Pananglukat Kadagiti Mata iti Naimbag a Damag

“ASUL latta ti langit uray no saan a makita ti bulsek,” kuna ti maysa a pagsasao a Danes. Ngem iti kupado nga inaldaw a panagbiagtayo, asul aya ti panagkitatayo iti langit, no ar-arigen? Sikikitatayo aya iti masanguanan a buyogen ti panagtalek? Pudpudno aya a mamatitayo iti naimbag a damag a masarakan iti Sao ti Dios, ti Biblia?

Iti napalabas nga artikulo, inusigtayo ti maipapan iti literal a kinabulsek. Ita intay sukimaten ti maysa a kita ti panagkita nga adayo a napatpateg. Nainaig iti dayta ti manayon a kinaragsaktayo kasta met ti masakbayan dagiti patpatgentayo.

Awan duadua, maipaspasangotayo kadagiti “napeggad a tiempo a narigat a pakilangenan.” (2 Timoteo 3:1) Aniat’ mapaspasamak bayat nga ikarkarigatan dagiti tattao ti agsapul iti pagbiag, mangib-ibtur kadagiti sakit ken parikut iti pamilia, ken mangsarsaranget iti pannakairurumen ken kinaawan ayat? Nakalkaldaang ta mapukpukawen ti panagtalek dagiti adu iti pada a tao, iti relihion, ken iti gobierno. Gapu ta mariknada nga awan ti solusion, pagarupen dagiti dadduma a pulos a saanto a marisut dagiti parikutda iti normal a pamay-an. Iti pagiwarnak ti Brazil a Jornal da Tarde, kuna ni Jacob Pinheiro Goldberg: “Iti sango ti nasaem a kinapudno, mariribukan iti kasta unay dagiti tattao kadagiti biddut nga uray la saanda a makapanunot a naimbag, ken agpannurayda iti makapaupay a misterioso a relihion.” Kaskasdi, uray no nariribuk dagiti kasasaad, di met aya kayattayo nga aramaten ti nasimbeng a panagpampanunot?

Darepdepenyo iti apagbiit a kasapulanyo ti maysa a pagtaengan a maipaay iti pamiliayo, ket saanyo a parikut ti kuarta. Nalabit iwarasyo ti panagkitayo ket pasiarenyo dagiti nagduduma a balay iti nadumaduma a lugar. Nupay ikagumaan dagiti ahente ti balay ken daga a patgan dagiti kalikagumyo, saanyo a masarakan ti kita ti pagtaengan a kayatyo. Kaskasdi, tangay nainaig ti pannakapnek ken pagimbagan ti pamiliayo, sumukokay kadin? Ita darepdepenyo ti ragsakyo no iti kamaudiananna nasarakanyo met laengen ti pagtaengan nga ar-arapaapenyo.

No kasano a mangbusboskayo iti panawen a mangbirok iti baro a pagtaengan, apay a diyo sukimaten ti Biblia ket mangsapulkayo iti solusion dagiti parikutyo? No kasano a nasken a tingitingentayo dagiti bambanag iti panangaramid iti pangngeddeng maipapan iti pagtaengan, nasken met nga agrasontayo a naimbag a maibatay iti mabasbasatayo iti Sao ti Dios. Ket ti ad-adda pay a makagunggona ngem ti panangsapul iti maysa a pagtaengan isu ti panangkita ken panangawattayo iti kinapudno maipapan kada Jehova a Dios ken ni Jesu-Kristo. Kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Ngem no nagpateg ti mensahe ti Biblia, apay a nakaad-adu pay laeng ti bulsek iti naimbag a damag a linaon daytoy? Ti maysa a makagapu, a mabalin a pagsiddaawan ti adu, isu daytoy: “Ti intero a lubong adda iti pannakabalin daydiay nadangkes.” (1 Juan 5:19) Kas banagna, ‘binulsek [ni Satanas a Diablo] ti pampanunot dagiti di manamati, tapno ti lawag ti nadayag a naimbag a damag maipapan ken Kristo, isu a ladawan ti Dios, saan koma nga agsilnag.’ (2 Corinto 4:4) Nupay dagiti mata ti pagkitatayo, ti utek ti mangipatarus iti lawag a sumrek iti mata. Gapuna, ti panagbalin a bulsek kaipapananna met ti “di pannakabael wenno panagkedked a mangilasin wenno mangngeddeng.” Ipalagip daytoy kadatayo ti nalatak a pagsasao a: “Bulsek dagidiay agimbubulsek.”

