Rumbeng Kadi a Pagkararaganyo ni Jesus?

IBILANG ti dadduma a maikanatad ti panagkararag ken Jesus. Idiay Alemania, nasuruan ti adu nga ubbing a pagakubenda dagiti imada sakbay ti pannangan ket agyamanda ken Jesu-Kristo.

Sigun iti Biblia, pudno a nakangatngato ti saad ni Jesus idiay langit. Nupay kasta, kaipapanan kadi dayta a rumbeng nga agkararagtayo kenkuana? Mabalin a maysakayo kadagidiay agkarkararag ken Jesus gaput’ ayatyo kenkuana, ngem aniat’ makuna a mismo ni Jesus maipapan kadagiti kasta a kararag?

Umuna, apay a tumaud pay dagitoy a saludsod? Gapu ta dakamaten ti Biblia a ni Jehova a Dios ket isu ti “Managimdeng iti kararag.” Gapuna, di pakasdaawan a nagkararag dagiti adipen ti Dios idi ugma, kas kadagiti Israelita, ken ni Jehova a Dios laeng, ti Mannakabalin-amin.​—Salmo 5:1, 2; 65:2.

Nagbalbaliw kadi ti bambanag idi immay ditoy daga ni Jesus, ti Anak ti Dios, tapno ispalenna ti sangatauan manipud basol ken ipapatay? Saan, maiturong pay laeng dagiti kararag ken ni Jehova. Idi adda ni Jesus ditoy daga, naynay a nagkararag a mismo iti nailangitan nga Amana, ket insurona dagiti dadduma nga aramidenda met dayta. Panunotenyo laengen ti modelo a kararag, a no dadduma maawagan iti Kararag ti Apo wenno ti Amami, a maysa kadagiti kalatakan a kararag iti lubong. Saan nga insuro ni Jesus nga agkararagtay kenkuana; intedna kadatayo daytoy a pagtuladan: “Amami nga adda iti langlangit, masantipikar koma ti naganmo.”​—Mateo 6:6, 9; 26:39, 42.

Ita, usigentayo a naan-anay ti tema babaen ti panangsukimat no ania a talaga ti kararag.

Ania ti Kararag?

Tunggal kararag ket maysa a kita ti panagdayaw. Pasingkedan daytoy ti The World Book Encyclopedia, a kunkunana: “Ti kararag ket maysa a kita ti panagdayaw a babaen daytoy mabalinan ti maysa a tao ti mangidaton iti debosion, panagyaman, panagipudno, wenno ar-araraw iti Dios.”

Kinuna ni Jesus iti naminsan: “Adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.’” Nagtalinaed ni Jesus iti nagpateg a kinapudno a ti panagdayaw​—kasta met ngarud dagiti kararag​—ket masapul a maiturong laeng iti Amana, ni Jehova a Dios.​—Lucas 4:8; 6:12.

Panangbigbig ken Jesus Kadagiti Kararagtayo

Natay ni Jesus kas daton a subbot maipaay iti sangatauan, pinagungar ti Dios, ket naital-o iti natan-ok a saad. Kas iti mapanunotyo, nangituggod amin daytoy iti panagbalbaliw maipapan kadagiti maanamongan a kararag. Iti ania a pamay-an?

Inladawan ni apostol Pablo ti dakkel nga impluensia ti saad ni Jesus kadagiti kararag, a kunkunana: “Gapu itoy met laeng a rason isu intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan, tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga, ket tunggal dila bigbigenda koma a sipapanayag a ni Jesu-Kristo ket Apo a maipaay a dayag ti Dios nga Ama.”​—Filipos 2:9-11.

Ti kadi sasao nga “iti nagan ni Jesus agparintumeng koma ti tunggal tumeng” kaipapananna nga agkararagtayo kenkuana? Saan. Ti Griego a sasao a nairaman ditoy “ipabigbigna ti nagan a nakikaykaysaan dagidiay nangiruknoy ti tumengda, a nakaikaykaysaan amin a (πᾶν γόνυ) panagdayaw. Ti nagan nga inawat ni Jesus tignayenna ti amin iti nagkaykaysa a panagdayaw.” (A Grammar of the Idiom of the New Testament, ni G. B. Winer) Wen, tapno maanamongan ti maysa a kararag, masapul a maidatag dayta “iti nagan ni Jesus,” ngem dayta, nupay kasta, ket maiturong ken Jehova a Dios ken agpaay a pakaidayawanna. Gapu iti daytoy a rason, kuna ni Pablo: “Iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios.”​—Filipos 4:6.

