Panangasaba a Buyogen ti Panagibtur iti Daga ti Yelo ken Apuy

TI Iceland ket adda idiay North Atlantic iti agarup nagbaetan ti Norte America ken Europa. Nupay adda iti baba ti Arctic Circle, kalalainganna ti klima sadiay gapu iti mangpabara nga epekto ti Gulf Stream. Maaw-awagan ti Iceland iti daga ti yelo ken apuy gapu ta sadiay a masarakan ti kadakkelan a glacier ti Europa ken kasta met maysa kadagiti lugar iti lubong nga addaan iti adu a nabiag a bulkan. Agdindinamag daytoy gapu kadagiti adu a napudot nga ubbog ken solfatara, wenno bulkaniko a luglugar a mangpatpataud iti napudot nga alingasaw ken de asufre a gas.

Dagiti Viking, a nagtaeng ditoy nasuroken a 1,100 a tawen ti napalabas, ti kapuonan dagiti 260,000 nga agnaed iti daytoy maikadua a kadakkelan nga isla ti Europa. Awan nagdumaan ti Icelandic iti Old Norse, ti pagsasao ti Scandinavia idi panawen dagiti Viking. Dandani awan a pulos ti namalbaliwanna agsipud ta kaay-ayo dagiti Icelander ti agbasa kadagiti kadaanan a sarsaritada, a ti kaaduan kadagitoy ket naisurat idi maika-13 a siglo.

Idi maika-16 a siglo, nangrugi a maipatarus ti Biblia iti Icelandic. Nagparang ti “Baro a Tulag” idi 1540 ket ti kompleto a Biblia idi 1584. Nasurok a 90 porsiento kadagiti umili ti naikameng iti Evangelical Lutheran Church, ti opisial a relihion ti Estado. Nupay addaan ti gistay amin a pagtaengan iti Biblia, manmano ti mamati iti dayta kas Sao ti Dios. Napanuynoy ti kaaduan nga Icelander no maipapan iti relihion, ket kaaduan kadakuada ti sumursurot iti bukodda a kapanunotan.

Dumanon ti Naimbag a Damag Idiay Iceland

Agnanaed idi idiay Canada dagiti immuna nga Icelander a nakangngeg iti naimbag a damag ti Pagarian. Ni Georg Fjölnir Lindal ti maysa kadakuada. Taga Iceland dagiti nagannak kenkuana, ket Icelandic ti pagsasaona. Di nagbayag kalpasan ti panangidedikarna ti biagna ken Jehova a Dios, nagbalin a maysa nga amin-tiempo a manangaskasaba ti naimbag a damag. Idi 1929, idi agtawen iti 40, indanonna ti naimbag a damag kadagiti tattao iti dayta a daga ti yelo ken apuy.

Anian a nagdakkelan a trabaho para iti maymaysa a tao! Ag-320 kilometro ti kalawa ti Iceland manipud amianan nga agpaabagatan ken ag-500 kilometro manipud daya nga agpalaud. Ag-6,400 kilometro ti kaatiddog ti kosta, a pakairamanan dagiti fjord ken look. Kadagidi a panawen, awan dagiti napaypayso a kalsada ken gistay awan a pulos ti kotse wenno aniaman a dadduma pay a moderno a pagluganan. Nupay kasta, winanas ni Kabsat Lindal ti intero a puro iti las-ud ti sangapulo a tawen ken nakaiwaras iti rinibo a libro. Dinaliasatna ti baybay babaen ti bilog, ket iti isasarungkarna kadagiti away, nagusar iti dua a kabalio. Pagsakayanna ti maysa ket paraawit iti literatura ken kadagiti sanikuana ti maikadua.