Saan a makita ti bulsek a tao ti adda iti sangona, isu a mabalin nga agpeggad a madangran. Saan a maisubli ita ti panagkita dagiti adu a literal a bulsek, ngem awan ti kapilitan nga agtalinaed a bulsek iti naespirituan.

Panangparmek iti Naespirituan a Kinabulsek

No kasano a pakapsuten dagiti narugit a kasasaad ti panagkita, ti narugit a moral a kasasaad mabalin a mangiturong iti moral a kinabulsek. Mainayon pay, namakdaar ni Jesu-Kristo maibusor kadagiti doktrina ken tradision nga inaramid ti tao. Silalawag nga impakitana a yaw-awan dagiti relihiuso a papangulo idi kaaldawanna ti arbanda: “Isuda dagiti bulsek a mangidaldalan. No, ngarud, ti maysa a bulsek a lalaki idalanna ti maysa a bulsek a lalaki, agpadpada a matnagdanto iti abut.”​—Mateo 15:14.

Imbes a paallilaw kadagiti bulsek a papangulo, anian a ragsak dagidiay manglukat iti matada iti naimbag a damag maipapan iti Pagarian ti Dios! Kinuna ni Jesus: “Immayak iti daytoy a lubong maipaay iti daytoy a panangukom: tapno dagidiay di makakita makakitada.” (Juan 9:39) Nupay kasta, kasano a makakita dagidiay bulsek iti naespirituan? Bueno, intay ituloy ti panangusigtayo iti literal a kinabulsek.

Adda dagiti nagduduma a probision a magun-od itan dagiti bulsek. Saan a kanayon a kasta idi. Awan idi dagiti pudpudno a napasnek a panangpadas a tumulong kadagiti bulsek sakbay nga impasdek ni Valentin Haüy ti maysa a naisangsangayan nga eskuelaan a para kadagiti bulsek idi 1784. Kamaudiananna, pinartuat ni Louis Braille ti sistema a naipanagan kenkuana; inaramidna dayta tapno matulongan dagiti bulsek nga agbasa.

Komusta met ngay dagiti bulsek iti naespirituan? Kadagiti kallabes a tawen naaramid dagiti napasnek a panagregget a mangiwaragawag iti naimbag a damag kadagiti kaadaywan a paset ti daga. (Mateo 24:14) Maragsakan dagiti Saksi ni Jehova a mangidanon iti namnama agpadpada kadagiti bulsek iti naespirituan ken iti pisikal.

Insurat ti maysa a babai a taga Brazil: “Kayatko nga ibaga nga iti baet ti an-annayek, makakitaak​—iti naespirituan. Anian a nakaskasdaaw a Dios! Maragsakankam a makaammo nga ‘ukradento ni Jehova ti imana ket pennekenna ti tarigagay ti isuamin a nabiag.’” (Salmo 145:16) Kinuna met ni Jorge, maysa a bulsek: “Mabalin a mabingay ti biagko iti dua a paset: sakbay ken kalpasan dagiti Saksi. . . . Gapu kadakuada, makitakon a silalawag ken siraraniag ti lubong. Tagtagiragsakek ti nagsayaat a pannakilangen iti tunggal maysa iti kongregasion.” Nupay makaparagsak dayta, ipanamnama kadatayo ti Biblia a din agbayag awanton ti bulsek ditoy daga​—iti literal wenno iti naespirituan. Kasanonto a mapasamak dayta? Kasanonto a pumudno iti intero a daga a “ni Jehova luktanna ti mata dagiti bulsek”?​—Salmo 146:8.

