Panagballigi Maibusor ken ni Satanas ken Kadagiti Aramidna
“Ngarud, ipasakopyo ti bagbagiyo iti Dios; ngem busorenyo ti Diablo, ket isu agtalawto kadakayo.”—SANTIAGO 4:7.
1. Kasano nga ap-apektaran “ti ima ti nadangkok” ti sangatauan itatta?
SIUUMISO a kinuna ni Job: “Naiteden ti daga iti ima ti nadangkok.” (Job 9:24) Ket ita sangsanguentay ti kapepeggadan a tiempo iti intero a pakasaritaan ti tao. Apay? Agsipud ta dagitoy ti “maudi nga al-aldaw” ti sinasairo a panangituray ni Satanas iti daga. Di pakasdaawan nga, iti panangituggod ni Satanas, ‘dagiti nadangkes a tattao ken dagiti agpampammarang rumangrang-ayda manipud dakes nga agturong iti dakdakes pay, a mangiyaw-awan ken maiyaw-awanda.’ (2 Timoteo 3:1, 13) Mainayon pay, mabalin a paladingiten ken upayendatay dagiti pannakaidadanes, kinaawan hustisia, kinaulpit, krimen, kinarigat ti panagbiag, di maagasan a saksakit, parparikut iti kinalakay, emosional a pakariribukan ken dadduma pay.
2. Kasanotay a masaranget ti iraraut ni Satanas itatta?
2 Ipaspasnek ti dakkel a kabusor, ni Satanas a Diablo, ti irarautna iti sangatauan, nangruna kadagiti pudno nga agdaydayaw iti Dios. Kayatna a pagtallikuden amin a mainanama nga agtalinaed a natarnaw iti Dios ken iturong ida iti pannakadadael a maikanunong kenkuana ken dagiti demonio nga anghelna. Nupay kasta, mainanamatayo a no agibturtayo a sitatarnaw, agtalawto ti Diablo kadatayo. Kas ken Jesus, ‘masursurotay ti agtulnog’ iti Dios babaen kadagiti banag a sagabaentayo, ket gapu iti di kaikarian a kinamanangaasina, magun-odtayo ti biag nga agnanayon.—Hebreo 5:7, 8; Santiago 4:7; 1 Pedro 5:8-10.
3, 4. (a) Aniada a makinruar a pakasuotan ti sinaranget ni Pablo? (b) Aniat’ pakaseknan idi ni Pablo kas maysa a Kristiano a panglakayen?
3 Nasuot met ni apostol Pablo iti adu a pamay-an. Iti panangpatalgedna nga isu ket ministro ni Kristo, insuratna: “Ad-adda a naisangsangayanak: kadagiti panagbannog ad-adda nga aglaplapusanan, kadagiti pannakaibalud ad-adda nga aglaplapusanan, kadagiti pannakakabkabil nasurok unay, kadagiti dandani ipapatay masansan. Kadagiti Judio naminlima nga immawatak iti uppat a pulo a pannakasaplit agkurang maysa, namitlo a nakabilak kadagiti pang-or, naminsan a nauborak, namitlo a napadasak ti pannakarba iti barko, maysa a rabii ken maysa nga aldaw ti nabusbosko iti naadalem; kadagiti panagbaniaga masansan, kadagiti peggad iti karkarayan, kadagiti peggad manipud kadagiti tulisan, kadagiti peggad manipud iti bukodko a puli, kadagiti peggad manipud iti nasnasion, kadagiti peggad iti siudad, kadagiti peggad idiay let-ang, kadagiti peggad iti baybay, kadagiti peggad iti tengnga dagiti sinan-kakabsat, iti panagbannog ken panagrigat, kadagiti rabii nga awanan pannaturog masansan, iti bisin ken waw, iti di pampannangan adu a daras, iti lam-ek ken kinalamolamo.
