‘Dikay Agladingit a kas Kadagiti Dadduma’
NADLAWYO kadin ti kasla pannakalpay ti maysa a sabong kalpasan ti maysa a bagyo? Makagutugot-rikna a buya dayta. Kinaagpaysona, mabalin a dagdagen ti kellaat a panagbayakabak ti tudo ti adu nga animal ken tattao—natibtibker a parparsua ngem iti uray ania a sabong—nga agdardaras nga agsapul ti paglinongan. Nupay kasta, nakatakder laeng sadiay ti sabong, nakaramut, a sarsarangtenna ti narungsot unay a panawen. Ita, adtoy a di naan-ano, nalpay ngem saan a napirsay, a mangipakpakita iti kinapigsa nupay nalap-it ti langana. Bayat a pagsidsiddaawanyo daytoy, mabalin a mapanunotyo no maisublina pay ngata ti pigsana ken maitangadna manen ti kinapusaksakna iti tangatang.
Kasta met dagiti tao. Kadagitoy nariribuk a panawen, maipasangotayo iti amin a kita ti bagyo. Ti kinarigat ti biag, panagleddaang, panagkapuy ti salun-at, ti pannakapukaw ti inay-ayat gapu iti ipapatay—adda dagiti gundaway a dumteng kadatayo ti kakasta nga allawig, ket no dadduma saantayo a maliklikan dagitoy a kas iti sabong a saanna a mabalin a paruten ti bagina ket agsapul iti paglinongan. Makagutugot-rikna a makita dagiti tao nga agparang a kasla nalap-it ngem mangipakpakita iti nakaskasdaaw a pigsa ken agib-ibtur iti sidong ti kakasta a pannakaraut. Kasanoda nga ar-aramiden dayta? Masansan a ti tulbek isut’ pammati. Insurat ni Santiago a kabsat ni Jesu-Kristo iti ina: “Ammoyo a no agballigi ti pammatiyo iti panangsaranget iti kakasta a pakasuotan, agbanag dayta iti abilidad nga agibtur.”—Santiago 1:3, Today’s English Version.
Ti maysa pay a tulbek isu ti namnama. Kas pagarigan, no matay ti maysa nga ipatpateg, dakkel ti maaramidan ti namnama kadagidiay napanawan. Nagsurat ni apostol Pablo kadagiti Kristiano a taga-Tesalonica: “Dikam kayat nga awan ti pannakaammoyo maipapan kadagiti matmaturog ken patay; tapno dikay agladingit a kas kadagiti dadduma nga awanan iti namnama.” (1 Tesalonica 4:13) Nupay awan duadua nga agladingit dagiti Kristiano gapu iti ipapatay, adda nakaidumaanda. Addaanda iti umiso a pannakaammo maipapan iti kasasaad dagiti natay ken maipapan iti namnama iti panagungar.—Juan 5:28, 29; Aramid 24:15.
Daytoy a pannakaammo ti mangipaay kadakuada iti namnama. Ket dayta a namnama ti in-inut met a mangkissay iti ladingitda. Daytoy ti tumulong kadakuada nga agibtur, ken adu pay ti maaramidanna. Inton agangay, kas iti sabong kalpasan ti bagyo, maitangadda ti uloda manipud panagladingit ket maaddaanda manen iti rag-o ken pannakapnek iti biagda.