“Ad-adda Pay Ngem ti Maysa a Nabileg nga Ili”
“KADAGITI nabiit pay a surbey, agarup 40% dagiti ubbing iti E.U. ti makasaksi iti panagsina dagiti dadakkelda sakbay a madanonda ti 18.” (Science, Hunio 7, 1991) Anian a makapadanag nga estadistika! Apay a mapaspasamak daytoy?
Ni Edward M. Ginsburg, hues iti Court of Domestic Relations and Probate, inyebkasna ti panangmatmatna iti maysa nga interbiu iti The Boston Globe. Kinunana: “Managimbubukodantayo a kagimongan. Ti la agpaay ‘iti bagbagitayo’ ti tarigagayantayo. Saludsodentayo, ‘Ania ti adda iti dayta a para kaniak ita?’ Ti insigida a pannakapnek ti kayattayo.”
Ti kasta nga inuubingan a kinamanagimbubukodan agtungpal iti ladingit ken riri iti panagasawa. Kuna ni Judge Ginsburg a no dumanon dagiti agassawa iti divorce court, tarigagayan ti asawa a lalaki ken ti asawa a babai ti pannakaalangon. Kayatda nga adda mangibaga kadakuada nga isuda ti umiso ket ti asawada ti nagbiddut. Kayatda nga adda mangikuna: “Nangabakka iti riri.”
Dagiti sasaona ipalagipna kadatayo ti naipaltiing a proverbio: “Ti kabsat a nagsalungasing ket ad-adda pay ngem ti maysa a nabileg nga ili.” (Proverbio 18:19) Wen, no bumtak ti riri iti nagbaetan ti agassawa, mabalin a dida agtunos ken agpimpinnangedngedda. Masansan, determinadoda a di agkappia, kas ti “maysa a nabileg nga ili” a mararaut.
Rumbeng aya a mapasamak dagitoy a bambanag? Saan, adda solusion. Natibker ken agtalinaed dagiti panagasawa no ti agassawa, iti rugina pay laeng, ipangagda dagiti sasao ni apostol Pablo: “Agbalinkayo a manangaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa a kas met iti Dios sibubulos a pinakawannakayo babaen ken Kristo.” (Efeso 4:32) Nalaka aya a sukayen dagiti kasta a galad? Saan a kanayon. Ngem kasano kalaka ti agsina? Kasano kasaem dagiti emosional ken pinansial a pakadagsenan nga itden ti narakrak a panagasawa? Ket dagiti met ngay annak, a masansan nga agsagaba gapu ti panagsina dagiti dadakkelda agingga nga agmataenganda?
Nasaysayaat nga amang para kadagiti agassawa no ikagumaanda a pagtalinaeden ti panagasawa a saanda ket nga agpimpinnatangken iti tunggal maysa, kas iti “maysa a nabileg nga ili.” Ti balakad ni Pablo kadagiti Kristiano agaplikar nangnangruna kadagiti agassawa: “Kawesanyo ti bagbagiyo iti ayat, ta isu ti naan-anay a singgalut ti panagkaykaysa.”—Colosas 3:14.
[Picture Credit Line iti panid 32]
The Complete Encyclopedia of Illustration/J.G Heck