4 “Malaksid kadagidiay a bambanag a makinruar ti kitada, adda ti dumaruros kaniak iti inaldaw-aldaw, ti pannakaringgor a maipaay iti isuamin a kongregasion. Siasino ti nakapuy, ket saanak a nakapuy? Siasino ti naitibkol, ket saanak nga agpungtot?” (2 Corinto 11:23-29) No kasta, nagtalinaed ni Pablo a natarnaw idi naipasango kadagiti pannakaidadanes ken pakasuotan iti ruar, ket kas maysa a Kristiano a panglakayen, maseknan la unay a mangpabileg kadagiti nakapkapuy a kakabsat iti kongregasion, a tumulong kadakuada nga agtalinaed a natarnaw. Anian a nagsayaat nga ulidan para kadagiti Kristiano a panglakayen itatta!
Kinatarnaw iti Sidong ti Pannakaidadanes
5. Ania ti sungbat iti direkta a panangidadanes?
5 Ania dagiti pamay-an nga us-usaren ni Satanas a mangdadael iti kinatarnaw? Kas naipakita iti ngato, maysa kadagiti kadamsakan a pamay-an ni Satanas isu ti direkta a panangidadanes, ngem adda sungbat. Balakadannatayo ti Efeso 6:10, 11: “Itultuloyyo a gun-oden ti pannakabalin iti Apo ken iti kinabileg ti pigsana. Ikapetyo ti naan-anay a kabal manipud iti Dios tapno mabalinanyo ti agtakder a sititibker maibusor kadagiti pangallilaw a pamuspusan [wenno, “nasikap a pamay-an,” footnote] ti Diablo.”
6. Kasano a maipakita a “naan-anay a naballigi” dagiti Saksi ni Jehova?
6 Kadagitoy maudi nga al-aldaw, masansan a maipasango dagiti Saksi ni Jehova kadagiti pakasuotan. Gapuna, kas ken Pablo, maikunatayo: “Kadagitoy amin a bambanag rumrummuartayo a naan-anay a naballigi babaen kenkuana a nangayat kadatayo.” (Roma 8:37) Mapaneknekan daytoy iti rekord ti kinatarnaw dagiti Saksi ni Jehova kadagiti kampo a pagbaludan ti Alemania, Austria, Polandia, ken Yugoslavia iti tiempo dagiti Nazi iti nagbaetan ti 1933 ken 1945, iti sidong ti panangirurumen ti [turay] a Komunista idiay Makindaya nga Europa iti nagbaetan ti 1945 ken 1989, ken kadagiti panangidadanes a nangsaplit iti dadduma a paset ti Africa ken Latin America iti di pay unay nabayag.
7. Aniada a makagutugot a pagulidanan iti kinatarnaw ti naipadamag manipud Ethiopia?
7 Nangipaay dagiti Saksi ni Jehova idiay Ethiopia iti makagutugot a pagulidanan iti kinatarnaw iti nagbaetan ti 1974 ken 1991. Kastoy ti kuna ti maysa a lalaki nga agduyos iti politika iti maysa a kabsat a pinaibaludna: “Naim-imbag pay a bulosanmi dagiti leon nga adda iti zoo ngem ti wayawayaandakayo manen!” Tinutuok dagitoy naulpit a manangidadanes dagiti adipen ni Jehova, ket kalpasan ti sumagmamano a tawen, imbilin ti korte a pagapelaran ti pannakapapatayda. Naiparang iti publiko ti bangkay ti maysa a kabsat kas pakaballaagan. Winayawayaan ti maysa a mannakaawat a korte dagiti dadduma a kakabsat a nagapelar iti pannakawaswas ti sentensia nga ipapatay, ket naaddaan iti paset ti dadduma kadagitoy a matalek a ‘manangparmek’ iti programa iti “Nadiosan a Panangisuro” a Kombension Distrito idiay Addis Ababa idi apagtapog ti 1994.a—Juan 16:33; idiligyo ti 1 Corinto 4:9.