Iti agarup 18 a tawen, ni laeng Kabsat Lindal ti Saksi idiay Iceland. Iti laksid ti kinagagetna a nangaskasaba, awan a pulos ti nakitana a dimmasig iti Pagarian kadagidi a tiempo. Naggibus ti nabayag a panaggianna nga agmaymaysa idi Marso 25, 1947, idi simmangpet dagiti immuna a nagturpos iti Watchtower Bible School of Gilead. Napalaus ti ragsakna idi sinungbatan ni Jehova kamaudiananna ti panangikarkaragna iti ad-adu nga agani. (Mateo 9:37, 38) Intultuloy ni Kabsat Lindal ti nagserbi idiay Iceland agingga iti panagsublina idiay Canada idi 1953.

Umadu ti Agani

Idi 1947, immay ti dua a misionero a taga-Denmark. Adu pay a misionero ti simmangpet dua a tawen kalpasanna. Bayat nga intultuloyda ti trabaho a panangasaba a kadua ti sumagmamano a gagayyem nga immakar idiay Iceland, rinibo a publikasion ti naiwaras. Kaay-ayo ti kaaduan nga Icelander ti agbasa, ngem manmano ti nangipangag iti naimbag a damag. Kalpasan ti 27 a tawen a panagmulmula ken panagsibsibug, mangrugin a makita dagiti naanus a kakabsat dagiti bunga ti nagbannoganda. Idi 1956, pito a kabbaro ti dimmasig iti Pagarian ken nangidedikar iti biagda ken Jehova.

Iti las-ud ti napalabas a sangapulo a tawen, nasurok a mamindua ti dimmakkelan ti bilang dagiti agibumbunannag ti Pagarian. Ita, addan pito a kongregasion ken maysa a naiputputong a grupo, nga agdagup iti 280 a manangiwaragawag ti naimbag a damag. Intay pasiaren ti isla ket bisitaentayo dagitoy a kongregasion.

Iti Aglawlaw ti Kabisera

Sibabaknang a nabendisionan dagiti kakabsat a lallaki ken babbai a nagibtur iti las-ud dagidiay a tawen. Adda itan dua a rumangrang-ay a kongregasion idiay Reykjavík, ti kabisera a siudad. Agtataripnongda iti napintas a Kingdom Hall nga adda iti pasdek a yan ti sanga nga opisina, a naidedikar idi 1975.

Karaman da Friðrik ken Ada kadagiti pito a nabautisaran idi 1956. “Iti maysa a bassit a kuarto iti attic a pagnanaedan dagiti misionero ti paggigimonganmi idi,” malagip ni Friðrik. “Adda maysa a kuarto a makalaon iti 12 a tugaw, ngem no dadduma, no ad-adu ti umay makigimong, luktanmi ti ruangan nga agturong iti maysa pay a bassit a kuarto. Naiduma ita ta makapaggigimong dagiti dua a kongregasion iti Kingdom Hall!”

Ni Friðrik ti manangaywan iti Food Service Department kadagiti immuna a naangay nga asamblea. “Siak a mismo ti mangasikaso iti gistay amin a trabaho, ket maigiddato iti dayta, masansan a maikkanak iti tallo wenno uppat a paset iti programa kada aldaw. Nakaapronak no addaak iti kusina. No mapanakon agpalawag, isuotko ti jacket-ko saak agdardaras a mapan iti pagasambleaan. Masansan a palagipandak dagiti kakabsat nga ikkatek ti apronko. Itatta, manipud 400 agingga iti 500 ti tumabtabuno kadagiti asamblea, a pakairamanan dagiti nasayaat a panglakayen nga addaan paset iti programa. Adu met ti madadaan a tumulong iti Food Service Department.”

Keflavík ti kaasitgan a kongregasion idiay Reykjavík, agarup 50 kilometro iti laud. Lumasattayo kadagiti lugar nga adut’ lava. Sangapulo porsiento ti Iceland ti nakumotan iti lava. Pasig a lumot ti immuna a nagtubo kadagitoy a lugar, ngem kadagiti naduduog a kalavaan a lugar, makasarakkayo kadagiti atap a berry ken babassit unay a kaykayo.

