Dagiti Babbai iti Aglikmut ti Lubong
IDI nagrebelde maibusor iti Dios ti immuna natauan a pagassawaan, impakauna ni Jehova dagiti makadidigra a pagbanagan a mapasaranda a dua ken dagiti annakda. Kinuna ni Jehova ken Eva: “Ket ti asawam isunto ti kalikagumam, ket isu iturayannakanto.” (Genesis 3:16) Kanayon nga iparparegta ti Biblia ti nauneg a panagraem kadagiti babbai, ket minilion a babbai ti mangtagtagiragsak iti naragragsak, ad-adda a makapnek a biag agsipud ta iyap-aplikarda ken ti pamiliada dagiti prinsipio iti Biblia.
Nupay kasta, sigun iti nabiit pay a damag maipapan kadagiti kalintegan ti tao, adu a sabsabali pay a babbai iti intero a lubong ti maipabpababa, magunggundawayan, ken matagtagibassit. Iti panagkomento maipapan iti damag, kuna ti International Herald Tribune: “Iti nakaan-annad a detalye, iladawan ti damag iti 193 a pagilian . . . ti maysa a nakalkaldaang a kasasaad ti inaldaw a panangidumduma ken panangabuso.”
Ti sumagmamano a pagarigan: Idiay sentral Africa, kasapulan nga asikasuen dagiti babbai ti kaaduan kadagiti nadagsen a trabaho idiay talon, ken ti ages-eskuela kadakuada ket apagkatlo laeng iti kaadu dagiti lallaki. Iti maysa a pagilian sadiay, maiparit iti linteg ti pannakikamalala dagiti babbai ngem saan kadagiti lallaki. Iti sabali a pagilian ti Africa palubosan ti linteg a papatayen ti asawa a lalaki ni baketna no masalamaanna daytoy a makikamkamalala, ngem saan nga ipalubos ti linteg a papatayen ti maysa nga asawa a babai ni lakayna iti umasping a kasasaad.
Ibaga ti damag nga iti sumagmamano a paset ti Sud America, di man la maasian dagiti polis kadagiti makabkabil a babbai. Ken kadawyanen nga aganus dagiti agtartrabaho a babbai iti sueldo a 30 aginggat’ 40 porsiento a basbassit ngem kadagiti lallaki.
Iti sumagmamano a paset ti Asia, dagiti babbai ti biktima ti inkapilitan a panagpakapon ken aborsion. Iti maysa a pagilian, agarup 500,000 dagiti balangkantis, a kaaduan kadakuada inlako dagiti nagannak nga agkasapulan iti kuarta agpaay iti daytoy tapno makagatangda iti baro a balay para kadakuada. Masapul nga asikasuen ti polisia iti sabali pay a pagilian ti panagsaknap ti “dowry deaths”—ti asawa a babai ket papatayen ni lakayna wenno ti pamiliana gapu ta saan a naitupag ti sab-ongna iti ninamnama.
Maipanggep ken Jesu-Kristo, ipasigurado ti Biblia kadatayo: “Ispalennanto ti makasapul intono umkis, ken ti napanglaw nga awan mangarayat kenkuana. Mangngaasinto kadagiti napanglaw ken makasapul, ket dagiti kararua dagiti makasapul isalakannanto. Subbotennanto dagiti kararuada iti panangirurumen ken iti panangrabsut, ket napategto ti darada kadagiti matana.” (Salmo 72:12-14) Gapuna adda panggapuantayo a mangnamnama; makainanama dagiti babbai iti intero a lubong maipaay kadagiti mapasayaat a kasasaad nga addanto iti dayta a tiempo.