8. Kasano a pinadas ni Satanas a gundawayan ti “panangdalus iti pulí”?
8 Napaay ni Satanas a mangrakrak iti kinatarnaw ti kakasta a nasungdo a kakabsat babaen ti direkta ken agdadata nga iraraut. Gapuna, ania dagiti dadduma pay a nasikap a pamay-an nga us-usarenna? Kunaen ti Apocalipsis 12:12 maipapan kadagitoy maudi nga al-aldaw: “Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” Gapu ta napaay a mangikisap iti nasungdo nga ili ti Dios babaen ti panangidadanes, sipupungtot a padpadasenna a papatayen amin a tattao, nga awan duadua a pinanggepna daytoy tapno mairaman a mapukaw ti ili ni Jehova. Isu a naisayangkat ti makunkuna a panangdalus iti pulí iti dadduma a paset ti sigud a Yugoslavia, ken ti nasaknap a pammapatay idiay Liberia, Burundi, ken Rwanda.
9. Apay a masansan a mapaay dagiti taktika ni Satanas? Mangtedkayo kadagiti pagarigan.
9 Nupay kasta, masansan nga agballatek ken ni Satanas dagiti taktikana, ta ti sinasairo a panangparigat ipabigbigna kadagiti nasingpet panagpuspusona a tattao a ti kakaisuna a namnamada ket naibatay iti Pagarian ti Dios, a sireregta nga iwarwaragawag dagiti Saksi ni Jehova. (Mateo 12:21) Kinapudnona, agturturong dagiti interesado a tattao iti Pagarian! Kas pagarigan, idiay nariribuk a Bosnia ken Herzegovina, iti pannakarambak ti Panglaglagip iti ipapatay ni Jesus idi Marso 26, 1994, 1,307 ti timmabuno, ad-adu iti 291 ngem iti napalabas a tawen. Nairekord dagiti kangatuan a bilang ti timmabuno idiay Sarajevo (414), Zenica (223), Tuzla (339), Banja Luka (255), ken iti dadduma pay nga ili. Iti kabangibang a Croatia, adda baro a kangatuan a bilang ti timmabuno a 8,326. Ti kinaranggas a mapaspasamak iti aglawlawda dina linapdan dagiti Saksi ni Jehova kadagidiay a pagilian a mangtungpal iti bilin nga ‘itultuloyyo nga iwaragawag ti ipapatay ti Apo, agingga iti idadatengna.’—1 Corinto 11:26.
Idiay Nariribuk a Rwanda
10, 11. (a) Aniat’ napasamak iti makunkuna a Kristiano a Rwanda? (b) Kasanot’ panangyebkas dagiti matalek a misionero iti kaririknada?
10 Idi 1993, idiay Rwanda, nga addaan iti 2,080 nga agibumbunannag iti Pagarian, 4,075 ti timmabuno iti “Nadiosan a Panangisuro” a Kombension Distrito, ken 230 ti nabautisaran. Sangagasut uppat a pulo ket dua kadagitoy ti dagus a nagaplikar para iti auxiliary pioneer a serbisio. Ngimmato ti bilang dagiti panagadal iti Biblia iti pagtaengan iti nasurok a 7,655 idi 1994—a sigurado a nakaluksawan ni Satanas! Nupay ibagbaga ti kaaduan kadagiti umili a Kristianoda, nagpipinnatayda gapu iti panagduma ti tribuda. Inannugot ti L’Osservatore Romano ti Vaticano: “Maysa daytoy a panaginnibus iti tribu. Daksanggasat ta uray dagiti Katoliko ket adda sungsungbatanda iti dayta.” Mapattapatta a kagudua a milion a lallaki, babbai, ken ubbing ti natay, ket agarup dua a milion ti napukawan iti pagtaengan wenno napilitan a pumanaw. Iti panangtaginayonda iti natalna a neutral a takderda kas Kristiano, inkagumaan dagiti Saksi ni Jehova ti agtalinaed a sangsangkamaysa. Ginasut a kakabsattayo ti napapatay. Ngem iti maysa a kongregasion a buklen ti 65 nga agibumbunannag iti Pagarian, a sadiay 13 ti napapatay, ngimmato ti bilang dagiti makigimgimong iti 170 idi Agosto 1994. Karaman kadagiti kaunaan a simmangpet dagiti tulong a naggapu kadagiti Saksi kadagiti sabali a pagilian. Ikararagantayo dagiti nakalasat.—Roma 12:12; 2 Tesalonica 3:1, 2; Hebreo 10:23-25.