Sangapulo ket siam ti agibumbunannag iti kongregasion idiay Keflavík a nabuangay idi 1965. Adda iti asideg ti international airport, ken masarakan met ditoy ti base militar ti E.U. Nupay pulos a saan pay a napadasan dagiti Saksi ti nangasaba iti binalaybalay iti uneg ti base a mismo, adu a panagadal iti Biblia ti maidadaulo sadiay, ken adu ti nakaammo iti kinapudno.

Masarakan ti sabali pay a kongregasion idiay Selfoss, 55 kilometro iti daya ti Reykjavík. Makitatay ditoy ti karuotan a tay-ak a pagpaaraban kadagiti baka ken karnero, agraman ti kadakkelan a pagpagatasan iti Iceland. Iti dalan, malabsantayo ti Hveragerði, maysa a bassit nga ili iti nakapimpintas a ginget. Iti adayo makitatayo iti intero a tanap dagiti umas-asimbuyok nga alibungubong nga aggapu kadagiti napudot nga ubbog. Daytoy ti maysa kadagiti kalawaan a thermal a lugar iti pagilian, ken adu a greenhouse ti nabangon tapno mausar dagitoy a rekursos ken makapatanor iti hothouse a kamatis, pepino, ken nadumaduma a sabong.

Iti daytoy a lugar adda maysa a bassit ngem aktibo a kongregasion a buklen ti 19 nga agibumbunannag ti Pagarian. Immakar da Sigurður ken Guðrún Svava manipud Reykjavík tapno tulonganda daytoy a bassit a grupo idi a kabuangbuangay ti kongregasion idi 1988. Ni laeng Sigurður ti panglakayen ditoy. Sakbay a nagbalin a maysa kadagiti Saksi ni Jehova agarup sangapulo a tawenen ti napalabas, nalatak isuna kas maysa a musiko. Isu ti drummer ti nadumaduma a banda. Itatta, paradalus ti tawa ti trabahona, ken mangisursuro met iti musika. Idi maysa pay laeng nga entertainer, adu a parikut ti napasaranna, kas iti panangabuso iti droga, panagbarbartek, ken narakrak a panagasawa. Napalalo ti ragsakna itan ta addan panggep ti biagna ken agserserbin ken Jehova!

Iti Daya

Panawantayo ti Selfoss ket agdaliasattayo iti 680 kilometro, a lumasat kadagiti akikid ken lasonglasong a kalsada. Agturongtayo iti sumaruno a kongregasion, iti ili ti Reyðarfjörður, iti akindaya a kosta. Kalpasan ti kaguduat’ oras, maimatangantayo ti Hekla, ti kalatakan a bulkan idiay Iceland. Namimpaten a bimtak ti nasao a bulkan iti daytoy a siglo.

Idi 1973 sirurungsot a bimtak ti maysa a bulkan idiay Vestmannaeyjar (Westmann Islands). Sitatalged a nayakar dagiti agarup 5,300 nga agnaed idiay mainland iti sumagmamano laeng nga oras. Idi simmayaaten ti kasasaad ti ili, nagin-inut a nagsubli ti kaaduan nga agnaed. Adda dua a Saksi nga agnanaed ita sadiay ken mangikaskasaba ti naimbag a damag kadagiti tattao iti daytoy a bassit a komunidad. Kalpasan ti panagbiahetayo iti dua pay nga oras, agparang iti imatangtayo ti nangayed a Vatnajökull, ti kadakkelan a glacier idiay Iceland, a 8,300 kilometro kuadrado ti kalawana. Iti dalan, adu nga agkakapintas a dissuor ken karayan ti malabsantayo.