Kas iti maysa a dalan a mangiturong iti papanan, kasta met a ni Jesus ti “dalan” nga agturong iti Dios a Mannakabalin-amin. “Siak ti dalan ken ti kinapudno ken ti biag. Awan ti umay iti Ama malaksid no baeten kaniak,” insuro ni Jesus kadagiti apostol. (Juan 14:6) Gapuna, rumbeng nga idatagtay dagiti kararagtayo iti Dios baeten ken Jesus ket saan a maiturong ken Jesus a mismo.a

‘Ngem,’ mabalin a yimtuod ti dadduma, ‘saan aya nga impadamag ti Biblia nga agpadpada a nakisao da adalan nga Esteban ken apostol Juan ken ni Jesus idiay langit?’ Pudno dayta. Nupay kasta, saan a nairaman ti karkararag kadagitoy a pasamak, ta agpada a nakita da Esteban ken Juan ni Jesus iti maysa a parparmata ket nakisaritada a direkta kenkuana. (Aramid 7:56, 59; Apocalipsis 1:17-19; 22:20) Laglagipenyo a ti basta pannakisao uray iti Dios, dina kaipapanan a dayta ket maysan a kararag. Nakisao da Adan ken Eva iti Dios, a nagpampambar gapu iti nadagsen a basolda, idi nga inukomna ida kalpasan ti panagbasolda idiay Eden. Ti pannakisaritada kenkuana iti kasta a pamay-an ket saan a maysa a panagkararag. (Genesis 3:8-19) Gapuna, saan a maikanatad ti panangdakamat iti pannakisarita ni Esteban wenno ni Juan ken ni Jesus kas pammaneknek a rumbeng nga agkararagtayo kenkuana.

Kasano a ‘Maawagan’ ti Nagan ni Jesus?

Addaankay kadi kadagiti makaimayeng a panagduadua, nga ibilangyo pay laeng a maikanatad ti panagkararag ken Jesus? Nagsurat ti maysa a babai iti sanga nga opisina ti Watch Tower Society: “Daksanggasat, diak pay laeng mamati a di nagkararag dagiti immuna a Kristiano ken Jesus.” Adda iti panunotna ti sasao ni Pablo iti 1 Corinto 1:2, a dinakamatna nga “iti isuamin a lugar umaw-awagda iti nagan ti Apotayo, ni Jesu-Kristo.” Nupay kasta, rumbeng a bigbigen ti maysa nga iti orihinal a pagsasao, saan laeng a kararag ti tuktukoyen ti sao nga “umawag.”

Kasano a ‘naawagan’ ti nagan ni Kristo iti isuamin a lugar? Ti maysa a pamay-an isut’ sipapanayag a panangbigbig kenkuana dagiti pasurot ni Jesus a taga-Nasaret kas Mesias ken “Manangisalakan iti lubong,” a nagaramidda ti adu a datdatlag iti naganna. (1 Juan 4:14; Aramid 3:6; 19:5) Gapuna, kunaen ti The Interpreter’s Bible a ti sasao nga “umawag iti nagan ti Apotayo . . . kaipapananna ti panangbigbig iti kinaturayna imbes nga agkararag kenkuana.”

Ti panangawat ken Kristo ken panangalagad ti pammati iti naiparukpok a darana, a namagbalin a posible iti pannakapakawan ti basbasol, ket mairaman met iti ‘panangawag iti nagan ti Apotayo, ni Jesu-Kristo.’ (Idiligyo ti Aramid 10:43 iti Ara 22:16.) Ken literal a dakamatentayo ti nagan ni Jesus no agkararagtayo iti Dios baeten kenkuana. Gapuna, nupay ipakpakitana a mabalintay nga awagan ti nagan ni Jesus, saan nga ipaspasimudaag ti Biblia a rumbeng nga agkararagtayo kenkuana.​—Efeso 5:20; Colosas 3:17.

