Agtalinaedkayo a Natarnaw ket Agbiagkayo!

“ILUNODMON ti Dios ket mataykan!” Iti akkub daytoy a magasin, nailadawan ti asawa ni Job, a nangbabalaw kenkuana babaen kadagidiay a sasao. Dayta ket ag-3,600 a tawenen ti napalabas. Nupay kasta, itampok dayta a panangbabalaw iti matalek nga adipen ti Dios ti maysa nga isyu a nakaipasanguan ti sangatauan agpapan kadagitoy nga aldaw. Naglak-am ni Job iti dakkel a pukaw​—dagiti animal a tarakenna, ti pagtaenganna, dagiti sangapulo nga annakna. Ita natutuok ti bagina gapu iti nakaro a sakit, a nangsuot kenkuana iti kasta unay. Ti makagapu? Iruprupir idi ti kangrunaan a kabusor ti Dios ken tao, ni Satanas a Diablo, ti karit a saan nga agtalinaed ti tao a natarnaw iti Dios iti sidong ti nakaro a pakasuotan.​—Job 1:11, 12; 2:4, 5, 9, 10.

Itatta, kas idi kaaldawan ni Job, “ti intero a lubong adda iti pannakabalin daydiay nadangkes,” ni Satanas a Diablo. (1 Juan 5:19) Kinapudnona, ad-adda a pudno dayta iti kaaldawantayo, ta napaksiaten idiay langit ket naitappuak ditoy daga “daydiay naawagan iti Diablo ken Satanas, a mangiyaw-awan iti intero a mapagnaedan a daga.” (Apocalipsis 12:9) Daytoy ti makagapu kadagiti nakaro a rigat a sagsagabaen ti sangatauan iti panawentayo. Ti umuna a gubat sangalubongan, a bimtak idi 1914, ti nangtanda iti “pangrugian dagiti ut-ot ti panagrigat” a nagtultuloy agingga iti daytoy maika-20 a siglo.​—Mateo 24:7, 8.

Iti daytoy naulpit, nagdakes a lubong, mariknayo kadi a saankayon a makapagibtur? Pampanunotenyo kadi, ‘Adda kadi aniaman a panggep ti biag?’ Nalabit a kasta met ti narikna ni Job, ngem pulos a saan a napukaw ti pammatina iti Dios, nupay nakaaramid kadagiti biddut. Inyebkasna ti determinasionna kadagitoy a sasao: “Agingga iti matayak diakto ikkaten kaniak ti kinatarnawko!” Nagtalek a ‘maammuanto [ti Dios] ti kinatarnawna.’​—Job 27:5; 31:6.

Inibturan met ni Jesu-Kristo, ti mismo nga Anak ti Dios, dagiti pakasuotan idi adda ditoy daga. Pinarigat ni Satanas ni Jesus iti nadumaduma a pamay-an. Ginundawayanna dagiti pisikal a kasapulan ni Jesus ket sinubokna ti panagpannurayna iti Sao ti Dios, kas idi sinulisogna idiay bantay. (Mateo 4:1-11) Riniribukna ni Jesus babaen ti panangtignayna kadagiti apostata nga eskriba ken Fariseo ken dagiti naallilawda a mangidadanes kenkuana, mangpabasol kenkuana iti panagtabbaaw, ken mangisikat iti ipapatayna. (Lucas 5:21; John 5:16-18; 10:36-39; 11:57) Dakdakes ti inaramidda ken ni Jesus ngem ti inaramid dagiti tallo a sinsinan a manangliwliwa ken ni Job.​—Job 16:2; 19:1, 2.

Idiay minuyongan ti Getsemani, bayat nga umad-adani ni Jesus iti kangitingitan daytoy a pannubok, kinunana kadagiti adalanna: “Maleddaangan unay ti kararuak, uray agingga iti ipapatay.” Kalpasanna, “nagruknoy, a nagkarkararag ket kunkunana: ‘Amak, no mabalin, daytoy a kopa lumabas koma kaniak. Nupay kasta, saan a kas iti pagayatak, no di ket kas iti pagayatam.’” Kamaudiananna, iti kayo a pagtutuokan, iti kaitungpalan dagiti naimpadtuan a sasao ti Salmo 22:1, impukkaw ni Jesus: “Diosko, Diosko, apay a binaybay-annak?” Ngem idi ud-udina saan a binaybay-an ti Dios ni Jesus agsipud ta sinalimetmetan ni Jesus ti naan-anay a kinatarnawna Kenkuana, a nangipaay iti pagtuladan a suroten dagiti amin a pudno a Kristiano. Ginunggonaan ni Jehova ti panangsalimetmet ni Jesus iti kinatarnawna babaen ti panangpagungarna kenkuana ken panangitan-okna kenkuana iti kangatuan a langlangit. (Mateo 26:38, 39; 27:46; Aramid 2:32-36; 5:30; 1 Pedro 2:21) Gunggonaanto met ti Dios amin a sabsabali pay nga agtalinaed a natarnaw kenkuana.

Saan laeng a nangipaay ti kinatarnaw ni Jesus iti naan-anay a sungbat iti karit ni Satanas no di ket ti panangidatonna iti perpekto a natauan a biagna nangipaay iti subbot, a gapu iti dayta magun-odan dagiti natarnaw a tattao ti biag nga agnanayon. (Mateo 20:28) Umuna, urnongen ni Jesus ti napulotan a “bassit nga ipastoran” a makipagturay kenkuana iti Pagarian ti langlangit. (Lucas 12:32) Kalpasan daytoy, maurnong ti “maysa a dakkel a bunggoy” a makalasat iti “dakkel a rigat,” a rummuar iti dayta tapno tawidenda ti biag nga agnanayon iti naindagaan a sakup ti Pagarian ti Dios.​—Apocalipsis 7:9, 14-17.

Maysanto ni natarnaw a Job kadagiti binilbilion a natay a mapagungar tapno agbalin a paset dayta natalna a “baro a daga” a kagimongan. (2 Pedro 3:13; Juan 5:28, 29) Kas nailadawan iti bangir nga akkub daytoy a magasin, nagunggonaan ni Job gapu iti kinatarnawna idi a “binendisionan [ni Jehova] ti naud-udi a tungpal ni Job a nangnangruna ngem idi panangrugina.” Isut’ nakagun-od iti naespirituan a bileg kas maysa a ‘saan a nagbasol kadagiti bibigna.’ Pinaatiddog ti Dios ti biagna iti 140 pay a tawen. No sanikua ti pagsasaritaan, inikkanna ni Job iti mamindua a kas iti kaadu ti sigud nga adda kenkuana, ket “naaddaan [ni Job] iti pito nga annak a lallaki ken tallo a babbai,” a dagiti annakna a babbai ti maibilang a kapipintasan idi iti intero a daga. (Job 2:10; 42:12-17) Ngem amin dagitoy a kinarang-ay ket maysa laeng a pakauna dagiti bendision a tagiragsakento dagiti agtalinaed a natarnaw iti Paraiso ti “baro a daga.” Magun-odanyo met dayta a rag-o, kas ilawlawag dagiti sumaganad a panid!

[Ladawan iti panid 4]

Impaay ni Jesus ti naan-anay nga ulidan kas maysa a manangsalimetmet iti kinatarnaw