Kalpasan ti agarup sangapulo nga oras iti dalan, addatayon iti destinasiontayo. Iti Reyðarfjörður, maam-ammotayo dagiti 12 nga agibumbunannag iti kaubingan a kongregasion iti Iceland. Awan Saksi a nagnaed iti daytoy a lugar agingga idi naipasdek ti pagtaengan dagiti misionero iti tartaraudi ti 1988. Da Kjell ken Iiris, agassawa a misionero a taga-Sweden nga agserserbi iti Iceland sipud idi 1963, ti natudingan a mangasaba kadagiti 15,000 a tattao iti daytoy nga away. Adu kadagitoy ti agnanaed kadagiti babassit a purok iti igid ti baybay, nga agarup 500 kilometro ti kaatiddogna. Panagdaklis ti kangrunaan a pagsapulan dagiti tao sadiay.

Kuna ni Kjell: “Awan duadua a sibabaknang a binendisionan ni Jehova ti trabaho ti Pagarian iti daytoy a paset ti Iceland. Idi Enero 1, 1993, nabuangay ti maysa a kongregasion, ket adu a panagadal iti Biblia ti idadaulomi. Nasayaat ti irarang-ay dagiti yad-adalanmi. Nupay nagbaliwen ti kasasaad ti transportasion sipud idi nagdaldaliasat ni Kabsat Lindal a sisasakay iti kabalio, saan a kanayon a nalaka ti lumasat kadagiti bessang agsipud ta nayelo dagiti dalan kabayatan ti nasipnget a bulbulan iti panawen ti lam-ek, uray pay four-wheeler ti luganmi. Naminsan, naikaglis iti nayelo a dalan ket namindua wenno namitlo ngata a nagtulid iti bakras. Kasta unay ti ragsakmi ta saankami a naan-ano!”

Kalpasan ti 30 a tawen a kaaddana iti Iceland, kuna ni Iiris: “Iti panaglabas dagiti tawen, adu dagiti naggapu kadagiti sabali a pagilian nga immay timmulong. Nupay pimmanaw ti kaaduan gapu iti nadumaduma a rason, dakkel ti naitulongda iti trabaho a panagmula ken panagsibug. Maragsakankami ta nakapagtalinaedkami, yantangay maim-imatanganmi ita ti irarang-ay ti panagani. Pappapardasen met ni Jehova ti trabahona ditoy.”

Rimmang-ay ti trabaho ditoy gapu ta kaskasabaan dagiti kabbaro dagiti katrabahuanda. Naammuan ni Atli ti kinapudno manipud kadagiti misionero ket rinugianna a kinasabaan dagiti sabsabali iti kompania ti konstruksion a pagpapaayanna. Dua kadagiti katrabahuanna ti makipaspaset itan iti trabaho a panangasaba. Nabautisaranen ti maysa kadakuada agraman ni baketna idi Nobiembre 1992. Adda maysa pay a katrabahuanna a yad-adalan dagiti Saksi iti Biblia.

Ilalasat iti Amianan

Panawantay ti Reyðarfjörður ket agpalaudtayo. Tallogasut a kilometro ti kaadayo ti sumaruno a kongregasion, iti ili ti Akureyri. Natudingan dagiti espesial nga amin-tiempo a manangaskasaba nga agtrabaho sadiay idi rugrugi ti 1950’s. Manipud pay idi damo, napalalo ti panangbusor dagiti sumagmamano a klero iti trabahotayo. Naipablaak dagiti artikulo kadagiti lokal a periodiko a namallaag kadagiti umili maibusor kadagiti Saksi ni Jehova. Adu kadagiti umili ti naigamer met iti espiritismo. Ngem gapu iti panagibtur ken kinaanus dagiti nadumaduma a payunir ken misionero, adda itan sadiay ti maysa nga aktibo ken naayat a kongregasion a buklen ti 35 a manangaskasaba ti Pagarian.