11 Iti tengnga daytoy a nakaal-alingget a kasasaad, nakalibas dagiti tallo a misionero nga adda idiay Rwanda. Insuratda: “Mabigbigmi a nasken a sarangten dagiti kakabsattayo iti intero a lubong dagiti umasping wenno nakarkaro pay a kasasaad, ket ammomi a paset amin dagitoy ti pagilasinan ti maudi nga al-aldaw daytoy dakes a sistema. Nupay kasta, no personal a mairamanka, ad-adda a mabigbigmo ti kinapudno dagiti bambanag ken maapresiarmo no kasano kapateg ti biag. Naaddaan dagiti dadduma a kasuratan iti baro a kaipapanan kadakami, ket segseggaanmi ti tiempo inton saanen nga umapay iti panunot dagiti bambanag iti napalabas. Kabayatanna, kayatmi ti agtalinaed nga okupado iti panagserbi ken ni Jehova.”
Dagiti Natarnaw nga Agtutubo
12, 13. (a) Kasano a sinalimetmetan ti maysa nga agtutubo ti kinatarnawna? (b) Sadino ti mabalin a pakasarakan dagiti agtutubotayo iti pammaregta ita?
12 Kinuna ni Jesus a dagidiay ilaksid dagiti kameng ti pamilia gapu iti kinapudno ket magunggonaandanto “iti maminsangagasut.” (Marcos 10:29, 30) Pudno daytoy ken ni Entellia, maysa a sangapulot’-tawenna a balasitang idiay umamianan nga Africa, a nangipateg iti nagan ti Dios—a Jehova—apaman a nangngegna dayta. Nakipagadal [ni Entellia] kadagiti Saksi ni Jehova ket 90 a minuto ti mabusbosna a magna iti ipapan ken iti panagawidna manipud kadagiti gimong, nupay masansan nga irikepan ti bumusbusor a pamiliana no kasta a sumangpet idiay balayda. Idi agtawenen iti 13, mangaskasaban iti binalaybalay, ket bimmara ti ibubusor ti pamiliana. Iti maysa nga aldaw, pinarautan dagiti kakabagianna ti ima ken sakana ket imbilagda a nakadata iti init a kuminkinnit ti pudotna iti las-ud ti pito nga oras, a pasaray sabuaganda iti narugit a danum. Siuulpit a kinabkabilda, a pinerdida ti maysa a matana, ket kamaudiananna pinagtalawda. Nupay kasta, nakastrek iti maysa nga ospital ket idi kamaudiananna nagbalin a nars. Idi agtawen iti 20, nagpabautisar ket dagus a nag-auxiliary pioneer. Dinayaw ti pamiliana ti kinatarnawna ket pinagsublida iti pagtaenganda. Siam kadakuada ti payad-adalanen iti Biblia iti pagtaengan.
13 Nakagun-od ni Entellia iti dakkel a pammaregta iti Salmo 116, nangruna ti bersikulo 1-4, a maulit-ulit a binasana: “Ay-ayatek ni Jehova, agsipud ta denggenna ti timekko, dagiti dawdawatko. Gapu ta inyallingagna ti lapayagna kaniak, ket umawagakto kenkuana bayat ti panagbiagko. Dagiti galgalut ni patay pinarautandak ket dagiti tutuok ni Sheol nasarakandak. Nasarakak ti dukot ken ladingit. Ngem immawagak iti nagan ni Jehova: ‘O, Jehova, agdawatak kenka, luk-atam toy kararuak!’” Sungbatan ni Jehova ti kakasta a kararag!
