Dagiti Saksi ni Jehova iti Aglikmut ti Lubong​—Colombia

TI Colombia ket maysa a naisangsangayan a daga iti Sud America. Agpada dagiti taaw Atlantico ken Pacifico a nanglawlaw iti baybay daytoy naarkosan iti bulkan a pagilian. Nabara ti klima kadagiti tanap, idinto ta nalamiis iti nangangato a naabungotan-yelo a Kabambantayan ti Andes.a

Nupay nalatak ti Colombia gapu iti balitok ken esmeralda, dagiti tattao ti kapatgan a sanikua daytoy. Ita, pumpunnuen ni Jehova ti naespirituan a balayna iti kinadayag. Agturturong dagiti naimnas, makaay-ayo a managdaydayaw iti dayta iti isuamin a paset ti daga, agraman ti Colombia.​—Haggeo 2:7.

Natignay Dagiti Mangimatmaton iti Negosio

Idi Domingo, Nobiembre 1, 1992, naidedikar ti baro a sanga nga opisina ken pasilidad iti pagimprentaan ti Watch Tower Society idiay Facatativá, ag-42 kilometro iti amianan a laud ti Bogotá. Dakkel ti epektona kadagiti bisita ti panagpasiar iti sanga. Idi makasubli iti paktoria a pagtartrabahuanna, maysa a bisita ti sigagagar a nangparegta kadagiti manager-na a mapan ken paliiwenda ti maysa nga organisasion a ‘nakaskasdaaw no maipapan iti kinalaing, kinaurnos, ken kinaganaygay dagiti trabahador.’ Iti simmaruno a panagpasiarda, nangipakita dagiti mangimatmaton iti negosio iti nasged nga interes ket adu ti insaludsodda.

Kayat dagitoy a mangimatmaton iti negosio nga ibaon dagiti superintendente, superbisor, ken kapatasda​—iti kinapudnona, amin dagiti trabahadorda​—nga agpasiar. Tunggal lawas, mangyurnosda iti 15 aginggat’ 25 nga empleado nga agpasiar agingga a dagiti amin a 1,300 a trabahador ket maimatanganda ti kasta nga organisasional a kinalaing.

Ginasut kadagiti trabahadorda ti nakapasiar kadagiti pasilidad iti sanga ken nakabuya iti video a Jehovah’s Witnesses​—The Organization Behind the Name. Gaput’ panangapresiarda iti kinadakkel ti organisasion ken ti sangalubongan a pannakaisaknap ti trabaho a panangikaskasaba ti Pagarian, nasdaawda iti kinangato ti tukad ti teknolohia a maus-usar kadagiti operasion ti Sosiedad. Idi pumanawda, adu ti nangngegan a nangikuna a nariknada a kasda la ‘pumanaw iti Paraiso nga agsubli iti nariribuk a lubong.’

Madandanon ti Kinapudno ti Amin a Kita ti Tao

Madandanon ti naimbag a damag ti amin a kita ti tattao. (1 Timoteo 2:3, 4) Kas pagarigan, inawat ti dati a mammutar ken lider ti maysa a banda [ti musika] a heavy-metal rock ti kinapudno ti Biblia, binalbaliwanna ti panagbiagna, ken di nagbayag nagbalin kas maysa a regular pioneer. Kamaudiananna natudingan kas maysa a ministerial nga adipen. Adu nga indibidual a kameng dagiti managalsa a grupo ti nakasursuro a mangikabil ti panagtalek ken namnamada iti Pagarian ni Jehova. Aktiboda itan a makiramraman iti panangikaskasaba ti mensahe maipapan iti maysa a natalna a baro a lubong.

Dimngeg met iti kinapudno dagiti adikto ken aglaklako iti maiparit a droga. Maysa nga agtutubo a lalaki a Saksi itan ti nangimaton iti maysa a minulaan iti maiparit a droga ken laboratorio ti cocaine iti kabakiran iti unos ti lima a tawen sakbay a limmapsut iti kasta a kita ti biag. Nasarakanna ti ragsak iti panagadal ken panangyaplikar kadagiti prinsipio ti Biblia. Iti maysa a pagbaludan, sipipinget nga ikarkararag dagiti nasentensiaan a mammapatay a natignay gapu iti sipapasnek a panagadal iti Biblia a pakawanen koma ni Jehova ti basbasolda ken awatenna ida a kas ad-adipenna.

Isu nga ipangpangag dagiti amin a kita ti tattao ti mensahe ti Pagarian. Idiay Colombia, kas iti dadduma a lugar, pumpunnuen ni Jehova ti balayna iti kinadayag.

[Footnote]

[Kahon iti panid 8]

KASASAAD TI PAGILIAN

1993 a Tawen Serbisio

KANGATUAN A BILANG TI MANGASKASABA: 60,854

RATIO: 1 a Saksi iti 558

TIMMABUNO ITI MEMORIAL: 249,271

PROMEDIO A BILANG DAGITI AGIBUMBUNANNAG A PAYUNIR: 8,487

PROMEDIO A BILANG DAGITI PANAGADAL ITI BIBLIA: 100,927

BILANG TI NABAUTISARAN: 5,183

BILANG DAGITI KONGREGASION: 751

SANGA NGA OPISINA: FACATATIVÁ

[Ladawan iti panid 9]

Dagiti kameng ti sanga nga opisina ken dagiti misionero idi 1956

[Ladawan iti panid 9]

Ti buya manipud tangatang ti sanga nga opisina