Ti Kakaisuna a Permanente a Solusion​—Pagarian ti Dios

Nupay rumangrang-ay ti pannakaammo iti medisina, agtultuloy dagiti nakaad-adu a sakit a mamagbulsek, mangyeg iti ut-ot, ken ipapatay. Ngarud, ania ti kasapulan tapno agpatingga ti malnutrision, dagiti narugit a kasasaad, ken ti rigat a mangpukaw agpadpada iti panagkita ken rag-o iti biag? Ti panangpaimbag ni Jesus kadagiti bulsek ken dadduma pay ket maysa laeng a bassit a panangiparangarang iti maaramidto iti masanguanan. Makaparagsak ta ti panangisuro ken panangpaimbagna inladawanna dagiti bendision a dumtengto iti daga iti sidong ti gobierno ti Pagarian ti Dios.

Asidegen ti panangpaimbag a maaramid iti intero a lubong.a Nagpintas ti panangiladawan ni apostol Juan iti daytoy nadibinuan a programa a panangpaimbag: “Impakitana kaniak ti maysa a karayan ti danum ti biag, nalitnaw a kas kristal, nga agay-ayus manipud iti trono ti Dios ken iti Kordero nga agpababa iti tengnga ti akaba a dalanna. Ket iti daytoy nga igid ti karayan ken iti dayta nga igid adda dagiti kayo ti biag a mangpatpataud iti sangapulo ket dua nga ap-apit a bunga, a mangipapaay kadagiti bungada iti tunggal bulan. Ket dagiti bulong dagiti kayo agpaayda iti pannakaagas dagiti nasion.”​—Apocalipsis 22:1, 2.

Dagiti ebkas a “danum ti biag” ken “dagiti kayo ti biag” iladawanda a kalpasan ti panagpatingga ti agdama a dakes a sistema, dagiti makaagas a probision ti Pagarian ti Dios in-inutto a yegda ti sangatauan iti kinaperpekto. Kinapudnona, dagiti gunggona ti daton a subbot ni Jesus (agraman ti naan-anay a pannakapakawan dagiti basol), kasta met ti pannakaammo ken Jesu-Kristo ken iti Amana, ti mangyegto iti perpekto a salun-at ken biag nga agnanayon.​—Juan 3:16.

Kinaragsak iti Baro a Lubong ti Dios

Ngarud, darepdepenyo ti maysa a daga nga awan ti krimen, polusion, wenno kinapanglaw. Arep-epenyo ti pamiliayo nga agbibiag a sitatalna iti naisubli a Paraiso. (Isaias 32:17, 18) Anian a makaay-ayo a matmatan dagiti nagduduma a maris a buyogen ti perpekto a panunot ken sentido!

“Ti gagangay a kasasaad para iti tao isu ti panagbiag iti kanayon nga agbaliwbaliw nga aglawlaw​—ti lawag, maris, dagiti porma. Awan ti makunkuna a makauma nga aglawlaw iti nakaparsuaan,” kuna ni Faber Birren. “Ti maris ti maysa kadagiti nakaisigudan a pakaragsakan iti daytoy a lubong. Isu dayta ti pagannurotan ti nakaparsuaan, saan laeng nga iti dadduma a kasasaad, ken agpannuray iti dayta ti adu a pakaragsakan iti biag.”

Anian a nagpateg a sagut ti panagkita! Anian a makaparagsak inton makakitan dagiti mata a sigud a bulsek​—iti literal wenno iti naespirituan!

Wen, iti um-umay a naisubli a Paraiso, saanton a mamagliday ti kinabulsek ken dadduma pay nga an-annayen! Awanton ti mayaw-awan. Tangay agarinto ti pudpudno nga ayat, malawlawaganto ti amin iti naespirituan. Asidegen a mapasamak dayta, ken adu pay, ngem itan ti tiempo a pananggun-od iti anamong Daydiay mangtungpalto iti naimpadtuan a karina: “Iti dayta a tiempo maluktanto ti mata dagiti bulsek”!​—Isaias 35:5.

[Footnote]

[Ladawan iti panid 7]

Iti dayta a tiempo maluktanto ti mata dagiti bulsek!