14. Kasano nga impakita dagiti Saksi a Polako ti naisangsangayan a kinatarnaw?
14 Kas idi kaaldawan ni Jesus, masansan nga usaren ni Satanas ti narelihiusuan a kinapanatiko a mangrubrob iti panangidadanes—ngem saan a nagballigi. Naisangsangayan ti ulidan dagiti kakabsattayo idiay Polandia, kas naisalaysay iti 1994 Yearbook of Jehovah’s Witnesses. Nakalikaguman uray dagiti agtutubo a mangipaneknek iti kinatarnawda. Idi 1946, naibilin iti maysa a balasitang nga agtawen iti 15: “Agugiska laeng a kas iti ar-aramiden dagiti Katoliko. Ta no saan, paltogandaka!” Gapu ta sinalimetmetanna ti kinatarnawna, inulodda nga impan iti kabakiran, siaaprang a tinutuokda, sada pinaltogan.—Idiligyo ti Mateo 4:9, 10.
Dadduma Pay a Nasikap a Pamay-an ni Satanas
15, 16. (a) Ania ti sinasairo a pagannurotan ni Satanas, ket kasanotay a masaranget isuna? (b) Apay a di kasapulan a maitibkol dagiti agtutubotayo?
15 Ti sinasairo a pagannurotan ni Satanas ket “agturay wenno mangdadael”! Isut’ addaan iti adu a nakaam-amak nga igam a madadaan nga aramatenna. Di ngad pakasdaawan nga impakdaar ni apostol Pablo: “Addaantayo iti pannakigubal, saan a maibusor iti dara ken lasag, no di ket maibusor kadagiti gobierno, maibusor kadagiti turay, maibusor kadagiti agturay iti lubong daytoy a kinasipnget, maibusor kadagiti nadangkes nga espiritu a puersa kadagiti nailangitan a disso. Gapu itoy alaenyo ti naan-anay a kabal manipud iti Dios, tapno mabalinanyo ti sumaranget iti nadangkes nga aldaw ket, kalpasan a naan-anay a naaramidyon ti amin a bambanag, makapagtakderkayo a sititibker.” (Efeso 6:12, 13) Dagiti materialistiko a tarigagay, dakes a paglinglingayan ken propaganda, sinasatanas a musika, panangpilit dagiti kapatadan idiay eskuelaan, panangabuso iti droga, ken panagbarbartek—mabalin a dadaelen ti aniaman kadagitoy ti biagtayo. Gapuna, intuloy nga imbalakad ti apostol: “Kangrunaan iti amin, alaenyo ti dakkel a kalasag ti pammati, a babaen iti dayta mabalinanyonto a depdepen amin dagiti sumsumged a gayang daydiay nadangkes.”—Efeso 6:16.
16 Nangnangruna a nakapatpateg daytoy itatta ta laylayusen ni Satanas daytoy a lubong iti karkarna a musika. Iti dadduma a kasasaad, direkta a nainaig ti Satanismo. Kastoy ti kuna ti maysa a report manipud iti opisina ti sheriff ti San Diego County (E.U.A.): “Iti maysa a konsierto a naangay ditoy, pinadagdagullit ti banda kadagiti 15,000 nga agtutubo ti ‘Sanatas’—kayatna a sawen, Satanas a pabaliktad ti pannakaibalikasna.” Nailadawan ti Satanismo kas maysa nga abut a pakaitibkolan dagiti agtutubo “agsipud ta nagtawatawda a marirriribukan, makapungtot ken agbukbukod.” Dakayo nga agtutubo iti kongregasion Kristiano, di kasapulan a maitibkolkayo! Ipapaayannakay ni Jehova iti naespirituan a kabal a pulos a di masalput dagiti gayang ni Satanas.—Salmo 16:8, 9.
