabsat.’ Nangitinnag iti kalalainganna a kantidad iti kahon ti donasion. ‘Makaalaak koma a kanayon iti nangato a marka tapno makaipatulodak iti ad-adu pay a kuarta,’ kinunana.” Kas pangserra, kunaen ti report ti sanga a dagiti surat ti nabara a panagyaman dagiti kakabsat idiay Ukraine, dagiti adu nga ebkas ti panagyaman dagiti kakabsat idiay Italia, ken dagiti nasayaat a kapadasan iti panangisagana ken panangitulod kadagiti abasto ket makatignay, makaparegta, ken mamagkaykaysa.
Taraon Para Kadagiti Rinibo a Delegado
Naangay ti kaunaan nga internasional a kumbension dagiti Saksi ni Jehova idiay dati nga Union Soviet iti Kirov Stadium idiay St. Petersburg, Russia, idi Hunio 28-30, 1992. Daytoy nakalalagip a kumbension, natemaan iti “Dagiti Managawit iti Lawag,” ket dinar-ayan ti nasurok a 46,200 a delegado a naggapu iti 28 a pagilian. Nangted dayta iti sabali pay a gundaway a mangipakita iti Nakristianuan nga ayat “iti intero a timpuyog dagiti kakabsat.”—1 Pedro 2:17.
Tinontonelada a taraon a naggapu idiay Denmark, Finlandia, Sweden, ken dadduma pay a pagilian idiay Makinlaud nga Europa ti naibunong a libre iti rinibo a delegado a naggapu idiay dati nga U.S.S.R., a kanenda bayat ti kumbension. Bayat ti ipapanawda iti kumbension kalpasan ti maudi a sesion, napabalonanda pay kadagiti nabalkot a taraon ken dadduma pay a probision iti panagawidda.
Ipakita dagiti report a nadakamat ditoy a saan laeng a dagiti taga laud ti nangiranud. Adda panagbinnales a panangiranud. Pudno a naggapu dagiti taraon ken lupot idiay laud, ngem ti aglaplapusanan a nararagsak nga ebkas ti ayat ken makapabileg-pammati a kapadasan dagiti taga daya iyanninawda ti kinaanus ken kinamatalek dagiti rinibo a managdaydayaw ni Jehova bayat dagiti pakadagsenan ken pakarigatan iti las-ud ti adu a dekada. Gapuna, narikna ti agsumbangir a dasig ti kinapudno dagiti sao ni Jesus: “Naragragsak ti mangted ngem ti umawat.”—Aramid 20:35.
[Diagram/Ladawan iti panid 21]
1. Manipud Finlandia: St. Petersburg, Russia; Tallinn ken Tartu, Estonia; Riga, Latvia; Vilnius ken Kaunas, Lithuania; Kaliningrad, Russia; Petrozavodsk, Karelia
2. Manipud Netherlands: Lviv, Ukraine
3. Manipud Sweden: St. Petersburg, Russia; Lviv, Ukraine; Nevinnomyssk, Russia
4. Manipud Denmark: St. Petersburg, Russia; Lviv, Ukraine
5. Manipud Austria: Lviv, Ukraine; Belgrade, Mostar, Osijek, Sarajevo, Zagreb (idiay dati a Yugoslavia)
6. Manipud Switzerland: Lviv, Ukraine
7. Manipud Italia: Lviv, Ukraine
[Dagiti ladawan iti panid 23]
Kinahon a lupot iti sanga ti Sweden
Panangikarga dagiti maipatulod a tulong
Dagiti taraon iti maysa a parsela
Bacon ken ham manipud Denmark
Kumboy ti 11 a trak ken 1 a kotse
Dagiti parsela ken maleta iti sanga ti Austria
Panangdiskarga iti trak idiay Lviv, Ukraine