No Aniat’ Maaramidan ni Jesus Para Kadatayo

Silalawag nga inkari ni Jesus kadagiti adalanna: “No dawatenyo ti aniaman a banag iti naganko, aramidekto dayta.” Kalikaguman kadi daytoy ti panagkararagtayo kenkuana? Saan. Naiturong ti panagkiddaw ken Jehova a Dios​—ngem iti nagan ni Jesus. (Juan 14:13, 14; 15:16) Kiddawentayo iti Dios nga aramaten ti Anakna, ni Jesus, ti dakkel a bileg ken kinaturayna agpaay kadatayo.

Kasano a makikomunikar ni Jesus kadagiti pudno a pasurotna ita? Ti panangiladawan ni Pablo iti kongregasion dagiti napulotan a Kristiano mabalin nga agserbi kas ilustrasion. Inyarigna daytoy iti maysa a bagi ket ni Jesu-Kristo ti ulo. Ipapaayan ti “ulo” dagiti kasapulan ti kamkameng ti naespirituan a bagi babaen kadagiti “nagsusuopan ken ur-urat,” wenno dagiti pamay-an ken urnos iti panangipaay iti naespirituan a taraon ken panangiwanwan iti kongregasionna. (Colosas 2:19) Iti umasping a pamay-an, ar-aramaten ni Jesus ita dagiti ‘sagut a tattao,’ wenno lallaki a kualipikado iti naespirituan, a mangidaulo iti kongregasion, a mangtubngar pay ketdi no kasapulan. Awan ti probision agpaay kadagiti kameng ti kongregasion a makikomunikar a direkta ken Jesus wenno agkararag kenkuana, ngem awan duadua a rumbeng​—wen, kasapulan​—nga agkararagda iti Ama ni Jesus, ni Jehova a Dios.​—Efeso 4:8-12.

Kasanoyo a Padayawan ni Jesus?

Anian a nagpateg ti akem ni Jesus iti pannakaisalakan ti sangatauan! Inyesngaw ni apostol Pedro: “Awan ti asinoman a sabali a pakaisalakanan, ta awan ti sabali a nagan iti baba ti langit a naited kadagiti tattao a masapul a pakaisalakanantayo.” (Aramid 4:12) Sipapanunotkay kadi iti kinapateg ti nagan ni Jesus?

Saantay nga ipabpababa ti saad ni Jesus gapu iti saantay a panangiturong a personal kadagiti kararag kenkuana. Imbes ketdi, mapadayawan ni Jesus no agkararagtayo iti naganna. Ket kas iti panangpadayaw dagiti ubbing kadagiti nagannakda babaen ti panagbalin a natulnog, mapadayawantay ni Jesu-Kristo babaen ti panagtulnog kadagiti bilinna, kangrunaanna ti baro a bilin a panagayat iti maysa ken maysa.​—Juan 5:23; 13:34.

Dagiti Maanamongan a Kararag

Tarigagayanyo kadi ti mangidaton kadagiti maanamongan a kararag? Iturongyo ngarud dagita ken Jehova a Dios, ket aramidenyo dayta iti nagan ti Anakna, ni Jesus. Ammuenyo ti pagayatan ti Dios, ket yanninaw koma ti kararagyo dayta a pannakaawat. (1 Juan 3:21, 22; 5:14) Gumun-odkayo iti pammabileg manipud iti sasao ti Salmo 66:20: “Madaydayaw koma ti Dios, isu a saan a nangiwagsak iti kararagko, ken dina met inyadayo kaniak ti naayat a kinamanangaasina.”

Kas nakitatayon, dagiti kararag ket maysa a kita ti panagdayaw nga agpaay laeng iti Mannakabalin-amin a Dios. Babaen ti panangiturong iti amin a kararagtayo ken Jehova a Dios, ipakpakitatay nga impapusotayo ti imbilin ni Jesus a panagkararag: “Amami nga adda iti langlangit.”​—Mateo 6:9.

[Footnote]