Dagiti Saludsod Manipud Kadagiti Managbasa
Sigun iti Galacia 6:8, “ti agimulmula a maipaay iti lasagna apitennanto ti panagrupsa manipud iti lasagna, ngem ti agimulmula maipaay iti espiritu apitennanto ti agnanayon a biag manipud iti espiritu.” Ania nga “espiritu” ti tuktukoyenna, ken kasano a magun-odtay ti biag?
Dagiti Hebreo ken Griego a termino a naipatarus nga “espiritu” addaan iti nadumaduma a kaipapanan, kas ti: (1) aktibo a puersa ti Dios, (2) ti puersa ti biag nga adda kadagiti tao wenno animal, (3) ti mangtigtignay a puersa iti panunot ti maysa a tao, ken (4) espiritu a persona, wenno anghel. Ti umuna kadagitoy—ti aktibo a puersa ti Dios—isut’ kaipapanan ti tuktukoyen ti Galacia 6:8.
Tapno matulongan iti panagsukimat, kitaenyo ti Galacia 3:2, a sadiay umuna a naaramat ti [termino nga] “espiritu” iti libro a Galacia. Pinagsaludsodan ni Pablo dagiti Kristiano: “Inawatyo kadi ti espiritu gapu iti ar-aramid ti linteg wenno gapu iti panagdengngeg babaen ti pammati?” Kalpasanna, iti Galacia 3:5, innaigna dayta nga “espiritu” iti panagaramid kadagiti datdatlag. Isu a ti “espiritu” a tuktukoyenna isut’ nasantuan nga espiritu, ti di makita nga aktibo a puersa ti Dios.
Kamaudiananna, iti Galacia 5:16, pinagdilig ni Pablo ti espiritu ken lasag. Mabasatayo: “Kunaek, Itultuloyyo ti magna babaen ti espiritu ket dikayto pulos makaaramid iti nainlasagan a tarigagay.” Iti “nainlasagan a tarigagay” tuktukoyenna ti managbasol a lasag ti tao. Gapuna, iti Galacia 5:19-23, inlistana “dagiti aramid ti lasag” a maisupadi iti “bunga ti espiritu.”
Gapuna, iti Galacia 6:8, ti tao nga “agimula maipaay iti lasagna” ket maysa a tao a mangipalubos iti bagina kadagiti managbasol a natauan a tarigagay, nga agum-uma “kadagiti aramid ti lasag.” Mabalin a sagabaenna dagiti makadangran nga epekto ti kasta nga aramid, ket no saan nga agbalbaliw, awan duadua a dinanto magun-odan ti biag iti sidong ti Pagarian ti Dios.—1 Corinto 6:9, 10.
Kas napasnek a Kristiano rumbeng a tarigagayantayo ti ‘agmula a maipaay iti espiritu ti Dios.’ Mairaman ditoy ti panagbiag iti pamay-an a mangipalubos iti nasantuan nga espiritu nga agtignay a siwayawaya iti biagtayo, a tumulong kadatayo a mangiparangarang kadagiti bungana. Rumbeng a laglagipentayo dayta no agpilitayo iti basaen wenno programa iti telebision a buyaentayo. Agmulatayo a maipaay iti espiritu no agimdengtayo kadagiti gimong ti kongregasion ken ikagumaan nga iyaplikar ti balakad dagiti panglakayen a pinulotan ti nasantuan nga espiritu.—Aramid 20:28.
Makapainteres, agngudo ti Galacia 6:8 a buyogen ti pammatalged a no agmulatayo maitunos ti nasantuan nga espiritu, maikaritayto nga ‘agapit ti agnanayon a biag manipud iti espiritu.’ Wen, maibatay iti subbot ni Kristo, mangipaayto ti Dios iti awan inggana a biag babaen ti panagtignay ti nasantuan nga espiritu.—Mateo 19:29; 25:46; Juan 3:14-16; Roma 2:6, 7; Efeso 1:7.