17. Kasano a maparmek ti emosional a pakariribukan?
17 Nairanta dagiti sumsumged a gayang ni Satanas a mangriribuk iti rikrikna. Babaen kadagiti pakarigatan iti biag, kas iti pisikal a sakit wenno nakaro a liday, mabalin nga iparikna ti kabusortayo kadagiti dadduma nga awan serserbida. Mabalin a maupay ti maysa gapu ta bassit laeng ti oras a mabusbosna iti panagserbi iti Dios wenno gapu ta dina matabtabunuan amin a gimong iti kongregasion. Makatulong ti naayat a panangaywan dagiti panglakayen ken dadduma pay a naasi a kakabsat iti panangparmek iti narikut a pakariribukan. Kanayon a laglagipenyo nga ay-ayaten ni Jehova dagiti matalek nga adipenna. (1 Juan 4:16, 19) Kuna ti Salmo 55:22: “Yallatiwmo ta awitmo ken ni Jehova, ket saranayennakanto. Dinanto ipalubos a magaraw ti nalinteg.”
18. Aniada a sinasatanas a pangallilaw ti nasken a sarangten dagiti dadduma?
18 Nabiit pay a nagparang ti sabali pay a kita dagiti nasikap a “pangallilaw a pamuspusan” ni Satanas. Iti dadduma a pagilian, adu a nataengan ti rirriribuken dagiti pampanunot a mangipapati kadakuada a sikakas-ang nga inabuso ida dagiti sataniko a kulto idi ubbingda pay. Sadino ti pagtataudan ti kakasta a kapanunotan? Nupay adun a panagsukimat ti naaramid, nagduduma ti kapanunotan dagiti espesialista ti lubong. Ibilang dagiti dadduma ti kakasta a pampanunot kas aktual a lagip ti napalabas. Kuna met ti sumagmamano nga ar-arapaap laeng dagitoy—nalabit parnuay ti mapagduaduaan a wagas ti panangagas. Kuna pay dagiti dadduma a dagita ket maysa a kita ti panagam-amangaw a pinataud ti nasaem a kapadasan bayat ti kinaubing.
19. (a) Ania a pampanunot ti nasken a sarangten idi ni Job? (b) Kasano a matulad dagiti panglakayen ti ulidan ni Eliu?
19 Makapainteres ta nasken a sarangten idi ti adipen ti Dios a ni Job dagiti “makariribuk a pampanunot” nga immula ni Satanas [iti panunotna] babaen kada Elifaz ken Sofar. (Job 4:13-18; 20:2, 3) Isut’ gapuna a ‘nagalipunget’ ni Job, a nagbanag iti panangisawangna iti “nadursok a sasao” maipapan kadagiti “nakakigkigtot” a mangburburibor iti panunotna. (Job 6:2-4; 30:15, 16) Siuulimek a dimngeg ni Eliu ken ni Job ken sipapasnek a tinulonganna a makakita iti nainsiriban a panangmatmat ni Jehova kadagiti bambanag. Kasta met itatta, ipakita dagiti mannakaawat a panglakayen a maseknanda kadagiti marirriribukan babaen ti saanda a panangnayon iti ‘pakadagsenan[da].’ Imbes ketdi, kas ken Eliu, siaanus a dumngegda kadakuada sada sapsapuan ida iti makapabang-ar a lana ti Sao ti Dios. (Job 33:1-3, 7; Santiago 5:13-15) Iti kasta, makasarak iti makapabang-ar a Nainkasuratan a liwliwa iti uneg ti kongregasion ti siasinoman a marirriribukan gapu kadagiti nasaem a kapadasan, agpayso man wenno parparnuay, wenno ‘butbutngen dagiti tagtagainep, ken dagiti parparmata’ a kas ken Job.—Job 7:14; Santiago 4:7.