Maysa a mangngalap ni Friðrik, maysa kadagiti panglakayen ditoy. Kalpasan ti itatabunona iti kumbension distrito idi 1982, kapkapnekanna a kinapudno ti maad-adalna. Nagsubli idiay Akureyri a determinado a mangpaneknek iti pamiliana, kadagiti gagayyem, ken katrabahuanna. Panggep ni Friðrik ti umikkat iti pagsapulanna kas mangngalap tapno ad-adu ti panawenna iti kongregasion. Imbagana ken ni nobiana a Helga a saandan a mabalin ti agkabbalay agingga iti dida agkasar, ta agbalinton a maysa kadagiti Saksi ni Jehova. Tarigagayan met ni Friðrik nga agadal ti nobiana iti Biblia agsipud ta dina mabalin ti ‘mangasawa iti saan a manamati.’ (1 Corinto 7:39) Iti pannakaklaatna, rinugian ni Helga ti nagadal. Nagkallaysada idi Pebrero 1983 ket nabautisaranda di nagbayag kalpasanna. Idi agangay inawat met ti nanang ni Friðrik ken ti kabsatna a babai ti kinapudno.

Akranes ti maudi a papanantayo, a 350 kilometro ti kaadayona manipud Akureyri. Bumallasiwtayo iti tallo a kabambantayan ken lumasat kadagiti adu nga agkakapintas a ginget. Sementado ti kalsada ditoy, isu a makaay-ayo ti agbiahe no idilig kadagiti lasonglasong ken akikid a kalsada a nagnaantayo. Masarakantayo idiay Akranes ti kabassitan a kongregasion iti Iceland. Lima laeng ti agibumbunannag sadiay. Dua kadakuada ti agserserbi kas panglakayen. Buklen daytoy ti dua a pamilia a nangipangag iti makunkuna nga ayab ti Macedonia, a pinanawanda ti maysa kadagiti daddadakkel a kongregasion idiay Reykjavík, ken nagtaengda iti daytoy a bassit nga ili tapno agserbi iti lugar a dakdakkel ti pakasapulan. (Aramid 16:9, 10) Iti nasuroken a dua a tawen, siaanus nga ikaskasabada ti naimbag a damag iti daytoy a teritoria, a mangnamnamada a padakkelen ni Jehova dagiti bambanag.​—1 Corinto 3:6.

Mainanama ti Irarang-ay

Babaen kadagiti greenhouse a pappapudoten ti enerhia geotermal ken artipisial a lawag, makapatanor dagiti mannalon nga Icelander iti adu a kita ti prutas, natnateng, ken dadduma pay a mulmula. Kasta met, dagiti Saksi, a nakabalan iti naespirituan a kinapudno, kinabara ti naemma a panangallukoy, ken iti pammendision ti nasantuan nga espiritu ni Jehova, sagsagrapenda dagiti makaparagsak a bunga ti nagbannoganda iti tay-ak ti Iceland.

Iti daytoy a tawen, 542 ti timmabuno iti Panglaglagip iti ipapatay ni Kristo, ken agarup 200 a panagadal iti Biblia ti maidadaulo. Mainayon pay, ti panangipangag iti pammaregta nga agserbi kadagiti saan pay a nasagid a teritoria ipanamnamana kadatayo a mangngeganto dagiti amin a kimmarnero a tattao iti daytoy a naglawaan nga isla ti timek ti Naimbag a Pastor, ni Jesu-Kristo. (Juan 10:14-16) Anian a makaparagsak a resulta kadagidiay matalek a manangiwaragawag ti Pagarian a kasta unay ti panagan-anus ken panagib-ibturda a nangikaskasaba ti naimbag a damag iti daga ti yelo ken apuy iti las-ud ti napalabas nga 64 a tawen!

[Mapa iti panid 24]

(Para iti aktual a pannakaurnosna, kitaem ti publikasion)

Akureyri

Akranes

Keflavík

Selfoss

Vestmannaeyjar

Reyðarfjörður

Hekla

Geysir

VATNAJÖKULL

REYKJAVIK

[Credit Line]

Naibasar iti mapa ni Jean-Pierre Biard