20. Kasano a matulongan dagiti marirriribukan a Kristiano a mangtaginayon iti kinatimbengda iti naespirituan?
20 Iti agdama, masinunuo ti maysa a Kristiano nga, uray kaskasano, ni Satanas ti adda iti likudan dagitoy nakabutbuteng a pampanunot. No adda sumagmamano iti kongregasion nga agsagsagaba iti kastoy a pamay-an, nainsiriban a matmatanda ti kakasta a nakabutbuteng a pampanunot kas direkta a panangpadas ni Satanas a mangdadael iti kinatimbengda iti naespirituan. Kasapulanda ti anus ken mannakaawat a Nainkasuratan a pannaranay. Babaen ti panagkararag ken ni Jehova ken panagpatulong kadagiti naespirituan a papastor, magun-odan dagidiay marigrigatan ti di gagangay a pannakabalin. (Isaias 32:2; 2 Corinto 4:7, 8) Iti kasta, makapagibturda a simamatalek ket saanda a palubosan dagiti dakes a makariribuk a pampanunot a mangapektar iti talna ti kongregasion. (Santiago 3:17, 18) Wen, kabaelanda a sarangten ti Diablo, ken ipakita ti isu met laeng nga espiritu kas iti inaramid ni Jesus idi kinunana: “Pumanawka, Satanas!”—Mateo 4:10; Santiago 4:7.
21. Ania a ballaag ti ipaay dagiti Kasuratan maipapan kadagiti nasikap a pamay-an ni Satanas?
21 Ammotayo nga uray kasano, panggep ni Satanas a dadaelen ti panunottayo, kas imballaag ni apostol Pablo idiay 2 Corinto 11:3: “Maamakak nga iti uray kasano, kas iti panangallilaw ti serpiente ken Eva babaen ti kinasikapna, dagiti pampanunotyo mabalin a mapadakesda a maiyadayo iti kinapasnek ken iti kinadalus a maiparbeng ken Kristo.” Ti agdama a pannakadadael ti amin a lasag, wenno natauan a kagimongan a naisina iti Dios, ipalagipna kadatayo ti nagdakes a kasasaad a pinataud dagiti dakes ken naranggas a mestiso a “Manangituang” idi kaaldawan ni Noe. (Genesis 6:4, 12, 13, footnote; Lucas 17:26) Di ngarud pakasdaawan nga us-usaren ni Satanas dagiti nasikap a pamay-an ken pangallilaw tapno maipapasna ti pungtotna, nangnangruna iti ili ti Dios.—1 Pedro 5:8; Apocalipsis 12:17.
22. Inton awanen ni Satanas, aniada a bendision ti mainanamatayo?
22 Saan man la a nadakamat ni Satanas kadagiti panggibus a kapitulo ti libro ti Biblia a Job. Pinaneknekan ti kinatarnaw ni Job nga ulbod ti nagdakes a karit [ni Satanas] a saan a masalimetmetan dagiti tattao ti kinatarnawda iti Dios. Kasta met, iti asideg a masanguanan, inton ‘aggapu iti dakkel a rigat’ ti “maysa a dakkel a bunggoy” dagiti manangsalimetmet iti kinatarnaw, maigarangugongto ni Satanas iti mangliwengliweng nga abut. Makitiponto dagiti matalek a lallaki ken babbai, agraman ken matalek a Job, iti dayta “dakkel a bunggoy,” a mangsagrap kadagiti bendision iti paraiso a kasasaad, a dakdakkel nga adayo ngem dagidiay gunggona nga inawat ni Job!—Apocalipsis 7:9-17; 20:1-3, 11-13; Job 14:13.
[Footnote]
a Kitaenyo ti 1992 Yearbook of Jehovah’s Witnesses, panid 177.
Dagiti Pangrepaso a Saludsod
◻ Ania a nasayaat a pagulidanan iti kinatarnaw ti impaay da Job, Jesus, ken ni Pablo?
◻ Kasano a sinaranget dagiti manangsalimetmet iti kinatarnaw ni Satanas?
◻ Kasano a masaranget dagiti agtutubo dagiti nasikap a pamay-an ni Satanas?
◻ Kasanotay a masaranget dagiti pangallilaw ni Satanas?
[Ladawan iti panid 7]
Idiay Ethiopia, agserserbi ita da Meswat ken Yoalan ken ni Jehova iti amin a tiempo kas panangsurot iti ulidan ni tatangda, a napapatay
[Ladawan iti panid 7]
Ni Entellia, maysa a natarnaw nga agtutubo idiay umamianan nga Africa